འདི་ནི་ཀག་ན་གསར་འགྱུར་ཁང་གི་གསར་འགོད་པ་སི་ཏི་ཧྥུན·ཨ་སན་ཏིས་རྒྱལ་ཡོངས་སྲིད་གྲོས་ཀྱི་ཨུ་ཡོན་ལ་བཅར་འདྲི་བྱེད་བཞིན་པ།

རྒྱལ་ཡོངས་ཚོགས་འདུ་གཉིས་ནི་ཀྲུང་གོའི་ཆབ་སྲིད་འཚོ་བའི་ཁྲོད་ཀྱི་དོན་ཆེན་ཞིག་ཡིན་པས་ཕྱི་རྒྱལ་གྱི་གསར་འགོད་པ་མི་ཉུང་བ་ཞིག་བཅར་འདྲི་བྱེད་པར་སླེབས་ཡོད། ཁོ་ཚོ་པེ་ཅིང་དུ་མཉམ་འཛོམས་བྱས་ནས་འཕྲིན་སྤེལ་བྱས་ཏེ་འཛམ་གླིང་གིས་ཀྲུང་གོའི་བརྒྱུད་རིམ་ཧྲིལ་པོའི་མི་དམངས་དམངས་གཙོའི་གསོན་ཤུགས་དང་དེ་བཞིན་ཀྲུང་གོའི་སྤུས་ཚད་མཐོ་བའི་འཕེལ་རྒྱས་ཀྱི་རྣམ་པ་ཚོར་བར་བྱས་ཡོད། འདི་ག་ཚགས་པར་གྱི་གསར་འགོད་པའི་བཅར་འདྲི་དང་ལེན་བྱེད་མཁན་ཕྱི་རྒྱལ་གྱི་གསར་འགོད་པས། ཀྲུང་གོའི་རྒྱལ་ཡོངས་ཚོགས་འདུ་གཉིས་ཀྱི་སྐར་ཁུང་བརྒྱུད། ང་ཚོས་ཀྲུང་གོའི་དམངས་གཙོ་ཆབ་སྲིད་ཀྱི་ལག་ལེན་ལ་ལྟ་ཞིབ་སྔར་བས་གཏིང་ཟབ་ཐུབ་པ་དང་། ཀྲུང་གོའི་དེང་རབས་ཅན་འཛུགས་སྐྲུན་ལ་སྐུལ་འདེད་གཏོང་བའི་བྱེད་ཐབས་གསར་པ་ཤེས་རྟོགས་ཐུབ་པ། ཀྲུང་གོ་དང་རྒྱལ་ཁབ་ཁག་ཐུན་མོང་ཐོག་འཕེལ་རྒྱས་འགྲོ་བའི་མཛེས་སྡུག་ལྡན་པའི་འབྱུང་འགྱུར་ལ་མཉམ་དུ་རེ་སྒུག་ཐུབ་པ་བཅས་བྱུང་ཡོད་ཅེས་བརྗོད།

ཨེ་ཅིབ་ཀྱི་ཚགས་པར་གཙོ་བོའི་གྲས་ཤིག་ཡིན་པའི《དེང་གི་གསར་འགྱུར་ཚགས་པར》གྱིས་ཀྲུང་གོའི་འཕེལ་རྒྱས་ལ་དོ་ཁུར་ཆེན་པོ་བྱེད་ཅིང་། “ཀྲུང་གོས་རྒྱལ་ཡོངས་ཚོགས་འདུ་གཉིས་བརྒྱུད། ཞི་བདེ་འཕེལ་རྒྱས་དང་མཉམ་ལས་གཉིས་ཕན་ལ་གཞོལ་བའི་བརྡ་རྟགས་བཏང་བ་དེས་གོ་ལ་ཧྲིལ་པོའི་བརྟན་ལྷིང་དང་དར་རྒྱས་ལ་དགེ་མཚན་ལྡན་པའི་ཤུགས་རྐྱེན་ཐེབས་སྲིད”ཅེས་རྩོམ་སྒྲིག་པ་གཙོ་བོ་ཨའེ་དབྱི་མན·ཨའེ་སྨི་འར་གྱིས། ད་ལོའི་སྲིད་གཞུང་གི་ལས་དོན་སྙན་སྒྲོན་ནང་བཏོན་པའི“ཚན་རྩལ་གསར་གཏོད”དང་། “ལྗང་མདོག་ཐཱན་ཉུང་འཕེལ་རྒྱས” “རྒྱལ་སྤྱིའི་མཉམ་ལས”སོགས་དང་འབྲེལ་བ་ཡོད་པའི་ནང་དོན་ལ་དོ་ཁུར་ཧ་ཅང་ཆེན་པོ་བྱས་ཡོད།

“གསར་དར་ཐོན་ལས་དང་འབྱུང་འགྱུར་ཐོན་ལས་སྐྱེད་སྲིང་དང་སྟོབས་ཆེར་གཏོང་བ”དང་། “ལྗང་མདོག་ཚོང་དོན་དང་གྲངས་འཛིན་ཚོང་དོན་སོགས་ཀྱི་འཕར་གནས་གསར་པ་སྐྱེད་སྲིང” “སྤུས་ཚད་མཐོ་པོས‘རྒྱུད་གཅིག་ལམ་གཅིག’མཉམ་སྐྲུན་བྱ་རྒྱུ་དེ་གཏིང་ཟབ་དང་ཏན་ཏིག་ཡོང་བར་སྐུལ་འདེད་གཏོང་བ”སོགས་ཀྱི་ཐད་ ཨའེ་དབྱི་མན་གྱིས། “ད་ལོའི་ཀྲུང་གོའི་རྒྱལ་ཡོངས་ཚོགས་འདུ་གཉིས་ཀྱི་ཐོག་བཏོན་པའི་སྲིད་ཇུས་ཀྱི་ཁེ་སྤོགས་ཀྱིས་ཀྲུང་གོའི་མི་དམངས་ལ་ཕན་པ་ཐོབ་རྒྱུ་ཡིན་ལ་འཛམ་གླིང་རྒྱལ་ཁབ་ཁག་ལའང་འཕེལ་རྒྱས་ཀྱི་གོ་སྐབས་དེ་བས་མང་བ་ཐོབ་རྒྱུའི་ཡིད་ཆེས་ཡོད། ངས་ཨེ་ཅིབ་དང་ཀྲུང་གོ་རྒྱལ་ཁབ་གཉིས་ཀྱིས་ཚན་རྩལ་དང་བསྐྱར་སྐྱེས་ནུས་རྒྱུ་སོགས་ཁྱབ་ཁོངས་ཀྱི་མཉམ་ལས་ལ་སྔར་བས་ཤུགས་སྣོན་རྒྱག་རྒྱུའི་རེ་སྒུག་བྱེད་ཀྱི་ཡོད། གསར་འགོད་པ་ཞིག་ཡིན་པའི་ངས་ཀྲུང་གོའི་འཕེལ་རྒྱས་དང་ཨེ་ཀྲུང་མཉམ་ལས་ཀྱི་གནས་ཚུལ་འཕྲིན་སྤེལ་ཧུར་ཐག་བྱས་ནས་རྒྱལ་ཁབ་གཉིས་དབར་ཕན་ཚུན་ཤེས་རྟོགས་དང་ཕན་ཚུན་ཡིད་ཆེས་ཟབ་ཏུ་གཏོང་ཆེད་ལེགས་སྐྱེས་དེ་བས་མང་བ་འབུལ་རྒྱུ་ཡིན”ཞེས་བརྗོད།

ཀྲུང་གོའི་རྒྱལ་ཡོངས་ཚོགས་འདུ་གཉིས་ནི་ཀྲུང་གོའི་དམངས་གཙོ་ཆབ་སྲིད་ལ་ལྟ་ཞིབ་བྱེད་པའི་སྐར་ཁུང་གལ་ཆེན་ཞིག་རེད། ཀྲུང་གོའི་ས་གནས་ཁག་ནས་ཡོང་བའི་འཐུས་མི་དང་ཨུ་ཡོན་མཉམ་དུ་འཛོམས་ནས་ལྷག་བསམ་ཟོལ་མེད་ངང་གྲོས་འགོ་འདོན་པ་དང་ཐུན་མོང་ཐོག་རྒྱལ་དོན་གླེང་སྟེ། རྒྱལ་ཁབ་འཕེལ་རྒྱས་ལ་སྐུལ་འདེད་དང་མི་དམངས་མང་ཚོགས་ལ་བདེ་སྐྱིད་བསྐྲུན་རྒྱུར་གཞོལ་བཞིན་ཡོད”ཅེས་ཀྲུང་གོར་བཅའ་སྡོད་ཕ་ཁི་སི་ཐན་མཉམ་འབྲེལ་གསར་འགྱུར་ཁང་གི་གསར་འགོད་པ་ཨ་སི་ཅར་གྱིས་གསར་འགོད་པའི་བཅར་འདྲི་དང་ལེན་བྱེད་སྐབས་དེ་ལྟར་བརྗོད།

ཕ་ཁི་སི་ཐན་མཉམ་འབྲེལ་གསར་འགྱུར་ཁང་ནི་ཕ་ཁི་སི་ཐན་རྒྱལ་ཁབ་ཀྱི་གསར་འགྱུར་ཁང་ཞིག་ཡིན་ལ། ཕ་ཁི་སི་ཐན་གྱི་ཤུགས་རྐྱེན་ཆེན་པོ་ལྡན་པའི་སྨྱན་སྦྱོར་གྱི་གྲས་ཤིག་ཀྱང་རེད། ཨ་སི་ཅར་ལོ་དགུ་བསྟུད་མར་ཀྲུང་གོའི་རྒྱལ་ཡོངས་ཚོགས་འདུ་གཉིས་ཀྱི་གནས་ཚུལ་འཕྲིན་སྤེལ་ལས་དོན་ནང་ཞུགས་ཡོད། ཨ་སི་ཅར་གྱིས། “ཀྲུང་གོས་དབུལ་ཕོངས་མི་འབོར་དུང་ཕྱུར་8ཚང་མ་དབུལ་སྒྲོལ་ཐུབ་པར་ཕ་ཁི་སི་ཐན་ཚུད་པའི་རྒྱ་ཆེའི་འཕེལ་རྒྱས་འགྲོ་བཞིན་པའི་རྒྱལ་ཁབ་ལ་སྐུལ་མ་ཆེན་པོ་ཐེབས་ཡོད། ད་ལོའི་སྲིད་གཞུང་གི་ལས་དོན་སྙན་སྒྲོན་ནང་ལྷོད་གཡེང་སྤུ་ཙམ་ཡང་མེད་པའི་ངང་དབུལ་སྒྲོལ་འགག་སྒྲོལ་གྱི་གྲུབ་འབྲས་སྲ་བརྟན་དང་རྒྱ་སྐྱེད་དུ་གཏོང་དགོས་པ་སླར་ཡང་བཏོན་ཡོད། ང་ཚོས་ཀྲུང་གོའི་དབུལ་སྒྲོལ་གྱི་འདུ་ཤེས་དང་ཉམས་མྱོང་སློབ་སྦྱོང་དང་དཔྱད་གཞིར་འཛིན་རྒྱུའི་རེ་བ་བྱེད་ཀྱི་ཡོད”ཅེས་བཤད།

ཚོགས་རར་ད་ལོའི་སྲིད་གཞུང་གི་ལས་དོན་སྙན་སྒྲོན་ཉན་རྗེས། ཁུ་པའི་ལ་ཏིང་མེ་གླིང་གསར་འགྱུར་ཁང་གི་གསར་འགོད་པ་དབྱི་ཧྲའོ་ལཱ·ཏེ་སིས། ད་ལོའི་སྲིད་གཞུང་གི་ལས་དོན་སྙན་སྒྲོན་ནས་མིག་སྔར་ཀྲུང་གོར་འཕྲད་པའི་ཕྱི་ནང་གི་འགྲན་སློང་ཤེས་རྟོགས་གསལ་པོ་བྱུང་བ་དང“ལོ་ལྔ་ཚན་བཅུ་བཞི་པའི”འཆར་འགོད་ཀྱི་མཇུག་བསྡུའི་ལོའི་འགག་རྩའི་ལས་འགན་བཀོད་སྒྲིག་བྱས་ཡོད་ལ། ཆུ་ཚད་མཐོ་པོས་ཕྱི་ཕྱོགས་ལ་སྒོ་མོ་འབྱེད་རྒྱ་ཆེ་རུ་གཏོང་བ་དང་། ཕྱི་རྒྱལ་གྱི་ཚོང་པས་མ་འཇོག་བྱ་རྒྱུར་སྐུལ་ལྕག་བྱེད་པ། དམངས་གཉེར་དཔལ་འབྱོར་འཕེལ་རྒྱས་ལ་སྐུལ་འདེད་གཏོང་བ། “མི་ཐབས་རིག་ནུས+”བྱ་སྤྱོད་ལ་སྐུལ་འདེད་རྒྱུན་མཐུད་གཏོང་བ། སྲོལ་རྒྱུན་ཐོན་ལས་སྒྱུར་བཀོད་རིམ་སྤོར་ལ་སྐུལ་འདེད་གཏོང་བ་སོགས་ཕྱོགས་མང་གི་བྱེད་ཐབས་བཏོན་ནས་འཕར་བའི་སྒུལ་ཤུགས་བརྟན་དུ་གཏོང་དགོས་པ་བཏོན་ཡོད་ཅེས་བརྗོད།

དབྱི་ཧྲའོ་ལཱ·ཏེ་སིས། ཀྲུང་གོའི་རྒྱལ་ཡོངས་ཚོགས་འདུ་གཉིས་སྐོར་གྱི་འཕྲིན་སྤེལ་གནས་ཚུལ་བཅུ་གྲངས་ཁ་ཤས་བྲིས་ཡོད། ཁོང་གིས། ལ་ཏིང་མེ་གླིང་གསར་འགྱུར་ཁང་གིས་ཀྲུང་གོའི་དཔལ་འབྱོར་གྱི་འབྲེལ་ཡོད་གྲོས་དོན་ལ་ཚད་མཐོའི་དོ་ཁུར་བྱེད་ཀྱི་ཡོད། དེའི་ནང་ཀྲུང་གོས་ཕྱོགས་ཡོངས་ནས་སྒྱུར་བཅོས་སྔར་བས་ཟབ་ཏུ་གཏོང་བ་དང་། ནང་མཁོ་རྒྱ་ཆེར་གཏོང་བ། ཚོང་གཉེར་ཁོར་ཡུག་ལེགས་སུ་གཏོང་བ་བཅས་ཀྱི་སྲིད་ཇུས་བྱེད་ཐབས་དང་། མི་ཐབས་རིག་ནུས་དང་གློག་སྒུལ་རླངས་འཁོར་སོགས་གསར་དར་ཁྱབ་ཁོངས་ཀྱི་འཕེལ་རྒྱས། ཕྱི་རྒྱལ་གྱི་མ་དངུལ་འགུག་པའི་ཕན་འབྲས་སོགས་ཚུད་ཡོད། “ང་ཚོས་ཀྱང་ལ་ཀྲུང་མཉམ་ལས་འཕེལ་རིམ་དང་དེ་བཞིན་གོ་ལ་ཧྲིལ་པོའི་ལྷོ་ཕྱོགས་འཕེལ་རྒྱས་ལ་སྐུལ་འདེད་གཏོང་བའི་ཁྲོད་ཀྲུང་གོས་བཏོན་པའི་ནུས་པ་གལ་ཆེན་ལ་དོ་ཁུར་བྱེད་ཀྱི་ཡོད”ཅེས་བརྗོད།