འདི་ནི་སྨན་དོན་པས་གཡུ་ཐོག་ཡོན་ཏན་མགོན་པོའི་སྐུ་བརྙན་མདུན་དུ་དགུན་གསེང་གི་བཅོལ་ཉར་འཛིན་གྲྭའི་སློབ་མར་བོད་ཀྱི་གསོ་བ་རིག་པའི་འཕེལ་རྒྱས་ཀྱི་ལོ་རྒྱུས་ངོ་སྤྲོད་བྱེད་བཞིན་པ།

འདི་ནི་སྨན་དོན་པས་དགུན་གསེང་གི་བཅོལ་ཉར་འཛིན་གྲྭའི་སློབ་མ་ཁྲིད་དེ་བོད་སྨན་གྱི་སྨན་རྩྭར་རྒྱུས་ལོན་བྱེད་བཞིན་པ།

དགུན་གསེང་རིང་གི་བཅོལ་ཉར་འཛིན་གྲྭའི་སློབ་མ་རྣམས་ཀྱི་སློབ་གསེང་འཚོ་བ་སྔར་བས་ཕུན་སུམ་ཚོགས་སུ་བཏང་ནས་ཀྲུང་ཧྭའི་ཕུལ་བྱུང་སྲོལ་རྒྱུན་རིག་གནས་རྒྱུན་འཛིན་དང་དར་སྤེལ་གཏིང་ཟབ་གཏོང་ཆེད། སྣ་དཀར་རྩེ་རྫོང་དམངས་སྲིད་ཅུས(རྫོང་དམག་ཞབས་ཐིམ་པའི་དམག་མིའི་ལས་དོན་ཅུས)ཀྱི་མཛུབ་ཁྲིད་ཞིབ་ཚགས་འོག དགུན་གསེང་རིང་། སྣ་དཀར་རྩེ་རྫོང་གི་ན་སོ་དར་ལ་མ་བབས་པའི་མིའི་སྲུང་སྐྱོང་ལྟེ་གནས་དང་རྫོང་སྤྱི་ཚོགས་ལས་དོན་ས་ཚིགས་ཀྱིས་རྫོང་སྨན་རྩིས་ཁང་དང་མཉམ་དུ་དགུན་གསེང་རིང་གི་བཅོལ་ཉར་འཛིན་གྲྭའི་སློབ་མ་40ལྷག་ཙམ་སྒྲིག་འཛུགས་བྱས་ནས། རྣམ་པ་གསར་པའི་བོད་ཀྱི་གསོ་བ་རིག་པའི་རིག་གནས་དྲིལ་བསྒྲགས་བྱེད་སྒོ་སྤེལ་ཏེ་ཕྲུ་གུ་ཚོའི་སེམས་ཀྱི་ཞིང་ས་གཤིན་པོར་རིག་གནས་རྒྱུན་འཛིན་གྱི་ས་བོན་བཏབ་པ་རེད།

བྱེད་སྒོ་སྤེལ་ཡུལ་དུ་རྣམ་པ་འཁྲུག་ཆ་ཤིན་ཏུ་དོད་ཅིང་། སྣ་དཀར་རྩེ་རྫོང་སྨན་རྩིས་ཁང་གི་བསླབ་རྒན་སྨན་དོན་པས་གསོན་ཉམས་དོད་ལ་སྤྲོ་སྣང་ལྡན་པའི་གཏམ་རྒྱུད་ལ་བརྟེན་ཏེ་ཕྲུ་གུ་ཚོར་བོད་ཀྱི་གསོ་བ་རིག་པའི་འབྱུང་ཁུངས་དང་འཕེལ་རྒྱས་སྐོར་ལྷུག་པོར་བརྗོད།

“ཡ་མཚན་ཆེ་བ་ལ། མི་འདིར་ན་ཚ་ལྗིད་པོ་འདི་འདྲ་ཕོག་འདུག རྟར་བཞོན་ནས་བསྐོར་བ་ཁ་ཤས་བརྒྱབ་པ་ཙམ་གྱིས་དྲག་སྐྱེད་ཇི་ལྟར་བྱུང་བ་ཡིན་ནམ། གཡུ་ཐོག་ཡོན་ཏན་མགོན་པོས། ནད་པ་འདིའི་གློ་བ་རྩིབས་མར་འབྱར་ཡོད་པས་རྟ་རྒྱུག་ནས་འཁྲུག་ཐེབས་སྐབས་དེ་གཉིས་སོ་སོར་འབྱེད་པས་ན། རང་བཞིན་གྱིས་དྲག་སྐྱེད་འགྲོ་གི་ཡོད”ཅེས་གསུངས་མྱོང་བའི་སྐོར་ཐོས་སྐབས་དེ་གར་ཡོད་པའི་སློབ་མ་ཚོས་གཡུ་ཐོག་ཡོན་ཏན་མགོན་པོའི་སྨན་བཅོས་ཆུ་ཚད་ལ་ཡིད་རངས་ངང་གིས་སྐྱེས། བོད་ཀྱི་གསོ་བ་རིག་པ་ཐོག་མར་དར་འགོ་ཚུགས་པ་ནས་མཐའ་འཁོར་མི་རིགས་ཀྱི་གསོ་རིག་གི་ཉིང་བཅུད་ཟམ་མི་ཆད་པར་བླངས་རྗེས་དབྱར་མཚོ་རྒྱས་པ་ལྟར་འཕེལ་རྒྱས་ཕྱིན་པའི་དུས་མཚམས་བར། དུས་རབས་རིམ་བྱུང་གི་བོད་ཀྱི་གསོ་རིག་མཁས་པའི་ངོ་མཚར་གཏམ་རྒྱུད་བརྗོད་པ་ལས་ལོ་རྒྱུས་ཀྱི་ཆུ་རྒྱུན་རིང་པོའི་ནང་བོད་ཀྱི་གསོ་བ་རིག་པ་རྒྱུན་མཐུད་འཕེལ་རྒྱས་དང་གསར་གཏོད་བྱས་པའི་བརྒྱུད་རིམ་བཅས་སྨན་དོན་པས་འགྲེལ་བཤད་རྒྱག་སྐབས་ཕྲུ་གུ་ཚོས་ནན་ཏན་ངང་ཉན་ནས་བོད་ཀྱི་གསོ་བ་རིག་པར་ལོ་རྒྱུས་ཡུན་རིང་ལྡན་པ་དང་ནང་དོན་ཧ་ཅང་གཏིང་ཟབ་པ་ཤེས་ཚོར་ཐུབ་ཡོད།

དེ་རྗེས། བྱེད་སྒོ་དེ་ཡང་ངོ་མཚར་གྱིས་ཕྱུག་པ་དང་འཚོལ་ཞིབ་རང་བཞིན་གྱི་ལག་ལེན་དང་ལྟ་སྐོར་བྱེད་པའི་དུས་མཚམས་སུ་སླེབས་ཡོད།

བོད་ལུགས་སྨན་རྩྭ་འགྲེམས་ཁུལ་དུ་སྒྲོག་ཙེའི་ཐོག་བོད་ལུགས་སྨན་རྩྭ་སྣ་ཚོགས་བཤམས་ཡོད་པས། བཟོ་ལྟ་འདྲ་མིན་གྱི་སྨན་རྩྭས་ཕྲུ་གུ་ཚོའི་ཡིད་དབང་རབ་ཏུ་འཕྲོག་ནས་ཡ་མཚན་ཆེན་པོས་དེའི་ཕྱོགས་སུ་རུབ་ནས་བསྡད།

“ངས་སྨན་རྩྭ་འདི་མཐོང་མྱོང་ཡོད། འདིས་ངའི་སྤོ་བོ་ལགས་ཀྱི་གྲུམ་བུའི་ནད་བཅོས་ཐུབ་པ་རེད”ཅེས་གཟུགས་སྟོབས་ཆེ་བའི་ཕྲུ་གུ་ཞིག་གིས་སྐད་ཤུགས་ཆུང་ངུས་ཉེ་འགྲམ་གྱི་གྲོགས་པོ་དེར་བཤད། ཕྲུ་གུ་ཚོས་བློ་རྩེ་གཅིག་སྒྲིམ་གྱིས་ཉན་ཞོར་དུ་སྨན་རྩྭའི་བཟོ་ལྟར་ཞིབ་པར་བལྟས། ཡང་མཚམས་རེ་ཧ་ལས་ཧང་སངས་པའི་སྐད་སྒྲ་རེ་རེ་ཡང་གྲགས་འོང་།

བོད་ཀྱི་གསོ་བ་རིག་པའི་ཡོ་བྱད་འགྲེམས་ཁུལ་དུ་སྨན་དོན་པས་བཟོ་རྩལ་ལེགས་པའི་གསེར་ཁབ་དང་གནའ་ཉམས་དོད་པའི་རྩ་བརྟག་ཡོ་བྱད་སོགས་འགྲེམས་སྟོན་བྱས་འདུག སྨན་དོན་པས་རྩ་བརྟག་ཡོ་བྱད་ཐོགས་བཞིན་ཕྲུ་གུ་ཚོར་རྩ་བལྟས་ནས་ལུས་པོའི་བདེ་ཐང་གི་གནས་ཚུལ་ལ་ཇི་ལྟར་བརྟག་དགོས་མིན་འགྲེལ་བཤད་བརྒྱབ་པ་མ་ཟད། བོད་ཀྱི་གསོ་བ་རིག་པའི་དམིགས་བསལ་ཁྱད་ཆོས་ལྡན་པའི་རླུང་མཁྲིས་བད་ཀན་གསུམ་གྱི་གཞུང་ལུགས་དང་མིའི་ལུས་པོའི་བདེ་ཐང་འབྲེལ་བ་དམ་ཟབ་ཡོད་ལུགས་དོན་སྙིང་ཟབ་ལ་གོ་བདེ་ཤེས་སླའི་ངང་འགྲེལ་བཤད་ཀྱང་བརྒྱབ་པ་རེད། འགྲེལ་བཤད་རྒྱག་སྐབས་ཕྲུ་གུ་ཚོའི་ཡིད་དབང་རབ་ཏུ་འཕྲོག་ནས་མདུན་དུ་འཚང་ཁ་ཤིག་ཤིག་ངང་ཉམས་ལེན་བྱེད་པར་འོང་། སྨན་དོན་པའི་ངང་རྒྱུད་རིང་བའི་མཛུབ་ཁྲིད་འོག་ཕྲུ་གུ་ཕན་ཚུན་རྩའི་འཕར་ཚུལ་ག་ལེར་བརྟག་པ་དེ་ནི་མིའི་ལུས་པོའི་གསང་བ་འཚོལ་ཞིབ་བྱེད་པ་ལྟར་དུ་སྣང་།

“ང་རང་ནར་སོན་རྗེས་བོད་ཀྱི་གསོ་བ་རིག་པའི་སྨན་པ་ཞིག་བྱེད་ཀྱི་ཡིན”ཞེས་བུ་མོ་ཆུང་ཆུང་ཞིག་གིས་ངོ་ཚ་སྨིན་པོས་བཤད། བྱེད་སྒོ་མཇུག་འགྲིལ་སྐབས་ཕྲུ་གུ་ཚོས་བོད་ཀྱི་གསོ་བ་རིག་པར་རྒྱུས་མངའ་གསར་པ་ཞིག་བྱུང་བ་མ་ཟད། རང་ཉིད་སྐྱེ་ས་འཚར་སའི་ས་གཞི་འདིས་ངོ་མཚར་ཆེ་བའི་གསོ་རིག་གཞུང་ལུགས་འདི་འདྲ་ཞིག་བསྐྱངས་པ་དངོས་འབྲེལ་ཚོར་བྱུང་ཞེས་ཕྲུ་གུ་མི་ཉུང་བ་ཞིག་གིས་སེམས་འགུལ་ཐེབས་བཞིན་བཤད།