“ཨོ་ཀྲུང་འབྲེལ་བ་ལོ་རྒྱུས་ཀྱི་དུས་སྐབས་ཡག་ཤོས་སུ་གནས་ཡོད། ཨོ་མན་ཕྱོགས་ཁག་གིས་གོ་སྐབས་དམ་འཛིན་གྱིས་ཀྲུང་གོ་དང་མཉམ་ལས་སྔར་བས་ཟབ་ཏུ་བཏང་སྟེ་གཉིས་ཁེ་གཉིས་ཕན་དང་ཐུན་མོང་འཕེལ་རྒྱས་ཡོང་བའི་རེ་སྒུག་བྱེད་བཞིན་ཡོད” ཨོ་མན་ཀྲུང་གོའི་མཛའ་གྲོགས་གླེང་སྟེགས་ཀྱི་དྲུང་ཆེ་དང《ལྟ་བའི་ཚགས་པར》གྱི་སྤྱི་ཁྱབ་རྩོམ་སྒྲིག་པ་ཧ་ཐི་མུའུ·ཐ་དབྱི་ཡིས་ཉིན་ཤས་གོང་འདི་ག་ཚགས་པར་གྱི་གསར་འགོད་པའི་ཆེད་དོན་བཅར་འདྲི་དང་ལེན་བྱེད་སྐབས། ཨོ་ཀྲུང་མཛའ་གྲོགས་ལ་ལོ་རྒྱུས་ཡུན་རིང་ལྡན་པ་དང་ཁྱབ་ཁོངས་ཁག་གི་དངོས་གཉེར་མཉམ་ལས་ལ་སྐུལ་འདེད་གཏོང་རྒྱུ་དེ་རྒྱལ་ཁབ་གཉིས་པོའི་མི་དམངས་ཀྱི་ཐུན་མོང་གི་འདུན་པ་དང་མཐུན་ཡོད་ཅེས་བརྗོད།

ཉེ་བའི་ལོ་ཤས་རིང་། ཨོ་མན་དང་ཀྲུང་གོའི་འབྲེལ་བ་འཕེལ་རྒྱས་མྱུར་པོ་བྱུང་ཡོད། སྤུས་ཚད་མཐོ་བའི“རྒྱུད་གཅིག་ལམ་གཅིག”མཉམ་སྐྲུན་གྱི་སྒྲོམ་གཞིའི་འོག་ཕྱོགས་གཉིས་པོའི་དཔལ་འབྱོར་དང་། རིག་གནས། སློབ་གསོ། ཚན་རྩལ་སོགས་ཁྱབ་ཁོངས་ཀྱི་མཉམ་ལས་རྒྱུན་ཆད་མེད་པར་ཟབ་ཏུ་ཕྱིན་ཡོད། མིག་སྔར་ཀྲུང་གོ་ནི་ཨོ་མན་གྱི་ཚོང་དོན་རོགས་ཟླ་ཆེ་ཤོས་ཡིན་པ་དང་། ཨོ་མན་ནི་ཨ་རབ་རྒྱལ་ཁབ་ཁྲོད་ཀྱི་ཀྲུང་གོའི་ཚོང་དོན་རོགས་ཟླ་ཆེ་གྲས་ཨང་བཞི་པ་དེ་རེད།

ཐ་དབྱི་ཡིས། སྤུས་ཚད་མཐོ་བའི“རྒྱུད་གཅིག་ལམ་གཅིག”མཉམ་སྐྲུན་གྱི་གྲོས་འགོ་དང་ཨོ་མན་གྱི“2040ལོའི་རེ་འདོད”འབྲེལ་མཐུད་བྱ་རྒྱུར་ཤུགས་སྣོན་རྒྱག་རྒྱུ་དེ་ཨོ་ཀྲུང་ཕྱོགས་གཉིས་པོའི་ཁེ་ཕན་དང་མཐུན་པ་མ་ཟད། རྒྱལ་ཁབ་གཉིས་པོས་དཔལ་འབྱོར་འཕེལ་རྒྱས་ཕྱོགས་སྒྱུར་ལ་སྐུལ་འདེད་གཏོང་བའི་ཐུན་མོང་གི་འདུན་པའང་མཚོན་ཡོད། ཕྱོགས་གཉིས་པོའི་རིམ་པ་ཁག་དབར་ཕན་ཚུན་འཚམས་འདྲི་ཡང་ཡང་བྱས་ཏེ་དངོས་གཉེར་མཉམ་ལས་རྣམ་གྲངས་མང་པོ་ཞིག་དོན་འཁྱོལ་ཐུབ་པ་དེ་ནི་ཕྱོགས་གཉིས་པོའི་འཕེལ་རྒྱས་འཐབ་ཇུས་འབྲེལ་མཐུད་ཐུབ་པའི་མཚོན་ཚུལ་ཞིག་རེད། ཀྲུང་གོ—ཨོ་མན(ཏུའུ་ཁུའུ་མུའུ)ཐོན་ལས་གླིང་ནི་ཨོ་ཀྲུང“རྒྱུད་གཅིག་ལམ་གཅིག”མཉམ་སྐྲུན་གྱི་སྒྲོམ་གཞིའི་འོག་གི་མཉམ་ལས་རྣམ་གྲངས་གལ་ཆེན་ཞིག་ཡིན་པ་དང་། ཀྲུང་གོའི་ཁེ་ལས་མང་པོ་ཞིག་ཨོ་མན་གྱི་དཔལ་འབྱོར་དང་སྤྱི་ཚོགས་འཕེལ་རྒྱས་འཕེལ་རིམ་ལ་སྐུལ་འདེད་གཏོང་བའི་ནང་ཞུགས་ཡོད་ཅེས་ནན་བཤད་བྱས་པ་རེད།

ཐ་དབྱི་ཡིས་སྨྱན་སྦྱོར་གྱིས་རྒྱལ་ཁབ་མི་འདྲ་བའི་དམངས་ཚོགས་དབར་ཕན་ཚུན་བསམ་ཤེས་བྱེད་ཟབ་ཏུ་གཏོང་བའི་ཐད་ནུས་པ་གལ་ཆེན་བཏོན་ཡོད། མིག་སྔར་འཛམ་གླིང་ཡོ་ལང་དང་འཕོ་འགྱུར་གྱི་དུས་སྐབས་གསར་པར་སླེབས་པས“ཨོ་ཀྲུང་ལས་རིགས་ཁག་གིས་མཉམ་ལས་ལ་ཤུགས་སྣོན་བརྒྱབ་སྟེ་ཨོ་ཀྲུང་མཛའ་གྲོགས་འགྲོ་འོང་གི་གཏམ་རྒྱུད་མཉམ་དུ་ཡག་པོ་བརྗོད་དགོས”པའི་ངོས་འཛིན་བྱས་པ་རེད།

(འདི་ག་ཚགས་པར་གྱི་དབུས་ཤར་ལྟེ་བའི་གསར་འགྱུར་ཡན་ལག་ཁང་གི་ཧའེ་སེ་མུའུ·མུའུ་ཀྲ་ཨེན་རྩོམ་འབྲིའི་ནང་ཞུགས་ཡོད)