འདི་ནི་རྣམ་གླིང་རྫོང་དེང་རབས་ཞིང་ལས་ཐོན་ལས་གླིང་ཁུལ་གྱི་ཤངས་ཆུའི་ཟམ་ཆེན་ཡིན་པ།

རྣམ་གླིང་རྫོང་གིས་ཏང་གི་ཐབས་ཇུས་བཀོད་སྒྲིག་ལ་ཕྱོགས་ཡོངས་ནས་སྐུལ་འདེད་བཏང་སྟེ་འགྲིམ་འགྲུལ་སྐྱེལ་ འདྲེན་བྱ་གཞག་འཕེལ་རྒྱས་བརྟན་ལ་གོ་རིམ་ལྡན་པ་དང་བརྟན་ཐོག་ཡར་འཕེལ་ཡོང་བར་བྱས་པ།

2024ལོར་རྣམ་གླིང་རྫོང་གིས་སྔར་ན་མེད་པའི་འགག་སྒྲོལ་བྱས་ནས་འགྲིམ་འགྲུལ་གྱི་གཙོ་གནད་རྣམ་གྲངས་ནུས་ཤུགས་ཡོད་རྒུས་སྐྲུན་མགྱོགས་སུ་བཏང་ཞིང་། ལོ་ཧྲིལ་པོར་འགྲིམ་འགྲུལ་རིགས་ཀྱི་རྣམ་གྲངས་ཁྱོན་13གསར་སྐྲུན་དང་མཐུད་སྐྲུན་ལ་སྐུལ་འདེད་བཏང་བ་དང་། ཁྱོན་མ་དངུལ་སྒོར་དུང་ཕྱུར་1.54བཏང་བར་རྣམ་གྲངས་ཚང་མ་བདེ་འཇགས་དང་གོ་རིམ་ལྡན་པའི་ངང་ལས་མཇུག་འགྲིལ་ཡོད།

འཛུགས་སྐྲུན་རྣམ་གྲངས་ཁག་དང་མང་ཚོགས་ཀྱི་རྒྱུན་གཏན་གྱི་ཟོག་འདྲེན་དགོས་མཁོར་བརྟེན་ནས་རྫོང་ཡོངས་ཀྱི་ཟོག་འདྲེན་གཉེར་སྐྱོང་རང་བཞིན་གྱི་ཡོང་འབབ་སྒོར་ཁྲི་5377མངོན་འགྱུར་ཐུབ་སྟེ། ཟོག་འདྲེན་ལས་རིགས་གསར་འཕར་ལ་སྐུལ་འདེད་བཏང་ཡོད། འགྲིམ་འགྲུལ་ཁྱབ་ཁོངས་ཀྱི་སྒོར་ཁྲི་400མན་གྱི་ཉེན་ཡོད་ཟམ་ཆེན་སྒྱུར་བཀོད་དང་། བདག་སྐྱོང་ལས་གྲྭ བདེ་འཇགས་འགན་ལེན་སོགས་དང་འབྲེལ་བ་ཡོད་པའི་རྣམ་གྲངས་ཁག་8ལ་ཁྱོན་མ་དངུལ་སྒོར་ཁྲི་2196.63བཏང་བ་དང་། ཡོངས་བསྒྲགས་ངང་རྒྱན་ཤོག་འཐེན་པའི་བྱ་ཐབས་སྤྱད་ནས་ས་གནས་དེ་གའི་ཞིང་འབྲོག་པའི་ཨར་ལས་རུ་ཁག་ལ་ལས་གྲྭ་གཉེར་འགན་སྤྲད་པ་དང་འབྲེལ། འགྲིམ་འགྲུལ་འཛུགས་སྐྲུན་རྣམ་གྲངས་གལ་ཆེན་ནང་ཞིང་འབྲོག་མང་ཚོགས་ཀྱི་ལས་མི་1136བསྡུས་པར་ཡོང་འབབ་སྒོར་ཁྲི་3765.57བྱུང་ཡོད། མང་ཚོགས་ཐག་ཉེ་ས་དང་སྟབས་བདེ་སར་འབབ་འཕར་ཐུབ་ཆེད་མཐུན་རྐྱེན་བསྐྲུན་པ་མ་ཟད། དཔལ་འབྱོར་འཕེལ་རྒྱས་ལ་སྐུལ་འདེད་གཏོང་བ་དང་། མི་དམངས་མང་ཚོགས་ཀྱི་ཕྱིར་སྐྱོད་ཆ་རྐྱེན་ལེགས་སུ་གཏོང་བ། མང་ཚོགས་ཀྱི་འཚོ་བའི་སྤུས་ཚད་མཐོ་རུ་གཏོང་བ། གྲོང་གསེབ་དར་རྒྱས་ལ་རམ་འདེགས་བཅས་བྱ་ཆེད་འགྲིམ་འགྲུལ་གྱི་ལེགས་སྐྱེས་ཕུལ་ཡོད།

མི་དམངས་ལ་ཞབས་འདེགས་ཞུ་བའི་ཐོག་མའི་བསམ་འདུན་དང་འགན་འཁྲི་བློ་ལ་བཅངས་ནས་གྲོང་གསེབ་ཀྱི་འགྲིམ་འགྲུལ་ཆ་རྐྱེན་རྒྱུན་ཆད་མེད་པར་ལེགས་སུ་བཏང་ཞིང་། སྤྱི་ལེ་122ཙམ་ཟིན་པའི་གཞུང་ལམ་ཨ་མའི་ལམ་ངོས་ཉམས་བཟོ་བདག་སྐྱོང་གི་ལས་གྲྭ་དང་། གྲོང་གསེབ་ཀྱི་ཉེན་ཡོད་ཟམ་ཆེན་2སྒྱུར་བཀོད། སྤྱི་ལེ་21.89ཡི་བདེ་འཇགས་འགོག་སྲུང་ལས་གྲྭ་བཅས་ལེགས་གྲུབ་བྱས་པ་དང་གྲོང་གསེབ་གཞུང་ལམ་གྱི་རིམ་གསུམ“ལམ་དཔོན་ལམ་ལུགས”རྒྱུན་མཐུད་ཟབ་ཏུ་བཏང་བ། གཞུང་ལམ་ལ་རྒྱུན་གཏན་བདག་སྐྱོང་དང་སྐོར་ཞིབ་ཞིབ་བཤེར་ལམ་སྲོལ་རྒྱུན་རྣམ་ཅན་དང་ཕན་ཆེའི་ངང་འཁོར་སྐྱོད་ཐུབ་པ་བཅས་བྱས་ཏེ། མི་དམངས་མང་ཚོགས་བདེ་འཇགས་ངང་ཕྱིར་སྐྱོད་ཐུབ་པ་བྱས་ཡོད།

འགྲིམ་འགྲུལ་དམངས་ཕན་ཞབས་ཞུའི་ལས་དོན་གྱི་གོ་རིམ་རྒྱུན་མཐུད་ལེགས་སུ་བཏང་ཞིང་། 2024ལོའི་ཟླ་2པ་ནས་བཟུང་རྣམ་གླིང་རྫོང་འགྲིམ་འགྲུལ་སྐྱེལ་འདྲེན་ཅུས་ཀྱིས་རྫོང་དམངས་ཕན་ཞབས་ཞུའི་ཚོམས་ཆེན་དུ་བཅའ་སྡོད་བྱས་ཏེ་འགྲིམ་འགྲུལ་སྐྱེལ་འདྲེན་ལས་དོན་གྱི་སྒྲུབ་གཉེར་བརྒྱུད་རིམ་ཡོངས་བསྒྲགས་དང་། འགྲིམ་འགྲུལ་སྐྱེལ་འདྲེན་ལས་དོན་གྱི་ཞབས་ཞུ་ཚད་ལྡན་ཅན་དང་། ཚད་གཞི་ཅན། སྟབས་བདེ་ཅན་བཅས་ཀྱི་ཆུ་ཚད་ཕྱོགས་ཡོངས་ནས་མཐོ་རུ་བཏང་སྟེ། ལས་གཉེར་མི་སྣས་ཞབས་ཞུའི་ལས་དོན་སྒྲུབ་གཉེར་བྱེད་པར་སྟབས་བདེ་བསྐྲུན་ཡོད། གློག་རྡུལ་སྐྱེལ་འདྲེན་ལས་དོན་རེ་ཞུའི་དོན་ཚན་དྲིལ་བསྒྲགས་རྒྱ་ཁྱབ་བྱས་པ་དང་འབྲེལ་ཡོད་དྲིལ་བསྒྲགས་ལག་དེབ་500ལྷག་ཙམ་སྤྲད་ཅིང་། 2024ལོར་དམངས་ཕན་ཞབས་ཞུའི་བྱ་བ་3216བསྒྲུབས་པ་དང་མི་162ལ་གློག་རྡུལ་ལག་ཁྱེར་རག་ཡོད།

འགན་འཁྲི་ཕྲག་ཏུ་ཁུར་ནས་འགྲིམ་འགྲུལ་སྐྱེལ་འདྲེན་ལས་རིགས་ཀྱི་བདེ་འཇགས་འགོག་སྲུང་འཛིང་རགས་བརྟན་དུ་བཏང་ཞིང་། 2024ལོའི་འབྲུབ་དུས་སུ་རྣམ་གླིང་རྫོང་གིས་ཉེན་སེལ་ཤར་བགྲོད་ལས་དོན་ལ་ཚད་མཐོའི་མཐོང་ཆེན་བྱས་ཏེ། ཏང་ཡོན་ལས་བྱེད་པ་སྒྲིག་འཛུགས་བྱས་ནས་གཏོར་སྐྱོན་ཚབས་ཆེན་ཕོག་པའི་ར་ཐང་ཤང་རྩིབ་གྲོང་ཚོའི་ལམ་དུམ་S208དང་། ར་ཐང་ཤང་གནས་སྐོར་གྲོང་ཚོའི་ལམ་དུམ་S303 ནུ་མ་ཤང་དགའ་ཚང་གྲོང་ཚོ་ནས་རབ་ལག་གྲོང་ཚོ་བར་གྱི་ལམ་དུམ་སོགས་ཤར་བགྲོད་ཐུབ་པར་བྱས་ཡོད། རིམ་རྩིས་བརྒྱབ་ན། ཉེན་སེལ་ཤར་བགྲོད་ནང་རླངས་འཁོར་དང་འཕྲུལ་ཆས་ཐེངས་130དང་། ལས་དོན་པ་མི་ཐེངས་674 མ་དངུལ་སྒོར་ཁྲི་60.9བཅས་བཏང་ཡོད། དེ་དང་ཆབས་ཅིག 2024ལོའི་དུས་ཆེན་གསུམ་དང་། ཟླ་མཆོད་དུས་ཆེན། རྒྱལ་སྟོན་བཅས་ཀྱི་སྔ་ནུབ་ཏུ་གཞིས་རྩེ་གྲོང་ཁྱེར་སྒུལ་བདེ་ཀུང་སི་དང་འབྲེལ་གཏུག་ཧུར་ཐག་བྱས་ཏེ་སྤྱི་ཕན་འཕྲིན་ཐུང་བསྐུར་ནས་རྒྱ་ཆེའི་ཁ་ལོ་བ་དང་འགྲུལ་པས་འགྲིམ་འགྲུལ་བདེ་འཇགས་ལ་ཡིད་གཟབ་བྱས་ཏེ་ཁྲིམས་མཐུན་སྐྱེལ་འདྲེན་རླངས་འཁོར་ལ་སྡོད་དགོས་པའི་དྲན་སྐུལ་བྱས་ཡོད།