འདི་ནི་གཞིས་རྩེ་ནས་ཡིན་པའི་མིག་དམར་བསྟན་འཛིན་གྱིས་ཁྲེང་ཀོན་ཆུས་སུ་གནས་པའི་ཤིང་བརྐོས་ལས་དོན་ཁང་དུ་ཤིང་བརྐོས་ལག་ཤེས་སྦྱོང་བཞིན་པ།

འདི་ནི་ལྷུན་གྲུབ་ནས་ཡིན་པའི་རྡོ་རྗེས་ཁྲེང་ཀོན་ཆུས་སུ་གནས་པའི་ཤིང་བརྐོས་ལག་ཤེས་ཁང་དུ་ཤིང་བརྐོས་ལག་ཤེས་སྦྱོང་བཞིན་པ།

ཉེ་ཆར། གསར་འགོད་པ་ལྷ་ས་གྲོང་ཁྱེར་སྟོད་ལུང་བདེ་ཆེན་ཆུས་གནམ་གང་ཤིང་བརྐོས་བཟོ་ཁང་དུ་བསྐྱོད་དེ་གནམ་གང་བོད་ཀྱི་ཤིང་བརྐོས་སྐོར་གྱི་གཏམ་རྒྱུད་ཉན་ནས་བོད་ཀྱི་ཤིང་བརྐོས་ཉམས་ལེན་དང་ལག་ཤེས་དེའི་རྒྱབ་ཀྱི་བརྟན་སྲུང་དང་སྟོབས་ཤུགས་ཚོར་བ་བྱས།

2008ལོར། བོད་ཀྱི་ཤིང་བརྐོས་དེ་ཉིད་རྒྱལ་ཁབ་རིམ་པའི་མངོན་མིན་རིག་གནས་ཤུལ་བཞག་གི་མིང་གཞུང་ཁག་གཉིས་པའི་ནང་བཅུག་པ་རེད།

ད་ལོ་ལོ་46ལ་སླེབས་པའི་གནམ་གང་ནི་གཞིས་རྩེ་ནས་ཡིན་ཞིང་། ཕ་མེས་ཡང་མེས་ནས་ཤིང་བརྐོས་ལག་རྩལ་ལ་བྱང་པའི་ཁོར་ཡུག་ཁྲོད་འཚར་ལོངས་བྱུང་ཡོད། ཁྱིམ་དུ་ཡོད་པའི་ཤིང་བརྐོས་ཁྱིམ་ཆས་དེ་དག་གི་བཟོ་བཀོད་ལེགས་པ་དང་མཛེས་ཉམས་གཞན་དང་མི་འདྲ་བ་ཞིག་ཡོད་པས་ཉེ་འཁོར་མང་ཚོགས་ཀྱིས་བསྔགས་བརྗོད་ཆེན་པོ་བྱེད་པ་མ་ཟད། བོད་ཀྱི་ཤིང་བརྐོས་ལག་ཤེས་རྒྱུན་འཛིན་གྱི་མིག་དཔེར་འཛིན་པས་རྟག་ཏུ་ཡུལ་གྲུ་གཞན་གྱི་ཉར་ཚགས་པ་དང་ཤིང་བརྐོས་ལ་དགའ་པོ་བྱེད་མཁན་ཚོས་ཉོ་བར་ཡོང་གི་ཡོད། སྲིད་གཞུང་གིས་བོད་ཀྱི་མངོན་མིན་རིག་གནས་ཤུལ་བཞག་ལ་རྒྱབ་སྐྱོར་དང་དྲིལ་བསྒྲགས་ཤུགས་ཆེན་བྱས་པ་དང་དེ་བཞིན་བོད་ཀྱི་དྲ་ཐོག་ཚོང་དོན་འཕེལ་རྒྱས་ཀྱི་ཆུ་ཚད་ཕྱོགས་ཡོངས་ནས་མཐོ་རུ་གཏོང་བའི་སྲིད་ཇུས་ཀྱི་ཕན་པ་ཐོབ་སྟེ་བརྐོས་མ་དེ་དག་བོད་དུ་བྲིན་ཁ་རྒྱུག་པ་མ་ཟད། ད་དུང་སྟབས་བདེ་བའི་དྲ་ཐོག་ཚོང་དོན་གྱི་ཟོག་འགྲེམས་བརྒྱུད་མཚོ་སྔོན་དང་སི་ཁྲོན་སོགས་སུའང་འཚོང་གི་ཡོད་པ་རེད། ཤིང་བརྐོས་ལག་ཤེས་ལ་བརྟེན་ནས་གནམ་གང་ཁྱིམ་ལ་ལོ་རེའི་ཡོང་འབབ་སྒོར་ཁྲི་བཅུ་གྲངས་ཟིན་གྱི་ཡོད། གནམ་གང་ཁྱིམ་ཚང་བཟོ་ཁང་གིས་ད་དུང་ཉེ་འཁོར་གྱི་ན་གཞོན་བཅུ་ལྷག་ཙམ་ལས་ཀར་བསྡུས་ནས་གནའ་བོའི་ལག་ཤེས་རྒྱུན་འཛིན་བྱེད་པ་དང་ཆབས་ཅིག་ད་དུང་ཁྱིམ་ཚང་ལ་ཡོང་འབབ་ཀྱང་བསགས་ཏེ་བོད་ཀྱི་ཤིང་བརྐོས་ལག་ཤེས་རྒྱུན་འཛིན་དང་འཕེལ་རྒྱས་ལ་མཉམ་དུ་སྐུལ་འདེད་གཏོང་གི་ཡོད།

ཁོང་གི་ཤིང་བརྐོས་བཟོ་ཁང་དུ་སྐྱོད་སྐབས། ཤིང་གི་དྲི་བསུང་ཞིག་སོག་ཕྱེ་དང་སྦྲགས་ནས་འཐུལ་འོང་བ་དང་། གནམ་གང་གིས་རྐོ་གྲི་དམ་པོར་བཟུང་ནས་ཤིང་སྟག་མ་ཞིག་ལ་རྩེ་གཅིག་ཏུ་བརྐོས་དཀྲོལ་བྱེད་བཞིན་འདུག “ཆུང་དུས་ནས་ང་ཤིང་བརྐོས་སྦྱངས་རྒྱུར་དགའ་པོ་ཡོད”ཅེས་གནམ་གང་གིས་ལག་ཤེས་སྦྱོང་བའི་ལོ་ཟླ་ཕྱིར་དྲན་བྱས། “ལོ་12ནས་ངས་དགེ་རྒན་བསྟེན་ནས་རྐོ་གྲི་བརྡར་བ་དང་ཤིང་ཆ་འདེམས་སྟངས་སྦྱོང་འགོ་བཙུགས་ཏེ་འཁྱུག་ཙམ་ཞིག་ལ་ལོ་བཅུ་ཕྲག་ཕྱིན་འདུག ཤིང་ཆ་ཚང་མར་སོ་སོའི་ཁྱད་ཆོས་ཡོད་པས་སེམས་རྣལ་དུ་ཕབ་ནས་དེར་རྒྱུས་ལོན་བྱེད་དགོས། དེར་བརྟེན་ཤིང་ཆའི་ལྷུན་གྱིས་གྲུབ་པའི་བཟོ་ལྟ་དང་ཁྲ་རིས་གཞིར་བཟུང་བརྐོས་དཀྲོལ་བྱས་ཏེ་འཛེར་ཆ་རྣམས་ཐུན་མོང་མ་ཡིན་པའི་ཇུས་འགོད་ཀྱི་ཁྱད་ཆོས་སུ་སྒྱུར་གྱི་ཡོད”ཅེས་བཤད། ཁོང་གིས་ངོ་སྤྲོད་བྱས་པར། ལོ་རེའི་བོད་ཀྱི་ལོ་གསར་གྱི་སྔ་ནུབ་ལ་ཚོང་ཡག་པོ་ཡོད་པ་དང་། ས་གནས་ཁག་གི་ཚོང་ཤག་དང་ཡུལ་སྐོར་བས་བཟོ་ཁང་ཁེངས་པ་མ་ཟད། མངགས་ཐོའང་མང་དུ་འགྲོ་གི་ཡོད། གནམ་གང་དང་དགེ་ཕྲུག་ཚོས་ཉིན་མཚན་བསྟུད་མར་བརྐོས་དཀྲོལ་རྒྱག་གི་ཡོད་ལ། ཁོང་ཚོའི་ཐོན་རྫས་ཧབ་ཐོབ་བརྒྱབ་ནས་ཉོ་གི་ཡོད།

ད་ཆ་ན་གཞོན་མང་པོ་ཞིག་གིས་ལག་ཤེས་དེར་དེ་ཙམ་དོ་སྣང་བྱེད་ཀྱི་མེད་མོད། འོན་ཀྱང་ཁོང་དང་ལས་རིགས་གཅིག་པས་བློས་མ་བཏང་བར་རྒྱུན་འཛིན་གྱི་ལས་ལ་ཧུར་ཐག་གཞོལ་ཡོད། གནམ་གང་གིས་ལྷོ་ཁ་གྲོང་ཁྱེར་ལས་རིགས་སློབ་གསོ་ལྟེ་གནས་སུ་བསྐྱོད་ནས་ཡུལ་དེ་གའི་ཕྲུ་གུ་ཚོས་བོད་ཀྱི་ཤིང་བརྐོས་ཤེས་རྟོགས་དང་སྦྱོང་རྒྱུར་ཁྲིད་སྟོན་བྱས་ཏེ་ལག་ཤེས་དེར་དགའ་ཞེན་ཐུབ་པར་བྱས་ཡོད།

གནམ་གང་སོགས་བོད་ཀྱི་ཤིང་བརྐོས་རྒྱུན་འཛིན་པའི་འབད་བརྩོན་འོག བོད་ཀྱི་ཤིང་བརྐོས་ལག་ཤེས་དེར་དུས་རབས་གསར་པར་གསོན་ཤུགས་གསར་པ་རྒྱས་བཞིན་ཡོད།