དབུ་ཤོག>གསར་འགྱུར།>སྐབས་དོན་ཆབ་སྲིད།
  • རྒྱལ་ཡོངས་སྲིད་གྲོས་ཀྱི་ཨུ་ཡོན་སྨན་གྲོང་ནོར་བུ་སྲི་ཐར་གྱིས་གསུངས་དོན།

    མི་རིགས་ལག་ཤེས་བཟོ་རྩལ་གྱི་མཐོ་རིམ་ཤེས་ལྡན་པ་གསོ་སྐྱོང་བྱེད་པར་ལས་སྟེགས་སྔར་བས་ཡག་པོ་སྐྲུན་དགོས།

  • ཡོང་ཁུངས།  ཀྲུང་གོའི་བོད་ཀྱི་གསར་འགྱུར་དྲ་བ།   |     སྤེལ་དུས།  2025-03-11

    འདི་ནི་སྨན་གྲོང་ནོར་བུ་སྲི་ཐར་གྱིས་ཐང་ག་བཞེངས་བཞིན་པ།

    བོད་དུ་ཐང་ག་འབྲི་བཞེངས་དང་། སྲོལ་རྒྱུན་འཁེལ་འཐག རྐོ་དཀྲོལ་འཇིམ་རྐོས་སོགས་མི་རིགས་ལག་ཤེས་བཟོ་རྩལ་གྱི་སྣ་ཁ་ཕུན་སུམ་ཚོགས་ལ་ལོ་རྒྱུས་ཡུན་རིང་ཡང་ལྡན་ཡོད། རྩ་ཆེའི་སྲོལ་རྒྱུན་ལག་རྩལ་དེ་དག་དུས་བསྟུན་མདུན་སྐྱོད་ཐུབ་མིན་དེ་ཀྲུང་ཧྭའི་ཕུལ་བྱུང་སྲོལ་རྒྱུན་རིག་གནས་རྒྱུན་འཛིན་དང་འཕེལ་རྒྱས་ཇི་བྱུང་དང་འབྲེལ་བ་ཆེན་པོ་ཡོད།

    རྒྱལ་ཡོངས་སྲིད་གྲོས་ཀྱི་ཨུ་ཡོན་སྨན་གྲོང་ནོར་བུ་སྲི་ཐར་ནི་སྨན་གསར་ལུགས་ཀྱི་རྒྱལ་ཁབ་རིམ་པའི་མངོན་མིན་རིག་གནས་ཤུལ་བཞག་གི་མཚོན་བྱེད་རང་བཞིན་གྱི་རྒྱུན་འཛིན་པ་དང་ཀྲུང་གོའི་བཟོ་རྩལ་མཛེས་རྩལ་ཆེ་མོ་བ་ཞིག་རེད། ལོ་40ལྷག་ཙམ་རིང་། སྨན་གྲོང་ནོར་བུ་སྲི་ཐར་གྱིས་ཐང་གའི་སྒྱུ་རྩལ་སྲུང་སྐྱོང་དང་རྒྱུན་འཛིན་བྱེད་པར་གཞོལ་བ་མ་ཟད། ད་དུང་ཆུ་ཚད་མཐོ་བའི་ལྷ་འབྲི་བ་400ལྷག་ཙམ་གསོ་སྐྱོང་གནང་ཡོད། ཁོང་གིས་བཙུགས་པ་དང་འབྲེལ་ཡོན་ཀྲང་གི་འགན་ཡང་ཁུར་བའི་བོད་ལྗོངས་ཐང་ག་བཞེངས་ཁང་མིག་སྔར་རྒྱལ་ཁབ་རིམ་པའི་མངོན་མིན་རིག་གནས་ཤུལ་བཞག་མིང་གཞུང་ནང་གི་བོད་ཀྱི་ཐང་གའི“སྨན་གསར་ལུགས”ཀྱི་སྲུང་སྐྱོང་ཚན་པའི་ནང་བཅུག་ཡོད།

    ད་ལོའི་རྒྱལ་ཡོངས་ཀྱི་ཚོགས་འདུ་གཉིས་ཀྱི་རིང་། སྨན་གྲོང་ནོར་བུ་སྲི་ཐར་གྱིས་མི་རིགས་ལག་ཤེས་ཆེད་ལས་ཀྱི་མཐོ་རིམ་ཤེས་ལྡན་པའི་དཔུང་ཁག་འཛུགས་སྐྱོང་ཐད་གྲོས་འདོན་ཇུས་འབུལ་གནང་ཞིང་། ཁོང་གིས་ཆ་རྐྱེན་འཛོམས་པའི་མཐོ་སློབ་ཏུ་ཡུལ་བབ་དང་བསྟུན་ནས་མི་རིགས་ཀྱི་ལག་ཤེས་བཟོ་རྩལ་དང་འབྲེལ་བ་ཡོད་པའི་བཟོ་རྩལ་མཛེས་རྩལ་ཆེད་ལས་བཙུགས་ན་ཡག་པོ་འདུག དེ་འདྲ་བྱུང་ན་མི་རིགས་ལག་ཤེས་བཟོ་རྩལ་གྱི་ལས་ཞུགས་མི་སྣའི་ཐད་ལ་སྲོལ་རྒྱུན་དང་དེང་རབས་ཟུང་འབྲེལ་བྱེད་པར་སྐུལ་འདེད་ཐེབས་ཏེ། མངོན་མིན་རིག་གནས་ཤུལ་བཞག་རྒྱུན་འཛིན་བྱེད་མཁན་ཤེས་རྩལ་འཛོམས་པའི་མི་སྣ་གསོ་སྐྱོང་བྱ་རྒྱུར་ཕན་ཡོད་ཀྱི་མཐུན་རྐྱེན་སྐྲུན་ཐུབ་ཅེས་གསུངས་པ་རེད།

    དེང་སྐབས་བོད་ཀྱི་ཐང་གའི་སྒྱུ་རྩལ་གྱི་འཐུས་ཚབ་མི་སྣ་ཞིག་ཡིན་པའི་སྨན་གྲོང་ནོར་བུ་སྲི་ཐར་ལ་ཆ་མཚོན་ན། གཞུང་འཁྱོངས་གསར་འབྱེད་གནང་རྒྱུ་ནི་ཁོང་གི་སྒྱུ་རྩལ་ལམ་བུར་ཐོག་མཐའ་བར་གསུམ་དུ་རྒྱུན་འཁྱོངས་གནང་བའི་དོན་གཉེར་ཞིག་རེད།

    སྨན་གྲོང་ནོར་བུ་སྲི་ཐར་གྱིས་རང་འགན་སྒྲུབ་རིང་མཐོ་སློབ་དང་མི་རིགས་ལག་ཤེས་བཟོ་རྩལ་ལས་རིགས་ཁྲོམ་རར་བསྐྱོད་ནས་བརྟག་དཔྱད་གཏིང་ཟབ་གནང་ཞིང་། ཁོང་གིས་མཐོ་སློབ་ནི་རྨང་གཞིའི་ཞིབ་འཇུག་དང་གསར་གཏོད་ཤེས་ལྡན་པ་གསོ་སྐྱོང་བྱེད་སའི་གཡུལ་ས་གལ་ཆེན་ཞིག་ཡིན་པས། མི་རིགས་ལག་ཤེས་བཟོ་རྩལ་དང་འབྲེལ་བ་ཡོད་པའི་རིག་ཚན་མ་ལག་དང་། ཆེད་ལས། སློབ་ཚན་འཛུགས་སྐྱོང་བཅས་ཐད་ཕན་ཡོད་ཀྱི་འཚོལ་ཞིབ་བྱས་ཚེ། མི་རིགས་ལག་ཤེས་བཟོ་རྩལ་ཤེས་ལྡན་པ་རིམ་པ་མཐོ་བ་དང་ཆེད་ལས་ཅན་གྱི་ཕྱོགས་སུ་གསོ་སྐྱོང་བྱེད་པར་སྐུལ་འདེད་ནུས་ལྡན་ཐེབས་ངེས་ཡིན་པའི་ངོས་འཛིན་གནང་གི་ཡོད།

    “སྐབས་གཉིས་ཀྱི་རྒྱལ་ཡོངས་སྲིད་གྲོས་ཀྱི་ཨུ་ཡོན་ཞིག་ཡིན་པའི་ངས་ལོ་ལྟར་གྱི་རྒྱལ་ཡོངས་ཀྱི་ཚོགས་འདུ་གཉིས་ཀྱི་ཐོག་ཀྲུང་ཧྭའི་ཕུལ་བྱུང་སྲོལ་རྒྱུན་རིག་གནས་རྒྱུན་འཛིན་དང་འཕེལ་རྒྱས་གཏོང་བར་རེ་སྒུག་གསར་པ་བཅངས་ཀྱི་ཡོད། ངས་རང་ཉིད་ཀྱི་ལས་དོན་དང་བསྟུན་ནས་ཤེས་རྟོགས་བྱུང་བའི་གནད་དོན་དང་བསམ་གཞིག་པེ་ཅིང་དུ་ཁྱེར་ཏེ་རང་འགན་གཙང་སྒྲུབ་བྱ་རྒྱུ་མ་ཟད། མང་ཚོགས་ཀྱི་དོ་ཁུར་མཚོན་པར་བྱེད་ཀྱི་ཡིན”ཞེས་སྨན་གྲོང་ནོར་བུ་སྲི་ཐར་གྱིས་གསུངས་པ་རེད།

    འགན་འཁུར་རྩོམ་སྒྲིག་པ། བདེ་སྐྱིད་བུ་ཁྲིད།

མཉམ་སྤྱོད།

འབྲེལ་ཡོད་གསར་འགྱུར།