ཀྲུང་གོའི་མི་བཞུགས་འཇིག་རྟེན་འཕུར་སྐྱོད་འདུ་འགོད་གཞུང་ལས་ཁང་ནས་གནས་ཚུལ་སྤེལ་བར་གཞིགས་ན། 2025ལོར་ཀྲུང་གོའི་མི་བཞུགས་འཇིག་རྟེན་འཕུར་སྐྱོད་འདུ་འགོད་ཀྱིས་བར་སྣང་ས་ཚིགས་བཀོལ་སྤྱོད་དང་འཕེལ་རྒྱས་དང་མི་བཞུགས་འཕུར་གྲུའི་ཟླ་དཔྱད་ལས་འགན་ཆེན་པོ་གཉིས་ལ་སྐུལ་འདེད་ཏན་ཏིག་གཏོང་རྒྱུ་ཡིན་པ་རེད། མིག་སྔར་ཀྲུང་གོའི་བར་སྣང་ས་ཚིགས་འཁོར་ལམ་ཐོག་འཁོར་སྐྱོད་བརྟན་པོ་ཡོད་པ་དང་ཕན་འབྲས་ལེགས་པོ་ཐོན་ནས། མི་བཞུགས་འཕུར་གྲུའི་ཟླ་དཔྱད་འདུ་འགོད་ཀྱི་ཟླ་བའི་གོ་ལར་འཕུར་བའི་དུས་མཚམས་ལས་འགན་གྱི་ཞིབ་བཟོ་དང་འཛུགས་སྐྲུན་ལས་དོན་ཁག་འཆར་གཞི་ལྟར་བརྟན་པོའི་ངང་སྐུལ་འདེད་གཏོང་བཞིན་ཡོད།

2025ལོར་འདུ་འགོད་དེས་མི་བཞུགས་འཕུར་སྐྱོད་ལས་འགན་ཐེངས་2དང་ཟོག་འདྲེན་འཕུར་གྲུའི་མཁོ་སྤྲོད་ལས་འགན་ཐེངས་1འཆར་འགོད་བྱས་ཡོད། འདི་ལོ་རང་རྒྱལ་གྱིས་ལྷ་གྲུ་ཨང་ཉི་ཤུ་པ་དང་ལྷ་གྲུ་ཨང་ཉེར་གཅིག་པའི་མི་བཞུགས་འཕུར་གྲུ་འཕེན་གཏོང་བྱ་རྒྱུ་ཡིན་པ་དང་། མིག་སྔར་འཇིག་རྟེན་འཕུར་སྐྱོད་པའི་ཚོགས་ཆུང་བདམས་ཟིན་པ་དང་འབྲེལ་ཡོད་སྦྱོང་བརྡར་བྱེད་བཞིན་ཡོད།

མིག་སྔར་ཀྲུང་གོའི་བར་སྣང་ས་ཚིགས་ཀྱིས་འཁོར་ལམ་ཐོག་བར་སྣང་ཚན་རིག་ཞིབ་འཇུག་དང་བཀོལ་སྤྱོད་རྣམ་གྲངས་180ལྷག་ཙམ་ལག་བསྟར་བྱས་པར་གསར་གཏོད་རང་བཞིན་གྱི་གྲུབ་འབྲས་མང་པོ་ཐོབ་ཡོད། རྒྱང་སྐྱོད་ཨང་བཅུ་པའི་སྐྱེལ་འདྲེན་མེ་ཤུགས་འཕུར་མདའ་དང་། ཕུགས་འདུན་གྲུ་གཟིངས་ཀྱི་མི་བཞུགས་འཕུར་གྲུ ཟླ་བའི་གོ་ལའི་ངོས་ཀྱི་བབས་ཆས། བར་སྣང་ལ་ཕྱོགས་པའི་ཟླ་བའི་གོ་ལའི་གྱོན་ཆས། ཟླ་དཔྱད་མི་བཞུགས་འཁོར་ལོ་སོགས་འཕུར་སྐྱོད་ཐོན་རྫས་གཙོ་བོ་ཐོག་མའི་ཞིབ་བཟོའི་དུས་མཚམས་སུ་སླེབས་ནས་དུས་རིམ་རང་བཞིན་གྱི་འཕེལ་རྒྱས་བྱུང་ཡོད། ཝུན་ཁྲང་འཕེན་གཏོང་ར་བའི་ཟླ་བའི་གོ་ལར་འཕུར་བའི་ལས་འགན་དང་འབྲེལ་བ་ཡོད་པའི་ཚོད་ལྟའི་འཕེན་གཏོང་སྒྲིག་བཀོད་ཀྱི་སྒྲིག་ཆས་གོ་རིམ་ལྡན་པའི་སྒོ་ནས་ཞིབ་བཟོ་དང་འཛུགས་སྐྲུན་བྱེད་བཞིན་ཡོད།