མལ་གྲོ་གུང་དཀར་རྫོང་གི་བུད་མེད་ཀྱི་མགུལ་རྒྱན་ཡིན་པ།

མོ་ཐྲོལ་གྱིས་མལ་གྲོ་གུང་དཀར་རྫོང་གི་རྒྱན་གོས་ངོམ་སྟོན་བྱེད་བཞིན་པ།

མལ་གྲོ་གུང་དཀར་རྫོང་གི་བུད་མེད་ཀྱི་མེ་ཏོག་དབྱིབས་ཅན་གྱི་རྣ་རྒྱན་ཡིན་པ།

མལ་གྲོ་གུང་དཀར་རྫོང་གི་སྐྱིན་ཁབ་ཀྱིས་མཐའ་རྒྱན་སྤྲས་པའི་འབུ་རས་འོག་འཇུག་ཡིན་པ།

སྟོད་ལུང་བདེ་ཆེན་ཆུས་སྐྱོར་མོ་ལུང་གི་ལྷ་མོའི་འཁྲབ་ཆས་ཡིན་པ།

ཆུ་ཤུར་རྫོང་གི་བུད་མེད་ཀྱི་རྣ་རྒྱན་ཡིན་པ།

སྟོད་ལུང་བདེ་ཆེན་ཆུས་སྐྱོར་མོ་ལུང་གི་ལྷ་མོ་བའི་ཟོན་པ་ལྷ་མོ་ཡིན་པ།

ཆུ་ཤུར་རྫོང་གི་ཞྭ་མོ་ཚེ་རིང་སྐྱིན་ཁེབས་ཡིན་པ།

མོ་ཐྲོལ་གྱིས་ཆུ་ཤུར་རྫོང་གི་རྒྱན་གོས་ངོམ་སྟོན་བྱེད་བཞིན་པ།

སྟོད་ལུང་བདེ་ཆེན་ཆུས་སྐྱོར་མོ་ལུང་ལྷ་མོ་ཚོགས་པའི“འབག་སྔོན”ཡིན་པ།

ཡངས་ཤིང་རྒྱ་ཆེ་ལ་ངོ་མཚར་ཆེ་བའི་མཚོ་བོད་ས་མཐོའི་ཐུན་མོང་མ་ཡིན་པའི་ས་ཁམས་ཁོར་ཡུག་གིས་དམིགས་བསལ་གྱི་ཁྱད་ཆོས་མངའ་བའི་མི་རིགས་ཀྱི་རིག་གནས་ཤིག་སྐྱེད་སྲིང་བྱས་ཡོད། དེའང་ལྷ་ས་གྲོང་ཁྱེར་མལ་གྲོ་གུང་དཀར་རྫོང་དང་། ཆུ་ཤུར་རྫོང་། སྟོད་ལུང་བདེ་ཆེན་ཆུས་བཅས་ཀྱི་རྒྱན་གོས་ནི་ས་མཐོའི་རིག་གནས་ལྡུམ་རར་བཞད་པའི་བཀྲག་མདངས་ཆེ་བའི་མེ་ཏོག་ཅིག་དང་མཚུངས། རྒྱན་གོས་དེ་དག་ནས་ས་མཐོའི་བུ་ཕྲུག་གི་རྣམ་དཔྱོད་དང་བློ་གྲོས་མཐོང་ཐུབ་པ་མ་ཟད། དེ་བས་རྒྱན་གོས་དེ་དག་ལོ་རྒྱུས་དང་དོན་དངོས་ཀྱི་སྦྲེལ་ཟམ་ལྟ་བུར་གྱུར་ཏེ། སྐྱེ་བོ་མང་པོས་གནས་དེའི་རིག་གནས་ཀྱི་ཉིང་བཅུད་ལ་མྱོང་རོལ་གང་ལེགས་ཐུབ་ཡོད།

མལ་གྲོ་གུང་དཀར་རྫོང་གི་འབྲི་གུང་གི་སྣམ་བུ་རྒྱ་སྨུག་ནི་ཁུལ་དེའི་ཆ་ལུགས་ཀྱི་ཚབ་མཚོན་ཁ་དོག་ཡིན་ཞིང་། ཁ་དོག་དེ་ཉིད་རྒྱུན་གཏན་གྱི་འཚོ་བའི་ཕྱོགས་གང་ས་ནས་མཐོང་རྒྱུ་ཡོད་པ་མ་ཟད། ལྷག་པར་དུ་བོད་སྟོད་པའི་ཤོན་དང་ལྷ་མོ་སོགས་སྲོལ་རྒྱུན་གྱི་གླུ་གར་འཁྲབ་སྟོན་སྐབས་སུ་མང་པོ་མཐོང་རྒྱུ་ཡོད། སྐྱེས་པ་ཚོས་སྣམ་བུའི་ཕྱུ་པའི་འོག་ཏུ་སྐྱིན་ཁབ་ཀྱིས་མཐའ་རྒྱན་སྤྲས་པའི་འབུ་རས་དཀར་པོའི་འོག་འཇུག་གྱོན་སྲོལ་ཡོད་པ་དང་། བལྟས་ན་མིག་ལ་མཛེས་པ་དང་མྱངས་ན་ཡིད་ཀྱི་བརྟན་པ་ཅིག་ཅར་དུ་འཕྲོག་པ་ཞིག་ཡོད་པས་ས་མཐོའི་སྐྱེས་པ་ཚོའི་བློ་སྟོབས་ངང་ངམ་ཤུགས་སུ་མངོན་པར་བྱེད།

བུད་མེད་ཚོའི་རྒྱན་གོས་ལ་དེ་བས་མཛེས་ཉམས་ལྡན་ཞིང་། སྣམ་བུ་ནག་པོའི་ཕྱུ་པའི་སྒང་ལ་པང་གདན་འཇའ་རིས་འཆིང་སྲོལ་ཡོད་པས། ཀུན་ལ་བབ་ཆགས་པའི་སྣང་བ་ཞིག་སྟེར་བ་མ་ཟད། བུད་མེད་ཀྱི་སྒེག་ཉམས་ཀྱང་ལེགས་པར་མངོན་གྱི་ཡོད། རྣ་རྒྱན་དང་། གའུ། ལག་གདུབ། མཛུབ་དཀྲིས་སོགས་ཀྱི་རྒྱན་ཆ་དེ་ཙམ་གྱིས་གྲ་རྒྱས་པོ་མེད་ཀྱང་ཧ་ཅང་བབ་ཆགས་པས་ས་མཐོའི་རང་བྱུང་མཛེས་ལྗོངས་དང་གཅིག་ལ་གཅིག་རྒྱན་དུ་གྱུར་པའི་སྣང་བ་སྟེར་འོང་། གཞན་ཡང་། མལ་གྲོ་གུང་དཀར་རྫོང་གི་བུད་མེད་ཚོ་མེ་ཏོག་དབྱིབས་ཀྱི་རྣ་རྒྱན་འདོགས་པར་དགའ་པོ་ཡོད་པས། དེ་ཉིད་ཁོ་ཚོའི་སྣམ་ཞྭ་དང་ཧ་ཅང་འཚམ་པོ་ཡོད།

ལྷ་སའི་ལུང་གཞུང་དུ་གནས་པའི་ཆུ་ཤུར་རྫོང་དུ་གནམ་གཤིས་ཡག་ལ་ས་རྒྱུ་བཟང་བས་ཞིང་འབྲོག་ལས་འཕེལ་རྒྱས་ཆེ་བ་དང་། རང་བྱུང་ཁོར་ཡུག་དང་ཐོན་སྐྱེད་བྱེད་སྟངས། དེ་བཞིན་ལོ་རྒྱུས་ཀྱི་འཕོ་འགྱུར་བཅས་ཀྱིས་རྐྱེན་པས་དེ་གའི་རྒྱན་གོས་རིག་གནས་ལ་ལྷ་སའི་ཞིང་ཁུལ་གྱི་ཁྱད་ཆོས་ཟབ་མོ་ལྡན།

སྐྱེས་པ་ཕལ་ཆེ་བས་མགོ་ལ་ཞྭ་མོ་ཚེ་རིང་སྐྱིན་ཁེབས་དང་། རྐང་པར་ཟོན་པ་ལྷ་མོ། ལུས་ལ་སྣམ་ཆས་དཀར་ནག་གྱོན་པ་དང་། གོང་བ་དང་། ཕུ་ཐུང་། སྒབ་གཤམ་སོགས་སུ་ཡིད་དུ་འོང་བའི་མཐའ་རྒྱན་སྤྲས་ཡོད། དེ་དག་ལས་ས་མཐོའི་སྐྱེས་པའི་བློ་རྒྱ་དང་། དཔའ་སྟོབས། དེ་བཞིན་ནན་ཏན་ཞིབ་ཆ་ཆེ་བའི་གཤིས་རྒྱུད་མཚོན་པར་བྱེད། བུད་མེད་ཚོའི་རྒྱན་གོས་ནི་དེ་བས་སྣ་མང་ཕུན་སུམ་ཚོགས་པ་ཞིག་སྟེ། ཁོ་ཚོས་སྣམ་བུའི་ཕྱུ་པའི་འོག་ཏུ་འོག་འཇུག་སྣ་མིན་སྣ་ཚོགས་གྱོན་པ་དང་པང་གདན་འཇའ་རིས་འཆིང་སྲོལ་ཡོད་ཅིང་། སྐབས་དེར་ཁོ་ཚོ་ནི་ས་མཐོར་རབ་ཏུ་བཞད་པའི་མེ་ཏོག་ཅིག་དང་ཀུན་ནས་མཚུངས།

གཞན་ཡང་། སྟོད་ལུང་བདེ་ཆེན་ཆུས་ཀྱི་སྐྱོར་མོ་ལུང་ལྷ་མོའི་རྒྱན་གོས་རིག་གནས་ལའང་སྐྱེ་བོ་ཀུན་གྱིས་བསྔགས་བརྗོད་ཀྱི་མེ་ཏོག་ཡང་ཡང་གཏོར་བཞིན་ཡོད་ཅིང་། དེའི་ནང་ཕུན་སུམ་ཚོགས་པའི་མི་ཆོས་རིག་གནས་ཀྱི་ཁྱད་ཆོས་དང་ལོ་རྒྱུས་ཀྱི་ནང་དོན་ཡང་འདྲེས་ཡོད། དཔེར་ན། “རྔོན་པའི་ཆས”དང“ལྷ་མོའི་འཁྲབ་ཆས”སོགས་ལྷ་མོའི་རྒྱན་གོས་ལ་རྩེར་སོན་གྱི་ལག་ཤེས་དང་ཐུན་མོང་མ་ཡིན་པའི་ཉམས་འགྱུར་ལྡན་པས་མི་རྣམས་ཀྱི་ཡིད་དབང་འགུག་བཞིན་ཡོད། རྒྱན་གོས་དེ་དག་གིས་ལྷ་མོའི་ནང་གི་མི་སྣའི་གཟུགས་བརྙན་གསོན་ཉམས་དོད་པོས་མཚོན་པ་མ་ཟད། ལྟད་མོ་བ་ཚོས་ལྷ་མོར་ལྟ་ཞོར་དུ་ས་མཐོའི་རྒྱན་གོས་རིག་གནས་ཀྱི་ཐུན་མོང་མ་ཡིན་པའི་ངོ་མཚར་ཉམས་སུ་མྱོང་ཐུབ་ཀྱི་ཡོད།

དུས་རབས་འཕེལ་རྒྱས་ཕྱིན་པ་དང་ཆབས་ཅིག མལ་གྲོ་གུང་དཀར་རྫོང་དང་། ཆུ་ཤུར་རྫོང་། སྟོད་ལུང་བདེ་ཆེན་ཆུས་བཅས་ཀྱི་རྒྱན་གོས་རིག་གནས་ཀྱང་ཕུན་སུམ་ཚོགས་སུ་དང་འཐུས་སྒོ་ཚང་དུ་རྒྱུན་ཆད་མེད་པར་འགྲོ་བཞིན་ཡོད། རྒྱན་གོས་ལ་མི་རིཌ་ཀྱི་ཉམས་འགྱུར་དང་ས་གནས་ཀྱི་ཁྱད་ཆོས་དེ་བས་མངོན་ནས། དེའང་ས་མཐོའི་རྒྱན་གོས་རིག་གནས་དང་དམངས་སྲོལ་ལ་རྒྱུས་ལོན་བྱེད་པའི་སྐར་ཁུང་ཞིག་ཏུ་གྱུར་ཡོད།

(པར་རིས་ཚང་མ་ལྷ་ས་གྲོང་ཁྱེར་རིག་གནས་དང་ཡུལ་སྐོར་ཅུས་ཀྱིས་མཁོ་འདོན་བྱས)