ཕྱི་འབྲེལ་པུས་བསྟན་དོན།
ཀྲུང་གོས་མུ་མཐུད་སྤུས་ཚད་མཐོ་བའི་འཕེལ་རྒྱས་དང་ཆུ་ཚད་མཐོ་བའི་ཕྱི་ཕྱོགས་སྒོ་དབྱེར་བརྟེན་ནས་འཛམ་གླིང་ལ་ནུས་པ་འདོན་རྒྱུ་རེད།
ཤིན་ཧྭ་གསར་འགྱུར་ཁང་པེ་ཅིང་ནས་ཟླ་3ཚེས་11ཉིན་གློག་འཕྲིན་འབྱོར་གསལ། ཚེས་11ཉིན་ཕྱི་འབྲེལ་པུའི་མགྲིན་ཚབ་པ་མའོ་ཉིང་གིས་ཀྲུང་གོས་མུ་མཐུད་སྤུས་ཚད་མཐོ་བའི་འཕེལ་རྒྱས་དང་ཆུ་ཚད་མཐོ་བའི་ཕྱི་ཕྱོགས་སྒོ་དབྱེར་བརྟེན་ནས་འཛམ་གླིང་ལ་ནུས་པ་བཏོན་ཏེ་གོ་ལ་ཧྲིལ་པོའི་དཔལ་འབྱོར་སླར་གསོ་དང་འཕེལ་རྒྱས་ལ་འགག་རྩའི་སྐུལ་འདེད་གཏོང་ནུས་གསར་པ་འདོན་རྒྱུ་ཡིན་ཞེས་བརྗོད།
ཉིན་དེའི་གསར་འགོད་པའི་འཆར་ཅན་ཚོགས་འདུར་གསར་འགོད་པ་ཞིག་གིས། སྲིད་གཞུང་གི་ལས་དོན་སྙན་སྒྲོན་ནང་བཏོན་པའི་ཀྲུང་གོའི་ད་ལོའི་དཔལ་འབྱོར་འཕར་ཚད་ཀྱི་སྔོན་དཔག་དམིགས་ཚད་ལ་རྒྱལ་ཁབ་ཕྱི་ནང་གིས་དོ་ཁུར་ཆེན་པོ་བྱེད་ཀྱི་ཡོད། གོ་ལ་ཧྲིལ་པོའི་དཔལ་འབྱོར་འཕེལ་ཚུལ་སྐྱོ་བའི་རྣམ་པའི་འོག་ཀྲུང་གོས་འཛམ་གླིང་གི་འཕེལ་རྒྱས་ལ་ལེགས་སྐྱེས་གསར་པ་ཇི་ལྟར་འབུལ་རྒྱུ་ཡིན་ནམ་ཞེས་དྲིས།
མའོ་ཉིང་གིས་སྒོ་དབྱེ་ནི་ཀྲུང་གོའི་དཔལ་འབྱོར་འཕར་ཁུངས་དེ་ཡིན་ལ་ཀྲུང་གོས་འཛམ་གླིང་ལ་འགྱུར་མེད་ཁས་ལེན་བྱས་པ་ཞིག་ཀྱང་རེད། དཔེར་ན་ད་ལོའི་སྲིད་གཞུང་གི་ལས་དོན་སྙན་སྒྲོན་ནང་ཕྱི་རོལ་གྱི་ཁོར་ཡུག་ལ་འགྱུར་ལྡོག་ཇི་ལྟར་བྱུང་རུང་ཀྲུང་གོས་ཐོག་མཐའ་བར་གསུམ་དུ་ཕྱི་ཕྱོགས་སྒོ་དབྱེར་གཡོ་འགུལ་མི་གཏོང་བ་མཐའ་འཁྱོངས་བྱེད་པ་དང་ལམ་ལུགས་རྣམ་པའི་སྒོ་མོ་དབྱེ་རྒྱ་བརྟན་པོའི་ངང་ཆེ་རུ་བཏང་ནས་གོ་རིམ་ལྡན་པའི་ངང་རང་བརྟེན་སྒོ་དབྱེ་དང་ཕྱོགས་རྐྱང་སྒོ་དབྱེ་ཆེ་རུ་གཏོང་རྒྱུ་ཡིན་པ་བསྟན་ཡོད་ཅེས་བརྗོད།
མའོ་ཉིང་གིས“ང་ཚོས་ཕྱི་ཕྱོགས་ཚོང་དོན་བརྟན་པོ་ཡོང་བའི་སྲིད་ཇུས་ལ་ཤུགས་སྣོན་བརྒྱབ་ནས་ཞབས་ཞུའི་ཚོང་དོན་གྱི་གསར་གཏོད་དང་འཕེལ་རྒྱས་ལ་སྐུལ་འདེད་གཏོང་བ་དང་ལྗང་མདོག་ཉོ་ཚོང་དང་གྲངས་འཛིན་ཉོ་ཚོང་སོགས་ཀྱི་འཕར་གཞི་གསར་པ་སྐྱེད་སྲིང་བྱས་ནས་ནང་འདྲེན་དངོས་མང་སྟོན་ཚོགས་དང་། ཀོང་ཀྲོའུ་ཚོང་འདུས། ཞབས་ཞུ་ཉོ་ཚོང་ཚོང་འདུས། གྲངས་འཛིན་ཉོ་ཚོང་ཚོང་འདུས། འཛད་སྤྱོད་དངོས་མང་སྟོན་ཚོགས་སོགས་འགྲེམས་ཚོགས་གལ་ཆེན་སྤུས་ཚད་མཐོ་པོས་གཉེར་རྒྱུ་རེད”ཅེས་དང་། “ང་ཚོས་ཕྱོགས་མང་དང་ཕྱོགས་གཉིས། དེ་བཞིན་ས་ཁོངས་དཔལ་འབྱོར་མཉམ་ལས་གཏིང་ཟབ་ཏུ་བཏང་ནས་འཛམ་གླིང་ཚོང་དོན་རྩ་འཛུགས་ཀྱིས་ལྟེ་བར་བྱས་པའི་ཕྱོགས་མང་ཚོང་དོན་སྒྲིག་སྲོལ་ལ་སྲུང་སྐྱོང་བརྟན་པོ་བྱས་ཏེ་རྒྱལ་ཁབ་ཁག་གི་ཁེ་ཕན་གྱི་འབྲེལ་མཚམས་གནས་རྒྱ་ཆེར་བཏང་ནས་ཐུན་མོང་འཕེལ་རྒྱས་ལ་སྐུལ་འདེད་གཏོང་གི་ཡིན”ཞེས་བརྗོད།
མའོ་ཉིང་གིས“ཀྲུང་གོས་མུ་མཐུད་སྤུས་ཚད་མཐོ་བའི་འཕེལ་རྒྱས་དང་ཆུ་ཚད་མཐོ་བའི་ཕྱི་ཕྱོགས་སྒོ་དབྱེར་བརྟེན་ནས་འཛམ་གླིང་ལ་ནུས་པ་སྦྱིན་ཏེ་གོ་ལ་ཧྲིལ་པོའི་དཔལ་འབྱོར་སླར་གསོ་དང་འཕེལ་རྒྱས་ལ་འགག་རྩའི་སྐུལ་འདེད་གཏོང་ནུས་གསར་པ་འདོན་རྒྱུ་ཡིན”ཞེས་བརྗོད།