“ཆེད་ལས་ཨ་མ”ཉི་མ་སྒྲོལ་དཀར་གྱིས་བརྩེ་སེམས་ཟབ་མོ་བཅངས་ནས་བྱིས་པར་དྲོ་སྐྱིད་ལྡན་པའི་ཁྱིམ་ཚང་བསྐྲུན་པ།
ལྷ་སའི་SOSབྱིས་པའི་གྲོང་དུ་རླབས་ཆེ་བའི་བུད་མེད་དཀྱུས་མ་ཞིག་ཡོད་ཅིང་། ཁོང་གིས་སྐྱེད་མའི་ལྷད་མེད་ཀྱི་བྱམས་བརྩེར་བརྟེན་ནས་ཆགས་ས་བརྟེན་ས་མེད་པའི་ཕྲུ་གུ་མང་དག་ཅིག་ལ་དྲོ་སྐྱིད་སྦྱིན་བཞིན་ཡོད། ཁོང་ནི“ཆེད་ལས་ཨ་མ”ཉི་མ་སྒྲོལ་དཀར་རེད།
2000ལོའི་ཟླ་9པར་བྱིས་པའི་གྲོང་དུ་སླེབས་པ་ནས་བཟུང་། ཉི་མ་སྒྲོལ་དཀར་གྱིས་བྱམས་བརྩེ་དང་སེམས་ནུས་ཡོད་ཚད་ཁྲག་རྒྱུད་ཀྱི་འབྲེལ་བ་གང་ཡང་མེད་པའི་ཕྲུ་གུ་དེ་དག་ལ་བཏོན་ཡོད། མི་ལོ་24ཡི་རིང་ཁོང་གིས་སྔ་རྗེས་སུ་དྭ་ཕྲུག་17ལ་ལྟ་སྐྱོང་བྱས་པ་དང་རང་ཉིད་ཀྱི་ལག་གཉིས་ལ་བརྟེན་ནས་ཁོང་ཚོ་བྱམས་ཀྱིས་བསྐྱངས་ཡོད།
དེ་སྔ་ངོ་གདོང་ནག་ཅིང་ཤ་རིད་ལ་ལུས་ཟུངས་ཞན་པ་དང་ནད་གཞི་མང་བའི་བུ་མོ་ཕུར་སྒྲོན་ནི་ཉི་མ་སྒྲོལ་དཀར་གྱིས་སེམས་ནུས་མང་ཤོས་བཏོན་པའི་ཕྲུ་གུ་གཅིག་རེད། བུ་མོ་ཕུར་སྒྲོན་ན་སྐབས་ཉི་མ་སྒྲོལ་དཀར་གྱིས་མཚན་གང་མལ་ཁྲིའི་མདུན་དུ་བསྡད་ནས་ཨ་ཅོར་རློན་པས་ཁོ་མོའི་ཚ་བ་འཇཌ་ཐབས་བྱས་ཤིང་། ཁོང་གི་ལྟ་སྐྱོང་ཞིབ་ཚགས་འོག་བུ་མོ་ཕུར་སྒྲོན་དྲག་སྐྱེད་ཡག་པོ་བྱུང་ཡོད།
ཁ་ལ་ཉན་པོ་མེད་པའི་བུ་བཀྲ་ཤིས་ལ་ཉི་མ་སྒྲོལ་དཀར་གྱིས་དེ་བས་ཀྱང་སེམས་ནུས་ཧ་ཅང་ཆེན་པོ་བཏོན་ཡོད། ཁོང་གིས་དཔྱད་གཞིའི་ཡིག་རིགས་ལྟ་ཀློག་དང་རིགས་གཅིག་མཁས་ཅན་ལ་བློ་འདྲི་བྱས་ནས། བུ་བཀྲ་ཤིས་ཀྱི་སེམས་ཁམས་ལ་རྒྱུས་ལོན་བྱེད་ཀྱི་ཡོད། ཁོང་གིས་བུ་བཀྲ་ཤིས་རི་མོ་འབྲི་བར་དགའ་པོ་ཡོད་པ་ཤེས་རྗེས། ཉིན་ལྟར་བུ་བཀྲ་ཤིས་ཀྱི་འཁྲིས་སུ་བསྡད་དེ་རི་མོ་འབྲི་རོགས་དང་སྒྲུང་ཤོད་ཀྱི་ཡོད། རིམ་བཞིན། བུ་བཀྲ་ཤིས་མི་གཞན་དང་འབྲེལ་འདྲིས་བྱེད་འདོད་ཡོད་པར་གྱུར་བ་མ་ཟད། སྔས་མགོའི་འཁྲིས་སུ་ཨ་མ་དང་ཕྲུ་གུའི་འཛུམ་རིས་དང“ཨ་མ་ལགས། ང་ཁྱེད་རང་ལ་དགའ་པོ་ཡོད”ཅེས་པའི་ཡི་གེའང་བྲིས་ཡོད།
ཉི་མ་སྒྲོལ་དཀར་གྱི་བྱམས་སྐྱོང་ཞིབ་ཚགས་འོག ཕྲུ་གུ་ཚོ་གཟུགས་གཞི་བདེ་ཐང་བྱུང་བ་མ་ཟད། སེམས་ལའང་དྲོ་སྐྱིད་ཚོར་ཡོད། ཕྲུ་གུ་ཚོས་ཉི་མ་སྒྲོལ་དཀར་ལ་བསྐུར་བའི་འཕྲིན་ཡིག་ནང་ཁོང་ཚོས“ཨ་མ་ལགས། ཁྱེད་ནི་མི་ཚེའི་ལམ་སྟོན་སྒྲོན་མེ་དང་འདྲ་བར་ང་ཚོའི་མདུན་སྐྱོད་ཀྱི་ལམ་བུར་གསལ་སྟོན་གནང་བྱུང”སོགས་བྲིས་ཏེ་ཨ་མའི་བཀའ་དྲིན་མཚོན་པར་བྱས་ཡོད།
ལྷ་ས་SOSབྱིས་པའི་གྲོང་དུ། ཉི་མ་སྒྲོལ་དཀར་གྱིས་བརྩེ་བ་ཟབ་མོས་རང་ཉིད་ལ་དབང་བའི་ངོ་མཚར་ཆེ་བའི་གཏམ་རྒྱུད་ཅིག་རྩོམ་བཞིན་ཡོད། ཁོང་བུད་མེད་ཕལ་པ་ཞིག་ཡིན་རུང་། རླབས་ཆེ་བའི་སྐྱེད་མའི་བྱམས་བརྩེར་བརྟེན་ནས་ཕྲུ་གུ་ཚང་མའི་སེམས་ལ་དྲོ་སྐྱིད་སྦྱིན་ཞིང་ཁོང་ཚོའི་འབྱུང་འགྱུར་གྱི་ལམ་བུར་གསལ་སྟོན་བྱེད་བཞིན་ཡོད། ཁོང་ནི་ཕྲུ་གུ་ཚོའི་སེམས་དབུས་ཀྱི་ལྷ་མོ་ཡིན་ལ། འཛམ་གླིང་འདིའི་ཐོག་གི་ཆེས་རླབས་ཆེ་བའི་སྐྱེད་མའང་རེད།