“‘དཔྱིད་གསར་དུས་ཆེན’དེ་མིའི་རིགས་ཀྱི་མངོན་མིན་རིག་གནས་ཤུལ་བཞག་གི་མཚོན་བྱེད་བརྩམས་ཆོས་ཀྱི་མིང་གཞུང་ནང་བཅུག་པའི་ཁྱབ་བསྒྲགས་བྱས་མ་ཐག ང་ཚོའི་འཐུས་མི་ཚོགས་པའི་ཁོངས་མི་ཚང་མ་དགའ་སྤྲོ་རབ་ཏུ་འཁོལ་སོང”ཞེས“དཔྱིད་གསར་དུས་ཆེན”དེ་ཤུལ་བཞག་ལ་རེ་ཞུ་བྱེད་སྐབས་ཀྱི་གནས་ཚུལ་སྐོར་གླེང་སྐབས། རྒྱལ་ཡོངས་མི་དམངས་འཐུས་ཚོགས་ཀྱི་འཐུས་མི་དང་ཀྲུང་གོ་སྤྱི་ཚོགས་ཚན་རིག་ཁང་མི་རིགས་རྩོམ་རིག་ཞིབ་འཇུག་སུའོ་ཡི་ཞིབ་འཇུག་པ་པཱ་མོ་ཆུས་པུའུ་མོ་ཡིས་འདི་ལྟར་གསུངས།

སི་ཁྲོན་ལེང་ཧྲན་དབྱི་རིགས་རང་སྐྱོང་ཀྲོའུ་ནས་ཡོང་བའི་དབྱི་རིགས་ཀྱི་མཁས་དབང་དེས་འདས་ཟིན་པའི་ལོ་གཅིག་རིང་འགན་འཁྲི་སྒྲུབ་པའི་ལས་དོན་ཁྲོད་མངོན་མིན་རིག་གནས་ཤུལ་བཞག་སྲུང་སྐྱོང་ཁྱབ་ཁོངས་ཀྱི་རིག་གཞུང་གི་ཁྱད་ཡོན་བཏོན་ཡོད། འགན་སྒྲུབ་བརྟག་ཞིབ་དང་ཁྲིམས་སྒྱུར་ཞིབ་བཤེར་ནང་ཞུགས་པ་བརྒྱུད། པཱ་མོ་ཆུས་པུའུ་མོ་ཡིས་མངོན་མིན་རིག་གནས་ཤུལ་བཞག་ལ་བརྒྱུད་རིམ་རང་བཞིན་གྱི་སྲུང་སྐྱོང་བྱས་པར་ཐོབ་པའི་གྲུབ་འབྲས་ལ་བདེན་དཔང་བྱས་པ་དང་ཆབས་ཅིག མངོན་མིན་རིག་གནས་ཤུལ་བཞག་རྒྱུན་འཛིན་དང་དར་སྤེལ་གཏོང་རིང་གི་གནད་དོན་ཁག་གཅིག་ཀྱང་ཤེས་རྟོགས་བྱུང་བ་རེད། པཱ་མོ་ཆུས་པུའུ་མོ་ཡིས། “ས་ཆ་ཁ་ཤས་སུ་མངོན་མིན་རིག་གནས་ཤུལ་བཞག་ཚོང་ལས་ཅན་དུ་སྒྱུར་ཐལ་དྲགས་པའི་སྣང་ཚུལ་ཐོན་ནས། མངོན་མིན་རིག་གནས་ཤུལ་བཞག་དེ་གཡོ་ཐབས་ལ་བརྩི་གི་ཡོད་པ་དང་། དྲ་ཚིགས་དང་རང་སྨྱན་སྦྱོར་ཁ་ཤས་ཀྱིས་ཀྲུང་གོའི་མངོན་མིན་རིག་གནས་ཤུལ་བཞག་མཚོན་རྟགས་གང་བྱུང་དུ་སྤྱད་དེ། མངོན་མིན་རིག་གནས་ཤུལ་བཞག་གི་མཚོན་བྱེད་རང་བཞིན་གྱི་རྣམ་གྲངས་རྫུན་སྤྱོད་དང་སྒེར་སྤྱོད་བྱེད་པ་མ་ཟད། ཐ་ན་འགྲན་བསྡུར་གཉེར་བ་དང་ལག་ཁྱེར་སྤྲོད་པའི་མིང་ཐོག་ནས་ཡོངས་ཁུངས་མི་གཙང་བའི་རྒྱུ་ནོར་ཐོབ་ཐབས་བྱེད་པ་དེ་དག་ངེས་པར་དུ་བཅོས་སྒྲིག་ནན་པོ་བྱེད་དགོས”ཞེས་གསུངས།

ད་ལོའི་རྒྱལ་ཡོངས་ཀྱི་ཚོགས་འདུ་གཉིས་ལ་པཱ་མོ་ཆུས་པུའུ་མོ་ཡིས་གྲངས་འཛིན་ཁོར་ཡུག་ཁྲོད་མངོན་མིན་རིག་གནས་ཤུལ་བཞག་སྲུང་སྐྱོང་ལམ་སྲོལ་འཐུས་སྒོ་ཚང་དུ་གཏོང་རྒྱུའི་སྐོར་གྱི་གྲོས་འགོ་འབུལ་རྩིས་ཡོད་པ་རེད།

པཱ་མོ་ཆུས་པུའུ་མོ་ཡིས། “སྲུང་སྐྱོང་ཨང་དང་པོ་དང་རྒྱུན་འཛིན་སྔོན་ལ་འཇོག་རྒྱུ་མཐའ་འཁྱོངས་བྱས་ཏེ། སྲུང་སྐྱོང་དང་བེད་སྤྱོད་དང་། སྲུང་སྐྱོང་དང་འཕེལ་རྒྱས། སྲུང་སྐྱོང་དང་གསར་སྤེལ་བཅས་ཀྱི་འབྲེལ་བ་ཐག་གཅོད་ཡང་དག་བྱས་ནས། མངོན་མིན་རིག་གནས་ཤུལ་བཞག་སྐོར་གྱི་དོན་དངོས་འཁྱོག་བཤད་དང་གང་བྱུང་དུ་སྤྱོད་པ་སྔོན་འགོག་བྱེད་དགོས”ཞེས་གསུངས།