ཉེ་བའི་ལོ་ཤས་རིང་། ཆབ་མདོ་གྲོང་ཁྱེར་བྲག་གཡབ་རྫོང་བྱམས་མདུན་གྲོང་རྡལ་གྱིས་ལས་ཀའི་བྱེད་ཐབས་རྒྱུན་ཆད་མེད་པར་ལེགས་སུ་བཏང་སྟེ“མང་ཚོགས་ཀྱི་དཀའ་ངལ་སེལ་རོགས་དང་། མང་ཚོགས་ལ་དོན་དངོས་བསྒྲུབས་པ། མང་ཚོགས་ལ་བྱ་བཟང་བསྒྲུབས་པ”བཅས་ཀྱི་རྩ་དོན་མཐའ་འཁྱོངས་ཀྱིས་ཐོན་ཁུངས་སྣ་ཚོགས་བསྡུ་སྒྲིལ་དང་དམངས་ལ་སྟབས་བདེ་བསྐྲུན་པའི་ཞབས་ཞུའི་མ་ལག་འཐུས་སྒོ་ཚང་དུ་བཏང་སྟེ། མི་དམངས་ལ་ཞབས་འདེགས་ཞུ་བའི“མཐའ་མའི་འགག་གནད”བསལ་བས་ལས་དོན་ཁག་ལ་ཚད་བརྒལ་གསར་པ་བྱུང་ཡོད། 2023ལོ་ཚུན། བྱམས་མདུན་གྲོང་རྡལ་སྔ་རྗེས་སུ་བོད་རང་སྐྱོང་ལྗོངས་ཀྱི་ལོ་རྒྱུས་རིག་གནས་གྲགས་ཅན་གྲོང་རྡལ་དང་། བོད་རང་སྐྱོང་ལྗོངས་ཀྱི་སྐྱེ་ཁམས་ཤེས་དཔལ་འཛུགས་སྐྱོང་གི་དཔེ་སྟོན་ཤང(གྲོང་རྡལ)བོད་རང་སྐྱོང་ལྗོངས་ཀྱི་ས་མཐོའི་ཁྱད་ལྡན་དཔལ་འབྱོར་སྤུས་ཚད་མཐོ་བའི་འཕེལ་རྒྱས་ཀྱི་དཔེ་སྟོན་ས་ཚིགས་བཅས་སུ་བདམས་པ་རེད།

ཉེ་ཆར། དེ་བས་ཕུལ་དུ་བྱུང་བའི་ལས་ཀའི་ནུས་པར་བརྟེན་ནས་བྲག་གཡབ་རྫོང་བྱམས་མདུན་གྲོང་རྡལ་ཏང་ཨུད་ལ་རང་སྐྱོང་ལྗོངས་ཏང་ཨུད་དང་སྲིད་གཞུང་གིས་མཉམ་སྡེབ་ཀྱི་བྱས་རྗེས་རིམ་པ་དང་པོ་སྤྲད་པ་རེད།

ཞབས་འདེགས་ལེགས། དམངས་ལ་སྟབས་བདེ་བསྐྲུན་པས་མི་སེམས་དྲོ་བར་བྱས་པ།

བྱམས་མདུན་གྲོང་རྡལ་མི་དམངས་སྲིད་གཞུང་གི་གཞུང་ལས་ཐོག་ཁང་དུ་བསྐྱོད་སྐབས། ཐོག་སོ་དང་པོའི་ཕྱོགས་བཞི་ཡི་གྱང་ངོས་ཐོག་བོད་རྒྱ་སྐད་ཡིག་གཉིས་ལྡན་གྱི་དམངས་སྲིད་ཞབས་ཞུ་དང་། སྤྱི་ཚོགས་འགན་སྲུང་། གྲོང་གསེབ་ཀྱི་སྤྱི་ཚོགས་རྒན་གསོའི་འགན་བཅོལ་གསར་པའི་ནང་ཞུགས་པ་དང་གྲོན་དངུལ་འཇལ་བའི་ལས་རིམ་དཔེ་རིས་སོགས་བཀལ་ཡོད། ཁ་གསལ་བའི་ལས་རིམ་དཔེ་རིས་དེ་དག་གིས་ལས་དོན་སྒྲུབ་པར་ཡོང་བའི་མང་ཚོགས་ལ་ཧ་ཅང་སྟབས་བདེ་བསྐྲུན་ཡོད།

དེ་སྔ་ལས་དོན་སྒྲུབ་པའི་བརྒྱུད་རིམ་རྙོག་འཛིང་ཆེ་བ་དང་ཁ་གསལ་པོ་མེད་པའི་དབང་གིས་མང་ཚོགས་ག་བྱེད་འདི་བྱེད་མེད་པར་གྱུར་གྱི་ཡོད། མདའ་པ་གྲོང་ཚོའི་ཡུལ་མི་དབང་འདུས་ལ་དེའི་ཐད་མྱོང་ཚོར་ཟབ་མོ་ཡོད། ཁོང་གིས་འདས་ཟིན་པའི་ཉམས་མྱོང་ཕྱིར་དྲན་བྱེད་བཞིན“དེ་སྔ་གནད་དོན་དེ་དངོས་གནས་མགོ་བོ་ན་དགོས་པ་ཞིག་ཡོད། བྱ་བ་མི་འདྲ་བ་སྒྲུབ་པར་སྐྱོད་རིམ་བཞིན་དཔྱད་གཞི་མི་ཚང་བའམ་ཡང་ན་ལས་དོན་དེ་སྒྲུབ་མཁན་བསྡད་མེད་པ་སོགས་ཀྱིས་རྐྱེན་པས་ཐེངས་ཁ་ཤས་སྐྱོད་དགོས་སྟབས་དུས་ཚོད་ཚང་མ་ཕར་འགྲོ་ཚུར་འོང་ཁོ་ནར་རྫོགས་ཀྱི་ཡོད། ད་ལྟ་བོད་རྒྱ་སྐད་ཡིག་གཉིས་ལྡན་གྱི་ལས་རིམ་པར་རིས་འདི་ཡོད་པས། ཚང་མ་བལྟས་པ་ཙམ་གྱིས་གསལ་ཐག་ཆོད་འདུག གསལ་པོ་མི་ཤེས་པ་ཡོད་ཚེ། ག་དུས་ཡིན་རུང་དམངས་ཕན་ཞབས་ཞུའི་ལྟེ་གནས་ཀྱི་ལས་དོན་པར་སྐད་ཆ་འདྲི་ཆོག་གི་འདུག ཁོང་ཚོའི་རྣམ་འགྱུར་ཧ་ཅང་ཡག་པོ་ཡོད་པ་མ་ཟད། ད་དུང་འབྲེལ་ཡོད་དཔྱད་གཞི་འབྲི་རོགས་ཀྱང་བྱེད་ཀྱི་འདུག དེ་རིང་ངས་གོང་ཞུ་བྱས་པའི་ཕྱུགས་རིགས་ཀྱི་འགན་བཅོལ་དེ་ཞོགས་པ་དེ་རང་ལ་བཟོས་ཚར་སོང”ཞེས་བློ་ཡིད་ཚིམས་པོས་བཤད།

དབང་འདུས་ལྟར་བྱམས་མདུན་གྲོང་རྡལ་གྱི་དམངས་ཕན་ཞབས་ཞུའི་སྒྱུར་བཅོས་ཀྱི་ཕན་པ་ཐོབ་མཁན་མང་ཚོགས་ད་དུང་མང་པོ་ཡོད།

2024ལོར་བྱམས་མདུན་གྲོང་རྡལ་དམངས་ཕན་ཞབས་ཞུའི་ལྟེ་གནས་ཀྱིས་མང་ཚོགས་ལ་གཅིག་འཐུས་རྣམ་པའི་ཐོག་ནས་དོན་དག་ཁག་1000ལྷག་ཙམ་བསྒྲུབས་པ་དང་། སྲིད་ཇུས་གསལ་འགྲེལ་ཐེངས་20ལྷག་ཙམ་བརྒྱབ་པ། དམངས་འཚོའི་ཆ་འཕྲིན་20ལྷག་ཙམ་བསྡུ་རུབ་བཅས་བྱས་ཡོད། ནད་གཞི་ཚབས་ཆེན་དང་། ལོ་ན་མཐོ་བ། དབང་པོ་སྐྱོན་ཅན་སོགས་དཀའ་ངལ་ཡོད་པའི་མང་ཚོགས་ལ་ད་དུང“སྒོ་འགྲམ་དུ་ཞབས་འདེགས”ཞུ་བར་སྐྱོད་ཀྱི་ཡོད། དམངས་ཕན་ཞབས་ཞུ་དེ་འབོད་ཚིག་ཙམ་ཞིག་མིན་པར་དངོས་གནས་དྲང་གནས་ཀྱི་དྲོ་སྐྱིད་སྦྱིན་པའི་བྱ་བར་འགྱུར་ནས་བྱམས་མདུན་གྲོང་རྡལ་གྱི་མང་ཚོགས་ཚང་མའི་འཚོ་བའི་ཁྲོད་ཁྱབ་ཡོད།

འགན་འཁྲི་འཁུར། ཏང་ཡོན་གྱིས་བྱ་སྤྱོད་སྤེལ་ནས་དམངས་སེམས་གཅིག་ཏུ་སྒྲིལ་བ།

ཐུབ་བསྟན་གྱིས“གྲོང་རྡལ་ཏང་ཨུད་དང་ཚང་མའི་རོགས་རམ་འོག་ང་ཚོར་གོ་སྐབས་འདི་འདྲ་ཞིག་རག་བྱུང”ཞེས་སེམས་འགུལ་ཚད་མེད་ཐེབས་བཞིན་བཤད།

ཐུབ་བསྟན་ནི་བྱམས་མདུན་གྲོང་རྡལ་འདུན་སྒྲུབ་གྲོང་གསར་གྱི་ཡུལ་མི་ཞིག་ཡིན་པ་དང་ཆུང་དུས་ནས་རྐང་པ་གཉིས་དབང་པོ་སྐྱོན་ཅན་དུ་གྱུར་ནས་གཅུང་མོ་དང་གཅིག་ལ་གཅིག་བརྟེན་གྱིས་འཚོ་བ་སྐྱེལ་གྱི་ཡོད། ཁོང་ཚོའི་འཚོ་བ་དེ་ཙམ་ཡག་པོ་མེད་རུང་ལས་དབང་སྒྱུར་བའི་གོ་སྐབས་ཤིག་འཆར།

བྱམས་མདུན་གྲོང་རྡལ་ཏང་ཨུད་ཀྱི་ཧྲུའུ་ཅི་ཧྥན་ལིན་གྱིས་འཚམས་འདྲི་བྱེད་སྐབས་ཐུབ་བསྟན་གྱི་དཀའ་ངལ་ཤེས་རྟོགས་བྱུང་རྗེས། འཕྲལ་མར་གྲོང་ཚོའི“ཨུ་ལྷན་གཉིས”ཚན་ཁག་དང་མཉམ་དུ་བྱ་སྤྱོད་སྤེལ་འགོ་བརྩམས། ཧྥན་ལིན་གྱིས“ཐུབ་བསྟན་གཅེན་གཅུང་ལ་གདུང་སེམས་མཉམ་སྐྱེ་བྱེད་དགོས་པ་མ་ཟད། དེ་བས་ཀྱང་དངོས་འབྲེལ་རོགས་རམ་བྱས་ནས་ཁོང་གཉིས་རང་ཁ་རང་གསོ་ཐུབ་པར་བྱེད་དགོས”ཞེས་བཤད།

མཐུན་སྦྱོར་ཐེངས་མང་བྱས་པ་བརྒྱུད། འདུན་སྒྲུབ་གྲོང་གསར་ཁ་སྤྲོད་ཀྱི་ཚོང་ཁང་12དེ་དག་བྱམས་མདུན་གྲོང་རྡལ་གྱི་མྱུར་འགྲུབ་རྣམ་གྲངས་སུ་བརྩིས་ཏེ་ཟླ་རེར་བོགས་དངུལ་སྒོར་100ཡི་ཐོག་ནས་གྲོང་ཚོའི་དཀའ་ངལ་ཡོད་པའི་དུད་ཚང་ལ་བོགས་མར་བཏང་བས། ཐུབ་བསྟན་གཅེན་གཅུང་གཉིས་ལའང་དེའི་ནང་གི་ཁང་པ་གཅིག་རག་པ་རེད། ཁོང་གཉིས་ཀྱིས་དེ་གར་ཚོང་ཁང་ཆུང་ཆུང་ཞིག་བཙུགས་པས་འཚོ་བ་རིམ་བཞིན་ཇེ་ཡག་ཏུ་ཕྱིན་ཡོད། ད་ལྟ། ཐུབ་བསྟན་ཚོང་ཁང་གི་ཚོང་ཇེ་ཡག་ཏུ་འགྲོ་བཞིན་ཡོད་ལ། གཅེན་གཅུང་གཉིས་ཀྱི་ངོ་གདོང་ནས་ཀྱང་དགའ་སྤྲོའི་རྣམ་པ་མངོན་བཞིན་ཡོད།

ཉེ་བའི་ལོ་ཤས་རིང་། བྱམས་མདུན་གྲོང་རྡལ་ཏང་ཨུད་ཀྱིས་རིམ་རྩིས་བརྒྱབ་ན་མང་ཚོགས་ལ་དོན་དངོས་120ལྷག་ཙམ་བསྒྲུབས་པ་དང་། འགལ་བ་དང་རྩོད་གཞིའི་མངོན་མེད་རྐྱེན་ངན་200ལྷག་ཙམ་ཞིབ་བཤེར་དང་འདུམ་འགྲིག་ཐག་གཅོད་བྱས་པ་རེད། ཁོང་ཚོས་བྱ་སྤྱོད་དངོས་ལ་བརྟེན་ནས་ཏང་ཡོན་གྱི་འགན་འཁྲི་སྒྲུབ་ཚུལ་ལྷམ་མེར་མངོན་པར་བྱས་པས་ས་གནས་དེ་གའི་མང་ཚོགས་ཀྱི་སེམས་ཀྱི་བརྟེན་སར་གྱུར་ཡོད།

ཐོན་ལས་དར། ཞིང་པར་རོགས་རམ་བྱས་ནས་འབབ་འཕར་ཡོང་བར་བྱས་པ།

བདེ་ཐང་ནས་ནག་ལས་སྣོན་ཞིང་པའི་ཆེད་ལས་མཉམ་ལས་ཁང་ནང་འགན་འཁུར་བ་བློ་གྲོས་རིན་ཆེན་གྱིས་ལོ་མཇུག་གི་ཁེ་སྤོགས་བགོ་བའི་མ་དངུལ་རྩིས་རྒྱག་པར་བྲེལ་བཞིན་ཡོད་པ་དང་ཁོང་གི་ངོ་གདོང་ནས་དགའ་སྤྲོའི་རྣམ་པ་མངོན་བཞིན་འདུག “དེ་སྔ། འདི་གའི་ཐོན་ལས་རྐྱང་པ་ཡིན་པས་ཚང་མའི་ཡོང་འབབ་མཐོ་པོ་མེད”ཅེས་བློ་གྲོས་རིན་ཆེན་གྱིས་ཕྱིར་དྲན་བྱེད་བཞིན་བཤད། རྣམ་གྲངས་འཛུགས་སྐྲུན་ནས་ནས་ནག་འདེབས་པའི་བར་དང་དེ་ནས་ཐོན་རྫས་ཐོན་སྐྱེད་དང་སྐྱེལ་འདྲེན་བྱེད་པའི་བར་གྱི་ལྷུ་ཚིགས་ཚང་མར་གྲོང་རྡལ་ཏང་ཨུད་ཀྱིས་མཛུབ་ཁྲིད་ཞིབ་ཚགས་དང་རྒྱབ་སྐྱོར་ཤུགས་ཆེན་བྱེད་ཀྱི་ཡོད་པ་རེད། བློ་གྲོས་རིན་ཆེན་གྱིས“མཉམ་ལས་ཁང་ལ་ཡོང་འབབ་འདི་ལྟ་བུ་བྱུང་བ་ནི་གྲོང་རྡལ་ཏང་ཨུད་ཀྱིས་ནུས་ཤུགས་ཡོད་རྒུས་རོགས་སྐྱོར་བྱས་པ་དང་ཁ་འབྲལ་ཐབས་མེད་པ་ཞིག་རེད། ད་ཆ་མཉམ་ལས་ཁང་གིས་བྱམས་མདུན་སྡེ་ཁུལ་གྱི་ཁྱིམ་ཚང་303མཉམ་དུ་འབབ་འཕར་ཕྱུག་འགྱུར་ཡོང་རྒྱུར་སྐུལ་ཁྲིད་བྱས་པས་ཚང་མའི་འཚོ་བ་ཇེ་ཡག་ཏུ་འགྲོ་བཞིན་ཡོད”ཅེས་བཤད།

བྱམས་མདུན་གྲོང་རྡལ་མི་དམངས་སྲིད་གཞུང་གི་ཐོག་སོ་གཉིས་པའི་བར་ཁྱམས་ཀྱི་མཉམ་སྡེབ་ཏང་ཡོན་ལས་བྱེད་པའི་དམིགས་ཚད་གྱང་ཐོག་ཏུ་ཧྥན་ལིན་གྱིས་རང་ཉིད་ཀྱི་དམིགས་ཚད་ནང་དོན་ཁྲོད“གྲོང་ཚོའི་མཉམ་སྡེབ་དཔལ་འབྱོར་རྒྱུན་མཐུད་འཕེལ་རྒྱས་སྟོབས་ཆེར་བཏང་ནས‘གྲོང་ཚོ་རེར་ཐོན་རྫས་རེའི’ཏང་འཛུགས་སྐྱོང་གི་སྤུས་རྟགས་གཏོད་དེ་མཉམ་སྡེབ་དཔལ་འབྱོར་གྱི་བགོ་བཤའ་སྒོར་ཁྲི130ཡན་ཟིན་པ་བྱ་རྒྱུ་ཡིན”ཞེས་བཀོད་ཡོད་པ་རེད། ཁོང་གིས་གསར་འགོད་པར“2024ལོར་ང་ཚོའི་གྲོང་རྡལ་གྱི་མཉམ་སྡེབ་དཔལ་འབྱོར་གྱི་ཁེ་སྤོགས་སྒོར་ཁྲི་150ལས་བརྒལ་ཡོད”ཅེས་བཤད།

ཐོན་ལས་འཕེལ་རྒྱས་ལ་སྐུལ་འདེད་གཏོང་བའི་བརྒྱུད་རིམ་ཁྲོད། གྲོང་རྡལ་ཏང་ཨུད་ཀྱིས་ཐོན་ཁུངས་བསྡུ་སྒྲིལ་བྱ་རྒྱུར་མཐོང་ཆེན་བྱས་ཏེ་ཀྲུང་དབྱང་གི་མཉམ་སྡེབ་དཔལ་འབྱོར་རོགས་སྐྱོར་རྣམ་གྲངས་རེ་ཞུ་ཧུར་ཐག་བྱས་པ་རེད། ར་ཟད་གྲོང་ཚོ་དང་། འོ་འབུམ་གྲོང་ཚོ། ཤོག་ལུང་གྲོང་ཚོ། འགག་ཚ་གྲོང་ཚོ་བཅས་ཀྱི་ཀྲུང་དབྱང་གི་མཉམ་སྡེབ་དཔལ་འབྱོར་རོགས་སྐྱོར་རྣམ་གྲངས་4ལ་ཁྱོན་སྒོར་ཁྲི་280རེ་ཞུ་བྱས་པ་དང་ཆབས་ཅིག སྤུན་ཟླའི་ཤང་དང་གྲོང་རྡལ་དང་མཉམ་འགུལ་འཕེལ་རྒྱས་བཏང་སྟེ་ངལ་ལས་ཕྱིར་གཏོང་དང་རླངས་འཁོར་སྐྱེལ་འདྲེན་སོགས་བརྒྱུད་ལས་མི་འབོར་ཆེན་བསྡུས་ནས་མང་ཚོགས་ལ་འབབ་འཕར་ཕྱུག་འགྱུར་ཡོང་རྒྱུར་རྒྱུན་མཐུད་སྐུལ་ཁྲིད་བྱས་པ་རེད།