ཚེས་11ཉིན་གྱི་སྔ་དྲོར། རང་སྐྱོང་ལྗོངས་ཏང་ཨུད་ཀྱི་རྒྱུན་ཨུ་དང་དྲིལ་བསྒྲགས་པུའི་པུའུ་ཀྲང་དབང་ཧའེ་ཀྲོའུ་ཡིས་བོད་རང་སྐྱོང་ལྗོངས་དབུ་བརྙེས་ནས་ལོ་60འཁོར་བར་རྟེན་འབྲེལ་ཞུ་བའི་མཛད་སྒོའི་གྲ་སྒྲིག་ལས་དོན་འགོ་ཁྲིད་ཚོགས་ཆུང་གཞུང་དོན་ཁང་གི་དྲིལ་བསྒྲགས་རིག་རྩལ་ཚོགས་ཆུང(རྒྱ་ཆེ)གི་ཚོགས་འདུ་གཙོ་སྐྱོང་གནང་ནས་འབྲེལ་ཡོད་ཚན་པ་ཁག་གི་དུས་མཚམས་གོང་མའི་ལས་དོན་སྤེལ་ཚུལ་སྐོར་གྱི་སྙན་སེང་གསན་པ་དང་སྤྱི་ཡོངས་ཀྱི་དྲིལ་བསྒྲགས་ཇུས་གཞི་སོགས་འབྲེལ་ཡོད་གནད་དོན་ལ་ཞིབ་འཇུག་དང་གྲོས་ཞིབ་གནང་ནས་གོམ་སྟབས་རྗེས་མའི་ལས་དོན་ལ་བཀོད་སྒྲིག་གནང་བ་རེད།

དབང་ཧའེ་ཀྲོའུ་ཡིས་གསུངས་དོན། ད་ལོ་ནི་རང་སྐྱོང་ལྗོངས་དབུ་བརྙེས་ནས་ལོ་60འཁོར་བའི་ལོ་ཞིག་ཡིན་པས། རྟེན་འབྲེལ་མཛད་སྒོ་གྲ་སྒྲིག་ལས་དོན་ཡག་པོ་སྤེལ་རྒྱུ་ནི་ལྗོངས་ཡོངས་ཀྱི་མི་རིགས་ཁག་གི་མི་དམངས་ཀྱི་ཆབ་སྲིད་འཚོ་བའི་ཁྲོད་ཀྱི་དོན་ཆེན་ཞིག་རེད། དྲིལ་བསྒྲགས་རིག་རྩལ་ཚོགས་ཆུང་གིས་འགན་འཁྲི་དང་ལས་འགན་གལ་ཆེན་འཁུར་བཞིན་ཡོད་པས། ཚན་པ་ཁག་དང་སྡེ་ཚན་ཁག་གིས་ཆབ་སྲིད་ཀྱི་ཚུགས་གནས་མཐོ་རུ་གཏོང་བ་དང་བསམ་བློའི་ངོས་འཛིན་གཅིག་གྱུར་བྱས་ཏེ། རྟེན་འབྲེལ་ཆེན་པོའི་དྲིལ་བསྒྲགས་རིག་རྩལ་ཚོགས་ཆུང་གི་ལས་དོན་ལེགས་སྒྲུབ་བྱེད་པའི་གལ་ཆེའི་རང་བཞིན་དང་དོན་སྙིང་གལ་ཆེན་ལ་ངོས་འཛིན་གང་ལེགས་བྱེད་པ་དང་། བསམ་བློ་དང་བྱ་སྤྱོད་ཏང་ཀྲུང་དབྱང་དང་ལྗོངས་ཏང་ཨུད་ཀྱི་ཐབས་ཇུས་བཀོད་སྒྲིག་ཐོག་གཅིག་གྱུར་བྱེད་པ། ལས་དོན་ཡག་པོ་སྒྲུབ་པའི་འགན་འཁྲི་འཁུར་སེམས་དང་། ལས་འགན་སྒྲུབ་སེམས། ཁ་ཚ་དགོས་གཏུགས་ཀྱི་་བསམ་པ་བཅས་ཆེ་རུ་ཟམ་མི་ཆད་པར་བཏང་སྟེ། ལས་དོན་ཁག་གི་ལས་འགན་དོན་ཐོག་ཏུ་འཁྱོལ་བར་འགན་ལེན་བྱེད་དགོས།

དབང་ཧའེ་ཀྲོའུ་ཡིས་ནན་བཤད་གནང་དོན། བསམ་བློ་སྔར་བས་གཅིག་གྱུར་དང་ཚད་མཐོའི་མཐོང་ཆེན་གྱིས་སྤྱི་འདོམས་མཐུན་སྦྱོར་ལ་ཤུགས་སྣོན་རྒྱག་པ་དང་། མཉམ་ལས་དང་གཞོགས་འདེགས་དམ་ཟབ་བྱེད་པ། ལས་ཀའི་འགན་འཁྲི་དོན་འཁྱོལ་བྱེད་ཤུགས་ཆེ་རུ་གཏོང་བ་བཅས་བྱས་ནས་ལས་དོན་ཡག་པོ་སྒྲུབ་པའི་མཉམ་ཤུགས་ཆེན་པོ་ཆགས་པར་བྱེད་དགོས། སྒྲིག་འཛུགས་དང་ལག་བསྟར་ཞིབ་ཚགས་བྱེད་པ་དང་། བརྟན་ཞིང་གོ་རིམ་ལྡན་པའི་སྒོ་ནས་སྐུལ་འདེད་གཏོང་བ། དུས་མཚམས་རང་བཞིན་གྱི་བླང་བྱ་དང་ལེགས་སྒྲུབ་དུས་བཀག་གཞིར་བཟུང་ལས་ཡུན་ལྡོག་སྒྲིག་དང་འཆར་གཞི་བཀོད་ནས་ལས་དོན་བསྒྲུབས་ཏེ། ལས་དོན་ཁག་གི་ལས་འགན་བདེ་བླག་དང་ཕུན་སུམ་ཚོགས་པོས་ལེགས་གྲུབ་ཡོང་བར་འགན་ལེན་བྱེད་དགོས། འདུ་ཤེས་འཛིན་སྟངས་ལས་དོན་གྱི་འགན་འཁྲིའི་ལམ་ལུགས་དོན་འཁྱོལ་ནན་པོ་བྱས་ནས། ཆབ་སྲིད་ཀྱི་འགག་སྒོ་དང་། སྟོན་ཕྱོགས་ཀྱི་འགག་སྒོ ཞིབ་དཔྱད་ཀྱི་འགག་སྒོ བདེ་འཇགས་ཀྱི་འགག་སྒོ སྤུས་ཚད་ཀྱི་འགག་སྒོ་བཅས་དམ་འཛིན་ནན་པོ་བྱེད་པ་དང་། འདུ་ཤེས་འཛིན་སྟངས་ཁྱབ་ཁོངས་ཀྱི་ཉེན་ཁ་སྔོན་འགོག་དང་ནུས་ལྡན་ངང་བསལ་ཏེ། ཆུ་ཚད་དང་སྤུས་ཚད་མཐོ་པོས་ལས་དོན་ལ་སྐུལ་འདེད་གཏོང་དགོས། ལས་ཀའི་སྒྲིག་ཁྲིམས་དང་། དྲིལ་བསྒྲགས་ཀྱི་སྒྲིག་ཁྲིམས། གསང་སྲུང་གི་སྒྲིག་ཁྲིམས་བཅས་ལ་བརྩི་སྲུང་ནན་པོ་ཞུས་ཏེ། ལས་ཀའི་ཁྲོད་གསང་བ་མི་ཤོར་སྔོན་འགོག་མཐའ་གཅིག་ཏུ་བྱེད་པ་དང་། གྲོན་དངུལ་བེད་སྤྱོད་དང་དོ་དམ་བྱེད་ཤུགས་ཆེ་རུ་བཏང་ནས་གནད་དོན་གང་ཡང་མི་ཐོན་པའི་འགན་ལེན་བྱས་ཏེ་གྲ་རྒྱས་ཕུན་སུམ་ཚོགས་པ་དང་། སྤྲོ་སེམས་འཁོལ་བ། དགའ་སྤྲོ་འཆམ་མཐུན་བཅས་ཀྱི་རྟེན་འབྲེལ་ཞུ་བའི་རྣམ་པ་ཧུར་ཐག་བསྐྲུན་ཆེད་འབུལ་འོས་པའི་ལེགས་སྐྱེས་འབུལ་དགོས།