“ཁྱེད་ཀྱིས་དེ་སྔོན་བཏོན་པའི་བསམ་འཆར་ལྟར་སྡེ་ཁུལ་གྱི་ཁྲིམས་སྐྱོང་སློབ་ཚན་འཚོག་འགོ་ཚུགས་འདུག”ཅེས་ཉིང་ཞ་ཧུད་རིགས་རང་སྐྱོང་ལྗོངས་དབྱིན་ཁྲོན་གྲོང་ཁྱེར་གྱི་སྡེ་ཁུལ་ལས་བྱེད་པ་ཞིག་གིས་ལིའུ་ཅན་གོ་ལ་འཕྲིན་ཐུང་དེ་བསྐུར་བ་མ་ཟད། འཕྲིན་ཐུང་གི་ཞོར་དུ་ད་དུང་སྡེ་ཁུལ་གྱི་བྱེད་སྒོ་ཁང་དུ་གཞོན་ནུ་ལོ་ཆུང་10ལྷག་ཙམ་གྱིས་མཉམ་དུ་སློབ་སྦྱོང་བྱེད་པའི་པར་ཞིག་ཀྱང་བསྐུར་བ་དེས་ལིའུ་ཅན་གོ་ཡི་སེམས་པ་རེ་ཞིག་སྤྲོ་བས་བརྟས།

རྒྱལ་ཡོངས་སྲིད་གྲོས་ཀྱི་ཨུ་ཡོན་དང་ཉིང་ཞ་ཁྲིམས་རྩོད་པའི་མཐུན་ཚོགས་ཀྱི་ཚོགས་གཙོ་ལིའུ་ཅན་གོ་ཡིས་ད་ཕན་ལོ་ཤས་རིང་བརྟག་ཞིབ་ཀྱི་གཙོ་གནད་དེ་ན་སོ་དར་ལ་མ་བབས་པའི་མིའི་ཉེས་གསོག་སྔོན་འགོག་གི་ཁྱབ་ཁོངས་སུ་བཞག་ཡོད། གནས་ཚུལ་གསལ་པོར་རྟོགས་ཆེད། ཁོང་གིས་འཐབ་ས་དང་པོར་ཕེབས་ནས་སྡེ་ཚན་མང་པོར་བཅར་འདྲི་གནང་བ་རེད། ཁྱིམ་ཚང་གི་ལྟ་འདོམས་ཡག་པོ་མ་བྱུང་བའི་དབང་གིས་ལོག་ལམ་དུ་ཤོར་བའི་ལོ་ཆུང་དང་ཅི་འཕྲོས་མོལ་འཕྲོས་གནང་རྗེས། ཁོང་གིས“ཕྲུ་གུ་ཞིག་ཡང་དག་པའི་ལམ་བུར་ཁྲིད་སྟོན་བྱེད་ཐུབ་ཚེ། དེ་ནི་ཁྱིམ་ཚང་ཞིག་ལ་རེ་བ་སྦྱིན་པ་ཙམ་མ་ཟད། དེ་བས་སྤྱི་ཚོགས་ཀྱི་འབྱུང་འགྱུར་ལའང་སྲུང་སྐྱོབ་བྱས་པ་ཞིག་རེད”ཅེས་མྱོང་ཚོར་ཟབ་མོས་གསུངས།

ལིའུ་ཅན་གོ་ཡིས་ད་དུང་སློབ་སྐྱོར་ལས་དོན་ནང་ཞུགས་པ་དང་དེར་སྐུལ་འདེད་བཏང་ནས། ཉེས་གསོག་དང་འབྲེལ་བའི་གཞོན་ནུ་ལོ་ཆུང་མི་ཉུང་བ་ཞིག་ཁྲིམས་ཆད་འཁུར་ཡུན་ཐིམ་རྗེས་ཡང་དག་པའི་འཚོ་བའི་འགྲོ་ལམ་ཐོག་སྐྱོད་པར་སྐུལ་ལྕག་དང་རོགས་རམ་གནང་ཡོད་པ་རེད།

“ན་སོ་དར་ལ་མ་བབས་པའི་མིའི་ཉེས་གསོག་སྔོན་འགོག་བྱེད་པར་ཁྱིམ་ཚང་དང་། སློབ་གྲྭ སྤྱི་ཚོགས། ཁྲིམས་འཛིན་བཅས་ཀྱིས་མཉམ་དུ་འགོག་སྲུང་དྲ་བ་ཞིག་སྐྲུན་དགོས” ད་ལོའི་རྒྱལ་ཡོངས་ཀྱི་ཚོགས་འདུ་གཉིས་རིང་ལིའུ་ཅན་གོ་ཡིས་ན་སོ་དར་ལ་མ་བབས་པའི་མིའི་ཉེས་གསོག་སྔོན་འགོག་གི་མཉམ་འབྲེལ་ལམ་སྲོལ་ལ་ཤུགས་སྣོན་དང་། དེ་བཞིན་ཆེད་དམིགས་སློབ་གྲྭ་འཛུགས་པར་སྐུལ་འདེད་གཏོང་རྒྱུའི་སྐོར་གྱི་གྲོས་གཞི་འབུལ་རྩིས་ཡོད་པ་རེད།