ད་ལོའི་ལོ་འཁོར་གྱི་འཚོ་རྟེན་ལས་སྤྲོད་ལ་ཀྲུང་དབྱང་གི་མ་དངུལ་སྒོར་དུང་ཕྱུར་140ལྷག་ཙམ་བཏང་བ།
ཉེ་ཆར་རྒྱལ་ཁབ་འཕེལ་སྒྱུར་ཨུ་ལྷན་གྱིས་2025ལོའི་ལོ་འཁོར་གྱི་འཚོ་རྟེན་ལས་སྤྲོད་ལ་ཀྲུང་དབྱང་གི་སྔོན་རྩིས་ནང་གི་མ་དངུལ་སྒོར་དུང་ཕྱུར་50བཏང་ནས་ས་གནས་ལ་འཚོ་རྟེན་ལས་སྤྲོད་ཀྱི་རྣམ་གྲངས་1008ལག་བསྟར་བྱ་རྒྱུར་རྒྱབ་སྐྱོར་བྱས་པ་དང་། གྲོང་གསེབ་ཀྱི་དབུལ་སྒྲོལ་མི་འབོར་ཁྲི་12.3དང་ཡོང་འབབ་དམའ་བའི་ཚོགས་སྤྱི་གཞན་དག་ལས་གྲྭའི་རྣམ་གྲངས་འཛུགས་སྐྲུན་ནང་བསྡུས་ཏེ་ངལ་ནུས་གླ་ཆ་སྒོར་དུང་ཕྱུར་17.1ལྷག་ཙམ་སྤྲོད་རྩིས་ཡོད་པ་རེད།
ཁག་འདིའི་མ་འཇོག་འཆར་གཞི་དཀའ་ངལ་ཡོད་པའི་ས་ཁུལ་གྱི་གཙོ་གནད་ཚོགས་སྤྱིར་ཕྱོགས་རྩིས་ཡོད་པ་རེད། མ་དངུལ་གཙོ་བོ་དབུལ་སྒྲོལ་རྫོང་832སོགས་འཕེལ་རྒྱས་འགྲོ་འགོར་བའི་ས་ཁུལ་ལ་གཏོང་རྒྱུ་མ་ཟད། རྒྱལ་ཁབ་ཀྱི་གྲོང་གསེབ་དར་རྒྱས་ཀྱི་གཙོ་གནད་རོགས་སྐྱོར་རྫོང་དང་། གསར་བརྗེའི་རྟེན་གཞིའི་ཁུལ་རྙིང་པ། ཡུལ་གཞན་དུ་གནས་སྤོས་པའི་རྗེས་མཐུད་རོགས་སྐྱོར་གྱི་ལས་འགན་ཅུང་ལྕི་བ། དེ་བཞིན་རང་བྱུང་གནོད་འཚེའི་ཤུགས་རྐྱེན་ཅུང་ཆེ་བ་བཅས་ཀྱི་ས་ཁུལ་ལ་ཕྱོགས་ནས་ངལ་ནུས་སྤྱོད་མང་བ་དང་། ལག་རྩལ་གྱི་ཆ་རྐྱེན་དམའ་བ། ལས་གྲྭའི་འཕྲུལ་ཆས་ཀྱི་ལས་འགན་ཉུང་བ་བཅས་ཀྱི་གྲོང་གསེབ་ཀྱི་རྨང་གཞིའི་སྒྲིག་བཀོད་འཛུགས་སྐྲུན་གྱི་རྣམ་གྲངས་ཆུང་གྲས་ལ་གཙོ་གནད་ཐོག་རྒྱབ་སྐྱོར་བྱ་རྒྱུ་དང་། ཡོང་འབབ་དམའ་བའི་ཚོགས་སྤྱི་དང་ལྷག་པར་དུ་གྲོང་གསེབ་ཀྱི་དབུལ་སྒྲོལ་མི་འབོར་དང་། དབུལ་ལོག་སྔོན་འགོག་གི་ལྟ་ཞིབ་ཚད་ལེན་བྱ་ཡུལ། གནོད་འཚེའི་རྐྱེན་གྱིས་མུག་སྐྱོབ་བྱེད་དགོས་པའི་མི་འབོར། ཡུལ་གཞན་དུ་གནས་སྤོས་དབུལ་སྒྲོལ་མང་ཚོགས་སོགས་རྣམ་གྲངས་འཛུགས་སྐྲུན་ནང་སྔོན་ལ་བསྡུས་ཏེ་ཁྱིམ་གྱི་སྒོ་ཁར་ལས་ཞུགས་འབབ་འཕར་ཡོང་བ་བྱ་རྒྱུ་རེད།
ཁག་འདིའི་མ་འཇོག་གིས་ས་གནས་ཁག་ལ་གྲོང་ཚོར་ཤར་གཏོང་ཐུབ་པའི་གཞུང་ལམ་དང་། ཐོན་སྐྱེད་ཀྱི་གནས་སྐབས་འགྲོ་ལམ། ཐོན་ལས་ལམ་སོགས་རིགས་ཁག་གི་འགྲོ་ལམ་སྤྱི་ལེ་3550བསྐྲུན་ནས་ཞིང་ཁ་མུའུ་ཁྲི་1.5བཅོས་སྒྲིག་བྱེད་པ་དང་། རིགས་ཁག་གི་ཆུ་འདོན་དང་ཆུ་འབུད་ཀྱི་སྦུག་དྲ་སྤྱི་ལེ་1320སྔོག་པའམ་ཡང་ན་འདིང་བ། ཟམ་པ་དང་། ཟམ་སྦུག ཆུ་རྫིང་སོགས་790བསྐྲུན་པ། ཆུ་རགས་དང་ཆུ་ཡུར་སོགས་སྤྱི་ལེ་1600ལྷག་ཙམ་བསྐྲུན་རྒྱུར་རྒྱབ་སྐྱོར་བྱ་རྒྱུ་རེད།
2024ལོའི་ཟླ་10པར་རྒྱལ་ཁབ་འཕེལ་སྒྱུར་ཨུ་ལྷན་གྱིས་འཚོ་རྟེན་ལས་སྤྲོད་ལ་ཀྲུང་དབྱང་སྔོན་རྩིས་ནང་གི་མ་དངུལ་སྒོར་དུང་ཕྱུར་50སྔོན་ལ་བཏང་བ་དང་། ནོར་སྲིད་པུའུ་དང་མཉམ་དུ་ཀྲུང་དབྱང་ནོར་སྲིད་ཀྱི་གྲོང་གསེབ་དར་རྒྱས་ལ་སྦྲེལ་མཐུད་སྐུལ་འདེད་གཏོང་བའི་ཁ་གསབ་མ་དངུལ་གྱི་འཚོ་རྟེན་ལས་སྤྲོད་ལ་ལས་འགན་སྒོར་དུང་ཕྱུར་40.5སྔ་སྣུར་དུ་བཏང་བའི་ཐོག ད་ཐེངས་གཤམ་སྤྲོད་བྱས་པའི་ཀྲུང་དབྱང་སྔོན་རྩིས་ནང་གི་མ་དངུལ་སྒོར་དུང་ཕྱུར་50བསྣན་ནས་མིག་སྔར་རིམ་རྩིས་བརྒྱབ་ན་2025ལོའི་ལོ་འཁོར་གྱི་འཚོ་རྟེན་ལས་སྤྲོད་ལ་ཀྲུང་དབྱང་གི་མ་དངུལ་སྒོར་དུང་ཕྱུར་140.5བཏང་ཡོད།