ཚེས་10ཉིན། མཉམ་འབྲེལ་རྒྱལ་ཚོགས་བུད་མེད་ཀྱི་གནས་བབ་ཨུ་ལྷན་གྱི་ཚོགས་འདུ་སྐབས་དྲུག་ཅུ་རེ་དགུ་པ་མཉམ་འབྲེལ་རྒྱལ་ཚོགས་སྤྱི་ཁྱབ་པུའུ་རུ་འགོ་ཚུགས་ཤིང་། པེ་ཅིང་འཛམ་གླིང་བུད་མེད་ཚོགས་ཆེན་འཚོགས་ནས་ལོ་30འཁོར་བར་དྲན་གསོ་ཞུ་ཆེད། སྐབས་འདིའི་ཚོགས་འདུའི་ཐོག《པེ་ཅིང་གི་བསྒྲགས་གཏམ》དང《བྱ་སྤྱོད་ཀྱི་རྩ་འཛིན》གྱི་གྲུབ་འབྲས་ལག་བསྟར་བྱས་ཚུལ་ལ་ཞིབ་བཤེར་དང་དཔྱད་དཔོག་བྱས་པ་རེད།

མཉམ་འབྲེལ་རྒྱལ་ཚོགས་ཀྱི་དྲུང་ཆེ་ཀུའུ་ཐེ་ལེ་སི་ཡིས་འགོ་ཚུགས་ཚོགས་འདུའི་ཐོག་ཤིས་ཚིག་སྒྲོན་སྐབས། འདས་ཟིན་པའི་ལོ་30ཡི་རིང་། འཛམ་གླིང་ལ་ཡར་རྒྱས་རབ་དང་རིམ་པ་བྱུང་བ་སྟེ། བྱིས་པ་བུ་མོའི་སློབ་གསོའི་ཆུ་ཚད་མཐོ་རུ་ཕྱིན་པ་དང་། སྦྲུམ་མ་ཤི་ཚད་དམའ་རུ་ཕྱིན་པ། བུད་མེད་ཀྱི་བཅའ་ཁྲིམས་སྲུང་སྐྱོང་ལ་ཤུགས་སྣོན་ཐེབས་པ་སོགས་བྱུང་ཡོད་མོད། འོན་ཀྱང་ཧེ་བག་ཧ་ཅང་ཆེན་པོ་སྔར་བཞིན་གནས་ཡོད། གཏུམ་སྤྱོད་དང་། མཐོང་ཆུང་། དཔལ་འབྱོར་འདྲ་མཉམ་མིན་པ་སོགས་ཀྱི་སྣང་ཚུལ་སྔར་བཞིན་ཡོངས་ཁྱབ་ངང་གནས་ཡོད། ཕོ་མོའི་གླ་ཆའི་ཧེ་བག་20%ཟིན་པ་དང་གོ་ལ་ཧྲིལ་པོའི་བུད་མེད་1/3ཙམ་ལ་གཏུམ་སྤྱོད་ཕོག་མྱོང་ཡོད་ཅེས་བརྗོད། ཁོང་གིས། བུད་མེད་ལ་འདྲ་མཉམ་ངང་རྒྱུན་མཐུད་ཆོག་པའི་མ་དངུལ་བསྡུ་སྒྲིལ་མཁོ་འདོན་བྱེད་པ་དང་། བུད་མེད་རྩ་འཛུགས་ལ་རྒྱབ་སྐྱོར་བྱེད་ཤུགས་ཆེ་རུ་གཏོང་བ། ལག་རྩལ་གྱི་ཧེ་བག་མེད་པར་བཟོ་བ། བུད་མེད་ཐབས་ཇུས་འདོན་པའི་ནང་ཧུར་ཐག་ཞུགས་པ་དང་འབྲེལ་འགོ་ཁྲིད་ཀྱི་ནུས་པ་གང་ལེགས་འདོན་རྒྱུར་འགན་ལེན་བྱེད་པ་སོགས་ཀྱི་བྱ་ཐབས་བརྒྱུད། ཕོ་མོའི་ཧེ་བག་མེད་པ་བཟོས་ཏེ་བུད་མེད་ལ་དབང་ཆ་སྤྲོད་པར་སྐུལ་འདེད་གཏོང་རྒྱུའི་འབོད་སྐུལ་བྱས་པ་རེད།

ཀུའུ་ཐེ་ལེ་སི་ཡིས“བུད་མེད་ཀྱི་ཁེ་དབང་ལ་ཉམས་ཉེན་འཕྲད་སྐབས། ང་ཚོས་ངེས་པར་དུ《པེ་ཅིང་གི་བསྒྲཌ་གཏམ》གྱི་མཐའ་འཁོར་དུ་མཐུན་སྒྲིལ་བྱས་ཏེ《བྱ་སྤྱོད་ཀྱི་རྩ་འཛིན》དོན་འཁྱོལ་བྱེད་པར་བསྐྱར་དུ་འབད་བརྩོན་བྱས་ནས་འཛམ་གླིང་གི་བུད་མེད་དང་བྱིས་པ་བུ་མོ་ཚང་མར་ཁེ་དབང་དང་། འདྲ་མཉམ། དབང་སྤྲོད་བཅས་ཐུབ་པའི་ཁས་ལེན་དོན་ཐོག་ཏུ་མཐའ་གཅིག་ཏུ་འཁྱོལ་བ་བྱེད་དགོས”ཞེས་བརྗོད།

མཉམ་འབྲེལ་རྒྱལ་ཚོགས་བུད་མེད་ཧྲུའུ་ཡི་ལག་བསྟར་ཀྲུའུ་རེན་པཱ་ཧུའུ་སི་ཡིས། གྲངས་གཞིའི་ཧེ་བག་ཆུང་དུ་གཏོང་བ་དང་། མ་དངུལ་བཏང་ནས་དབུལ་ཕོངས་སེལ་བ། བཅའ་ཁྲིམས་ལ་ཤུགས་སྣོན་རྒྱག་པ་སོགས་ཀྱི་བྱ་སྤྱོད་སྤེལ་ནས། བུད་མེད་དང་བྱིས་པ་བུ་མོར་དམིགས་པའི་གཏུམ་སྤྱོད་མི་ཐོན་པ་བྱེད་པ་དང་འབྲེལ། བུད་མེད་དེ་བས་མང་བ་འགག་རྩའི་ཐབས་ཇུས་འདོན་པ་དང་ཞི་བདེ་འཛུགས་སྐྱོང་ནང་ཞུགས་སུ་འཇུག་དགོས་པའི་འབོད་སྐུལ་བྱས་པ་རེད།