ལོ་གསར་གྱི་ཚེས་གཅིག་ཉིན། གང་སར་བཀྲ་ཤིས་པའི་རྣམ་པས་ཁེངས་ཤིང་། ལོ་3ཙམ་ཁྱིམ་དུ་ལོག་ཁོམ་མ་བྱུང་བའི་གསར་འགོད་པའི་ངོས་ནས་བརྗོད་ན་ད་ལོ་དེ་སྔ་ལས་གྲ་རྒྱས་པའི་སྣང་བ་ཞིག་བྱུང་།

ནང་མི་ཚང་མ་མཉམ་དུ་འཛོམས་ནས་འདས་མ་ཐག་པའི་ལོ་གཅིག་རིང་གི་དོན་དག་ཅི་དགར་གླེང་ཞིང་། དགའ་སྤྲོ་དང་། སྐྱོ་སྣང་། དཀའ་སྡུག གྲུབ་འབྲས་སོགས་མཉམ་དུ་འདྲེས་ནས་ནང་མི་ཚང་མའི་བློ་སེམས་གཅིག་ཏུ་སྦྲེལ།

ལོ་གསར་གཏོང་རིམ་བཞིན་ཆུང་བྱིས་པའི་དུས་ཀྱི་དྲན་འཆར་ལ་ཕྱིར་དྲན་བྱེད་པ་ནི་མེད་དུ་མི་རུང་བའི་ཆ་ཤས་ཤིག་ཡིན་པའི་ཁར། སྤོ་བོ་ལགས་དང་རྨོ་བོ་ལགས་ནི་ནང་མི་ཚང་མའི་གླེང་གཞི་གཙོ་བོ་རེད།

སྤོ་བོ་ལགས་ཀྱི་རུས་མིང་ལ་ཡན་ཟེར་བ་དང་མཚོ་སྔོན་ནས་རེད། 1958ལོར་སྤོ་བོ་ལགས་ཀྱིས་རྡོག་ཆས་སྟབས་བདེ་ཞིག་ཁྱེར་ནས་ལྷ་སར་སྐྱོད་པའི་ལམ་ལ་བཞུད་པ་དང་། རྒྱལ་ལམ་109ཉམས་བཟོ་བྱེད་ཀྱིན་བོད་ལ་ཡོང་ཞིང་། ལམ་ཐག་སྤྱི་ལེ་1481ཟིན་ཡོད། ལྷ་སར་སྤོ་བོ་ལགས་དང་རྨོ་བོ་ལགས་ངོ་ཤེས་ནས་ལས་རོགས་སུ་གྱུར་ཞིང་། 1960ལོར་མི་རིགས་མི་འདྲ་ཡང་ལས་ཀྱི་མདུད་པས་ཐེབས་པའི་ཁོང་གཉིས་པོ་ལྷ་སར་གཞིས་ཆགས་པ་དང་མཉམ་དུ་འགྲོགས་པའི་ལོ་ཟླའི་ནང་ཕྲུ་གུ་7བསྐྱངས་ནས་མི་རིགས་མཐུན་སྒྲིལ་གྱི་ཁྱིམ་ཚང་མང་པོའི་བསྡུས་རིས་ཤིག་ཏུ་གྱུར་ཡོད།

ད་ལོ། མཐའ་མཚམས་ཀྱི་འཐབ་ས་དང་པོར་ལས་ཀ་བྱེད་བཞིན་པའི་གཅེན་པོའང་ལོག་ཁོམ་བྱུང་བས་ནང་མི་ཚང་མའི་གླེང་གཞི་གཞན་ཞིག་ཏུ་གྱུར། ཅི་འཕྲོས་མོལ་འཕྲོས་ཤོད་སྐབས་གཅེན་པོས་ནང་མི་ཚང་མར་མཐའ་མཚམས་སུ་ཐོན་པའི་མི་སེམས་འགུལ་བའི་གཏམ་རྒྱུད་བཤད།

གཅེན་པོ་ལས་ཀ་བྱེད་སའི་ས་ཆ་འཇིགས་སྐྱོབ་ཟམ་པའི་མཐའ་མཚམས་ཞིབ་བཤེར་ས་ཚིགས་སུ་ཡིན་པ་དང་། དེ་ནི་གཞིས་རྩེ་གྲོང་ཁྱེར་གཏིང་སྐྱེས་རྫོང་ཁོངས་སུ་ཡོད། ཞིབ་བཤེར་ས་ཚིགས་ཀྱི་ཀྲེན་ཀྲང་ཡིན་པའི་གཅེན་པོས། “ས་བབ་མཐོ་ཚད་སྨི་4200ཟིན་པའི་ཞིབ་བཤེར་ས་ཚིགས་1999ལོའི་ཟླ་8པར་བཙུགས་པ་དང་། གཙོ་བོ་གཏིང་སྐྱེས་རྫོང་མཐའ་མཚམས་དོ་དམ་ཁུལ་ནས་འགྲོ་འོང་བྱེད་མཁན་མི་དང་། འཁོར་རིགས། རྡོག་ཁྲེས་སོགས་ལ་ཞིབ་བཤེར་དང་ཁྲིམས་འགལ་ཉེས་གསོག་བྱེད་སྤྱོད་སྣ་ཚོགས་ལ་རྡུང་རྡེག་གཏོང་དགོས་པ་དང་ཆབས་ཅིག བཅའ་སྡོད་བྱ་ཡུལ་ཉེ་འཁོར་སྤྱི་ལེ་20ནང་ཚུན་དུ་བསྐོར་ནས་འགྲོ་སྲིད་པའི་ལམ་བུར་སྐོར་གཡེང་དོ་དམ་སོགས་མཐའ་མཚམས་ཀྱི་བརྟན་ལྷིང་སྲུང་སྐྱོང་ལས་འགན་སྒྲུབ་དགོས”ཞེས་རྒྱུས་མངའ་ཤིན་ཏུ་ཆེན་པོས་བཤད།

ཞིབ་བཤེར་ས་ཚིགས་ནི་ཇོ་མོ་གླང་མ་མཛེས་ལྗོངས་ཁུལ་དུ་འགྲོ་སའི་བརྒྱུད་དགོས་ངེས་ཀྱི་ལམ་བུར་གནས་ཡོད། 2022ལོར་ཞིབ་བཤེར་ས་ཚིགས་ཀྱིས་ས་བབ་ཀྱི་ལེགས་ཆ་སྤྱད་དེ་རིམས་ནད་སྐབས་ཀྱི་ལོགས་འཇོག་སྟབས་བདེའི་ཁང་པ་དེ་དག་ཕྱོགས་བསྡུས་ཞབས་ཞུའི་ས་ཚིགས་ལ་སྒྱུར་བཀོད་བྱས་ནས་ངལ་གསོ་ཁུལ་དང་། ཞག་སྡོད་ཁུལ། ཉེན་དོན་འགན་སྲུང་ཁུལ་སོགས་བཙུགས་ཡོད་པ་མ་ཟད། ད་དུང་ས་མཐོའི་ཕྱོགས་བསྡུས་སྨན་སྒམ་དང་། འཁྱེར་བདེའི་གསོ་རླུང་འཕྲུལ་ཆས། ཆུ་འཐུང་ཆས། གོས་བཀྲུ་འཕྲུལ་ཆས་སོགས་སྒྲིག་ཆས་ཀྱང་ཡོད་པ་དང་ཕར་འགྲོ་ཚུར་འོང་བྱེད་མཁན་འགྲུལ་པ་དང་། ཡུལ་སྐོར་བ། གླ་པ་རྒྱུག་མཁན་སོགས་ཚོགས་སྤྱིར་ཞབས་འདེགས་ཞུ་ཡི་ཡོད་པས། ཚང་མས་རྒྱལ་ལམ་219ཡི་ཐོག་བཙུགས་པའི“སྐར་མ་ལྔ་རིམ་པའི”དྲོ་སྐྱིད་ས་ཚིགས་ཞེས་སྙིང་ཉེ་བའི་སྒོ་ནས་འབོད་ཀྱི་ཡོད།

ས་ཚིགས་འཛུགས་པའི་ཐོག་མའི་བསམ་འདུན་གྱི་སྐོར་གླེང་སྐབས། གཅེན་པོས“ས་ཚིགས་ཀྱི་ཕྱོགས་བསྡུས་ཞབས་ཞུའི་བྱེད་ནུས་ལ་བརྟེན་ནས་ད་ཡོད་ཀྱི་ཐོན་ཁུངས་དང་སྒྲིག་ཆས་བསྡུ་སྒྲིལ་བྱས་ཏེ། དྲོ་སྐྱིད་དང་གཅེས་སེམས་མཚོན་པར་བྱས་ནས་མི་རིགས་མཐུན་སྒྲིལ་གྱི་འདུ་ཤེས་མི་སེམས་སུ་གཏིང་ཟབ་ཟུག་ཐུབ་པའི་ཆེད་དུ་ཡིན”ཞེས་བཤད། གཅེན་པོས་ཤོད་ཀྱིན་ཁ་པར་ཁ་ཕྱེ་ནས་ས་ཚིགས་སུ་ལྟ་བར་ཡོང་བའི་ཡུལ་སྐོར་བའི་འདྲ་པར་བསྟན་བྱུང་། འདྲ་པར་ནང་གཉེན་སྒྲིག་གི་ཡུལ་སྐོར་ལ་ཡོང་བའི་བག་གསར་མག་གསར་ཚོགས་པ་འདུག་ལ། བོད་དུ་གླ་པ་རྒྱུག་པར་ཡོང་བའི་ལས་མིའང་འདུག ཚང་མའི་ངོ་གདོང་ལས་འཛུམ་མདངས་འཕྱུར་ཞིང་ལག་ཏུ་མི་རིགས་མཐུན་སྒྲིལ་ཁྱིམ་ཚང་གཅིག་ལྟར་བརྩེ་ཞེས་པའི་སྦྱར་ཡིག་ཁྱེར་ཏེ་མཉམ་དུ་པར་བརྒྱབ་པ་དེ་ཐོག་ནས་མི་རིགས་ཁག་དབར་འགྲོ་འོང་དང་། སྤེལ་རེས། མཉམ་འདྲེས་བཅས་བྱེད་པའི་མཛེས་སྡུག་ལྡན་པའི་རྣམ་པ་མངོན།

ལོ་65ཡི་གོང་། སྤོ་བོ་ལགས་དང་རྨོ་བོ་ལགས་ཀྱིས་རྒྱ་བོད་ཁྱིམ་ཚང་གཉིས་དབར་གྱི་མི་རིགས་མཐུན་སྒྲིལ་གྱི་ཁྱིམ་ཚང་ཞིག་བཙུགས་པ་དང་། ལོ་12ཀྱི་གོང་། གཅེན་པོས་མི་རིགས་མཐུན་སྒྲིལ་གྱི་རྒྱུན་བསྐྱངས་ནས་མེས་རྒྱལ་མཐའ་མཚམས་སུ་མཐའ་སྲུང་སྲ་བརྟན་གྱི་གཟི་བརྗིད་ལྡན་པའི་ལས་འགན་སྒྲུབ་པར་བསྐྱོད་པ་རེད། ད་ཆ་ངས་མི་སེམས་འགུལ་བའི་གཏམ་རྒྱུད་ཆུང་ངུ་འདི་དག་ཤོག་ཐོག་ཏུ་འགོད་ཀྱི་ཡོད། མི་རབས་རེ་རེ་འཚོ་བའི་ལམ་ཕྲན་བརྒྱུད་ནས་རྒས་སོང་ནའང་། གངས་ལྗོངས་ས་མཐོར་བཞད་པའི་མི་རིགས་མཐུན་སྒྲིལ་གྱི་མེ་ཏོག་ནམ་ཡང་མི་ནུབ་པར་ཁྲ་ཆིལ་ལེར་བཞད་སྲིད།