“ན་ནིང་ཀྲུང་གོ་གུང་ཁྲན་ཏང་སྐབས་ཉི་ཤུ་པའི་ཀྲུང་ཨུ་ཚང་འཛོམས་གྲོས་ཚོགས་ཐེངས་གསུམ་པའི《གཏན་འབེབས》ནང‘སྒྱུར་བཅོས་སྒོ་དབྱེར་ཚར་དུས་མེད’ཅེས་བཏོན་ཡོད། ངའི་བསམ་པར་འདི་ནི་དགའ་འོས་པའི་རྣམ་བཤད་ཅིག་རེད། ཀྲུང་གོས་ཆུ་ཚད་མཐོ་བའི་ཕྱི་ཕྱོགས་སྒོ་དབྱེ་གཏིང་ཟབ་ཏུ་གཏོང་བའི་ཐད་འཆར་འགོད་གང་བྱས་ཡོད་དམ། འབྱུང་འགྱུར་འཐབ་ཇུས་གང་ཞིག་བཟོས་ནས་དཔལ་འབྱོར་གོ་ལ་ཅན་ལ་མུ་མཐུད་སྐུལ་འདེད་གཏོང་རྒྱུ་ཡིན་ནམ” ཟླ་3ཚེས་3ཉིན་འཚོགས་པའི་རྒྱལ་ཡོངས་སྲིད་གྲོས་སྐབས་བཅུ་བཞི་པའི་ཚོགས་འདུ་ཐེངས་གསུམ་པའི་གསར་འགྱུར་ཡོངས་བསྒྲགས་ཚོགས་འདུར་ཕྱི་རྒྱལ་སྨྱན་སྦྱོར་གྱིས་བཏོན་པའི་དྲི་བ་དང་པོ་དེ་སྒོ་དབྱེ་དང་འབྲེལ་བ་ཡོད་པ་དང་། དེ་ཐོག་ནས་སྲུང་སྐྱོང་རིང་ལུགས་ཀྱིས་མགོ་བོ་འདེགས་པ་དང་དཔལ་འབྱོར་གོ་ལ་ཅན་ལ་འགོག་རྐྱེན་འཕྲད་པའི་དུས་བབ་འོག་རྒྱལ་སྤྱིའི་སྤྱི་ཚོགས་ཀྱིས་ཀྲུང་གོས་ཕྱོགས་ཁག་དང་ལག་གདང་སྦྲེལ་ནས་མཉམ་དུ་འཕེལ་རྒྱས་གཏོང་བར་ཚད་མཐོའི་དོ་ཁུར་བྱེད་པ་ནས་མཚོན་ཡོད།

འདས་ཟིན་པའི་ལོ་གཅིག་རིང་། ཀྲུང་གོས་ཆུ་ཚད་དེ་བས་མཐོ་བའི་སྒོ་དབྱེ་རྣམ་པའི་དཔལ་འབྱོར་སྒྲིག་སྲོལ་གསར་པ་གང་མགྱོགས་བསྐྲུན་ནས་སྤུས་ཚད་མཐོ་པོས“རྒྱུད་གཅིག་ལམ་གཅིག”མཉམ་སྐྲུན་བྱས་པར་འཕེལ་རྒྱས་གསར་པ་རྒྱུན་མཐུད་ཐོབ་ཡོད། “རྒྱུད་གཅིག་ལམ་གཅིག”མཉམ་སྐྲུན་གྱི་གྲོས་འགོ་ནི་ཀྲུང་གོས་མཁོ་འདོན་བྱས་པའི་རྒྱལ་སྤྱིའི་སྤྱི་པའི་ཐོན་རྫས་གལ་ཆེན་ཞིག་ཡིན་ལ་ཀྲུང་གོས་ཕྱོགས་ཁག་དང་ལག་གདང་སྦྲེལ་ནས་ཀུན་ཕན་བསྟུན་མཁས་ལ་སྐུལ་འདེད་གཏོང་བའི་དཔལ་འབྱོར་གོ་ལ་ཅན་ཞིག་ཀྱང་ཡིན་པས“ཕྱར་བ་གྲུ་འདེགས”དང“མཐུན་འགྲོགས་མཉམ་གནས”ཀྱི་མཉམ་ལས་ལས་སྟེགས་གལ་ཆེན་དར་སྤེལ་གཏོང་གི་ཡོད། ལོ་10ལྷག་ཙམ་རིང“རྒྱུད་གཅིག་ལམ་གཅིག”མཉམ་སྐྲུན་གྱིས་ཐོག་མཐའ་བར་གསུམ་དུ་མཉམ་གྲོས་དང་། མཉམ་སྐྲུན། མཉམ་སྤྱོད་བཅས་ཀྱི་རྩ་དོན་མཐའ་འཁྱོངས་བྱས་པ་དང་རྒྱལ་ཁབ་150ལྷག་ཙམ་དང་རྒྱལ་སྤྱིའི་རྩ་འཛུགས་30ལྷག་ཙམ་གྱིས་ཧུར་ཐག་ཞུགས་པས་མཉམ་ལས་ཀྱི་ཁྱབ་ཁོངས་རྒྱུན་ཆད་མེད་པར་ཆེ་རུ་ཕྱིན་པ་དང་། མཉམ་ལས་ཀྱི་ཁྱབ་རྒྱ་རྒྱུན་ཆད་མེད་པར་ཆེ་རུ་ཕྱིན་པ། མཉམ་ལས་ཀྱི་རིམ་པ་རྒྱུན་ཆད་མེད་པར་མཐོ་རུ་ཕྱིན་ཡོད། “རྒྱུད་གཅིག་ལམ་གཅིག”མཉམ་སྐྲུན་གྱི་གྲོས་འགོ་ནི་ཀྲུང་གོ་ནས་བྱུང་བ་དང་གོ་སྐབས་དང་གྲུབ་འབྲས་འཛམ་གླིང་ལ་དབང་བས་ཀྲུང་གོས་འཛམ་གླིང་དེང་རབས་ཅན་ལ་ནུས་པ་སྦྱིན་པའི་སྒུལ་ཤུགས་ཀྱི་འབྱུང་རྩ་གལ་ཆེན་གྱི་གྲས་ཤིག་ཏུ་གྱུར་ཡོད་པ་རེད།

“རྒྱུད་གཅིག་ལམ་གཅིག”མཉམ་སྐྲུན་ནི་དར་གོས་ལམ་བུའི་སྙིང་སྟོབས་དར་སྤེལ་གཏོང་བའི་ཀྲུང་གོའི་བྱ་སྤྱོད་ཅིག་རེད། “རྒྱུད་གཅིག་ལམ་གཅིག”མཉམ་སྐྲུན་གྱི་སྟོབས་ཤུགས་འབྱུང་རྩ་གལ་ཆེ་ཤོས་ནི་ཞི་བདེ་མཉམ་གནས་དང་། སྒོ་དབྱེ་བསྟུན་མཁས། སློབ་སྦྱོང་དང་དཔྱད་གཞིར་འཛིན་རེས། གཉིས་ཁེ་གཉིས་ཕན་བཅས་ཀྱི་དར་གོས་ལམ་བུའི་སྙིང་སྟོབས་ཤིག་རེད། དེ་ཀྲུང་གོ་བས་རྒྱལ་ཁབ་ཁག་དང་ཞི་མཐུན་མཉམ་གནས་དང་། མཚེས་མཐུན་འགྲོགས་འདྲིས། རང་ཚུགས་གཞན་སྐྱོང་བཅས་བྱེད་པའི་འཇིག་རྟེན་གྱི་འགྲོ་ལུགས་དང་མཐུན་པ་དང་ཞི་བདེ་དང་། འཕེལ་རྒྱས། མཉམ་ལས། གཉིས་ཕན་བཅས་ཀྱི་དུས་རབས་ཀྱི་རླབས་རྒྱུན་དང་ཡང་འཚམ་ཡོད། ལོ་རྒྱུས་རྒྱུན་འཛིན་ནས་དུས་རབས་མཉམ་སྒྲོག་བར་དུ་གླེང་མོལ་ལ་བརྟེན་ནས་མི་མཐུན་པ་གསབ་པ་དང་། མཐུན་སྒྲིལ་ལ་བརྟེན་ནས་ཁ་ཕྲལ་ལ་ངོ་རྒོལ་བྱེད་པ། མཉམ་ལས་ལ་བརྟེན་ནས་འཕེལ་རྒྱས་ལ་སྐུལ་འདེད་གཏོང་བ་བཅས་ནི་ཀྲུང་གོས་བློ་བརྟན་འགྱུར་མེད་ངང“ནུས་སྦྱིན་རྣམ་པའི་རྒྱལ་ཁབ་ཆེན་པོ”བྱེད་པའི་རིན་ཐང་གི་ལྟ་བ་ཞིག་ཡིན་ལ། “རྒྱུད་གཅིག་ལམ་གཅིག”མཉམ་སྐྲུན་བརྒྱུད་སྤྲོད་བྱེད་པའི་འདུ་ཤེས་ཤིག་ཀྱང་ཡིན། ཟང་ཟིང་ཆེ་བའི་ལོ་བརྒྱའི་འཕོ་འགྱུར་ཆེན་པོའི་ཁྲོད་དུ“རྒྱུད་གཅིག་ལམ་གཅིག”མཉམ་སྐྲུན་གྱིས་འཛམ་གླིང་ལ་སྦྱིན་པ་ནི་འགག་རྩའི་དྲང་ནུས་རེད།

གནའ་བོའི་དར་གོས་ལམ་བུའི་ཐོག་རྔ་མོང་གིས་ལོ་ངོ་སྟོང་ལྷག་ཙམ་འགྲུལ་བཞུད་བྱས་པ་དང་དུས་རབས་གསར་པའི“ཀྲུང་ཡོའི་དུས་གཏན་མེ་འཁོར”རེ་བ་དང་བཅས་འབྱུང་འགྱུར་གྱི་ཕྱོགས་སུ་སྐྱོད་བཞིན་ཡོད། སྤུས་ཚད་མཐོ་པོས“རྒྱུད་གཅིག་ལམ་གཅིག”མཉམ་སྐྲུན་གྱིས་ཚད་གཞི་མཐོ་བ་དང་། དམངས་འཚོར་ཕན་འདོགས་པ། རྒྱུན་མཐུད་ཆོག་པ་བཅས་ཀྱི་མཉམ་ལས་རྣམ་གྲངས་སྤེལ་བར་རྒྱུན་མཐུད་གཞོལ་བ་དང་བསྟུན་ནས། ཀྲུང་གོས་ཕྱོགས་ཁག་དང་མཉམ་དུ་གོ་སྐབས་བཟང་པོ་མུ་མཐུད་གཏོད་དེ་གོ་ལ་ཧྲིལ་པོའི་འཕེལ་རྒྱས་དང་དར་རྒྱས་ལ་ནུས་པ་སྦྱིན་རྒྱུ་རེད།