ཚེས་11ཉིན་གསར་འགོད་པར་ཀྲུང་གོ་རླངས་འཁོར་བཟོ་ལས་མཐུན་ཚོགས་ནས་ཤེས་རྟོགས་བྱུང་བར། ཟླ་དང་པོ་དང་གཉིས་པར་རང་རྒྱལ་གྱི་རླངས་འཁོར་ལས་རིགས་ཀྱི་འགོ་ཚུགས་འཁོར་སྐྱོད་ཡག་པོ་བྱུང་ནས་རླངས་འཁོར་ཐོན་སྐྱེད་དང་ཕྱིར་ཚོང་ཁྲི་455.3དང་ཁྲི་455.2སོ་སོར་ཟིན་ཏེ་དུས་མཚུངས་ལས་16.2%དང་13.1%སོ་སོར་འཕར་ཡོད།

ཀྲུང་གོ་རླངས་འཁོར་མཐུན་ཚོགས་ཀྱི་དྲུང་ཆེ་གཞོན་པ་ཁྲེན་ཧྲི་ཧྭ་ཡིས་ངོ་སྤྲོད་བྱས་པར་གཞིགས་ན། དཔྱིད་གསར་དུས་ཆེན་རྗེས་སུ་ཁེ་ལས་ཀྱི་ཐོན་སྐྱེད་གཉེར་སྐྱོང་བྱེད་སྒོ་མགྱོགས་སུ་ཕྱིན་པ་དང་། ཐོན་རྫས་གསར་པ་ཁྱབ་བསྒྲགས་དང་བྲིན་ཚོང་གི་བྱེད་སྒོ་གཅིག་རྗེས་གཉིས་མཐུད་སྤེལ་བས་ཁྲོམ་རའི་གསོན་ཤུགས་མངོན་གསལ་དོད་པོས་ཆེ་རུ་ཕྱིན་ཡོད། ཟླ་བ་གཉིས་པར་རང་རྒྱལ་གྱི་རླངས་འཁོར་ཐོན་སྐྱེད་དང་ཕྱིར་ཚོང་ཁྲི་210.3དང་ཁྲི་212.9སོ་སོར་ཟིན་པ་དེ་དུས་མཚུངས་ལས་39.6%དང་34.4%སོ་སོར་འཕར་ཡོད།

གྲངས་གཞི་ལས་མངོན་པར། རང་རྒྱལ་གྱི་ནུས་གསར་རླངས་འཁོར་ཐོན་སྐྱེད་དང་ཕྱིར་ཚོང་མགྱོགས་མྱུར་འཕར་བའི་རྣམ་པ་རྒྱུན་མཐུད་བྱུང་ཡོད། ཟླ་དང་པོ་དང་གཉིས་པར་ནུས་གསར་རླངས་འཁོར་ཐོན་སྐྱེད་དང་ཕྱིར་ཚོང་ཁྲི་190.3དང་ཁྲི་183.5སོ་སོར་ཟིན་ནས་དུས་མཚུངས་ལས་52%འཕར་ཡོད།

ཕྱིར་གཏོང་ཐད་ཟླ་དང་པོ་དང་གཉིས་པར་རང་རྒྱལ་གྱིས་རླངས་འཁོར་ཁྲི་91.1ཕྱིར་གཏོང་བྱས་པ་དེ་དུས་མཚུངས་ལས་10.9%འཕར་བ་དང་། དེའི་ནང་ནུས་གསར་རླངས་འཁོར་ཁྲི་28.2ཕྱིར་གཏོང་བྱས་པ་དེ་དུས་མཚུངས་ལས་54.5%འཕར་ཡོད།