འདི་ནི་ཟླ་3ཚེས་5ཉིན། གནོད་འཚེ་ཚབས་ཆེ་ཤོས་ཕོག་པའི་དིང་རི་རྫོང་གི་གྲམ་མཚོ་ཤང་དང་། མཚོ་སྒང་ཤང་། ཆུ་ལྷོ་ཤང་བཅས་ཀྱི་སློབ་ཆུང་3གྱི་སློབ་མ་ཚོས་སློབ་འགོ་ཚུགས་པའི་མཛད་སྒོར་གླུ་གཞས《ཀྲུང་གོའི་ཕུགས་འདུན་སེམས་མཐུན་མཉམ་དུ་གཏོད》ཅེས་པ་གཏོང་བཞིན་པ།

“དམག་མི་དང་། སྨན་པ། མེ་གསོད་རུ་མི་བཅས་ང་ཚོའི་གེགས་རྗེས་ཀྱི་ཁྱིམ་གཞིས་སུ་ཟམ་མི་ཆད་པར་ཡོང་བས་ང་ཚོར་སེམས་འགུལ་ཆེན་པོ་ཐེབས་བྱུང་ལ་དྲིན་ཚོར་ཞེས་པའི་ཚིག་འདིའི་གོ་དོན་སྔར་བས་རྟོགས་བྱུང་། ང་ཆེན་པོ་ཆགས་རྗེས་སྤྱི་ཚོགས་ལ་ཕན་ཐོགས་པའི་མི་ཞིག་བྱེད་ངེས་ཡིན”ཞེས་དིང་རི་རྫོང་སློབ་འབྲིང་གཉིས་པའི་སློབ་དུས་གསར་པ་འགོ་ཚུགས་པའི་མཛད་སྒོར་གྲམ་མཚོ་ཤང་ཟིང་དཀར་གྲོང་ཚོའི་བསྟན་འཛིན་ནོར་གཡང་གིས་གཏམ་བཤད་སྤེལ།

དམིགས་བསལ་གྱི་དགུན་གསེང་འདིར། ས་ཡོམ་ཞིག་གིས་དིང་རི་རྫོང་གི་ལོ་ཆུང་བྱིས་པའི་མི་ཚེའི་བཞུད་ལམ་གྱི་ཁ་ཕྱོགས་སྒྱུར།

སློབ་འགོ་ཚུགས་པའི་མཛད་སྒོ་གྲོལ་རྗེས་ཆུ་ལྷོ་ཤང་མཚོ་སྔ་གྲོང་ཚོའི་བྱམས་པ་བསྟན་འཛིན་གྱིས་མིང་རྟགས་ཀྱིས་གང་བའི་རྐང་རྩེད་སྤོ་ལོ་ཞིག་འཁྱེར་ནས“ལྟོས་དང་། འདི་ཧྲང་ཧའེ་ཧྲེན་ཧྭ་སྤོ་ལོ་རུ་ཁག་གི་རུ་མི་ཝུའུ་ཤིས་ཀྱི་མིང་རྟགས་རེད”ཅེས་སྤྲོ་བ་ཆེན་པོས་གྲོགས་པོ་ཚོར་སོ་སོའི་དགུན་གསེང་རིང་གི་མྱོང་བ་བརྗོད།

གེགས་ཁུལ་གྱི་རྐང་རྩེད་སྤོ་ལོའི་འཐུས་མི་བྱམས་པ་བསྟན་འཛིན་ད་ཐེངས་ཀྱི་དགུན་གསེང་རིང་ཧྲང་ཧའེ་ལུས་རྩལ་ཁང་དུ་བསྐྱོད་ནས་ཀྲུང་གོའི་རིམ་འདས་རིམ་མཚུངས་མཉམ་འགྲན་གྱི་འགོ་ཚུགས་མཛད་སྒོ་དང་ཧྲང་ཧའེ་ཧྲེན་ཧྭ་དང་ཁྲང་ཁྲུན་ཡཱ་ཐའེ་བར་གྱི་འགོ་ཚུགས་འགྲན་བསྡུར་ལ་ལྟ་བའི་བསྐལ་བ་རག་པ་རེད།

བརྗེད་པར་དཀའ་བའི་འགྲུལ་བཞུད་འདིས་ཁོའི་སེམས་དབུས་སུ་རེ་བའི་ས་བོན་ཞིག་བཏབ་པར་བྱས།

“2024ལོར། ང་གཞིས་རྩེ་གྲོང་ཁྱེར་གྱི་U15རྐང་རྩེད་སྤོ་ལོའི་རིམ་མཚུངས་མཉམ་འགྲན་ལ་ཞུགས་པ་ཡིན། ཕྱིས་སུ་སློབ་སྦྱོང་གི་ཞོར་ལ་སྤོ་རྩལ་ཡང་སྦྱངས་ཏེ་ཆེད་ལས་ཀྱི་རྐང་རྩེད་སྤོ་ལོ་བ་ཞིག་ཆགས་པ་བྱེད་ཀྱི་ཡིན”ཞེས་ཤོད་སྐབས་བྱམས་པ་བསྟན་འཛིན་གྱི་ངོ་གདོང་ལ་ཉི་འོད་འཕྲོས་པ་དང་སྦྲགས་མིག་ཟུང་ལས་སེམས་ཤུགས་ཀྱི་འོད་སྣང་འཕྱུར།

དིང་རི་རྫོང་ཨུད་ཏང་གི་སློབ་གྲྭར། གྲམ་མཚོ་ཤང་སློབ་ཆུང་གི་བསྟན་འཛིན་གཡང་འཛོམས་ལ་སློབ་གྲོགས་ཚོས་སེམས་ཁུར་ཆེན་པོ་བྱེད་ཅིང་། ཁོ་མོས་སོ་སོའི་མྱོང་བ་གླེང་། “ས་ཡོམ་བརྒྱབ་རྗེས་མི་མང་པོ་རོགས་རམ་བྱེད་པར་སླེབས་སོང་། དུས་ཡུན་རིང་པོ་མ་འགོར་བར་ང་ཚོ་ཟས་གོས་ལ་སེམས་ཁྲལ་མེད་པ་མ་ཟད་སྡོད་གནས་ཀྱང་སྐྱིད་པོ་བྱུང་། ཆེན་པོ་ཆགས་རྗེས་ང་དགེ་རྒན་བྱེད་འདོད་ཡོད”ཅེས་བསྟན་འཛིན་གཡང་འཛོམས་ཀྱིས་གདེང་ཚོད་ཆེན་པོས་བཤད།

ཆུ་ལྷོ་ཤང་གཙོ་མཚོ་གྲོང་ཚོའི་སློབ་གྲྭ་ཆེ་མོ་བ་མིག་སྐྱིད་ལ་མཚོན་ན། ད་ཐེངས་ཀྱི་དགུན་གསེང་ནི་དམིགས་བསལ་གྱི“ནར་སོན་ལག་རྟགས”ཤིག་དང་ཁྱད་མེད།

ས་ཡོམ་བརྒྱབ་རྗེས། ཁོ་མོས་ཡོམ་འཕྲོར་མ་བལྟོས་པར་སློབ་གྲྭ་ནས་ཕ་ཡུལ་དུ་ལོག་སྟེ་དང་བླངས་པའི་རུ་ཁག་ལ་ཞུགས་པ་དང་། གྲོང་ཚོའི་གཅིག་ཐོག་གཅིག་བརྩེགས་རྒྱུན་ལྗང་ལྗོན་ཤིང་བྱིས་པའི་ཁྱིམ་གཞིས་སུ་ཕྲུ་གུ་40ལྷག་ཙམ་གྱི“སྐབས་འཕྲལ་ཁྱིམ་བདག”གི་འགན་ཁུར།

“དགུན་གསེང་ཚར་རྗེས་ང་སློབ་གྲྭར་ལོག་མཁན་ཡིན། ཡུལ་མི་སྤུན་ཟླ་ཚོས་ཟོལ་མེད་ཀྱི་ཐུགས་རྗེ་ཆེ་ཞུ་བ་ཐོས་སྐབས་ལས་ཀ་དེ་དག་ཚང་མ་རིན་ཐང་ལྡན་པར་གྱུར་སོང”ཞེས་མིག་སྐྱིད་ཀྱིས་བཤད།

འདས་མ་ཐག་པའི་དགུན་གསེང་ལ། ས་ཡོམ་གྱི་སྐྱོ་གདུང་ད་དུང་ཡལ་མེད་ནའང་གང་སར་དྲོད་ཁོལ་དང་སྟོབས་ཤུགས་ཀྱིས་ཁེངས་ཤིང་། ལོ་ཆུང་གཞོན་ནུ་ཚོ་གོད་ཆག་ཁྲོད་དུ་འཚར་ལོངས་བྱུང་ནས་མི་རྣམས་ཡིད་སེམས་འགུལ་བའི་སྡུག་རུས་དང་རེ་བ་མངོན་པ་དང་ཁོང་ཚོ་སོ་སོར་དབང་བའི་འཚར་ལོངས་ཀྱི་རྒྱུགས་ལན་ཞིག་འབྲི་བཞིན་ཡོད།