ཀྱག་ཀྱོག་གི་རི་ལམ་བརྒྱུད་སྐབས་རླངས་འཁོར་ཡམ་ཡོམ་བྱེད་ཅིང་། རྒྱལ་ཡོངས་སྲིད་གྲོས་ཀྱི་ཨུ་ཡོན་དང་བོད་ལྗོངས་མངའ་རིས་ས་ཁུལ་སྨན་རྩིས་ཁང་གི་ཡོན་ཀྲང་བཀྲ་ཤིས་དོན་གྲུབ་ཀྱིས་རླངས་འཁོར་བཏང་ནས་ལམ་ཐག་ཆུ་ཚོད་8ནས་10བར་ཡོད་པའི་མངའ་རིས་ས་ཁུལ་རྩྭ་མདའ་རྫོང་ཚོ་སྲིབ་གསུམ་དཀྱིལ་ཤང་དུ་སྐྱོད་བཞིན་ཡོད།

ཚོ་སྲིབ་གསུམ་དཀྱིལ་ཤང་འཕྲོད་བསྟེན་ཁང་དུ་ཕེབས་རྗེས་ས་གནས་དེ་གའི་སྨན་པ་ཞིག་གིས་བྲེལ་འཚུབ་ངང“ཡོན་ཀྲང་ལགས་ཁྱེད་རང་ཏག་ཏག་ཕེབས་སོང་། དེ་རིང་ཕྲུ་གུ་ཞིག་རྩེད་མོ་རྩེད་སྐབས་རྨས་སྐྱོན་ཕོག་འདུག བརྟག་དཔྱད་རགས་ཙམ་བྱས་ཟིན་པས། ཁྱེད་རང་གིས་ཡང་བསྐྱར་གཟིགས་དང”ཞེས་བཤད།

“རྨ་ཁར་སྨན་བཅོས་ཡག་པོ་བྱས་འདུག ངས་བྱས་ན་རྫོང་ངམ་ཡང་ན་ས་ཁུལ་དུ་བསྐྱོད་ནས་རུས་པར་གནད་དོན་ཡོད་མེད་བརྟག་དཔྱད་བྱས་ན་ཡག་པོ་ཡོང་གི་རེད”བྱིས་པའི་གནས་ཚུལ་བརྟག་དཔྱད་ཞིབ་ཕྲ་བྱས་རྗེས་བཀྲ་ཤིས་དོན་གྲུབ་ཀྱིས་འཕྲོད་བསྟེན་ཁང་གི་ལས་དོན་པར་དེ་ལྟར་གསུངས།

རྒྱལ་ཡོངས་སྲིད་གྲོས་ཀྱི་ཨུ་ཡོན་ཡིན་པའི་བཀྲ་ཤིས་དོན་གྲུབ་མངའ་རིས་ས་ཁུལ་གྱི་སྒེར་རྩེ་དང་མཚོ་ཆེན་སོགས་རྫོང་མང་པོར་བསྐྱོད་ནས་སྲིད་ཇུས་སྒྲོག་འགྲེལ་དང་རིན་མེད་སྐོར་ཞིབ་སྨན་བཅོས་གནང་བ་མ་ཟད། ལམ་བར་དུ་བརྟག་ཞིབ་ཀྱང་གནང་ཡོད། ད་ཐེངས་ཚོ་སྲིབ་གསུམ་དཀྱིལ་ཤང་དུ་ཕེབས་ནས་གཞི་རིམ་གྱི་སྨན་བཅོས་འཕྲོད་བསྟེན་གནས་ཚུལ་ལ་བརྟག་ཞིབ་གནང་བ་རེད། “མངའ་རིས་ས་ཁུལ་དུ་མི་ཁྲི་12.3ཡོད་པ་དང་ཞིང་འབྲོག་པའི་སྡོད་གནས་ཁ་ཐོར་ཡིན་པ་མ་ཟད། ཤང་དང་ཤང་དབར་གྱི་བར་ཐག་རིང་བ་དང་། གཞི་རིམ་སྨན་བཅོས་སྒྲིག་གཞིའི་ཞབས་ཞུའི་ཁྱབ་རྒྱ་ཆེ་བ། འགྲིམ་འགྲུལ་སྟབས་བདེ་མེད་པ་བཅས་ཀྱི་གནས་ཚུལ་འཕྲད་པས། ཚང་མའི་སྨན་བཅོས་ཆ་རྐྱེན་ལེགས་སུ་གཏོང་བའི་དགོས་མཁོ་ཉིན་བཞིན་ཆེ་རུ་འགྲོ་བཞིན་ཡོད”ཅེས་བཀྲ་ཤིས་དོན་གྲུབ་ཀྱིས་གསུངས།

བཀྲ་ཤིས་དོན་གྲུབ་ཀྱིས་ངོས་འཛིན་གནང་དོན། བོད་ཀྱི་གསོ་བ་རིག་པའི་ནུས་པ་སྔར་ལས་ཆེ་རུ་བཏང་ན། “གཞི་རིམ་དུ་མང་ཚོགས་ཀྱིས་སྨན་རྩིས་ཁང་དུ་སྨན་བཅོས་བྱེད་པར་འགྲོ་འདོད་བྱེད་པས། ང་ཚོའི་སྲོལ་རྒྱུན་གྱི་སྨན་བཅོས་ལག་རྩལ་གྱིས་ས་མཐོའི་ནད་རིགས་མང་པོའི་སྨན་བཅོས་ཐད་མ་གནས་དམའ་བ་དང་ཕན་འབྲས་བཟང་པོ་ཐོན་གྱི་ཡོད” ཉེ་བའི་ལོ་ཤས་རིང་ཁོང་གིས་སྨན་ཁང་གིས་བོད་སྨན་ཐོན་སྐྱེད་བྱེད་ཤུགས་མུ་མཐུད་ཆེ་རུ་གཏོང་རྒྱུར་སྐུལ་འདེད་བཏང་བ་མ་ཟད། ཀྲུང་དབྱང་གི་ཆེད་དོན་མ་དངུལ་གྱི་རྒྱབ་སྐྱོར་འོག་དེང་རབས་ཅན་གྱི་སྨན་བཟོ་ཁང་བསྐྲུན་ནས་བོད་སྨན་གྱི་སྙིང་བཅུད་སོར་འཇོག་བྱས་པར་མ་ཟད། ཐོན་ནུས་ཀྱང་ཆེ་རུ་བཏང་ཡོད།

འགན་འཁྲི་བསྒྲུབས་ནས་ལོ་གཉིས་ལྷག་ཙམ་རིང་བཀྲ་ཤིས་དོན་གྲུབ་ཀྱིས་རིམ་རྩིས་བརྒྱབ་ན། ལམ་ཐག་སྤྱི་ལེ་ཁྲི་ལྷག་ཙམ་ཟིན་པའི་ས་བབ་མཐོ་བའི་ཤང་དང་གྲོང་རྡལ་30ལྷག་ཙམ་ལ་བསྐྱོད་ཡོད། “ངས་རང་ཉིད་ཀྱི་ཐབས་འདོན་ཇུས་འབུལ་ལ་བརྟེན་ནས་བརྟག་དཔྱད་ཞིབ་འཇུག་གི་གོམ་སྟབས་རེ་རེ་དེ་དམངས་འཚོར་ཕན་རྒྱུའི་རེ་བ་ཡོད”ཅེས་བཀྲ་ཤིས་དོན་གྲུབ་ཀྱིས་གསུངས་པ་རེད།