ཨུ་ཡོན་ཝང་ཅིང་གིས་གསུངས་དོན།
ཁུ་ལྡན་ཤིང་འབྲས་ཆུང་ངུ་ཐོན་ལས་ཆེན་པོར་འགྱུར་བར་སྐུལ་འདེད་བཏང་བ།
གང་འདྲ་ཞིག་ལ་ཁུ་ལྡན་ཤིང་འབྲས་ཆུང་ངུ་ཟེར་རམ། “ཚང་མས་རྒྱུས་མངའ་ཆེ་བའི་ཤིང་ཏོག་ལན་མའེ་དང་། ཤིང་སྐྱེས་འབྲི་ཏ་ས་འཛིན། ཤིང་ཏོག་མན་ཡུའེ་མའེ། འོ་སེ་སོགས་ཚང་མ་ནི་ཁུ་ལྡན་ཤིང་འབྲས་ཡིན་ཞིང་། དེ་དག་ནི་མི་སེར་མང་པོ་ཞིག་གི‘ཕྱུག་འགྱུར་ཤིང་ཏོག་ཅིག་ཡིན”ཞེས་རྒྱལ་ཡོངས་སྲིད་གྲོས་ཀྱི་ཨུ་ཡོན་ཀྲུང་གོ་ཞིང་ལས་ཚན་རིག་ཁང་གི་ཞིབ་འཇུག་པ་ཝང་ཅིང་གིས་ཁུ་ལྡན་ཤིང་འབྲས་ཆུང་ངུའི་ཁྱད་ལྡན་ཐོན་ལས་འཕེལ་རྒྱས་ལ་མུ་མཐུད་དོ་ཁུར་གནང་བཞིན་ཡོད།
ཧེ་ལུང་ཅང་དང་། ལེའོ་ཉིང་། ཡུན་ནན། ཀུའེ་ཀྲོའུ་སོགས་སུ་བརྟག་ཞིབ་གནང་རྗེས་ཝང་ཅིང་གིས་རང་རྒྱལ་གྱི་ཁུ་ལྡན་ཤིང་འབྲས་ཆུང་ངུའི་ཐོན་ཁུངས་ཕུན་སུམ་ཚོགས་པོ་ཡོད་མོད། འོན་ཀྱང་རང་བདག་ཤེས་རིག་བདག་དབང་ལྡན་པའི་སོན་སྤུས་མི་འདང་བ་དང་། ཐོན་ལས་འཁོར་འབྲེལ་འཐུས་སྒོ་ཚང་པོ་མེད་ལ“ཆུང་ལ་ཁ་ཐོར”ཡིན་པ་དེར་འཕེལ་རྒྱས་ཀྱི་བར་སྟོང་ཧ་ཅང་ཆེན་པོ་ལྡན་པ་ཤེས་རྟོགས་བྱུང་ཡོད། 2024ལོའི་རྒྱལ་ཡོངས་ཀྱི་ཚོགས་འདུ་གཉིས་ཐོག་ཝང་ཅིང་གིས་ཁུ་ལྡན་ཤིང་འབྲས་ཆུང་ངུའི་ཁྱད་ལྡན་ཐོན་ལས་སྤུས་ཚད་མཐོ་བའི་འཕེལ་རྒྱས་ལ་སྐུལ་འདེད་གཏོང་རྒྱུའི་སྐོར་གྱི་གྲོས་གཞི་ཕུལ་ནས། འབྲེལ་ཡོད་སྡེ་ཚན་གྱིས་རྒྱལ་ཡོངས་རང་བཞིན་གྱི་ཁུ་ལྡན་ཤིང་འབྲས་ཆུང་ངུའི་རི་སྐྱེས་ཐོན་ཁུངས་ཡོངས་བཤེར་དང་རྒྱལ་ཁབ་རིམ་པའི་ཁུ་ལྡན་ཤིང་འབྲས་ཆུང་ངུའི་སོན་སྤུས་ཐོན་ཁུངས་ར་བ་བསྐྲུན་པ་སོགས་བྱ་རྒྱུའི་གྲོས་འགོ་བཏོན་གནང་བ་རེད།
ཡུན་རིང་མ་སོང་བར། ཝང་ཅིང་ལ་ཞིང་ལས་གྲོང་གསེབ་པུའུ་སོགས་འབྲེལ་ཡོད་པུའུ་ཨུད་ཀྱི་གྲོས་གཞིའི་སྐོར་གྱི་ལན་འབྱོར་ཞིང་། ཞིང་ལས་གྲོང་གསེབ་པུས། གོམ་སྟབས་རྗེས་མར། ཞིང་ཆེན་རིམ་པའི་སོན་སྤུས་ཐོན་ཁུངས་མཛོད(ར་བ)ཀྱི་ཆ་འཕྲིན་ཐོ་འགོད་ལ་མགྱོགས་མྱུར་སྐུལ་འདེད་བཏང་ནས། རྒྱལ་ཁབ་ཀྱི་མཛོད(ར་བ)དུ་ཉར་ཚགས་བྱས་མེད་པའི་ཁུ་ལྡན་ཤིང་འབྲས་ཆུང་ངུའི་སོན་སྤུས་ཐོན་ཁུངས་གཅིག་གྱུར་བསྡུ་རུབ་ཀྱིས་ཡུན་རིང་འཐབ་ཇུས་ཉར་ཚགས་བྱ་རྒྱུ་དང་། ལེགས་ལྡན་ཚན་ཞིབ་སློབ་གླིང་དང་ཁེ་ལས་ལ་བརྟེན་ནས་ཁུ་ལྡན་ཤིང་འབྲས་ཆུང་ངུའི་སོན་སྤུས་ཐོན་ཁུངས་གནད་སྨིན་གསལ་འབྱེད་མགྱོགས་མྱུར་བྱས་ཏེ། ཕུལ་བྱུང་གཞི་རྒྱུ་སྔོག་འདོན་དང་ཕུལ་བྱུང་སོན་སྤུས་གསར་གཏོད་བྱ་རྒྱུ། འབྲེལ་ཡོད་སྡེ་ཚན་གྱི་མཛུབ་ཁྲིད་འོག་ཁུ་ལྡན་ཤིང་འབྲས་ཆུང་ངུའི་འབྲེལ་ཡོད་རྒྱལ་ཁབ་རིམ་པའི་གསར་གཏོད་ལས་སྟེགས་བསྐྲུན་རྒྱུར་རྒྱབ་སྐྱོར་ཧུར་ཐག་བྱ་རྒྱུ། འབྲེལ་ཡོད་ཁེ་ལས་སྐྱེད་སྲིང་ཧུར་ཐག་བྱས་ནས་ས་གནས་ཀྱི་ཁྱད་ལྡན་ལེགས་ལྡན་ཐོན་ལས་འཕེལ་རྒྱས་ཡོང་བར་སྐུལ་འདེད་གཏོང་རྒྱུ་བཅས་རེད།
ཝང་ཅིང་གིས“འདི་ནི་ངས་བཏོན་པའི་ཁུ་ལྡན་ཤིང་འབྲས་ཆུང་ངུའི་ཐོན་ལས་སྐོར་གྱི་གྲོས་གཞི་གཉིས་པ་དེ་ཡིན་ཞིང་། དེ་དག་ཚང་མ་དོན་འཁྱོལ་ཐུབ་ཡོད་ལ་ཨ་ལན་ཡང་འབྱོར་བྱུང”ཞེས་གསུངས་པ་རེད།