འདི་ནི་ཀྲུང་ཕྱིའི་གསར་འགོད་པས་གསར་འགྱུར་ཡོངས་བསྒྲགས་ཚོགས་འདུའི་ཐོག་བཅར་འདྲི་བྱེད་བཞིན་པ།

ཟླ་3ཚེས་3ཉིན་གྱི་ཕྱི་དྲོར། རྒྱལ་ཡོངས་སྲིད་གྲོས་སྐབས་བཅུ་བཞི་པའི་ཚོགས་འདུ་ཐེངས་གསུམ་པས་མི་དམངས་ཚོགས་ཁང་ཆེ་མོའི་གསར་འགྱུར་ཡོངས་བསྒྲགས་ཁང་དུ་གསར་འགྱུར་ཡོངས་བསྒྲགས་ཚོགས་འདུ་འཚོགས་ཤིང་། ཚོགས་ཆེན་གྱི་གསར་འགྱུར་མགྲིན་ཚབ་པ་ལིའུ་ཅེ་དབྱི་ཡིས་ཀྲུང་ཕྱིའི་སྨྱན་སྦྱོར་ལ་ཚོགས་ཆེན་གྱི་འབྲེལ་ཡོད་གནས་ཚུལ་ངོ་སྤྲོད་གནང་ནས་གསར་འགོད་པའི་དྲི་བར་ལན་བསྐྱོན་པ་རེད།

ལིའུ་ཅེ་དབྱི་ཡིས་ངོ་སྤྲོད་བྱས་པར། རྒྱལ་ཡོངས་སྲིད་གྲོས་སྐབས་བཅུ་བཞི་པའི་ཚོགས་འདུ་ཐེངས་གསུམ་པ་ཟླ་3ཚེས་4ཉིན་གྱི་ཕྱི་དྲོའི་ཆུ་ཚོད་3པར་མི་དམངས་ཚོགས་ཁང་ཆེ་མོར་འཚོགས་ནས་ཟླ་3ཚེས་10ཉིན་གྱི་སྔ་དྲོ་མཇུག་འགྲིལ་རྒྱུ་དང་ཚོགས་ཡུན་ཉིན་6རེད། ཚོགས་ཆེན་གྱི་གྲོས་རིམ་གཙོ་བོ་ནི། རྒྱལ་ཡོངས་སྲིད་གྲོས་རྒྱུན་ལས་ཨུ་ཡོན་ལྷན་ཁང་གི་ལས་དོན་སྙན་སྒྲོན་དང་གྲོས་གཞིའི་ལས་དོན་གནས་ཚུལ་གྱི་སྙན་སྒྲོན་གསན་རྒྱུ་དང་གྲོས་ཞིབ་གནང་རྒྱུ་དང་། རྒྱལ་ཡོངས་མི་དམངས་འཐུས་ཚོགས་སྐབས་བཅུ་བཞི་པའི་ཚོགས་འདུ་ཐེངས་གསུམ་པར་ཟུར་ཞུགས་བྱས་ནས་སྲིད་གཞུང་གི་ལས་དོན་སྙན་སྒྲོན་དང་དེ་བཞིན་འབྲེལ་ཡོད་སྙན་སྒྲོན་གཞན་དག་གསན་རྒྱུ་དང་གྲོས་བསྡུར་གནང་རྒྱུ། རྒྱལ་ཡོངས་སྲིད་གྲོས་སྐབས་བཅུ་བཞི་པའི་ཚོགས་འདུ་ཐེངས་གསུམ་པའི་ཆབ་སྲིད་གྲོས་ཆོད་དང་རྒྱུན་ལས་ཨུ་ཡོན་ལྷན་ཁང་གི་ལས་དོན་སྙན་སྒྲོན་སྐོར་གྱི་གྲོས་ཆོད། རྒྱལ་ཡོངས་སྲིད་གྲོས་སྐབས་བཅུ་བཞི་པའི་ཚོགས་འདུ་ཐེངས་གཉིས་པ་འཚོགས་ཚུན་གྱི་གྲོས་གཞིའི་ལས་དོན་གནས་ཚུལ་སྙན་སྒྲོན་སྐོར་གྱི་གྲོས་ཆོད། རྒྱལ་ཡོངས་སྲིད་གྲོས་སྐབས་བཅུ་བཞི་པའི་ཚོགས་འདུ་ཐེངས་གསུམ་པའི་གྲོས་གཞིར་ཞིབ་བཤེར་བྱས་ཚུལ་སྐོར་གྱི་སྙན་སྒྲོན་བཅས་ལ་གྲོས་ཞིབ་བྱས་ནས་གྲོས་འཆམ་བྱ་རྒྱུ་བཅས་རེད།

“ལོ་གཅིག་རིང་། མི་དམངས་སྲིད་གྲོས་ཀྱིས་ཞི་ཅིན་ཕིང་གི་དུས་རབས་གསར་པའི་ཀྲུང་གོའི་ཁྱད་ཆོས་ཀྱི་སྤྱི་ཚོགས་རིང་ལུགས་ཀྱི་དགོངས་པ་མཛུབ་ཁྲིད་དུ་བྱ་རྒྱུ་མཐའ་འཁྱོངས་བྱས་ཏེ། ‘གཏན་འཁེལ་གཉིས’ཀྱི་ཐག་གཅོད་རང་བཞིན་གྱི་དོན་སྙིང་ལ་གོ་བ་གཏིང་ཟབ་ལེན་པ་དང་། ‘འདུ་ཤེས་བཞི’ཟབ་ཏུ་གཏོང་བ་དང་། ‘གདེང་ཚོད་བཞི’བརྟན་དུ་གཏོང་བ། ‘སྲུང་སྐྱོང་གཉིས”ཐུབ་པ་བཅས་བྱེད་པ། ཀྲུང་གུང་ཚོགས་ཆེན་ཉི་ཤུ་པ་དང་སྐབས་ཉི་ཤུ་པའི་ཀྲུང་ཨུ་ཚང་འཛོམས་གྲོས་ཚོགས་ཐེངས་གཉིས་པ་དང་གསུམ་པའི་དགོངས་དོན་ཕྱོགས་ཡོངས་ནས་ལག་བསྟར། ཏང་གི་འགོ་ཁྲིད་དང་། འཐབ་ཕྱོགས་གཅིག་གྱུར། གྲོས་མོལ་དམངས་གཙོ་བཅས་ཟུང་འབྲེལ་ནུས་ལྡན་བྱ་རྒྱུ་མཐའ་འཁྱོངས། མི་དམངས་སྲིད་གྲོས་ཀྱི་ངོ་བོའི་ངེས་གནས་མཐའ་འཁྱོངས། ཏང་དང་རྒྱལ་ཁབ་ཀྱི་ལྟེ་བའི་ལས་འགན་ལ་དམིགས་ནས་འགན་འཁྲི་གཙང་སྒྲུབ་བྱ་རྒྱུ་མཐའ་འཁྱོངས། མི་དམངས་སྲིད་གྲོས་ཀྱིས་མི་དམངས་ལ་ཞབས་འདེགས་ཞུ་རྒྱུ་མཐའ་འཁྱོངས། སྒྱུར་བཅོས་གསར་གཏོད་ཀྱི་སྙིང་སྟོབས་ལ་བརྟེན་ནས་འགན་འཁྲི་སྒྲུབ་པའི་ནུས་པ་འཛུགས་སྐྱོང་ལ་སྐུལ་འདེད་གཏོང་རྒྱུ་མཐའ་འཁྱོངས་བཅས་བྱས་པར་བརྟེན། ལས་དོན་ཁག་ལ་འཕེལ་རྒྱས་གསར་པ་དང་གྲུབ་འབྲས་གསར་པ་ཐོབ་ཡོད”ཅེས་འདས་ཟིན་པའི་ལོ་གཅིག་རིང་གི་ལས་དོན་ལ་ཕྱིར་དྲན་གནང་སྐབས་ལིའུ་ཅེ་དབྱི་ཡིས་དེ་ལྟར་གསུངས་པ་རེད།

ལིའུ་ཅེ་དབྱི་ཡིས་2025ལོ་ནི“ལོ་ལྔ་ཚན་བཅུ་བཞི་པའི”འཆར་འགོད་ཀྱི་མཇུག་བསྡུའི་ལོ་རེད། རྒྱལ་ཡོངས་སྲིད་གྲོས་ཀྱིས་སྲོལ་རྒྱུན་བཟང་པོ་དར་སྤེལ་དང་། ཆབ་སྲིད་ཀྱི་འགན་འཁྲི་བློ་ལ་བརྟན་པོར་ངེས་པ། ཆེད་དོན་གྲོས་མོལ་སྒྲིག་གཞིའི་ནུས་པ་གང་ལེགས་འདོན་པ། ལྟེ་བར་དམིགས་པ་དང་སྤྱི་ཡོངས་ལ་ཞབས་འདེགས་ཞུ་བ། བསམ་བློ་དང་ཆབ་སྲིད་ཀྱི་སྣེ་ཁྲིད་ལ་ཤུགས་སྣོན་རྒྱག་པ། ཐབས་འདོན་ཇུས་འབུལ་ཧུར་ཐག་བཅས་བྱས་ནས་ཀྲུང་གོའི་ལུགས་ཀྱི་དེང་རབས་ཅན་ལ་བརྟེན་ཏེ་རྒྱལ་ཁབ་སྟོབས་ཆེན་འཛུགས་སྐྲུན་དང་མི་རིགས་བསྐྱར་དར་གྱི་བྱ་གཞག་རླབས་པོ་ཆེར་ཕྱོགས་ཡོངས་ནས་སྐུལ་འདེད་གཏོང་ཆེད་བློ་གྲོས་དང་སྟོབས་ཤུགས་སྐྱེས་སུ་འབུལ་དགོས་ཞེས་གསུངས་པ་རེད།

“དཔལ་འབྱོར་གྱི་གྲོས་གཞི་ནི་སྔར་ནས་བཟུང་རྒྱལ་ཡོངས་སྲིད་གྲོས་ཀྱིས་སྒྲུབ་པའི་གཙོ་གནད་ཁ་ཕྱོགས་ཡིན” ལིའུ་ཅེ་དབྱི་ཡིས་ངོ་སྤྲོད་བྱས་པར། ལོ་གཅིག་རིང་། རྒྱལ་ཡོངས་སྲིད་གྲོས་ཀྱིས་དཔལ་འབྱོར་གྱི་གྲོས་གཞི་གལ་ཆེན་རབ་དང་རིམ་པར་དམིགས་ནས་ཐབས་འདོན་ཇུས་འབུལ་ཧུར་ཐག་བྱས་པ་མ་ཟད། དུས་ཚིགས་རེར་གཞི་ཆེའི་དཔལ་འབྱོར་གྱི་དུས་བབ་དབྱེ་ཞིབ་ཀྱི་བཞུགས་མོལ་ཚོགས་འདུ་འཚོགས་པ་དང་། སྤུས་ཚད་མཐོ་བའི་འཕེལ་རྒྱས་ལ་དམིགས་ནས་བརྟག་དཔྱད་ཞིབ་འཇུག་དང་གྲོས་མོལ་སྲིད་གླེང་གཏིང་ཟབ་བྱེད་པ། རྨ་ཆུའི་འབབ་རྒྱུད་ཀྱི་སྐྱེ་ཁམས་སྲུང་སྐྱོང་དང་། སྤུས་ཚད་མཐོ་བའི་འཕེལ་རྒྱས། གཙོ་གནད་ཐོན་ལས་རྒྱལ་ནང་དུ་གོ་རིམ་ལྡན་པའི་སྒོ་ནས་གཞན་སྒྱུར། ཁ་གཏད་རོགས་སྐྱོར་ལམ་སྲོལ་འཐུས་སྒོ་ཚང་དུ་གཏོང་བ་སོགས་ལ་དམིགས་ནས་དམངས་གཙོའི་ལྟ་སྐུལ་རང་བཞིན་གྱི་ལྟ་ཞིབ་བྱས་པ། དམངས་གཉེར་ཁེ་ལས་འཕེལ་རྒྱས་ཀྱི་ཁོར་ཡུག་ལེགས་སུ་གཏོང་བ་དང་ས་ནག་ས་ཞིང་སྲུང་སྐྱོང་ལ་ཤུགས་སྣོན་རྒྱག་པ་སོགས་ལ་དམིགས་ཏེ་ཆེད་དོན་ལྟ་སྐུལ་བྱས་ནས་འབྲེལ་ཡོད་ཐབས་ཇུས་བཀོད་སྒྲིག་དོན་འཁྱོལ་དང་ཕན་འབྲས་ཐོན་པར་སྐུལ་འདེད་བཏང་ཡོད།

“གོ་ལ་ཧྲིལ་པོའི་གློག་སྒྲོན་མཐོ་ལྕོག་བཟོ་གྲྭ་189ཡི་ཁྲོད་རང་རྒྱལ་གྱིས་79བཟུང་ཡོད། དེའི་ནང་ནས་ཕྱེད་ཀ་ཙམ་ནི་ངར་ལྕགས་དང་བཟའ་བཅའ་སོགས་སྲོལ་རྒྱུན་ཐོན་ལས་ཡིན། གསར་དར་ཐོན་ལས་དར་རྒྱས་ཆེན་པོ་བྱུང་ནས་འབྱུང་འགྱུར་ཐོན་ལས་བཀོད་སྒྲིག་བྱེད་ཤུགས་ཆེ་རུ་ཕྱིན་ཡོད། མི་གཟུགས་འཕྲུལ་མིས་དཔྱིད་གསར་དུས་ཆེན་གྱི་དགོང་ཚོགས་ཐོག་ཞབས་བྲོ་དབྱང་ཀོ་འཁྲབ་པ་དང་། མི་མེད་གནམ་གྲུ་མཚན་མོ་མཁའ་དབྱིངས་སུ་འཕུར་ནས་ཚོན་ཁྲ་ཅན་གྱི་ཤོག་སྦག་སྤོར་བ། མི་ཐབས་རིག་ནུས་ཀྱི་སྒོ་འབྱེད་དཔེ་དབྱིབས་ཆེན་པོར་འཛམ་གླིང་ཐོག་གྲོས་བསྡུར་འཁྲུག་པོ་བྱུང་ཡོད། གཞི་ཁྱོན་ཡན་གྱི་ལག་རྩལ་མཐོ་བའི་བཟོ་སྐྲུན་ལས་རིགས་ཀྱི་འཕར་ཐང་8.9%འཕར་བ་དང་བཟོ་ལས་འཕྲུལ་མི་སྒྲིག་སྦྱོར་བྱེད་ཚད་གོ་ལ་ཧྲིལ་པོའི་ཕྱེད་ཀ་ཙམ་བཟུང་ཡོད” ལིའུ་ཅེ་དབྱི་ཡིས་ཐོན་སྐྱེད་ནུས་ཤུགས་གསར་མ་འཕེལ་རྒྱས་གཏོང་རྒྱུར་སྐུལ་འདེད་ཤུགས་ཆེན་གཏོང་རྒྱུ་ནི་རྒྱལ་ཡོངས་སྲིད་གྲོས་ཀྱི་སྲིད་གླེང་ཇུས་འབུལ་གྱི་ཤུགས་རྒྱག་ས་གལ་ཆེན་ཞིག་ཡིན། རྒྱལ་ཡོངས་སྲིད་གྲོས་ཀྱིས་རྒྱལ་སྤྱིའི་ལག་རྩལ་གྱི་གནས་ཚུལ་ལ་རྗེས་སྙེགས་དམ་ཟབ་བྱས་ཏེ་ཚན་རིག་ཞིབ་འཇུག་ཁང་དང་སུའོ་དང་ཁེ་ལས་ཀྱི་འཐབ་ཕྱོགས་དང་པོར་བསྐྱོད་དེ་ཚན་རྩལ་གྲུབ་འབྲས་གཞན་སྒྱུར་དང་། ཁུལ་ཁོངས་ཚན་རྩལ་གསར་གཏོད་ལྟེ་གནས་འཛུགས་སྐྲུན། སྨན་རྫས་ཞིབ་སྤེལ་གསར་གཏོད་སོགས་ཀྱི་ཞིབ་འཇུག་བྱ་གཞིར་བརྟག་ཞིབ་བྱས་ཡོད། གྲངས་གཞིའི་རྒྱུ་རྐྱེན་གཙོ་བོའི་ཁྲོམ་ར་དང་མི་ཐབས་རིག་ནུས་ཉེར་སྤྱོད་སོགས་བརྗོད་དོན་གཙོ་བོར་དམིགས་ནས་གྲོས་མོལ་དང་གྲོས་བསྡུར་གཏིང་ཟབ་དང་ཐོན་སྐྱེད་ནུས་ཤུགས་གསར་མ་འཕེལ་རྒྱས་ལ་སྐུལ་འདེད་གཏོང་བའི་ཐབས་ལམ་དང་སྒྲིག་གཞི་ལམ་སྲོལ་འགན་སྲུང་ལ་དབྱེ་ཞིབ། དམིགས་སའི་རང་བཞིན་དང་སྔོན་མཐོང་རང་བཞིན་གྱི་ཐབས་ཇུས་གྲོས་འགོ་བཏོན་པ་བཅས་བྱས་པར་བརྟེན་གཙོ་གཉེར་དོ་དམ་སྡེ་ཚན་གྱིས་མཐོང་ཆེན་དང་དང་ལེན་བྱས་ཡོད། རྒྱལ་ཡོངས་སྲིད་གྲོས་ཀྱིས་མུ་མཐུད་རང་ངོས་ཀྱི་ལེགས་ཆ་བཏོན་ཏེ། ཐོན་སྐྱེད་ནུས་ཤུགས་གསར་མས་དེ་བས་སྟོབས་དང་ལྡན་པའི་འགུལ་ཤུགས་འདོན་ཐུབ་པ་བྱེད་དགོས་ཞེས་གསུངས་པ་རེད།

“དང་ཐོག་ཁྱེད་ཀྱིས་རྒྱ་སྐད་ཡག་པོ་བརྒྱབ་པར་བསྔགས་བརྗོད་བྱ་རྒྱུ་ཡིན། ངའི་བསམ་པར་དེ་ཡང་ཀྲུང་གོའི་སྒྱུར་བཅོས་སྒོ་དབྱེའི་གྲུབ་འབྲས་ཀྱི་བསྡུས་རིས་ཤིག་རེད་སྙམ་གྱི་འདུག” པར་ཙིར་ངལ་རྩོལ་པའི་བརྙན་འཕྲིན་ལས་ཁུངས་ཀྱི་གསར་འགོད་པས་ཆུ་ཚད་མཐོ་བའི་ཕྱི་ཕྱོགས་སྒོ་དབྱེའི་ཐད་རྒྱ་སྐད་ནས་བཏོན་པའི་དྲི་བར་ལན་བསྐྱོན་སྐབས། ལིའུ་ཅེ་དབྱི་ཡིས་རྒྱལ་ཡོངས་སྲིད་གྲོས་ཀྱིས་རྒྱལ་ཁབ་ཀྱི་ཕྱི་ཕྱོགས་སྒོ་དབྱེའི་བྱ་གཞག་ལ་ཞབས་འདེགས་ཞུ་རྒྱུར་ཡུན་རིང་གཞོལ་ཡོད། ལོ་གཅིག་རིང་། ལམ་ལུགས་རྣམ་པའི་སྒོ་མོ་འབྱེད་རྒྱ་ཆེ་རུ་གཏོང་བ་དང་། ཁུལ་ཁོངས་སྒོ་དབྱེ་བཀོད་སྒྲིག་ལེགས་སུ་གཏོང་བ། “རྒྱུད་གཅིག་ལམ་གཅིག”མཉམ་སྐྲུན་གྱི་སྤུས་ཚད་མཐོ་བའི་འཕེལ་རྒྱས་ལ་སྐུལ་འདེད་གཏོང་བ་སོགས་གྲོས་གཞི་གལ་ཆེན་ལ་དམིགས་ནས་གྲོས་མོལ་སྲིད་གླེང་རྒྱ་ཁྱབ་བྱས་ཡོད། “ང་ཚོས་ཐོག་མཐའ་བར་གསུམ་དུ་དཔལ་འབྱོར་གོ་ལ་ཧྲིལ་པོ་ཅན་ལ་བློ་བརྟན་འགྱུར་མེད་ངང་རྒྱབ་སྐྱོར་དང་དེའི་ནང་ཞུགས་པ་དང་། བློ་བརྟན་འགྱུར་མེད་ངང་ཕྱི་ཕྱོགས་སུ་སྒོ་མོ་འབྱེད་རྒྱ་ཆེ་རུ་གཏོང་བ། འཛམ་གླིང་གི་རྒྱལ་ཁབ་ཁག་དང་མཉམ་དུ་གོ་སྐབས་མཉམ་སྤྱོད་དང་མཉམ་དུ་དར་རྒྱས་གཏོད་པ་བཅས་བྱས་ཏེ་སྒོ་དབྱེ་རྣམ་པའི་འཛམ་གླིང་དཔལ་འབྱོར་བསྐྲུན་པར་མཉམ་དུ་སྐུལ་འདེད་གཏོང་རྒྱུ་ཡིན”ཞེས་གསུངས་པ་རེད།

“ཚང་མས་དོ་ཁུར་བྱེད་པའི་རྒན་དུས་གསོ་མཁན་ཡོད་པ་དང་། ཕྲུ་གུ་གསོ་མཁན་ཡོད་པ། ན་དུས་སྨན་བཅོས་ཐུབ་པ། ཉམས་ཞན་ལ་རོགས་སྐྱོར་བྱེད་པ་སོགས་ཚང་མ་ནི་རྒྱ་ཆེའི་སྲིད་གྲོས་ཨུ་ཡོན་ཚོས་དོ་ཁུར་བྱེད་པའི་གནད་དོན་ཡིན” “རྒྱལ་ཡོངས་སྲིད་གྲོས་ཀྱིས་དམངས་འཚོའི་འགན་ལེན་ཐད་ནུས་པ་གང་ཞིག་འདོན་མིན་ལ”ལན་བསྐྱོན་སྐབས། ལིའུ་ཅེ་དབྱི་ཡིས་སློབ་གྲྭ་འབྲིང་ཆུང་གི་སློབ་གྲྭར་ཨུ་ཡོན་ཚོས་གཞོན་ནུ་ལོ་ཆུང་གི་སེམས་ཁམས་བདེ་ཐང་ལ་དོ་ཁུར་དང“གཉིས་ཡང”སྲིད་ཇུས་དོན་འཁྱོལ་ཡག་པོ་བྱ་རྒྱུར་སྐུལ་འདེད་བཏང་ཡོད། གྲོང་ཁྱེར་དང་གྲོང་རྡལ་གྱི་རྒན་གསོའི་སྒྲིག་གཞིར་ཨུ་ཡོན་ཚོས་མུ་མཐུད་ས་གནས་ས་ཐོག་ཏུ་བརྟག་དཔྱད་ཞིབ་འཇུག་བྱས་ཏེ། རྒན་འཕྲོད་ཅན་གྱི་སྒྱུར་བཀོད་ནས་ལོ་ན་མཐོ་བའི་རྒན་རྒོན་གྱི་བཟའ་འཐུང་མ་ལག་འཐུས་སྒོ་ཚང་དུ་བཏང་སྟེ་རྒན་རྒོན་ཚོས་མཛའ་གྲོགས་རྣམ་པའི་སྤྱི་ཚོགས་ཀྱི་དྲོ་སྐྱིད་དེ་བས་ཚོར་ཐུབ་པ་བྱས་ཡོད། མཐའ་མཚམས་འཕྲོད་བསྟེན་ཁང་དུ་ཨུ་ཡོན་ཚོས་ཇི་ལྟར་བྱས་ནས་གཞི་རིམ་མང་ཚོགས་ཀྱི་སྒོ་རྩར་ནད་ལྟ་ཐུབ་པ་དང་སྨན་བཅོས་འགན་ལེན་ཐུབ་པའི་གནད་དོན་ལ་ཞིབ་འཇུག་བྱས་ཡོད། “དབང་སྐྱོན་གྱི་སྤྱི་ཚོགས་འགན་སྲུང་ལམ་ལུགས་དང་གཅེས་སྐྱོང་ཞབས་ཞུའི་མ་ལག་འཐུས་སྒོ་ཚང་དུ་གཏོང་བའི” གཟའ་འཁོར་གཉིས་ཀྱི་གྲོས་མོལ་བཞུགས་མོལ་ཚོགས་འདུའི་ཐོག་དབང་སྐྱོན་ཨུ་ཡོན་དང་མཉམ་དུ་དབང་སྐྱོན་གྱི་བདེ་ཐང་སླར་གསོ་དང་། སློབ་གསོ། གསོ་བཅོལ་ལྟ་སྐྱོང་། འགོག་མེད་ཞབས་ཞུ་སོགས་སྔར་བས་མཐོ་རུ་གཏོང་ཆེད་གྲོས་འགོ་བཏོན་ནས་དབང་སྐྱོན་གྱི་འཚོ་བའི་སྤུས་ཚད་རྒྱུན་ཆད་མེད་པར་མཐོ་རུ་གཏོང་ཆེད་ཇུས་འདོན་བྱས་ཡོད། “རྒྱལ་ཡོངས་སྲིད་གྲོས་ཀྱིས་མི་དམངས་ལ་ཞབས་འདེགས་ཞུ་བ་མུ་མཐུད་དུ་ལག་བསྟར་བྱས་ནས། ‘ཁྱིམ་ཚང་ཀུན་གྱི་བྱ་བ’བློ་ལ་འཆང་བ་དང་། ‘ལྟོ་གོས་ཀྱི་གནད་དོན’སེམས་ལ་འཆང་བ། ‘འཕྲལ་མཁོ་དང་། དཀའ་ངལ། སེམས་ཁྲལ། རེ་སྒུག’བཅས་ལ་དམ་པོར་དམིགས་པ། ལྷག་བསམ་རྣམ་དག་གིས་མང་ཚོགས་ལ་ཞབས་འདེགས་ཞུ་བ་བཅས་བྱས་ནས་མི་དམངས་མང་ཚོགས་ཀྱིས་སྲིད་གྲོས་དམངས་དང་ཐག་ཉེ་ལ་ཨུ་ཡོན་ང་ཚོའི་འགྲམ་དུ་ཡོད་པ་ཚོར་ཐུབ་པ་བྱ་རྒྱུ་ཡིན”ཞེས་ལིའུ་ཅེ་དབྱི་ཡིས་གསུངས་པ་རེད།