ཉི་འོད་དྲོ་བའི་ཕྱི་དྲོར་གསར་འགོད་པ་ཤིང་གི་དྲི་བསུང་འཐུལ་བའི་ལས་དོན་ཁང་ཞིག་ཏུ་སྐྱོད་སྐབས། དེར་ད་ལོ་ལོ་56ལ་སླེབས་པའི་ཤིང་བརྐོས་བཟོ་རྩལ་ཆེ་མོ་བ་ལྷག་པ་ཚེ་རིང་ལས་ཀ་བྱེད་བཞིན་འདུག

ལག་ཤེས་སྦྱོང་བའི་བརྒྱུད་རིམ་སྐོར་གླེང་སྐབས། ལྷག་པ་ཚེ་རིང་གི་མིག་གཉིས་སྔར་བས་གྲུང་ཤ་དོད་དུ་ཕྱིན། 1983ལོར་ཕོ་བྲང་པོ་ཏ་ལའི་ཤིང་གི་གདུང་མ་དང་། སྒོ ཀ་བ་ཁག་གཅིག་ཉམས་གསོ་བྱེད་འགོ་ཚུགས་པར་ཤིང་བརྐོས་ལ་དགའ་པོ་བྱེད་མཁན་ཁོང་གི་ངོས་ནས་བརྗོད་ཚེ། དེ་ནི་ཧ་ཅང་ཐོབ་པར་དཀའ་བའི་གོ་སྐབས་བཟང་པོ་ཞིག་རེད། དེ་དུས་ལོ་15ཡིན་པའི་ཁོང་གིས་ཉམས་གསོའི་ལས་འགན་འཁུར་མཁན་ཤིང་བརྐོས་བཟོ་རྩལ་ཆེ་མོ་བ་བདེ་ཆེན་བསྟེན་ནས་ལག་རྩལ་སྦྱོང་རྒྱུའི་སེམས་ཐག་བཅད། ཤིང་བརྐོས་བཟོ་རྩལ་ཆེ་མོ་བ་བདེ་ཆེན་ནི་བོད་ཀྱི་ཤིང་བརྐོས་ལས་རིགས་ཀྱི་གུས་བཀུར་ཞུ་ས་ཞིག་ཡིན་པ་མ་ཟད། ཁོང་གི་སེམས་ནང་གི་ཡིད་སྨོན་དང་མིག་དཔེ་བྱ་ཡུལ་ཞིག་དེ་བས་ཡིན་པ་རེད།

“‘མིའི་ཚེ་སྲོག་ལ་ཚད་ཡོད་ཀྱང་ཤིང་བརྐོས་བརྩམས་ཆོས་རྩེ་གྲ་ནི་མི་རབས་མང་པོ་བརྒྱུད་རྗེས་རབས་པ་ཚོས་བསྔགས་བརྗོད་བྱ་ཡུལ་དུ་གྱུར་ངེས’ཞེས་པའི་ཤིང་བརྐོས་ཆེ་མོ་བ་བདེ་ཆེན་གྱི་བཀའ་མོལ་དེ་ངའི་སེམས་ནང་གསལ་ལེར་དྲན་ལ། བཀའ་མོལ་དེའང་ང་རང་ཤིང་བརྐོས་ལག་རྩལ་གྱི་ལམ་བུར་བརྟན་པོར་སྐྱོད་པའི་སྒུལ་ཤུགས་ཀྱི་འབྱུང་ཁུངས་སུ་གྱུར་སོང”ཞེས་ལྷག་པ་ཚེ་རིང་གིས་ཕྱིར་དྲན་བྱེད་བཞིན་དུ་བརྗོད། ཤིང་བརྐོས་བཟོ་རྩལ་ཆེ་མོ་བ་བདེ་ཆེན་གྱི་མཛུབ་སྟོན་ཞིབ་ཚགས་འོག་ཁོང་གིས་བློ་རྩེ་གཅིག་སྒྲིམ་གྱིས་ཤིང་བརྐོས་ལག་ཤེས་ལོ་20ལྷག་ཙམ་སྦྱངས།

ལག་ཤེས་བྱང་ཆུབ་པ་ཕུད། ལྷག་པ་ཚེ་རིང་གིས་ད་དུང་རྒྱུན་འཛིན་དང་གསར་གཏོད་ལ་མཐོང་ཧ་ཅང་ཆེན་པོ་བྱེད་ཀྱི་ཡོད། 2014ལོར་ལྷག་པ་ཚེ་རིང་གིས་ལྷ་སར་ཞིང་འབྲོག་པའི་མི་རིགས་ལག་ཤེས་ཤིང་བརྐོས་ཆེད་ལས་མཉམ་ལས་ཁང་བཙུགས་པ་དང་། ཁོང་གིས་དགེ་ཕྲུག་ཉར་ནས་ལག་ཤེས་སློབ་རྒྱུ་མཐའ་འཁྱོངས་བྱས་ཏེ་ཤིང་བརྐོས་རྒྱུན་འཛིན་དང་འཕེལ་རྒྱས་གཏོང་བའི་ལས་ལ་གཞོལ་ཞིང་། ཁོང་གིས་རྒྱུན་འཛིན་པ་གསར་པ་གསོ་སྦྱོང་ཟམ་མི་ཆད་པར་བྱས་ཚེ། གཞི་ནས་གནའ་བོའི་ལག་ཤེས་འདིར་སྐྱེ་སྟོབས་དང་གསོན་ཤུགས་གསར་པ་འཕེལ་ཐུབ་པ་གསལ་པོར་ཤེས་ཀྱི་ཡོད། དེར་བརྟེན་ཁོང་གིས་ངང་རྒྱུད་རིང་པོས་དགེ་ཕྲུག་ཚང་མར་རང་ཉིད་ཀྱི་ལག་ཤེས་དང་ཉམས་མྱོང་ཡོད་ཚད་བུམ་པ་གང་བྱོའི་ཚུལ་དུ་སློབ་ཀྱི་ཡོད།

སྲོལ་རྒྱུན་བཟོ་རྩལ་བརྟན་སྲུང་དང་བཟོ་བོའི་སྙིང་སྟོབས་དོན་གཉེར་བྱས་པར་བརྟེན། ལྷག་པ་ཚེ་རིང་ལ་ཤིང་བརྐོས་ཁྱབ་ཁོངས་སུ་གྲུབ་འབྲས་གཟེངས་སུ་ཐོན་པ་ཐོབ་ནས། ཁོང་གི་བརྩམས་ཆོས་ལ་རྒྱལ་ནང་དུ་བྱ་དགའ་ཐེངས་མང་ཐོབ་པ་མ་ཟད། རྒྱལ་སྤྱིའི་གྲོགས་པོ་ཚོས་ཀྱང་བསྔགས་བརྗོད་ཆེན་པོ་བྱས་ཡོད། 2019ལོར་ལྷག་པ་ཚེ་རིང་ལ“བོད་ཀྱི་བཟོ་བོའི”གཟི་བརྗིད་མཚན་སྙན་ཐོབ་ཅིང་། དེ་ནི་ཁོང་གི་ལོ་མང་དཀའ་སྤྱད་འབད་བརྩོན་ལ་ཁས་ལེན་བྱས་པ་ཞིག་རེད། གཟི་བརྗིད་མཚན་སྙན་དེ་ནི་ཁོང་མི་སྒེར་གྱི་བཟོ་རྩལ་ལ་ཁས་ལེན་ཐོབ་པ་ཞིག་ཡིན་པ་མ་ཟད། བོད་ཀྱི་ཤིང་བརྐོས་ལག་ཤེས་རྒྱུན་འཛིན་དང་འཕེལ་རྒྱས་ལ་ལྕག་སྐུལ་དང་སྐུལ་འདེད་བཏང་བ་ཞིག་ཀྱང་དེ་བས་རེད།