རྒྱལ་ཡོངས་སྲིད་གྲོས་སྐབས་བཅུ་བཞི་པའི་ཚོགས་འདུ་ཐེངས་གསུམ་པ་འཚོག་རིང་། རྒྱ་ཆེའི་སྲིད་གྲོས་ཨུ་ཡོན་དང་སྲིད་གྲོས་ཀྱི་ཁོངས་ཞུགས་ཚན་པ་ཁག་དང་སྲིད་གྲོས་ཀྱི་ཆེད་དོན་ཨུ་ཡོན་ལྷན་ཁང་ཁག་གིས་ཞི་ཅིན་ཕིང་གི་དུས་རབས་གསར་པའི་ཀྲུང་གོའི་ཁྱད་ཆོས་ཀྱི་སྤྱི་ཚོགས་རིང་ལུགས་ཀྱི་དགོངས་པ་མཛུབ་ཁྲིད་དུ་བྱས་ཏེ། ཀྲུང་གུང་ཚོགས་ཆེན་ཉི་ཤུ་པ་དང་སྐབས་ཉི་ཤུ་པའི་ཀྲུང་ཨུ་ཚང་འཛོམས་གྲོས་ཚོགས་ཐེངས་གཉིས་པ་དང་གསུམ་པའི་དགོངས་དོན་ཕྱོགས་ཡོངས་ནས་ལག་བསྟར་དོན་འཁྱོལ་བྱེད་པ་དང་། སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས་ཀྲུང་གོ་མི་དམངས་ཆབ་སྲིད་གྲོས་མོལ་ཚོགས་འདུ་བཙུགས་ནས་ལོ་75འཁོར་བར་རྟེན་འབྲེལ་ཞུ་བའི་ཚོགས་ཆེན་ཐོག་གནང་བའི་གསུང་བཤད་གལ་ཆེན་གྱི་དགོངས་དོན་ལག་བསྟར་དོན་འཁྱོལ་གཏིང་ཟབ་བྱས་ཏེ། གྲོས་གཞི་ཧུར་ཐག་ཕུལ་ནས་ཀྲུང་གོའི་ལུགས་ཀྱི་དེང་རབས་ཅན་ལ་སྐུལ་འདེད་གཏོང་བ་དང་། ཕྱོགས་ཡོངས་ནས་སྒྱུར་བཅོས་སྔར་བས་ཟབ་ཏུ་གཏོང་བ། སྤུས་ཚད་མཐོ་བའི་འཕེལ་རྒྱས་ལ་སྐུལ་འདེད་གཏོང་བ། སྤྱི་ཚོགས་ཞི་མཐུན་བརྟན་ལྷིང་ལ་སྲུང་སྐྱོང་བཅས་བྱེད་པར་ཐབས་ཇུས་དང་ནུས་ཤུགས་བཏོན་ཡོད།

ཟླ་3ཚེས་5ཉིན་གྱི་ཆུ་ཚོད་20བར། ཁྱོན་གྲོས་གཞི་ཁག་5890འབྱོར་ཡོད། 《ཀྲུང་གོ་མི་དམངས་ཆབ་སྲིད་གྲོས་མོལ་ཚོགས་འདུ་རྒྱལ་ཡོངས་ཨུ་ཡོན་ལྷན་ཁང་གི་གྲོས་གཞིའི་ལས་དོན་སྲོལ་ཡིག》དང་གྲོས་གཞིའི་ཞིབ་བཤེར་ལས་དོན་གྱི་ཞིབ་སྲོལ་གཞིར་བཟུང་། ཞིབ་བཤེར་བྱས་པ་བརྒྱུད། གྲོས་གཞི་ཁག་5002ཐོ་འགོད་བྱས་པ་དང་། གྲོས་གཞི་ཁག་262ཟླ་སྒྲིལ་བ། གྲོས་གཞི་ཁག་626བསམ་འཆར་དང་གྲོས་འགོར་བསྒྱུར་ཡོད།

ཐོ་འགོད་བྱས་པའི་གྲོས་གཞིའི་ནང་། ཨུ་ཡོན་གྱིས་བཏོན་པའི་གྲོས་གཞི་ཁག་4531ཡོད་པ་དེས་90.6%བཟུང་བ་དང་། མཉམ་སྡེབ་ཀྱིས་བཏོན་པའི་གྲོས་གཞི་ཁག་471ཡོད་པ་དེས་9.4%བཟུང་ཡོད། དེའི་ནང་དཔལ་འབྱོར་འཛུགས་སྐྲུན་ཐད་ཀྱི་གྲོས་གཞི་ཁག་2133ཡོད་པ་དེས་42.6%བཟུང་བ་དང་། ཆབ་སྲིད་འཛུགས་སྐྱོང་ཐད་ཀྱི་གྲོས་གཞི་ཁག་419ཡོད་པ་དེས་8.4%བཟུང་བ། རིག་གནས་འཛུགས་སྐྱོང་ཐད་ཀྱི་གྲོས་གཞི་ཁག་459ཡོད་པ་དེས་9.2%བཟུང་བ། སྤྱི་ཚོགས་འཛུགས་སྐྲུན་ཐད་ཀྱི་གྲོས་གཞི་ཁག་1387ཡོད་པ་དེས་27.7%བཟུང་བ། སྐྱེ་ཁམས་ཤེས་དཔལ་འཛུགས་སྐྱོང་ཐད་ཀྱི་གྲོས་གཞི་ཁག་604ཡོད་པ་དེས་12.1%བཟུང་ཡོད།

ཐེངས་འདིའི་ཚོགས་འདུའི་གྲོས་གཞིར་གཤམ་གསལ་གྱི་ཁྱད་ཆོས་ལྡན་ཡོད་དེ། གཅིག་ནི་ཡང་དག་པའི་ཆབ་སྲིད་ཀྱི་ཁ་ཕྱོགས་མཐའ་འཁྱོངས་བྱས་ཤིང་། ཨུ་ཡོན་ཚོས་ཚད་མཐོའི་འགན་འཁུར་བའི་ཆབ་སྲིད་ཀྱི་འགན་འཁྲི་དང་སྒམ་བརླིང་ནན་ཏན་གྱི་ཚན་རིག་དང་མཐུན་པའི་རྣམ་འགྱུར་ལ་བརྟེན་ནས། ལྟེ་བར་དམིགས་པ་དང་སྤྱི་ཡོངས་ལ་ཞབས་འདེགས་ཞུ་རྒྱུ་མཐའ་འཁྱོངས་བྱས་ཏེ“ལོ་ལྔ་ཚན་བཅུ་བཞི་པའི”འཆར་འགོད་ཕུན་སུམ་ཚོགས་པོས་མཇུག་བསྡུ་བར་སྐུལ་འདེད་གཏོང་བ་དང“ལོ་ལྔ་ཚན་བཅོ་ལྔ་པའི”འཆར་འགོད་ཚན་རིག་དང་མཐུན་པའི་ངང་ཇུས་འགོད་བྱེད་པར་དངོས་སྒྲུབ་ཀྱི་ཐབས་འདོན་ཇུས་འབུལ་བྱས་ཡོད། གཉིས་ནི་སྤུས་ཚད་སྔར་བས་མཐོ་རུ་ཕྱིན་ཞིང་། ཨུ་ཡོན་ཚོས་གྲོས་གཞི་མང་པོ་མེད་ཀྱང་སྤུས་ཚད་ཡག་པོ་ཡོད་དགོས་པའི་རྩ་དོན་མཐའ་འཁྱོངས་བྱས་ནས་ཆེད་ལས་ཀྱི་ལེགས་ཆ་མངོན་གསལ་དོད་པ་དང་། བརྟག་དཔྱད་ཞིབ་འཇུག་གཏིང་ཟབ་བྱས་པས་གྲོས་གཞིའི་གྲོས་འགོར་རྒྱང་ལྟའི་རང་བཞིན་དང་། དམིགས་སའི་རང་བཞིན། བཀོལ་སྤྱོད་ཆོག་པའི་རང་བཞིན་བཅས་དེ་བས་ལྡན་ཡོད། གསུམ་ནི་རིགས་ཁོངས་ཀྱི་ཁྱད་ཆོས་སྔར་བས་མངོན་ཞིང་། སྲིད་གྲོས་ཀྱི་ཁོངས་ཞུགས་ཚན་པ་ཁག་དང་། སྲིད་གྲོས་ཀྱི་ཆེད་དོན་ཨུ་ཡོན་ལྷན་ཁང་། རིགས་ཁོངས་དང་ཨུ་ཡོན་ཚོགས་ཆུང་བཅས་ཀྱིས་རིགས་ཁོངས་ཀྱི་ཁྱད་ཆོས་དང་ལེགས་ཆ་འདོན་པར་མཐོང་ཆེན་བྱས་ཏེ། གྲོས་མོལ་རྒྱ་ཁྱབ་གཏིང་ཟབ་བྱས་པའི་རྨང་གཞིའི་ཐོག་མཉམ་སྡེབ་ཀྱི་གྲོས་གཞི་བཏོན་ཡོད། བཞི་ནི་ནུས་སེམས་གཅིག་སྒྲིལ་གྱི་ནུས་པ་སྔར་བས་བཏོན་ཞིང་། ཨུ་ཡོན་ཚོས་གྲོས་གཞི་བརྒྱུད་མི་དམངས་སྲིད་གྲོས་ཀྱི་ཆེད་དོན་གྲོས་མོལ་སྒྲིག་གཞིའི་ནུས་པ་གང་ལེགས་བཏོན་ཏེ་གྲོས་མོལ་དམངས་གཙོ་ཕྱོགས་ཡོངས་ནས་འཕེལ་རྒྱས་གཏོང་བའི་བླང་བྱ་གལ་ཆེན་ལག་ལེན་བསྟར་བ་དང་། རང་འགན་གཙང་སྒྲུབ་ཀྱི་འགན་འཁྲི་འཁུར་སེམས་ལ་བརྟེན་ནས་འཕེལ་རྒྱས་ཀྱི་གདེང་ཚོད་བརྟན་དུ་བཏང་བ་དང་། འབད་འབུངས་ཀྱི་སྟོབས་ཤུགས་གཅིག་ཏུ་བསྒྲིལ་ཡོད།

ཚོགས་ཆེན་གྲོལ་རྗེས། སྒྲུབ་གཉེར་ཚན་པར་གྲོས་གཞི་ཁག་བསྒྲུབ་རྒྱུར་འབུལ་རྒྱུ་རེད། ཐེངས་འདིའི་ཚོགས་ཆེན་གྱི་གྲོས་གཞི་འདོན་མཚམས་འཇོག་པའི་དུས་ཚོད་ཟིན་རྗེས་འབྱོར་བའི་གྲོས་གཞི་རྣམས་དུས་རྒྱུན་གྱི་གྲོས་གཞིར་བརྩིས་ཏེ་དུས་ཐོག་ཏུ་ཞིབ་བཤེར་དང་ཐག་གཅོད་བྱ་རྒྱུ་རེད།

གོང་གསལ་སྙན་སྒྲོན་ལ་གྲོས་ཞིབ་གནང་རོགས། ཤིན་ཧྭ་གསར་འགྱུར་ཁང་པེ་ཅིང་ནས་ཟླ་3ཚེས་10ཉིན་འབྱོར་བའི་གློག་འཕྲིན།