ཉེ་བའི་ལོ་ཤས་རིང་། ཕྱི་རྒྱལ་གྱི་ཚོང་པས་ཀྲུང་གོར་མ་འཇོག་བྱེད་པའི་གྲངས་འབོར་ཅུང་ཆག་པའི་ལྟ་ཚུལ་ལ་དམིགས་ནས། ཚེས་13ཉིན་ཕྱི་འབྲེལ་པུའི་མགྲིན་ཚབ་པ་མའོ་ཉིང་གིས། གྲངས་གཞིའི་ཐོག་ནས་བལྟས་ན། ཀྲུང་གོ་ནི་སྔར་བཞིན་རྒྱལ་སྒྲོལ་མ་འཇོག་གི་མཐོ་ས་ཞིག་ཡིན་པ་དང་། ཀྲུང་གོར་འཕེལ་རྒྱས་ཀྱི་བར་མཐོངས་ཆེན་པོ་ལྡན་པ་དེ་སྔར་བཞིན་ཕྱི་རྒྱལ་གྱི་ཁེ་ལས་མང་པོ་ཞིག་གི་ཐུན་མོང་གི་ངོས་འཛིན་ཞིག་རེད། ཀྲུང་གོས་ཐོག་མཐའ་བར་གསུམ་དུ་ཆུ་ཚད་མཐོ་བའི་ཕྱི་ཕྱོགས་སྒོ་དབྱེའི་དམ་བཅའ་ལག་ལེན་བསྟར་ནས་རྒྱལ་ཁབ་ཁག་གི་ཁེ་ལས་ཀྲུང་གོར་མ་འཇོག་དང་གཞི་ཚུགས་རྒྱུར་ཐོག་མཐའ་བར་གསུམ་དུ་དགའ་བསུ་ཞུ་གི་ཡིན་ཞེས་བརྗོད།

ཉིན་དེའི་གསར་འགོད་པའི་འཆར་ཅན་ཚོགས་འདུའི་ཐོག་གསར་འགོད་པ་ཞིག་གིས། ད་ལོ་ཚུན། ཕྱི་རྒྱལ་གྱི་ཚོང་པའི་མ་འཇོག་རྣམ་གྲངས་གལ་ཆེན་ཁག་གཅིག་ཀྲུང་གོར་བསྟུད་མར་དོན་འཁྱོལ་བྱས་ནས་འཆར་གཞིའི་མ་འཇོག་གྲངས་འབོར་ཨ་སྒོར་དུང་ཕྱུར་330ཟིན་པ་ང་ཚོར་དོ་སྣང་བྱུང་། དཔྱད་གཏམ་ཁག་གཅིག་ནང་ཕྱི་རྒྱལ་ཁེ་ལས་ཀྱིས་བྱ་སྤྱོད་དངོས་ལ་བརྟེན་ནས་ཀྲུང་གོའི་ཁྲོམ་རར་མ་འཇོག་བྱེད་ཚད་མང་དུ་བཏང་ཡོད་ཅེས་བརྗོད་འདུག འོན་ཀྱང་ལྟ་ཚུལ་ལ་ལས། གྲངས་གཞི་ལས་མངོན་པར། ཉེ་བའི་ལོ་ཤས་རིང་ཕྱི་རྒྱལ་གྱི་ཚོང་པས་ཀྲུང་གོར་མ་འཇོག་བྱེད་པའི་གྲངས་འབོར་ཅུང་ཆག་ནས“ཕྱི་རྒྱལ་གྱི་མ་དངུལ་ཀྲུང་གོ་ནས་ཕྱིར་འཐེན་བྱེད་པའི”སྣང་ཚུལ་ཐོན་པའི་ངོས་འཛིན་བྱས་འདུག ཁྱེད་ཀྱིས་འདིའི་ཐད་དཔྱད་གཏམ་གང་ཞིག་སྤེལ་རྩིས་ཡོད་དམ།

“ངས་ཚང་མར་དབང་གྲགས་ལྡན་པའི་སྡེ་ཚན་གྱིས་ཁྱབ་བསྒྲགས་བྱས་པའི་གྲངས་གཞི་གསར་ཤོས་ཁག་གཅིག་མཉམ་སྤྱོད་བྱ་རྒྱུ་ཡིན། ན་ནིང་ལོ་མཇུག་བར། ཕྱི་རྒྱལ་གྱི་ཚོང་པས་རིམ་རྩིས་བརྒྱབ་ན་ཀྲུང་གོར་མ་འཇོག་བྱས་ནས་ཁེ་ལས་ཁྲི་124ལྷག་ཙམ་བཙུགས་པར་མི་དམངས་ཤོག་སྒོར་དུང་ཕྱུར་ཁྲི་20.6དངོས་སུ་བེད་སྤྱོད་བྱས་ཡོད། ན་ནིང་། ཀྲུང་གོར་ཕྱི་རྒྱལ་གྱི་ཚོང་པས་མ་འཇོག་བྱས་པའི་ཁེ་ལས་ཁྲི་6ལྷག་ཙམ་གསར་དུ་བཙུགས་པ་དེ་དུས་མཚུངས་ལས་9.9%འཕར་ཡོད། ཉེ་བའི་ལོ་ལྔའི་རིང་། ཕྱི་རྒྱལ་གྱི་ཚོང་པས་ཀྲུང་གོར་ཐད་ཀར་མ་འཇོག་བྱས་པར་ཕན་པ་ཐོབ་ཚད་9%ཙམ་ཟིན་ནས་གོ་ལ་ཧྲིལ་པོའི་མདུན་གྲལ་དུ་སླེབས་ཡོད” མའོ་ཉིང་གིས། གྲངས་གཞིའི་ཐོག་ནས་བལྟས་ན། ཀྲུང་གོ་ནི་སྔར་བཞིན་རྒྱལ་སྒྲོལ་མ་འཇོག་གི་མཐོ་ས་ཞིག་ཡིན་ལ། ཀྲུང་གོར་འཕེལ་རྒྱས་ཀྱི་བར་མཐོངས་ཆེན་པོ་ལྡན་པ་དེ་སྔར་བཞིན་ཕྱི་རྒྱལ་ཁེ་ལས་མང་པོ་ཞིག་གི་ཐུན་མོང་གི་ངོས་འཛིན་ཞིག་རེད་ཅེས་བརྗོད་པ་རེད།