“དགུན་ཁ་ས་མཐོར་རི་འཛེག་ཐེངས་དང་པོ་ཡིན་པས། སེམས་ཧ་ཅང་སྐྱིད་པོ་བྱུང་། མྱོང་ཚོར་དེ་ཚེ་གང་རིང་བརྗེད་མི་སྲིད”ཧུའུ་པེ་ནས་ཡོང་བའི་ཡུལ་སྐོར་བ་ཀྲང་ལགས་ཀྱིས་སྐད་གྲགས་ཤིན་ཏུ་ཆེ་བའི་ལྷོ་རིའི་སྤྱི་གླིང་གི“མེས་རྒྱལ་ཁྲི་ལོར་བརྟན་པར་ཤོག”ཅེས་པའི་ཡིག་འབྲུ་བཀོད་པའི་རིར་འཛེག་པར་ཡོང་། ཁོང་རི་རྐེད་དུ་སླེབས་དུས་དབུགས་ཧལ་བཞིན་དུ“རི་སྟེང་དུ་ང་ཚོའི་ཕ་ཡུལ་གྱི་ལྗོན་ཤིང་དང་འདྲ་བ་མང་པོ་བཏབ་འདུག དགུན་ཁ་ཡང་སྔོ་ཐིང་ཐིང་ཡིན་པས་སེམས་ནང་བསམ་པའི་སྐྱ་ཐེར་ཐེར་གྱི་སྣང་བ་སྤུ་ཙམ་ཡང་མི་འདུག”ཅེས་བཤད། རིར་འཛེགས་རྗེས་ཀྲང་ལགས་ཀྱིས་དགའ་སྤྲོ་ཆེན་པོས་ལག་ཐོགས་ཁ་པར་བཏོན་ནས་པར་ལེན་ཞོར་དུ“ད་རེས་དངོས་འབྲེལ་ཡོང་རིན་ཆོག་འདུག”ཅེས་བཤད།

“དགུན་དུས་བོད་ལ་ཡུལ་སྐོར་བྱེད་པའི”སྲིད་ཇུས་ཀྱི་ཤུགས་རྐྱེན་འོག ལྷ་ས་གྲོང་ཁྱེར་གྱི་ལྷོ་རིའི་སྤྱི་གླིང་དུ་ཡོང་མཁན་ཡུལ་སྐོར་བ་སྔར་བཞིན་བར་མཚམས་ཆད་རྒྱུ་མེད། ལྷོ་རིའི་སྤྱི་གླིང་ནི་ལྷོ་རི་བྱང་རིའི་སྔོ་འགྱུར་གྱི་གཙོ་གནད་ས་ཁོངས་ཀྱི་གྲས་ཤིག་ཡིན་ལ། ལྷོ་རི་བྱང་རིའི་སྔོ་འགྱུར་ལས་གྲྭས་གྲོང་ཁྱེར་གྱི་སྐྱེ་ཁམས་ཁོར་ཡུག་ལེགས་སུ་གཏོང་བའི་མཚོན་ཚུལ་ཞིག་ཀྱང་རེད། མིག་སྔར་ལྷ་ས་གྲོང་ཁྱེར་གྱི་ལྷོ་རིའི་སྤྱི་གླིང་དེ་སྤྲོ་གསེང་ངལ་གསོ་དང་། ཡུལ་སྐོར་སྤྲོ་འཆམ། ལུས་སྦྱོང་རོལ་རྩེད་བཅས་གཞི་གཅིག་ཏུ་འདུས་པའི་ཡུལ་སྐོར་བྱ་ཡུལ་ཞིག་ཏུ་རིམ་བཞིན་གྱུར་ཡོད།

“ངས་ལོ་30ཙམ་མཐོང་བའི་རི་རྒོད་དེར་ལྗོན་ཤིང་སྐྱེས་ཡོང་སྙམ་པ་བསམ་པའི་ཡུལ་ལའང་འཁོར་མ་མྱོང” ལྷ་ས་གྲོང་ཁྱེར་ཁྲེང་ཀོན་ཆུས་ཚེ་མཆོག་གླིང་གྲོང་ཚོའི་གྲོང་མི་བསོད་ནམས་བཀྲ་ཤིས་ཀྱིས“ད་ཆ་ལྷོ་རིར་ཤིང་སྣ་ཇེ་མང་དུ་འགྲོ་བ་དང་། མཁའ་རླུང་ནང་བརླན་ཚད་འདུས་ཚད་མཐོ་རུ་སོང་བ། བྱ་བྱིའུ་ཡི་སྐད་སྒྲ་སྣ་ཚོགས་ཐོས་རྒྱུ་ཡོད་པས་སེམས་པ་ཧ་ཅང་སྐྱིད་པོ་འདུག”ཅེས་བཤད།

ལྷོ་རི་བྱང་རིའི་སྔོ་འགྱུར་ལས་གྲྭ་ནི་བོད་ཀྱི་གཞི་ཁྱོན་ཅན་གྱི་རི་ལྡེབས་ནགས་བཟོའི་སྐྱེ་ཁམས་ལས་གྲྭ་ཐོག་མ་གལ་ཆེན་ཡིན་པ་དང་། ལྷ་སའི་སྐྱིད་ཆུས་གཙོ་རྐང་དུ་བྱས་ནས་ཤར་ནུབ་ཏུ་སྤྱི་ལེ་200ཙམ་སྣུར་སྲིང་བྱས་ཡོད། ལས་གྲྭ་དེ་ཉིད་ལྷ་ས་གྲོང་ཁྱེར་གྱི་ཁྲེང་ཀོན་ཆུས་དང་། སྣེའུ། སྟོད་ལུང་བདེ་ཆེན། སྟག་རྩེ། ཆུ་ཤུར། མལ་གྲོ་གུང་དཀར། ལྷུན་གྲུབ། ལྷོ་ཁ་གྲོང་ཁྱེར་སྣ་དཀར་རྩེ་དང་གོང་དཀར་སོགས་རྫོང་དང་ཆུས་9ཡི་ཤང་དང་གྲོང་རྡལ་35ལ་ཁྱབ་ཡོད་པ་དང་། 2024ལོར་ནགས་བཟོ་ནགས་སྐྱོང་མུའུ་ཁྲི་10.17ལེགས་སྒྲུབ་བྱས་པར་སྤྱི་ཡོངས་གསོན་ཚད་80%ཡན་ཟིན་ཏེ་དགའ་འོས་པའི་གྲུབ་འབྲས་ཐོབ་ཡོད།

ལྷོ་རི་བྱང་རིའི་སྔོ་འགྱུར་ནི་ངལ་རྩོལ་འདུས་ཆེའི་ལས་གྲྭ་ཞིག་ཡིན་པ་དང་། 2024ལོར་རིམ་རྩིས་བརྒྱབ་ན་མང་ཚོགས་མི་ཐེངས་ཁྲི་250ལས་གྲྭ་འཛུགས་སྐྲུན་ནང་ཞུགས་རྒྱུར་སྐུལ་ཁྲིད་བྱས་པར་འབབ་འཕར་སྒོར་དུང་ཕྱུར་7ཙམ་བྱུང་ཡོད།

“རང་གིས་བཏབ་པའི་ལྕང་སོན་ཆེན་པོ་ཆགས་པ་མཐོང་སྐབས་ཧ་ཅང་དགའ་པོ་འདུག”བསྟན་འཛིན་དོན་གྲུབ་འཕྲད་སྐབས། ཁོང་དེ་སྔོན་བཏབ་པའི་ལྕང་མར་ཆུ་རྒྱག་བཞིན་འདུག ལོ་24ལ་སླེབས་པའི་བསྟན་འཛིན་དོན་གྲུབ་ཤིང་འཛུགས་ནགས་བཟོའི་ལས་ཀ་བྱས་ནས་ལོ་5ལྷག་ཙམ་སོང་བ་དང་། ཁོང་གིས་གཙོ་བོ་གསར་དུ་བཏབ་པའི་ལྕང་སོན་ལ་ཡལ་གཅོད་རྒྱག་པ་དང་། ཆུ་རྒྱག་པ། ལྕང་སོན་དབོར་བ་བཅས་ཀྱི་འགན་འཁུར་གྱི་ཡོད། བསྟན་འཛིན་དོན་གྲུབ་ཀྱིས“ལས་ཀ་དེར་གྲུབ་འབྲས་ཐོབ་སྣང་ཆེན་པོ་འདུག ལོ་གཅིག་ལ་གླ་ཆ་སྒོར་ཁྲི་དྲུག་བདུན་ཙམ་ཡོད་པས་བློ་ཡིད་ཚིམ་པོ་འདུག”ཅེས་བཤད།

ལྷོ་རི་བྱང་རིའི་སྔོ་འགྱུར་ལས་གྲྭ་ལག་བསྟར་བྱས་རྗེས་ལྷ་སའི་ལོ་རེའི་ཆ་སྙོམས་ཀྱི་མཁའ་རླུང་བརླན་ཚད་རིམ་བཞིན་ཆེ་རུ་ཕྱིན་པ་དང་། རི་སྐྱེས་སྲོག་ཆགས་ཀྱི་གྲངས་འབོར་རིམ་བཞིན་མང་དུ་ཕྱིན་ནས་ལས་གྲྭའི་ཁུལ་དུ་ལོ་མང་རིང་མཐོང་དཀོན་པའི་ཤྭ་བ་སེར་ཆེན་དང་གནའ་བ་སོགས་སྐབས་འགར་མཐོང་རྒྱུ་ཡོད་པ་དང་། ཝ་མོ་དང་། སྤྱང་ཀི སྤྲེའུ་སོགས་ཀྱང་སྐབས་འགར་མཐོང་རྒྱུ་ཡོད།

སྔོ་ལྗང་སྲུང་ཆེད། ནོར་ལུག་ནགས་བཟོ་ཁུལ་དུ་གློད་ཆོག་གི་མེད། ལྷ་ས་གྲོང་ཁྱེར་ཁྲེང་ཀོན་ཆུས་ཚེ་མཆོག་གླིང་གྲོང་ཚོའི་གྲོང་མི་ཚེ་དོན་གྲུབ་ཀྱིས་སྲིད་ཇུས་ཀྱི་འབོད་སྐུལ་ལ་དང་ལེན་ཧུར་ཐག་ཞུས་ནས། ད་ལོར་རང་འགུལ་ངང་རང་ཁྱིམ་གྱི་འབྲི་གཡག་ཚང་མ་བཙོངས་ཏེ་ཁྱིམ་ཚང་མགྲོན་ཁང་གཉེར་བར་གྲོང་ཚོའི་ཕྱུག་འགྱུར་མི་སྣ་དང་པོའི་གྲས་སུ་གྱུར་པ་རེད།