རྒྱལ་ཡོངས་ཚོགས་འདུ་གཉིས་ཀྱི་ཐོག“དེང་རབས་ཅན་གྱི་ཐོན་ལས་མ་ལག་འཛུགས་སྐྲུན་བྱ་རྒྱུ”ནི་རང་ལྗོངས་ཀྱི་རྒྱལ་ཡོངས་མི་དམངས་འཐུས་ཚོགས་ཀྱི་འཐུས་མི་དང་སྲིད་གྲོས་ཨུ་ཡོན་ཚོས་དོ་ཁུར་བྱ་ཡུལ་གཙོ་གནད་ཀྱི་གྲས་ཤིག་རེད།

“2024ལོར། ཆབ་མདོ་གྲོང་ཁྱེར་གྱིས་ནུས་རྒྱུ་གཙང་མའི་རྣམ་གྲངས་30ལག་ལེན་བསྟར་བར་མ་དངུལ་སྒོར་དུང་ཕྱུར་155ལྷག་ཙམ་བཏང་བས་ནུས་རྒྱུ་གཙང་མའི་ཐོན་ཁུངས་དེ་ཆབ་མདོ་གྲོང་ཁྱེར་གྱི་ཀ་རྟེན་ཐོན་ལས་ཨང་དང་པོར་གྱུར་ཡོད”ཅེས་རྒྱལ་ཡོངས་མི་དམངས་འཐུས་ཚོགས་ཀྱི་འཐུས་མི་དང་ཆབ་མདོ་གྲོང་ཁྱེར་གྱི་ཧྲི་ཀྲང་ལུའོ་ཆིང་ཝུའུ་ཡིས་སྤོབས་སེམས་ཆེན་པོས་གསུངས་ཤིང་། ཁོང་གིས“བཀྲག་མདངས་འཚེར་བའི་གྲུབ་འབྲས”འདི་ལྟར་བྱུང་བ་ནི་ཆབ་མདོ་གྲོང་ཁྱེར་གྱི་ཁྱད་ལྡན་ཐོན་ལས་ཀྱིས་འདེགས་སྐྱོར་ནུས་ལྡན་བྱས་པ་དང་། གསར་དར་ཐོན་ལས་ལ་མ་འཇོག་བྱས་པའི་འཕར་ཤུགས་ཆེན་པོ་དང་ཁ་འབྲལ་ཐབས་མེད་ཅེས་གསུངས།

ཉེ་བའི་ལོ་ཤས་རིང་། ཆབ་མདོ་གྲོང་ཁྱེར་གྱིས“དོན་ཆེན་བཞིར”དམིགས་པ་དང་། “འཛུགས་གཏོད་བཞིར”ཤུགས་སྣོན་བརྒྱབ་སྟེ་ཐོན་ཁུངས་ཀྱི་ལེགས་ཆ་དང་། གནས་ཡུལ་གྱི་ལེགས་ཆ། ཐོན་ལས་ཀྱི་རྨང་གཞི་བཅས་ལ་གཞི་ཚུགས་པའི་ཁར་ཡུལ་བབ་དང་བསྟུན་ཏེ་ཁྱད་ལྡན་ལེགས་ཆའི་ཐོན་ལས་འཕེལ་རྒྱས་དང་། ནུས་རྒྱུ་གཙང་མ་དང་ལྗང་མདོག་བཟོ་ལས་སོགས་ཐོན་ལས་རྒྱ་སྟོབས་ཆེ་རུ་བཏང་སྟེ་ས་མཐོའི་ཁྱད་ཆོས་ལྡན་པའི་དེང་རབས་ཐོན་ལས་ཀྱི་མ་ལག་ལ་སྤུས་འབྲས་ལེགས་གཉེར་ཡོང་བར་སྐུལ་འདེད་བཏང་ཡོད།

གཞན་ཡང་། ཆབ་མདོ་གྲོང་ཁྱེར་གྱི་ཁྱད་ལྡན་ལེགས་ཆའི་ཐོན་ལས་ཀྱི་གྲངས་གཞི་གཞན་ཞིག་ཀྱང་བཀྲག་མདངས་འཚེར་སར་གྱུར་ཡོད།

2024ལོར། ཆབ་མདོ་གྲོང་ཁྱེར་གྱི་གཞི་ཁྱོན་ཡན་གྱི་དཔལ་འབྱོར་འཕར་ཚད་མཐོ་པོ་རྒྱུན་འཁྱོངས་ཐུབ་ནས་གཞི་ཁྱོན་ཡན་གྱི་བཟོ་ལས་འཕར་ཐང་དེ་དུས་མཚུངས་ལས་33.2%འཕར་ནས་ལྗོངས་ཡོངས་ཀྱི་ཨང་དང་པོར་སླེབས་ཏེ། “རྒྱལ་ཁབ་ཀྱི་ལྗང་མདོག་བཟོ་ལས་གསར་གཏོད་དཔེ་སྟོན་ཁུལ”ཞེས་པའི་མཚན་སྙན་ཐོབ་ཡོད།

“ལྗང་མདོག་བཟོ་ལས་ནི་བོད་ཀྱི་སྐྱེ་ཁམས་ཤེས་དཔལ་གྱི་མཐོ་ས་གཏོད་པའི་ཀ་རྟེན་ཐོན་ལས་ཤིག་ཡིན་པ་མ་ཟད། ཆབ་མདོས‘ནུས་རྒྱུའི་མཐོ་ས་དང་སྐྱེ་ཁམས་སྲུང་བཅད་ཟུང་དུ་འབྲེལ་བའི’དམིགས་ཚད་གཉིས་མངོན་འགྱུར་བྱེད་པའི་ལྟེ་བའི་འཕར་ཚད་མཐོ་ཤོས་ཤིག་ཀྱང་རེད”ཅེས་ལུའོ་ཆིང་ཝུའུ་ཡིས་གསར་འགོད་པར་བཤད་བྱུང་། ཁོང་གིས། ཆབ་མདོ་གྲོང་ཁྱེར་གྱིས་འཁོར་སྐྱོད་བཀོད་གཏོང་ལ་ཤུགས་སྣོན་དང་འཕེལ་རྒྱས་ཀྱི་ཁོར་ཡུག་ལེགས་སུ་བཏང་ནས་ཁེ་ལས་ལྗང་མདོག་དང་བདེ་འཇགས་ལྡན་པའི་ངང་འཕེལ་རྒྱས་འགྲོ་བར་སྐུལ་འདེད་བཏང་སྟེ། ཁོངས་གཏོགས་ཁུལ་གྱི་ཁེ་ལས་ལ་གྲངས་འཛིན་ཅན་དུ་ཕྱོགས་སྒྱུར་དང་ཆ་འཕྲིན་ཅན་དུ་རིམ་སྤོར་བྱ་རྒྱུ་གཙོ་གནད་དུ་བརྩི་རྒྱུར་ལྕག་སྐུལ་དང་ཁྲིད་སྟོན་བྱས་པ་མ་ཟད། བཟོ་སྐྲུན་ལས་རིགས་ཀྱི་ལག་རྩལ་སྒྱུར་བཀོད་རིམ་སྤོར་འདུ་འགོད་ལག་ལེན་བསྟར་ཏེ་ཁེ་ལས་ཀྱི་སྒྲིག་ཆས་དེང་རབས་ཅན་དུ་འགྱུར་བའི་ཆུ་ཚད་མཐོ་རུ་འགྲོ་བར་ཤུགས་སྣོན་ཡང་བརྒྱབ་ཡོད་ཅེས་གསུངས།

འདས་ཟིན་པའི་ལོ་གཅིག་རིང་གི་རང་འགན་གཙང་སྒྲུབ་སྐོར་གླེང་སྐབས། རྒྱལ་ཡོངས་སྲིད་གྲོས་ཀྱི་ཨུ་ཡོན་དང་ལྷོ་ཁ་གྲོང་ཁྱེར་སྲིད་གྲོས་ཀྱི་ཀྲུའུ་ཞི་གཞོན་པ་ཟླ་བ་ཚེ་རིང་གིས་ནུས་རྒྱུ་གཙང་མའི་ཐོན་ལས་འཛུགས་སྐྲུན་ལ་དོ་ཁུར་ལྷག་པར་གནང་གི་ཡོད། རྟོག་ཞིབ་དང་བརྟག་ཞིབ་བྱས་ཚུལ་དང་ཟུང་འབྲེལ་གྱིས་ད་ལོའི་རྒྱལ་ཡོངས་ཚོགས་འདུ་གཉིས་ཀྱི་རིང་། ཟླ་བ་ཚེ་རིང་གིས་ལྷོ་ཁ་གྲོང་ཁྱེར་གྱི་རྟེན་གཞི་ཅན་གྱི་འདུ་ཤེས་ནུས་རྒྱུ་གཙང་མའི་ཐོན་ལས་ལ་ཁྱབ་གདལ་གཏོང་རྒྱུའི་སྐོར་གྱི་འབྲེལ་ཡོད་གྲོས་གཞི་འདོན་རྒྱུ་ཡིན་པ་རེད།

ཟླ་བ་ཚེ་རིང་གིས། ནུས་རྒྱུ་གཙང་མའི་ཐོན་ལས་འཕེལ་རྒྱས་ཀྱིས་ས་གནས་དང་ཉེ་འཁོར་མང་ཚོགས་ལ་ཡང་ཐོབ་སྣང་དངོས་དངོས་རྗེན་རྗེན་བྱུང་ཡོད་ཅེས་གསུངས་ཤིང་། ཁོང་གིས་གསར་འགོད་པར་གསུངས་དོན། ལྷོ་ཁ་གྲོང་ཁྱེར་གྱིས་ཐོན་ཁུངས་ཀྱི་ལེགས་ཆ་ཧུར་ཐག་བཏོན་ནས་ནུས་རྒྱུ་གཙང་མའི་ཐོན་ལས་རྒྱ་སྟོབས་ཆེ་རུ་གཏོང་བ་དང་དུས་མཚུངས། ས་གནས་མང་ཚོགས་ནུས་རྒྱུ་གཙང་མའི་རྣམ་གྲངས་འཛུགས་སྐྲུན་ནང་ཞུགས་རྒྱུར་ཁྲིད་སྟོན་དང་དེའི་ནང་བཅུག་སྟེ། མང་ཚོགས་ཀྱི་འབབ་འཕར་ཐབས་ལམ་རྒྱ་ཆེར་བཏང་ཡོད། “ལོ་ལྔ་ཚན་བཅུ་བཞི་པ”ཚུན་དུ། རྒྱ་ཚ་དང་དྭགས་པོ་སོགས་ཀྱི་ནུས་རྒྱུ་གཙང་མའི་རྣམ་གྲངས་ཀྱིས་སློབ་ཆེན་སློབ་མར་ལས་ཞུགས་ལས་གནས་120ལྷག་ཙམ་མཁོ་འདོན་བྱས་པ་མ་ཟད། ས་གནས་ཀྱི་མང་ཚོགས་6000ཡན་གྱི་ངལ་རྩོལ་ནུས་ཤུགས་གཞན་སྒྱུར་བྱས་ཡོད།

རྒྱལ་ཡོངས་སྲིད་གྲོས་ཀྱི་ཨུ་ཡོན་སྨན་གྲོང་ནོར་བུ་སྲི་ཐར་ནི་བོད་ཀྱི་སྨན་གསར་ལུགས་ཀྱི་ཐང་གའི་རྒྱལ་ཁབ་རིམ་པའི་མངོན་མིན་རིག་གནས་ཤུལ་བཞག་གི་འཐུས་ཚབ་རྒྱུན་འཛིན་པ་ཞིག་རེད་ལ། ཀྲུང་གོའི་བཟོ་རྩལ་མཛེས་རྩལ་ལས་རིགས་ཀྱི་ཕུལ་བྱུང་དགེ་རྒན་ཆེ་མོ་བ་ཞིག་ཀྱང་རེད།

“ལོ་འདི་དག་རིང་། རྒྱལ་ཁབ་དང་རང་སྐྱོང་ལྗོངས་ཀྱི་འབྲེལ་ཡོད་སྲིད་ཇུས་ཀྱི་རོགས་རམ་འོག ཐང་གའི་སྒྱུ་རྩལ་གྱི་མངོན་མིན་རིག་གནས་ཤུལ་བཞག་རྒྱུན་འཛིན་དང་འཕེལ་རྒྱས་ཡག་པོ་བྱུང་བ་མ་ཟད། བོད་ཀྱི་མི་རིགས་ཀྱི་ཁྱད་ལྡན་ཐོན་ལས་ལའང་ནང་གནས་ཀྱི་གསོན་ཤུགས་འཕེལ་ཡོད”ཅེས་སྨན་གྲོང་ནོར་བུ་སྲི་ཐར་གྱིས་གསུངས་པ་དང་། ཁོང་གིས། ཉེ་བའི་ལོ་ཤས་རིང་རང་ལྗོངས་ཀྱིས《ཐང་གའི་ཐོན་ལས་མགྱོགས་མྱུར་འཕེལ་རྒྱས་འགྲོ་བར་སྐུལ་འདེད་གཏོང་རྒྱུའི་བསམ་འཆར》སོགས་འབྲེལ་ཡོད་ཀྱི་སྲིད་ཇུས་དང་ཡིག་ཆ་རབ་དང་རིམ་པ་སྔ་རྗེས་སུ་བཏོན་ནས་ཐང་གའི་སྒྱུ་རྩལ་ཚུད་པའི་མི་རིགས་ཀྱི་ལག་ཤེས་བཟོ་རྩལ་ཁྲོམ་ར་དང་མཉམ་འདྲེས་དེ་བས་ལེགས་པ་བྱེད་རྒྱུར་ཁོར་ཡུག་བཟང་པོ་ཞིག་བཏོད་པ་དེས་རིག་གནས་དང་ཡུལ་སྐོར་ལས་རིགས་ནང་ཞུགས་མཁན་ལ་འབབ་འཕར་བརྟན་པོ་རྒྱུན་ཆད་མེད་པར་ཡོང་བར་སྣེ་ཁྲིད་ཐུབ་ཡོད་ཅེས་གསུངས།

ཉེ་བའི་ལོ་ཤས་རིང་། རང་ལྗོངས་ཀྱིས་ཐོན་ཁུངས་ཀྱི་ལེགས་ཆར་གཞི་ཚུགས་ནས་མི་རིགས་ཀྱི་རིག་གནས་ནང་དོན་སྔོག་འདོན་གང་ལེགས་བྱས་ཏེ། ཁྲོམ་རའི་སྣ་མང་ཅན་གྱི་དགོས་མཁོ་དང་འཚམ་རྒྱུ་ཕྱོགས་སྟོན་དུ་བྱས་ནས། བོད་རུམ་དང་བོད་བཟོའི་འཁེལ་འཐག་ཐོན་རྫས་དང་། སྤོས། ཐང་ག བོད་བཟོའི་ཁྱིམ་ཆས། མི་རིགས་ཀྱི་ཁྱད་ལྡན་ཡུལ་སྐོར་ཐོན་ཟོག་སོགས་ཀྱི་ཐོན་ལས་གཙོ་བོ་འཕེལ་རྒྱས་གཏོང་བ་དང་། མི་རིགས་ཀྱི་ལག་ཤེས་བཟོ་རྩལ་ཐོན་རྫས་ཡུལ་སྐོར་ཚོང་ཟོག་ཏུ་བསྒྱུར་བར་སྐུལ་འདེད་གང་མགྱོགས་གཏོང་བ། ཐོན་ལས་ཀྱི་གཞི་ཁྱོན་ཆེ་རུ་གཏོང་བ། དེང་རབས་ཀྱི་ལག་རྩལ་སྒྲིག་ཆས་ནང་འདྲེན་དང་ཁྱབ་གདལ་བེད་སྤྱོད་རིམ་པས་ཆེ་རུ་གཏོང་བ། ཐོན་རྫས་གསར་གཏོད་དང་། བཟོ་རྩལ་གསར་གཏོད། བྲིན་ཚོང་གི་གཞི་ཁྱོན་གསར་གཏོད་སོགས་ཀྱི་འགག་རྩའི་ལྷུ་ཚིགས་ཤུགས་ཆེར་གཏོང་བ་བཅས་བྱས་ཏེ། སྲོལ་རྒྱུན་གྱི་མི་རིགས་ལག་ཤེས་ལས་རིགས་གསར་གཏོད་ཁྲོད་སྐྱེ་སྟོབས་དང་གསོན་ཤུགས་འཕེལ་བར་བྱས་ཡོད། གྲངས་གཞི་ལས་མངོན་པར་གཞིགས་ན། 2024ལོར། ལྗོངས་ཡོངས་ཀྱི་རིག་གནས་ཐོན་ལས་ཀྱི་ཐོན་རྫས་རིན་ཐང་སྒོར་དུང་ཕྱུར་111.44ཟིན་པ་དང་། ལྗོངས་ཡོངས་སུ་ད་ཡོད་ཀྱི་རིག་གནས་ཁེ་ལས་སྣ་ཚོགས་12942དང་དེའི་ནང་ཞུགས་མཁན་ཁྲི་10ལྷག་ཙམ་ཟིན་ཡོད།