ཉིན་ཤས་གོང་གསར་འགོད་པར་བོད་རང་སྐྱོང་ལྗོངས་ཉིང་ཁྲི་གྲོང་ཁྱེར་མི་དམངས་སྲིད་གཞུང་གིས་འཚོགས་པའི་གསར་འགྱུར་ཡོངས་བསྒྲགས་ཚོགས་འདུ་ནས་ཤེས་རྟོགས་བྱུང་བར། ཉིང་ཁྲིའི་ཁམ་བུའི་མེ་ཏོག་ཡུལ་སྐོར་རིག་གནས་དུས་ཆེན་སྐབས་ཉེར་གཉིས་པ་2025ལོའི་ཟླ་4ཚེས་3ཉིན་དངོས་སུ་འགོ་ཚུགས་རྒྱུ་ཡིན་པ་རེད། བྱེད་སྒོ་དེ“མི་ཡུལ་གྱི་དག་ཞིང་། མཛེས་པའི་ཉིང་ཁྲི”ཞེས་པའི་བརྗོད་དོན་གཙོ་བོ་རྒྱུན་མཐུད་བྱས་ནས་ཟླ་བ་གཅིག་སྤེལ་རྒྱུ་ཡིན་པ་རེད།

དོ་སྣང་བྱེད་འོས་པ་ཞིག་ནི་འདི་ལོར་ཉིང་ཁྲི་གྲོང་ཁྱེར་གྱིས་པེ་ཅིང་གྲོང་ཁྱེར་ཕིང་ཀུའུ་ཆུས་དང་ཧུའུ་ནན་ཞིང་ཆེན་ཁྲང་ཏེ་གྲོང་ཁྱེར་དང་མཉམ་དུ་ཤུགས་རྐྱེན་རྒྱ་ཁྱབ་ལྡན་པའི“ཁམ་བུའི་མེ་ཏོག་མནའ་འབྲེལ”བཏོད་དེ་ཁམ་བུའི་མེ་ཏོག་བརྗོད་དོན་གཙོ་བོར་བྱས་པའི་ཡུལ་སྐོར་ཐོན་རྫས་རབ་དང་རིམ་པ་མཉམ་དུ་གསར་སྤེལ་དང་། ཁྱད་ཆོས་མངོན་གསལ་དོད་པའི་ཡུལ་སྐོར་ལམ་ཐིག་ཇུས་འགོད་ཞིབ་ཚགས་དང་འབྲེལ་ཁྱབ་གདལ་ཧུར་ཐག་གཏོང་བ། ས་གནས་གསུམ་གྱི་ཁམ་བུའི་མེ་ཏོག་དཔལ་འབྱོར་སྤུས་ཚད་མཐོ་བའི་མཉམ་འདྲེས་འཕེལ་རྒྱས་ཕྱོགས་སུ་བསྐྱོད་པར་སྐུལ་འདེད་གཏོང་བ་བཅས་བྱས་ནས། ས་ཁོངས་ལས་བརྒལ་བའི་མཉམ་འགུལ་གྱིས་ཁམ་བུའི་མེ་ཏོག་ལ་མཉམ་དུ་རོལ་རྒྱུ་དང་ས་གནས་གསུམ་གྱིས་དཔྱིད་ཀྱི་མཛེས་ལྗོངས་མཉམ་དུ་གཏོད་རྒྱུ་ཡིན་པ་རེད།

སྐབས་འདིའི་ཚོགས་ར་གཙོ་བོ་སྔར་བཞིན་ཉིང་ཁྲི་གྲོང་ཁྱེར་གྱི་ཀོང་པོའི་སྤྱི་གླིང་དུ་ཡིན་ཞིང་། རིག་གནས་དུས་ཆེན་དེ་རྫོང(ཆུས་དང་གྲོང་ཁྱེར)དྲུག་གི་ཐུན་མོང་མ་ཡིན་པའི་རིག་གནས་ཡུལ་སྐོར་ཐོན་ཁུངས་དང་ཟུང་འབྲེལ་བྱས་ཏེ། “ཁམ་བུའི་མེ་ཏོག+”བྱེད་སྒོ་ཧུར་ཐག་སྤེལ་ནས་དྲིལ་བསྒྲགས་ཁྱབ་གདལ་དང་། “གངས་ལྗོངས་ཁམ་བུའི་མེ་ཏོག་གི་གཏམ་རྒྱུད”ཀྱི་མཛད་སྒོ་གཟབ་རྒྱས་ཀྱི་འདུ་འཛོམས་བྱེད་སྒོ་རབ་དང་རིམ་པ། ཆེད་དོན་མཉམ་འགུལ་བྱེད་སྒོ་བཅས་ཆེད་དོན་གསུམ་གཙོ་གནད་དུ་བྱས་ཏེ། “དཔྱིད་དུས་ཀྱི་ཁམ་བུའི་མེ་ཏོག་གི་སྟོན་མོའི”ཞིམ་ཟས་ཉམས་ལེན་དང་། “ཁམ་བུའི་མེ་ཏོག་གི་ཕྱག་རྟགས”ཀྱི་ཁྱད་ལྡན་ཐོན་རྫས་འགྲེམས་སྟོན། མངོན་མིན་རིག་གནས་ཤུལ་བཞག་ཁམ་བུའི་མེ་ཏོག་གི་མེ་ཏོག་འགྲེམས་འཁོར་སོགས་བོད་ཀྱི་ཁྱད་ཆོས་དང་ཉིང་ཁྲིའི་ཁྱད་ཆོས་ལྡན་པའི་རིག་གནས་ཡུལ་སྐོར་ཚོང་དོན་བྱེད་སྒོ་20ལྷག་ཙམ་བཀོད་སྒྲིག་བྱ་རྒྱུ་ཡིན་པ་རེད།“ཁམས་བཟང་ཉིང་ཁྲི”ཞེས་པའི་རོལ་དབྱངས་དགའ་ནེའུ་དུས་ཆེན་དང་། དམངས་སྲོལ་ལུས་རྩལ་འགྲན་རྩལ།“ཁམ་བུའི་མེ་ཏོག་གི་རོལ་རྩེད”ཅེས་པའི་གངས་ལྗོངས་ཀྱི་འགུལ་བརྙན་འགྲེམས་སྟོན་སོགས་མང་ཚོགས་ཀྱིས་ལྟ་འདོད་ཆེན་པོ་བྱེད་པའི་སྐབས་སྔོན་མའི་བྱེད་སྒོ་སོར་འཇོག་བྱས་པའི་རྨང་གཞིའི་ཐོག ད་དུང“རྒྱལ་ལམ་318ཀྱི་སྟེང་དུ་སྦག་སྦག་བཞོན་ནས་ཉིང་ཁྲིའི་ཁམ་བུའི་མེ་ཏོག་ལ་ལྟ”ཞེས་པའི་འགྲེམས་སྟོན་དང“ཁམ་བུའི་མེ་ཏོག་རབ་ཏུ་མཛེས། མངོན་མིན་རིག་གནས་ཤུལ་བཞག་གིས་དཔྱིད་དུས་བསུ”སོགས་ཀྱི་བྱེད་སྒོ་སྤེལ་ནས་ཁམ་བུའི་མེ་ཏོག་དུས་ཆེན་རིང་གནངས་འཆར་འཁྲབ་སྟོན་རེ་ཡོད་པ་དང་ཉིན་ལྟར་ངོ་མཚར་ཆེ་བའི་ལྟད་མོ་རེ་ཡོད་པའི་འགན་ལེན་བྱ་རྒྱུ་ཡིན་པ་རེད།

ཡུལ་སྐོར་འཛད་སྤྱོད་ཁོར་ཡུག་བཟང་པོ་ཧུར་ཐག་བསྐྲུན་ཆེད། ཉིང་ཁྲི་གྲོང་ཁྱེར་གྱིས་ཡུལ་སྐོར་ཁོར་ཡུག་གི“མཐོར་གཏོང་བྱ་སྤྱོད་ཆེན་པོ་དགུའི”གྲུབ་འབྲས་མུ་མཐུད་སྲ་བརྟན་དུ་བཏང་ནས“བཟའ་བཅའ་དང་། སྡོད་ཁང་། འགྲོ་སྐྱོད། ཡུལ་སྐོར། ཉོ་སྒྲུབ། རོལ་རྩེད”སོགས་ལ་དོ་སྣང་ཆེན་པོ་བྱས་ཏེ་ཡུལ་སྐོར་ཁྲོམ་རའི་ཚད་ལྡན་དོ་དམ་ལ་ཕྱོགས་ཡོངས་ནས་འགན་ལེན་བྱ་རྒྱུ་ཡིན་པ་རེད། ཤེས་རྟོགས་བྱུང་བར་གཞིགས་ན། མིག་སྔར་ཉིང་ཁྲིས་གྲོང་ཁྱེར་ཡོངས་ཀྱི་རིག་གནས་དང་ཡུལ་སྐོར་ཁྲོམ་རའི་ཕྱོགས་བསྡུས་སྲིད་འཛིན་ཁྲིམས་འཛིན་ཞིབ་བཤེར་བྱ་སྤྱོད་ཁྱོན་བསྡོམས་ཐེངས་133སྤེལ་བ་མ་ཟད། མང་ཚོགས་ཀྱིས་དོ་ཁུར་བྱེད་པའི་མགྲོན་ཁང་གི་རིན་གོང་སོགས་གཙོ་གནད་གནད་དོན་ལ་དམིགས་ནས《མགྲོན་ཁང་དང་བཟའ་བཏུང་ལས་རིགས་ཀྱི་ཁམ་བུའི་མེ་ཏོག་དུས་ཆེན་རིང་གི་རིན་གོང་ཚོད་འཛིན་བཀའ་རྒྱ》དང《ཁམ་བུའི་མེ་ཏོག་དུས་ཆེན་རིང་གྲོང་ཁྱེར་ཡོངས་ཀྱི་གྲོང་མིར་ཕུལ་བའི་འཕྲིན་ཡིག་གཅིག》སོགས་གྲོས་འགོ་དང་སྤྱི་བསྒྲགས་སྤེལ་ཏེ། ཡ་རབས་ཡུལ་སྐོར་དང་། འཛད་སྤྱོད་རན་པོ། ཁེ་ལས་ཀྱི་རང་གཅུན་ནན་པོ་བཅས་དར་སྤེལ་གཏོང་བ་དང་ཁྲོམ་རའི་གཉེར་སྐྱོང་སྒྲིག་ལམ་ཚད་ལྡན་དུ་བཏང་སྟེ། འཛད་སྤྱོད་པའི་ཁྲིམས་མཐུན་ཁེ་དབང་སྲུང་སྐྱོང་ནུས་ལྡན་བྱས་ནས“ཡིད་རྟོན་གཉེར་སྐྱོང་དང་བློ་བདེའི་འཛད་སྤྱོད”ཀྱི་ཁོར་ཡུག་བཟང་པོ་བསྐྲུན་རྒྱུ་ཡིན་པ་རེད།