གསར་འགོད་པས་བཟོ་ལས་དང་ཆ་འཕྲིན་ཅན་པུའུ་ནས་ཤེས་རྟོགས་བྱས་པར། ཉེ་ཆར་བཟོ་ལས་དང་ཆ་འཕྲིན་ཅན་པུའུ་དང་། སྐྱེ་ཁམས་ཁོར་ཡུག་པུའུ། ཁྲོམ་ར་ལྟ་འདོམས་སྤྱི་ཁྱབ་ཅུས་བཅས་ཀྱིས་མཉམ་དུ་ཁོར་ཡུག་སྲུང་སྐྱོང་སྒྲིག་ཆས་བཟོ་སྐྲུན་ལས་རིགས་སྤུས་ཚད་མཐོ་བའི་འཕེལ་རྒྱས་ལ་སྐུལ་འདེད་གཏོང་བའི་བསམ་འཆར་འགའ་ཞིག་བཀྲམ་ནས་ཁོར་ཡུག་སྲུང་སྐྱོང་སྒྲིག་ཆས་བཟོ་སྐྲུན་ལས་རིགས་རྒྱུན་མཐུད་དང་། སྐྱོན་བྲལ། བརྟན་པོ་བཅས་ཀྱི་སྒོ་ནས་འཕེལ་རྒྱས་འགྲོ་བར་སྐུལ་འདེད་ཤུགས་ཆེན་བཏང་ནས། རྒྱལ་སྤྱིའི་འགྲན་རྩོད་ལེགས་ཆ་ལྡན་པའི་དུང་ཕྱུར་ཁྲི་རིམ་པའི་ཐོན་ལས་གཏོད་རྒྱུ་ཡིན་པ་རེད།

བསམ་འཆར་ནང་བཏོན་དོན། 2027ལོར་སླེབས་སྐབས་སྔོན་ཐོན་ལག་རྩལ་སྒྲིག་ཆས་ཀྱིས་ཁྲོམ་ར་བཟུང་ཚད་མངོན་གསལ་དོད་པོས་ཆེ་རུ་འགྲོ་རྒྱུ་དང་། གཙོ་གནད་ཁྱབ་ཁོངས་ཀྱི་ལག་རྩལ་སྒྲིག་ཆས་ཀྱི་ཐོན་ལས་འཁོར་འབྲེལ་གྱི་ཞན་ཆ་གཞི་རྩའི་ཆ་ནས་བསལ་ཏེ་བཟང་ཆའི་ལག་རྩལ་སྒྲིག་ཆས་དེ་རྒྱལ་ནང་དུ་གཙོ་ཁྲིད་དང་ཕྱི་རྒྱལ་དུ་ཁྱབ་པའི་དགེ་མཚན་ལྡན་པའི་རྣམ་པ་ཆགས་རྒྱུ་རེད། 2030ལོར་སླེབས་སྐབས། ཁོར་ཡུག་སྲུང་སྐྱོང་ལག་རྩལ་སྒྲིག་ཆས་ཀྱི་ཐོན་ལས་འཁོར་འབྲེལ་གྱི་ཞན་ཆ་རང་བདག་ཚོད་འཛིན་ཐུབ་པ་དང་། བཟང་ཆའི་ལག་རྩལ་སྒྲིག་ཆས་ཀྱི་ལེགས་ཆ་སྔར་བས་ཆེ་རུ་འགྲོ་བ། ཁོར་ཡུག་སྲུང་སྐྱོང་སྒྲིག་ཆས་བཟོ་སྐྲུན་ལས་རིགས་དེ་སྲོལ་རྒྱུན་གྱི་སྦགས་བཙོག་བཅོས་སྐྱོང་ནས་ལྗང་མདོག་དང་། ཐཱན་ཉུང་། འཁོར་སྐྱོད་འཕེལ་རྒྱས་བཅས་ལ་ཕྱོགས་ཡོངས་ནས་རིམ་སྤོར་བྱ་རྒྱུ་རེད།

འགག་རྩའི་ལག་རྩལ་འགག་སྒྲོལ་བྱེད་ཤུགས་ཆེ་རུ་གཏོང་བ་དང་། སྔོན་ཐོན་ལག་རྩལ་ཁྱབ་སྤེལ་མགྱོགས་སུ་གཏོང་བ། ལས་རིགས་འཕེལ་རྒྱས་ཀྱི་སྒུལ་ཤུགས་གསར་པ་གསོ་སྐྱོང་བྱེད་པ། ཐོན་ལས་འཕེལ་རྒྱས་ཀྱི་ཁོར་ཡུག་ལེགས་སུ་གཏོང་བ་བཅས་ཕྱོགས་བཞི་ལ་དམིགས་ནས་བསམ་འཆར་ནང་སྲིད་ཇུས་དང་བྱེད་ཐབས་ཁག་12བཏོན་ཡོད།