“ཀྲུང་གོའི་རྒྱུན་མཐུད་སྒོ་དབྱེ་ལས་གོ་ལ་ཧྲིལ་པོའི་ཁེ་ལས་ལ་གོ་སྐབས་མང་པོ་བསྐྲུན་ཡོད”
—— པར་ཙིར་ཧྲེང་པའོ་ལུའོ་ཀྲོའུ་བཙུགས་སློབ་ཆེན་གྱི་དགེ་རྒན་ཆེ་མོ་བ་པའོ་ལི་ནུའོ་ལ་བཅར་འདྲི་བྱས་པ།
གསར་འགོད་པ་པར་ཙིར་ཧྲེང་པའོ་ལུའུ་ཀྲོའུ་བཙུགས་སློབ་ཆེན་གྱི་མཚན་ཉིད་རིག་པ་དང་ཚན་རིག་སློབ་གླིང་གི་དགེ་རྒན་ཆེ་མོ་བ་ལུའུ་དབྱི་སི་·པའོ་ལི་ནུའོ་ཡི་གཞུང་ལས་ཁང་དུ་སྐྱོད་སྐབས་གྱང་ངོས་སུ་ཚགས་པར་གྱི་དཔར་གཞི་ཞིག་བཀལ་འདུག་པ་དེར་དོ་སྣང་བྱུང་། དེ་ནི་1949ལོའི་ཟླ་10ཚེས་1ཉིན་གྱི་མི་དམངས་ཉིན་རེའི་ཚགས་པར་གྱི་པར་ངོས་དང་པོའི་བསྐྱར་དཔར་རེད་འདུག ཁོང་གིས་གསར་འགོད་པར། “ཀྲུང་གོ་གསར་པ་དབུ་བརྙེས་ཚུན། འཛམ་གླིང་སྐྱེ་བོ་ཀུན་གྱིས་དོ་སྣང་བྱེད་པའི་འཕེལ་རྒྱས་ཀྱི་གྲུབ་འབྲས་ཐོབ་ཡོད། ངས་ཐོག་མཐའ་བར་གསུམ་དུ་ཀྲུང་གོའི་འཕེལ་རྒྱས་དང་ཡར་རྒྱས་ལ་དོ་སྣང་བྱེད་ཀྱི་ཡོད། རིམ་བཞིན་ཀྲུང་གོར་རྒྱུས་ལོན་དང་ཀྲུང་གོར་དགའ་པོ་བྱུང་བ་མ་ཟད། ཀྲུང་གོའི་མི་དམངས་ཀྱིས་སྤྱི་ཚོགས་རིང་ལུགས་དེང་རབས་ཅན་གྱི་རྒྱལ་ཁབ་ཕྱོགས་ཡོངས་ནས་འཛུགས་སྐྲུན་བྱེད་པར་ཕུལ་བའི་ལེགས་སྐྱེས་ལ་ཡིད་སྨོན་ཆེན་པོ་སྐྱེས་བྱུང”ཞེས་བརྗོད།
པའོ་ལི་ནུའོ་ཡིས་པར་ཙིར་ཧྲེང་པའོ་ལུའོ་ཀྲོའུ་བཙུགས་སློབ་ཆེན་ཁུང་ཙི་སློབ་གླིང་གི་པར་ཙིར་ཕྱོགས་ཀྱི་ཡོན་ཀྲང་གི་འགན་འཁུར་ནས་ཀྲུང་གོར་འཚམས་འདྲི་ཐེངས་བཅུ་གྲངས་བྱེད་མྱོང་བ་དང་། ཡུན་རིང་ཀྲུང་གོར་ཞིབ་འཇུག་བྱས་ཏེ་པར་ཀྲུང་རྒྱལ་ཁབ་གཉིས་པོའི་སློབ་གསོ་དང་རིག་གནས་སོགས་ཁྱབ་ཁོངས་ཀྱི་སྤེལ་རེས་དང་མཉམ་ལས་ལ་སྐུལ་འདེད་གཏོང་རྒྱུར་གཞོལ་ཡོད། ན་ནིང་ཟླ་11པར། པའོ་ལི་ནུའོ་ཡིས་པེ་ཅིང་དང་ཧུའུ་པེ་སོགས་སུ་རྟོག་ཞིབ་བྱས་ཤིང་། “ཀྲུང་གོའི་དཔལ་འབྱོར་གྱི་ལྡེམ་ཤུགས་དང་གསོན་ཤུགས་ཀྱིས་ང་ལ་བག་ཆགས་ཟབ་མོ་བཞག་བྱུང་། བསྐྱར་སྐྱེས་ཐུབ་པའི་ནུས་རྒྱུ་བེད་སྤྱོད་དང་ནུས་རྒྱུ་གསར་པའི་རླངས་འཁོར་སོགས་ཁྱབ་ཁོངས་ནང་ཀྲུང་གོ་འཛམ་གླིང་གི་མདུན་གྲལ་དུ་སླེབས་ཡོད། འབྱུང་འགྱུར་ལས་རིགས་དེ་དག་གིས་ཀྲུང་གོའི་དཔལ་འབྱོར་འཕར་རྒྱུར་སྐུལ་འདེད་ཐུབ་རྒྱུ་མ་ཟད། ད་དུང་གོ་ལ་ཧྲིལ་པོའི་རྒྱུན་མཐུད་ཆོག་པའི་འཕེལ་རྒྱས་ལ་ལེགས་སྐྱེས་གལ་ཆེན་འབུལ་ཐུབ་ངེས་རེད”ཅེས་པའོ་ལི་ནུའོ་ཡིས་བརྗོད།
ཀྲུང་གོའི་དཔལ་འབྱོར་མགྱོགས་མྱུར་འཕར་བའི་དུས་མཚམས་ནས་སྤུས་ཚད་མཐོ་བའི་འཕེལ་རྒྱས་ཀྱི་དུས་མཚམས་སུ་སླེབས་པར་པའོ་ལི་ནུའོ་ལ་མྱོང་ཚོར་ཟབ་མོ་བྱུང་ཞིང་། “རྨང་གཞིའི་སྒྲིག་བཀོད་འཛུགས་སྐྲུན་དང་། ཚན་རྩལ་གསར་གཏོད། གྲངས་འཛིན་དཔལ་འབྱོར། ལྗང་མདོག་འཕེལ་རྒྱས་སོགས་ཀྱི་ཁྱབ་ཁོངས་སུ་ཀྲུང་གོར་གྲུབ་འབྲས་ཧ་ཅང་ཆེན་པོ་ཐོབ་ཡོད” པའོ་ལི་ནུའོ་ཡིས་ཀྲུང་གོས་མི་ཐབས་རིག་ནུས་དང་། 5Gའཕྲིན་གཏོང་། བསྐྱར་སྐྱེས་ཐུབ་པའི་ནུས་རྒྱུ་སོགས་ཁྱབ་ཁོངས་ཀྱི་འཕེལ་རྒྱས་ལ་སྣེ་ཁྲིད་བྱེད་བཞིན་ཡོད། རྒྱལ་སྒྲོལ་ཁེ་ལས་མང་པོ་ཞིག་གིས་ཀྲུང་གོར་ཞིབ་འཇུག་གསར་སྤེལ་ལྟེ་གནས་བཙུགས་པ་དེ་ཡང་ཀྲུང་གོར་གསར་གཏོད་ནུས་པ་ཆེན་པོ་དང་ཁྲོམ་རའི་མི་མངོན་པའི་སྟོབས་ཤུགས་ཆེན་པོ་ཡོད་པས་རེད་ཅེས་བརྗོད།
པའོ་ལི་ནུའོ་ཡིས་ཀྲུང་གོས་འབྱུང་འགྱུར་ཐོན་ལས་འཕེལ་རྒྱས་གཏོང་བ་དང་ཐོན་སྐྱེད་ནུས་ཤུགས་གསར་མ་སྐྱེད་སྲིང་བྱེད་དགོས་ལུགས་ནན་བཤད་བྱེད་པ་དེ་དཔལ་འབྱོར་གྱི་གྲུབ་ཆ་ལེགས་སྒྲིག་ལ་སྐུལ་འདེད་གཏོང་བ་དང་དཔལ་འབྱོར་གྱི་ཡུན་རིང་གི་འགྲན་རྩོད་ནུས་པ་ཆེ་རུ་གཏོང་རྒྱུར་ཕན་ཐོགས་ཡོད་པའི་ངོས་འཛིན་བྱས། “ལྷག་པར་དུ་མི་ཐབས་རིག་ནུས་དང་། ཚད་རྡུལ་རྩིས་རྒྱག སྐྱེ་དངོས་སྨན་རྫས་སོགས་ཚན་རྩལ་འདུས་ཚད་མཐོ་བའི་ཁྱབ་ཁོངས་སུ་ཐོན་སྐྱེད་ནུས་ཤུགས་གསར་མ་སྐྱེད་སྲིང་དང་འཕེལ་རྒྱས་གཏོང་བ་དེས་ཀྲུང་གོས་གོ་ལ་ཧྲིལ་པོའི་གསར་གཏོད་ས་ཁོངས་ཁྲོད་དེ་བས་གལ་འགངས་ཆེ་བའི་གནས་བབ་བཟུང་ཐུབ་རྒྱུ་རེད” པའོ་ལི་ནུའོ་ཡིས“འབྲེལ་ཡོད་ལྕག་སྐུལ་སྲིད་ཇུས་ལ་རྒྱུན་མཐུད་སྐུལ་འདེད་གཏོང་བ་བརྒྱུད། ཀྲུང་གོའི་འབྱུང་འགྱུར་ཐོན་ལས་འཕེལ་རྒྱས་ཐད་ཚད་བརྒལ་དེ་བས་མང་བ་བྱུང་ནས་གོ་ལ་ཧྲིལ་པོའི་ཐོན་ལས་འཁོར་འབྲེལ་རིམ་སྤོར་ལ་སྐུལ་ཁྲིད་ཐུབ་ངེས་ཡིན་པ་ང་ལ་ཡིད་ཆེས་ཡོད”ཅེས་བརྗོད།
པའོ་ལི་ནུའོ་ཡིས་དེང་གི་འཛམ་གླིང་ལ་གནམ་གཤིས་འགྱུར་ལྡོག་དང་། ནུས་རྒྱུའི་བདེ་འཇགས། སྤྱི་པའི་འཕྲོད་བསྟེན་བདེ་འཇགས་སོགས་ཀྱི་འགྲན་སློང་ཆེན་པོ་འཕྲད་ཡོད་པས། རྒྱལ་སྤྱིའི་སྤྱི་ཚོགས་ཀྱིས་ལག་གདང་སྦྲེལ་ནས་ཁ་གཏད་གཅོག་དགོས། “དཔལ་འབྱོར་གོ་ལ་ཅན་འགོག་ཐབས་མེད་པས་རྒྱལ་ཁབ་ཁག་གིས་ངེས་པར་ཕྱར་བ་གྲུ་འདེགས་བྱས་ཏེ་མཉམ་དུ་གནད་དོན་ཐག་གཅོད་བྱེད་པའི་གོ་ལ་ཧྲིལ་པོའི་ཇུས་གཞི་བཟོ་དགོས”ཞེས་བརྗོད། ཡང་ཁོང་གིས་ཀྲུང་གོ་ནི་གོ་ལ་ཧྲིལ་པོའི་དཔལ་འབྱོར་འཕར་བའི་སྒུལ་ཤུགས་གལ་ཆེན་ཞིག་ཡིན་པ་མ་ཟད། རྒྱལ་སྤྱིའི་མཉམ་ལས་ཀྱི་འགག་རྩའི་སྐུལ་འདེད་གཏོང་མཁན་ཞིག་ཀྱང་ཡིན། ཀྲུང་གོས་ཕྱོགས་མང་རིང་ལུགས་བློ་བརྟན་འགྱུར་མེད་ངང་ལག་བསྟར་བྱས་ནས“རྒྱུད་གཅིག་ལམ་གཅིག”མཉམ་སྐྲུན་གྱི་གྲོས་འགོ་དང་གོ་ལ་ཧྲིལ་པོའི་འཕེལ་རྒྱས་ཀྱི་གྲོས་འགོ་སོགས་བཏོན་ཏེ། གོ་ལ་ཧྲིལ་པོའི་འཕེལ་རྒྱས་ལ་ཇུས་གཞི་གསར་པ་དང་གོ་སྐབས་གསར་པ་བཏོད་དེ་བསྟུན་མཁས་རང་བཞིན་གྱི་སྒོ་ནས་འཕར་རྒྱུར་སྐུལ་འདེད་གཏོང་བར་ལེགས་སྐྱེས་ཧུར་ཐག་འབུལ་བཞིན་ཡོད་ཅེས་བརྗོད།