ཚེས་13ཉིན། གསར་འགོད་པར་རང་སྐྱོང་ལྗོངས་མི་དམངས་སྲིད་གཞུང་གསར་འགྱུར་གཞུང་ལས་ཁང་གིས་འཚོགས་པའི་རང་སྐྱོང་ལྗོངས་ཀྱི“3.15རྒྱལ་སྤྱིའི་འཛད་སྤྱོད་པའི་ཁེ་དབང་སྲུང་སྐྱོང་ཉིན་མོའི”གསར་འགྱུར་ཡོངས་བསྒྲགས་ཚོགས་འདུ་ནས་ཤེས་རྟོགས་བྱུང་བར། 2024ལོར། རང་ལྗོངས་ཀྱིས་ཐོག་མཐའ་བར་གསུམ་དུ་འཛད་སྤྱོད་པའི་ཁྲིམས་མཐུན་ཁེ་དབང་སྲུང་སྐྱོང་བྱ་རྒྱུ་དེ་ཁྲོམ་ར་ལྟ་འདོམས་ལས་དོན་གྱི་འགོ་འཛུགས་ས་དང་དོན་ལ་བབས་སར་བྱས་ཏེ། ལས་ཀའི་ལམ་སྲོལ་གསར་གཏོད་དང་། ཁེ་དབང་སྲུང་སྐྱོང་བྱེད་ལམ་ཤར་གཏོང་། ལྟ་འདོམས་ཁྲིམས་སྒྱུར་བྱེད་ཤུགས་ཆེ་རུ་གཏོང་བ་བཅས་བྱས་ནས་འཛད་སྤྱོད་ཁོར་ཡུག་རྒྱུན་ཆད་མེད་པར་ལེགས་སུ་བཏང་བས། ལས་དོན་ཁག་ལ་ཕན་འབྲས་མངོན་གསལ་དོད་པོ་ཐོན་ཏེ་འཛད་སྤྱོད་པར་སྒོར་ཁྲི་1796.86ཙམ་གྱི་དཔལ་འབྱོར་གྱོང་གུན་མི་ཕོག་པ་བྱས་ཡོད།

ན་ནིང་། རང་ལྗོངས་ཀྱི་རིམ་ཁག་ཁྲོམ་ར་ལྟ་འདོམས་སྡེ་ཚན་གྱིས་ལམ་སྲོལ་བཟོས་ནས་དྲིལ་བསྒྲགས་ལ་མཐོང་ཆེན་དང་། ལྟ་འདོམས་བྱེད་ཤུགས་ཆེ་རུ་བཏང་ནས་ཁྲིམས་སྒྱུར་ནན་པོ་བྱས་ཏེ། རང་སྐྱོང་ལྗོངས་ཀྱི་12315བཀོད་འདོམས་ལྟེ་གནས་དང་ལྷ་ས་གྲོང་ཁྱེར་གྱི་12345ཐད་སྦྲེལ་ཁ་པར་ཕན་ཚུན་སྦྲེལ་མཐུད་ལ་སྐུལ་འདེད་ཤུགས་ཆེན་བཏང་ནས། རང་ལྗོངས་ཀྱི་ཁྲོམ་ར་ལྟ་འདོམས་ཁྱབ་ཁོངས་ཀྱི་འཛད་སྤྱོད་ཁེ་དབང་སྲུང་སྐྱོང་ཀྱི་ལས་དོན་སྒྲུབ་ནུས་རྒྱུན་ཆད་མེད་པར་ཆེ་རུ་བཏང་བ་མ་ཟད། ལྗོངས་ཡོངས་ཀྱི་12315ལས་སྟེགས་ཀྱིས་འཛད་སྤྱོད་པའི་ཞུ་གཏུག་ཐེར་འདོན་ཁྲི་2.17དང་ལེན་བྱས་ཤིང་། ཁྲོམ་ར་ལྟ་འདོམས་སྤྱི་ཁྱབ་ཅུས་ཀྱིས་རྒྱལ་ཡོངས་ཀྱི་12315ཐད་སྦྲེལ་ཁ་པར་ལ་འཐེན་བཤེར་བྱེད་སྐབས། བོད་དུ་ཐད་སྦྲེལ་ཁ་པར་སྦྲེལ་མཐུད་ཐུབ་ཚད་100%ཟིན་ནས་རྒྱལ་ཡོངས་ཀྱི་མདུན་གྲལ་དུ་སླེབས་ཡོད་པ་རེད།

མི་དམངས་མང་ཚོགས་ཀྱིས་དོ་ཁུར་བྱེད་པའི་བཟའ་བཅའི་བདེ་འཇགས་ཀྱི་གནད་དོན་ལ་དམིགས་ཏེ། 2024ལོར། ལྗོངས་ཡོངས་ཀྱི་རིམ་ཁག་ཁྲོམ་ར་ལྟ་འདོམས་སྡེ་ཚན་གྱིས་ན་ཟུག་འཇོམ་པ་དང་གཉིད་སྐྱོད་པོ་ཁུག་ཐུབ་པ་སོགས་ཀྱི་བྱེད་ནུས་ལྡན་ཚུལ་དང་། ཁྲིམས་དང་མ་མཐུན་པའི་ཁ་ཚར་གྱི་སྨན་རྫས་དང་དེ་བཞིན་བསྐྱར་འགྱུར་དངོས་པོ་སོགས་བླུགས་པའི་ཁྲིམས་འགལ་བྱེད་སྤྱོད་སྤེལ་རིགས་ཀྱི་བཟའ་བཅར་རྡུང་རྡེག་ཚ་ནན་གཏོང་རྒྱུ་གཙོ་གནད་དུ་བྱས་ཏེ། “མེད་པ་གསུམ”དང་དེ་བཞིན“ཚད་བརྒལ་གཉིས་དང་ཁྲིམས་དང་མ་མཐུན་པ་གཅིག”གི་བཟའ་བཅའ་སོགས་ཀྱི་ཁྲིམས་འགལ་སྒྲིག་འགལ་གྱི་བྱེད་སྤྱོད་ལ་ཐག་གཅོད་ནན་པོ་བྱས་ནས། བཟའ་བཅའི་རིགས་ཀྱི་ཁྲིམས་འགལ་སྒྲིག་འགལ་གྱི་གྱོད་གཞི་504ལ་གྱོད་དོན་ཐོ་འགོད་ཀྱིས་ཞིབ་གཅོད་བྱས་ཤིང་། དངོས་ཟོག་རིན་ཐང་སྒོར་ཁྲི་160.76དང་དངུལ་ཆད་དང་གཞུང་བཞེས་བཏང་བའི་དངུལ་འབོར་སྒོར་ཁྲི་542.85ཟིན་ཡོད།