ཉེ་ཆར། རྒྱལ་ཁབ་ནུས་རྒྱུ་ཅུས་ཀྱིས་བཀྲམ་པའི《2025ལོའི་ནུས་རྒྱུའི་ལས་དོན་གྱི་མཛུབ་ཁྲིད་བསམ་འཆར》(གཤམ་དུ《མཛུབ་ཁྲིད་བསམ་འཆར》ཅེས་བསྡུ་རྒྱུ)ནང་། 2025ལོར་རྒྱལ་ཡོངས་སུ་གློག་འདོན་འཕྲུལ་འཁོར་ནས་གློག་འདོན་ཚད་ཆན་ཝ་དུང་ཕྱུར་36ཡན་ཟིན་རྒྱུ་དང་ནུས་རྒྱུ་གསར་པའི་གློག་འདོན་འཕྲུལ་འཁོར་གྱི་གཞི་ཁྱོན་ཆན་ཝ་དུང་ཕྱུར་2ཡན་གསར་འཕར་ཐུབ་པ་དང་ཆུ་འཐེན་ནུས་གསོག་འཕྲུལ་འཁོར་གྱི་ཤོང་ཚད་ཆན་ཝ་ཁྲི་6200ཡན་ཟིན་པར་སྐུལ་འདེད་གཏོང་བ་དང་། འགྱུར་རྡོ་མིན་པའི་ནུས་རྒྱུའི་གློག་གཏོང་འཕྲུལ་འཁོར་གྱིས་བཟུང་བའི་བསྡུར་ཚད་60%ཡས་མས་སུ་མཐོ་རུ་གཏོང་བ་དང་འགྱུར་རྡོ་མིན་པའི་འཛད་སྤྱོད་སྤྱི་འབོར་ཁྲོད་བཟུང་བའི་བསྡུར་ཚད་20%ཡས་མས་སུ་མཐོ་རུ་གཏོང་དགོས་པ་བཏོན་ཡོད། གྲངས་གཞི་ལས་མངོན་པར། 2024ལོའི་ལོ་མཇུག་བར། རྒྱལ་ཡོངས་ཀྱི་གློག་འདོན་འཕྲུལ་འཁོར་གྱི་ཤོང་ཚད་བསྡོམས་འབོར་ཆན་ཝ་དུང་ཕྱུར་33.5ཟིན་ཡོད་པ་དང་འགྱུར་རྡོ་མིན་པའི་ནུས་རྒྱུའི་གློག་གཏོང་འཕྲུལ་འཁོར་གྱིས་བཟུང་བའི་བསྡུར་ཚད་58.2%ཡིན་པ་རེད།

《མཛུབ་ཁྲིད་བསམ་འཆར》ནང་ད་དུང་2025ལོར་རྡོ་སོལ་ཐོན་བརྟན་ཐོན་འཕར་ཡོང་བ་དང་། མ་བཅོས་རྡོ་སྣུམ་ཐོན་ཚད་ཏུན་དུང་ཕྱུར་2ཡན་རྒྱུན་འཁྱོངས་བྱེད་པ། རང་བྱུང་སོལ་རླངས་ཐོན་ཚད་མགྱོགས་ཙམ་འཕར་རྒྱུ་རྒྱུན་འཁྱོངས། སྣུམ་རླངས་གསོག་འཇོག་གི་གཞི་ཁྱོན་རྒྱུན་མཐུད་མང་དུ་གཏོང་དགོས་པ་བཅས་བཏོན་ཡོད།

ད་ལོ་རང་རྒྱལ་གྱིས་ནུས་རྒྱུ་གསར་སྤེལ་བེད་སྤྱོད་བྱེད་ཐབས་ལ་མུ་མཐུད་འགྱུར་ལྡོག་གཏིང་ཟབ་གཏོང་རྒྱུ་ཡིན་ཞིང་། བཟོ་ལས་དང་། འགྲིམ་འགྲུལ། འཛུགས་སྐྲུན། གྲངས་གཞིའི་ལྟེ་གནས་སོགས་གཙོ་གནད་ཁྱབ་ཁོངས་སུ་བསྐྱར་སྐྱེས་ཐུབ་པའི་ནུས་རྒྱུའི་ཚབ་བྱེད་བྱ་སྤྱོད་ལག་བསྟར་ཤུགས་ཆེན་བྱས་ཏེ། ཐཱན་མེད་གླིང་ཁུལ་དང་འོད་ཤུགས་འཛུགས་སྐྲུན་གྱི་གཞི་གཅིག་ཅན་ལ་རྒྱབ་སྐྱོར་ཧུར་ཐག་བྱས་ནས་ནུས་རྒྱུ་གསར་པ་ས་གནས་དེ་རང་དུ་འཛད་སྤྱོད་བྱ་རྒྱུར་སྔར་བས་སྐུལ་འདེད་གཏོང་རྒྱུ་དང་། ས་འོག་ཚ་ནུས་དང་། སྐྱེ་དངོས་ནུས་རྒྱུ། ཉི་ནུས་སོགས་བསྐྱར་སྐྱེས་ཐུབ་པའི་ནུས་རྒྱུའི་དྲོད་གཏོང་སྒྲིག་ཆས་སྤྱོད་རྒྱ་ཆེ་རུ་གཏོང་རྒྱུ་རེད།

ནུས་རྒྱུ་གསར་པ་འཛད་སྤྱོད་དང་སྙོམས་སྒྲིག་སྲིད་ཇུས་བྱེད་ཐབས་ཀྱང་སྔར་བས་འཐུས་སྒོ་ཚང་དུ་གཏོང་རྒྱུ་ཡིན་ཞིང་། 《མཛུབ་ཁྲིད་བསམ་འཆར》ནང་འདི་ལོ་ནུས་རྒྱུ་གསར་པའི་རིན་གོང་ལམ་སྲོལ་དང་འཛད་སྤྱོད་བྱེད་སྟངས་གསར་གཏོད་བྱས་ཏེ་ནུས་རྒྱུ་གསར་པ་ཕྱོགས་ཡོངས་ནས་ཁྲོམ་རར་ཞུགས་རྒྱུར་སྐུལ་འདེད་བཏང་སྟེ་ནུས་རྒྱུ་གསར་པ་འགན་སྲུང་རང་བཞིན་སྒོ་ནས་ཉོ་སྒྲུབ་བྱེད་པ་ནས་ཁྲོམ་ར་ཅན་གྱི་འཛད་སྤྱོད་དུ་འགྱུར་བ་བྱེད་དགོས་པ་དང་ལྗང་མདོག་གློག་ཤུགས་ཐད་སྦྲེལ་སྲིད་ཇུས་དང་བྱེད་ཐབས་ཞིབ་འཇུག་བྱས་ནས་བཟོ་དགོས་པ་བཏོན་ཡོད།