ཉེ་ཆར། ཀྲུང་གོ་འཛད་སྤྱོད་པའི་མཐུན་ཚོགས་ཀྱིས《2024ལོའི་གྲོང་ཁྱེར་100ཡི་འཛད་སྤྱོད་པའི་བློ་ཡིད་ཚིམ་ཚད་ཚོད་སྐོར་ཚད་ལེན་སྙན་ཞུ》ཡོངས་བསྒྲགས་བྱས་ཤིང་། ཚོད་སྐོར་ཚད་ལེན་བྱས་འབྲས་ལས་མངོན་པར། འཛད་སྤྱོད་པའི་བློ་ཡིད་ཚིམ་ཚད་ཀྱི་ཕྱོགས་བསྡུས་སྐར་གྲངས་80.36ཡིན་པས། སྤྱིའི་ཆ་ནས་ཆུ་ཚད་ཡག་པོ་ཞིག་ཏུ་གནས་ཡོད་པ་རེད།

ཀྲུང་གོ་འཛད་སྤྱོད་པའི་མཐུན་ཚོགས་ཀྱིས་2017ལོ་ཚུན་རྒྱལ་ཡོངས་ཀྱི་གྲོང་ཁྱེར་ཆེ་འབྲིང་གི་འཛད་སྤྱོད་པའི་བློ་ཡིད་ཚིམ་ཚད་ཚོད་སྐོར་ཚད་ལེན་བྱས་འབྲས་བསྟུད་མར་ཡོངས་བསྒྲགས་བྱས་ཡོད། ཚོད་སྐོར་ཚད་ལེན་བྱས་པའི་གྲོང་ཁྱེར་100ཡོད་པ་དང་། དེའི་ཁྱབ་ཁོངས་སུ་ཐད་སྐྱོང་གྲོང་ཁྱེར་4དང་། ཞིང་ཆེན་གྱི་ལྟེ་བའི་གྲོང་ཁྱེར་27 འཆར་གཞི་ལོགས་བཀོད་གྲོང་ཁྱེར་5 སྤྱི་ཚོགས་ཀྱི་འཛད་རྫས་སིལ་ཚོང་བསྡོམས་འབོར་ཅུང་མཐོ་བའི་གྲོང་ཁྱེར་64བཅས་ཚུད་ཡོད། ཀྲུང་གོ་འཛད་སྤྱོད་པའི་མཐུན་ཚོགས་ཀྱིས་ཕྱོགས་གསུམ་པའི་ཆེད་ལས་བརྟག་དཔྱད་སྒྲིག་གཞི་སྒྲིག་འཛུགས་བྱས་ནས་2024ལོའི་ཟླ་11ནས་2025ལོའི་ཟླ་2བར་ཚོད་སྐོར་ཚད་ལེན་བྱ་ཡུལ་གྲོང་ཁྱེར་100ལ་དུས་མཉམ་དུ་བརྟག་དཔྱད་བྱས་ཏེ། འཛད་སྤྱོད་པའི་གོ་ཆོད་མ་དཔེ་ཁྱོན་61998བསྡུས་ཡོད་པ་རེད།