གསར་འགོད་པར་ཧེ་ལུང་ཅང་ཞིང་ཆེན་བསྡོམས་རྩིས་ཅུས་ནས་ཤེས་རྟོགས་བྱུང་བར་གཞིགས་ན། ཧེ་ལུང་ཅང་ཞིང་ཆེན་གྱིས་རྒྱལ་ཡོངས་ཀྱི་ཁྱབ་ཁོངས་སུ་གངས་འཁྱགས་དཔལ་འབྱོར་ལ་བསྡོམས་རྩིས་ལྟ་ཞིབ་ཚད་ལེན་དང་བརྟག་དཔྱད་ཚད་ལེན་ཞིབ་རྩིས་ཀྱི་ལས་དོན་སྔོན་ལ་སྤེལ་བ་རེད། གྲངས་གཞི་ལས་མངོན་པར། 2024ལོར་ཧེ་ལུང་ཅང་གི་གངས་འཁྱགས་དཔལ་འབྱོར་གྱི་ཐོན་འབོར་བསྡོམས་འབོར་སྒོར་དུང་ཕྱུར་2661.7ཟིན་པའི་ནང་གངས་འཁྱགས་ཡུལ་སྐོར་གྱི་ཐོན་འབོར་སྒོར་དུང་ཕྱུར་1823.3ཟིན་ཡོད་པ་རེད།

“བསྡོམས་རྩིས་ཀྱི་གྲངས་གཞི་ལས་ཧེ་ལུང་ཅང་ཞིང་ཆེན་འདི་ཉིད་རང་རྒྱལ་གྱི་དེང་རབས་གངས་འཁྱགས་ལུས་རྩལ་འབྱུང་ཁུངས་དང‘གངས་འཁྱགས་ཀྱིས་བསྡམས་པའི་ས་གཞིའང་གསེར་རི་དངུལ་རི་ཡིན་པ’ལག་བསྟར་བྱ་ཡུལ་ཡིན་པའི་འཕེལ་རྒྱས་ཀྱི་གྲུབ་འབྲས་གང་ལེགས་མངོན་ཡོད”ཅེས་ཧེ་ལུང་ཅང་ཞིང་ཆེན་བསྡོམས་རྩིས་ཅུས་ཀྱི་ཅུས་ཀྲང་གཞོན་པ་ཡན་ཧུའེ་ཅུན་གྱིས་ངོ་སྤྲོད་བྱས་པ་དང་། བསྡོམས་རྩིས་གྲངས་གཞིའི་འདེགས་སྐྱོར་ནུས་པ་གང་ལེགས་འདོན་ཆེད། ཞིང་ཆེན་བསྡོམས་རྩིས་ཅུས་ཀྱིས་ཁྲལ་དོན་དང་། རིག་གནས་ཡུལ་སྐོར། ལུས་རྩལ། འགྲིམ་འགྲུལ། ཞིང་ལས་དང་གྲོང་གསེབ། བཟོ་འཕྲིན་སོགས་སྡེ་ཚན་གྱི་མཐུན་སྦྱོར་གཞོགས་འདེགས་འོག གངས་འཁྱགས་དཔལ་འབྱོར་གྱི་འབྲེལ་ཡོད་སྡེ་ཚན་གྱི་གྲངས་གཞི་ཁྱོན་ཡོངས་ནས་བསྡུ་རུབ་དང་ལེགས་སྒྲིག་བྱས་པ་རེད།

དེའི་རྨང་གཞིའི་ཐོག་ཧེ་ལུང་ཅང་ཞིང་ཆེན་བསྡོམས་རྩིས་ཅུས་ཀྱིས“གནད”ཀྱིས“ཁྱོན”ཁྲིད་པ་སོགས་ཀྱི་བྱ་ཐབས་སྤྱད་དེ་ཞིང་ཆེན་ཡོངས་ཀྱི་མཛེས་ལྗོངས་ཁུལ་དང་། ཉོ་སྒྲུབ་ཚོང་སྐོར། གངས་འཁྱགས་རོལ་རྩེད་གླིང་། གངས་ཤུད་ར་བ། རྟེན་མཛོད་ཁང་། རིག་གནས་སྒྱུ་རྩལ་ཁང་། ཞོགས་ཁྲོམ་དང་མཚན་ཁྲོམ་སོགས་རིགས་ཆེན་པོ་7གྱི་གཙོ་གནད་ཡུལ་སྐོར་རྣམ་གྲངས་200ལྷག་ཙམ་ལ་དཔེ་མཚོན་བརྟག་དཔྱད་བྱས་པ་དེ་གཉེར་སྐྱོང་བྱེད་པོ་ཁྲི་4ལྷག་ཙམ་དང་འབྲེལ་བ་ཡོད་པ་རེད།

ཚོད་རྩིས་རགས་ཙམ་བྱས་འབྲས་ནས་བལྟས་ན། ཧེ་ལུང་ཅང་གི་གངས་འཁྱགས་དཔལ་འབྱོར་འཕེལ་ཤུགས་ཆེ་བ་དང་། ཉམས་ཞན་གྱི་ཐོན་ཁུངས་དེ་དཔལ་འབྱོར་གྱི་ལེགས་ཆར་བསྒྱུར་བའི་གྲུབ་འབྲས་སྔར་བས་མངོན་གསལ་དོད་པོ་བྱུང་ནས། དུས་ཚིགས་གཅིག་ལ་སྐད་གྲགས་ཡོད་པ་ནས་དུས་ཚིགས་བཞི་ཀར་སྐད་གྲགས་ཡོད་པའི་བར་དང་ས་ཆ་གཅིག་ལ་འཕེལ་རྒྱས་ཆེ་བ་ནས་ཞིང་ཆེན་ཡོངས་སུ་འཕེལ་རྒྱས་འགྲོ་བའི་བར་གྱི་འཕེལ་ཕྱོགས་རགས་ཙམ་མངོན་ཏེ། འབྲེལ་ཡོད་ཐོན་ལས་ལ་སྐུལ་ཁྲིད་བྱེད་པའི་ནུས་པ་སྔར་ལས་ལྷག་པ་ཐོན་པ་དང་དཔལ་འབྱོར་འཕེལ་རྒྱས་ལ་འདེགས་སྐྱོར་བརྟན་པོ་བྱས་ཡོད།

2024ལོར། ཧེ་ལུང་ཅང་དང་གངས་འཁྱགས་ཡུལ་སྐོར་དབར་འབྲེལ་བ་ཅུང་ཆེ་བའི་བོགས་གཏོང་དང་ཚོང་དོན་ཞབས་ཞུའི་ལས་རིགས་དང་རིག་གནས་ལུས་རྩལ་དང་རོལ་རྩེད་ལས་རིགས་གཞི་ཁྱོན་ཡན་གྱི་ཚན་པའི་ལས་གཉེར་ཡོང་འབབ་དུས་མཚུངས་ལས་12.9%དང་17.6%སོ་སོར་འཕར་བ་དང་། ཞག་སྡོད་ལས་རིགས་དང་བཟའ་བཏུང་ལས་རིགས་ཀྱི་ཚོང་གཉེར་ཡོང་འབབ་2023ལོའི་འཕར་ཚད་རྒྱུན་མཐུད་ཐུབ་པ། ལྕགས་ལམ་དང་། དམངས་སྤྱོད་མཁའ་འགྲུལ། གཞུང་ལམ་བཅས་ཀྱི་འགྲུལ་སྐྱེལ་བྱེད་ཚད་ཚང་མ་གྲངས་གནས་གཉིས་འཕར་རྒྱུ་རྒྱུན་འཁྱོངས་ཐུབ་པ་བཅས་རེད། གངས་འཁྱགས་ཡུལ་སྐོར་གྱི་འཛད་སྤྱོད་དགོས་མཁོ་ཆེ་རུ་ཕྱིན་པ་དེས་ཤིང་ཏོག་མན་ཡུའེ་མེ་དང་ངང་ཆེན་སོགས་ཁྱད་ལྡན་ཞིང་ལས་ཐོན་རྫས་ཀྱི་ཐོན་འབབ་ཆེས་ཆེར་འཕར་བར་སྐུལ་ཁྲིད་ཐུབ་ཡོད།