དུས་ཚོད། ཟླ་3ཚེས་6ཉིན་གྱི་ཕྱི་དྲོ།

ཉིན་རེའི་ལས་རིམ། སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས་སྲིད་གྲོས་ཀྱི་ཚོགས་འདུར་ཞུགས་པའི་ཀྲུང་གོ་དམངས་གཙོ་མནའ་མཐུན་ཚོགས་པ་དང་། ཀྲུང་གོ་དམངས་གཙོ་ཡར་སྐུལ་ཚོགས་པ། སློབ་གསོའི་རིགས་ཁོངས་བཅས་ཀྱི་ཨུ་ཡོན་ལ་གཟིགས་པ་མ་ཟད། མཉམ་འབྲེལ་ཚོགས་ཆུང་གི་ཚོགས་འདུར་ཡང་ཞུགས་པ་རེད།

མི་ཐབས་རིག་ནུས་ཀྱིས་སློབ་གསོར་ནུས་པ་སྦྱིན་ཞིང་། འགྲན་ལམ་གསར་པ་དང་གོ་སྐབས་གསར་པ་འཕྲད་པ་དང་ཆབས་ཅིག འགྲན་སློང་གསར་པ་འཕྲད་པ་དང་སེམས་ཁྲལ་གསར་པ་ཡང་བྱུང་བཞིན་ཡོད།

ཚོགས་རའི་ཐོག་པེ་ཅིང་སྦྲག་སྲིད་གློག་འཕྲིན་སློབ་ཆེན་ནས་ཡིན་པའི་ཨུ་ཡོན་ཞུས་ཁུན་གྱིས་ལག་ལེན་ཁྲོད་བསམ་གཞིག་བྱས་ཏེ“མི་ཐབས་རིག་ནུས་དེ་སློབ་གསོའི་རྒྱལ་ཁབ་ཆེན་པོ་ནས་སློབ་གསོའི་རྒྱལ་ཁབ་སྟོབས་ཆེན་ཕྱོགས་སུ་མགྱོགས་མྱུར་ངང་མདུན་སྐྱོད་བྱེད་པའི་འགག་རྩའི་གནད་ཅིག་ཏུ་གྱུར་ཡོད”ཅེས་གསུངས་པ་རེད།

སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས“སློབ་གསོ་གྲངས་འཛིན་ཅན་དུ་འགྱུར་བའི་ཐད་གནད་དོན་ཁག་གཅིག་གསལ་པོ་བཟོ་དགོས”ཞེས་དོ་ཁུར་ཆེན་པོས་གསུངས་པ་རེད།

“ད་ལྟ། ཕྱོགས་གཅིག་ནས་རིག་ནུས་དྲ་སྦྲེལ་དང་མི་ཐབས་རིག་ནུས་ཡོད་པས། སློབ་གསོའི་ལག་ཆ་དང་བྱེད་ཐབས་ལ་འགྱུར་ལྡོག་འབྱུང་སྲིད་ལ་སློབ་མའི་ནུས་པ་གསོ་སྐྱོང་ལའང་འགྱུར་ལྡོག་འབྱུང་སྲིད་པས་དེ་དག་དུས་བསྟུན་འཕེལ་རྒྱས་ཀྱི་སྒོ་ནས་སྒྱུར་བཅོས་བྱེད་དགོས། ཕྱོགས་གཞན་ཞིག་ནས་སློབ་མའི་བློ་རིག་དང་སེམས་ཁམས་གསོ་སྐྱོང་དང་། རྩ་བའི་ཤེས་རྟོགས་ནུས་པ་དང་གནད་དོན་ཐག་གཅོད་བྱེད་ནུས་སྐྱེད་སྲིང་བྱེད་པར་ལྷོད་གཡེང་གཏོང་མི་རུང་བ་དང་སྦྲགས། ད་དུང་གཞི་རྩའི་ནུས་པའང་ཡོད་དགོས”

ཁོང་གིས་སྔོན་ཆད་དང་བསྡུར་བ་བྱས་ཏེ་དཔེ་ཞིག་བཞག་ནས་གསུངས་དོན། སྔོན་ཆད་ཚོང་ཁང་དུ་ཅ་དངོས་ཉོ་བར་འགྲོ་སྐབས། དངུལ་སིལ་མ་སློག་དུས་གཅིག་རྩིས་ཉིས་རྩིས་རྒྱག་དགོས་ཀྱི་ཡོད། དེ་ནི་རྩིས་རིག་གི་རྨང་གཞི་ཡག་པོ་མེད་པའི་མཚོན་ཚུལ་ཞིག་རེད། རྩིས་རྒྱག་འཕྲུལ་འཁོར་བེད་སྤྱོད་བྱས་རྗེས་དེའི་ཐད་ཀྱི་གཞི་རྩའི་ནུས་པའི་བླང་བྱ་ནི་སྔོན་ཆད་ཟོན་ཕན་རྒྱག་པའི་སྐབས་དང་གཅིག་པ་མིན། དེ་འདྲ་ཡིན་ནའང“སློབ་གསོའི་ཆེས་གཞི་རྩའི་ཆ་དོར་མི་རུང”

དཔེར་ན། གསར་བརྗེའི་སྙིང་སྟོབས་རྒྱུན་འཛིན་ལ་ཆ་བཞག་ན།

ཨུ་ཡོན་མ་ཅིང་ལིན་ནི་པེ་ཅིང་སློབ་འབྲིང་བཞི་པ་ནས་ཡིན་པ་དང་། ཁོང་གི་གཏམ་བཤད་ཀྱི་བརྗོད་དོན་གཙོ་བོ་ནི་རིག་གནས་རྒྱུན་འཛིན་དང་རིག་གནས་ཀྱི་གདེང་ཚོད་ཡིན། སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས་གསན་རྗེས“སློབ་གྲྭས་མི་གཅིག་གི་སེམས་གཏིང་དུ་ས་བོན་ཞིག་འདེབས་སྲིད། སློབ་ཆུང་དང་། སློབ་འབྲིང་། ཐ་ན་བུ་བཅོལ་ཁང་བཅས་ཀྱིས་མི་ཞིག་གི་ཚེ་གང་ལ་ནུས་པ་གལ་ཆེན་ཐོན་སྲིད་པས། ངེས་པར་དུ་ཕྲུ་གུ་ནས་དམ་འཛིན་བྱེད་དགོས” “བསམ་བློ་ཆབ་སྲིད་སློབ་གསོའི‘སློབ་ཁང་ཆུང་ཆུང’དང་སྤྱི་ཚོགས་ཀྱི‘སློབ་ཁང་ཆེན་པོ’གཉིས་མཉམ་འདྲེས་ནུས་ལྡན་བྱེད་དགོས”ཞེས་ཚོར་སྣང་ཟབ་མོས་གསུངས།

མངགས་བཅོལ་ཟབ་མོ་དེར་དུས་རབས་འཕོ་འགྱུར་གྱི་ངེས་ཤུགས་འདུས་ཡོད།

སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས“སློབ་གསོའི་ཐད་ཆུང་དུས་ནས་རྒྱལ་གཅེས་ཀྱི་སེམས་པ་སྐྱེད་སྲིང་བྱེད་པར་ངེས་པར་དུ་དམ་འཛིན་ནན་པོ་བྱེད་དགོས། ཆུང་དུས་ནས་ཕུགས་བསམ་ཡོད་པ་དང་དད་སེམས་དང་གདེང་ཚོད་བརྟན་དུ་གཏོང་དགོས། དེ་ལྟར་བྱས་ཚེ་ཀྲུང་གོའི་ཁྱད་ཆོས་ཀྱི་སྤྱི་ཚོགས་རིང་ལུགས་ཀྱི་བྱ་གཞག་ལ་བློས་འགེལ་ཆོག་པའི་རྒྱུན་འཛིན་པ་གསོ་སྐྱོང་བྱེད་ཐུབ”ཅེས་ཚིག་ནན་དོན་ཟབ་ངང་གསུངས་པ་རེད།

གཞན་ཡང་ད་དུང་དཔེ་ཀློག་ལ་ཆ་བཞག་ན།

རིག་གནས་དར་རྒྱས་ཡོང་བར་ལྟ་ཀློག་ལས་བྱུང་བའི་བསམ་པའི་འཚོ་བཅུད་དང་ཁ་འབྲལ་ཐབས་མེད། “དཔེ་ཀློག་གི་སིལ་ཧྲུག་ཅན”ནི་གྲངས་འཛིན་ཅན་དང་འགྲོགས་པའི“སེམས་ནད”ཅིག་ཀྱང་རེད།

“གྲངས་འཛིན་ཅན་གྱི་དུས་རབས་སུ་སྤྱི་ཚོགས་ཀྱི་གོམ་འགྲོས་མགྱོགས་པས། སེམས་ལྷོད་ལ་བབས་པ་དང་ངང་རྒྱུད་རིང་པོས་དཔེ་ཀློག་བྱེད་པ་ནི་ལས་སླ་མོ་ཞིག་མིན” སྤྱི་ཁྱབ་ཧྲུའུ་ཅིས་སྔོན་ཆད་ཀྱི་དཔེ་ཆ་བའི་ཁྱིམ་རྒྱུད་ནས་ད་ཆའི་རིག་དཔལ་དར་བའི་སློབ་གྲྭ་དང་སྤྱི་ཚོགས་འཛུགས་སྐྲུན་དར་སྤེལ་གཏོང་བའི་བར་“རིག་དཔལ་དར་བའི་རྣམ་པར”ཐུགས་རེ་ཆེན་པོ་གནང་གི་ཡོད།

མངགས་བཅོལ་དེ་ལས་ལག་རྩལ“རང་ལ་སྤྱོད་རྒྱུ་ཡོད་པའི”ཐབས་ཇུས་གསལ་སྟོན་གནང་ཡོད།

དྲ་སྐུད་གཅིག་དང་། བརྙན་ཡོལ་གཅིག ལས་སྟེགས་གཅིག་བཅས་ལ་བརྟེན་ནས་སྤུས་ལེགས་སློབ་གསོའི་ཐོན་ཁུངས་རི་བོ་དང་རྒྱ་མཚོ་བརྒལ་ནས་ཁྱབ་འགྲོ་གི་ཡོད། ལོ་དེ་དག་རིང་སློབ་གསོའི་བྱ་གཞག་ལ་གྲངས་འཛིན་གྱི་ནུས་པ་སྦྱིན་ནས་སྣང་ཚུལ་འདྲ་མིན་སྣ་ཚོགས་ཐོན་ཡོད། “རྒྱལ་ཁབ་ཀྱི་སློབ་གསོ་གྲངས་འཛིན་ཅན་གྱི་འཐབ་ཇུས་ལག་བསྟར”བྱེད་པ་དེ《སློབ་གསོའི་རྒྱལ་ཁབ་སྟོབས་ཆེན་འཛུགས་སྐྲུན་འཆར་འགོད་ཀྱི་རྩ་གནད（2024ལོ་ནས་2035ལོ་བར）》ནང་བཅུག་ཡོད། རང་རྒྱལ་འདི་ཉིད་གོ་ལ་ཧྲིལ་པོའི་གྲངས་འཛིན་སློབ་གསོའི་འཕེལ་རྒྱས་སྟོན་གྲངས་ཨང་རིམ་ཁྲོད་ཨང་དགུ་པར་འཕར་ཡོད།

“རྒྱལ་ཁབ་ཀྱི་སློབ་གསོ་གྲངས་འཛིན་ཅན་གྱི་འཐབ་ཇུས་ལག་བསྟར་བྱས་ནས་སློབ་སྦྱོང་རྣམ་པའི་སྤྱི་ཚོགས་བསྐྲུན་ཏེ་རིགས་ཁག་དང་རིམ་པ་ཁག་གི་ཤེས་ལྡན་པ་མང་པོ་ཐོན་པར་སྐུལ་འདེད་གཏོང་དགོས” ད་རེས་ཀྱི“ཚོགས་པ་དང་ཚོགས་ཆུང”དུ་ཕེབས་སྐབས་བརྗོད་གཞི་དེར་དམིགས་ནས་སྤྱི་ཁྱབ་ཧྲུའུ་ཅིས་ཚང་མར་རྒྱས་བཤད་གཏིང་ཟབ་གནང་བ་རེད།

སློབ་གསོ་གྲངས་འཛིན་ཅན་གྱི་གོ་སྐབས་ཀྱི་མདུན་དུ་ངེས་ཤུགས་སེམས་ལ་འཆང་དགོས་ལ་རང་འགུལ་ངང་བྱས་རྗེས་ཀྱང་འཇོག་དོན་ནི་རིག་དཔལ་དར་བ་དང་ཤེས་ལྡན་པ་མང་པོ་ཐོན་པའི་ཆེད་དུ་རེད་ལ་ཀྲུང་ཧྭ་མི་རིགས་ཀྱི་འབྱུང་འགྱུར་གྱི་ཆེད་དུ་ཡང་རེད།