འདི་ནི་སློབ་ཆེན་དང་བླངས་པས་སྒྲ་བརྙན་དཀྲོལ་སྟངས་སློབ་བཞིན་པ།

ལྷོ་ཁ་གྲོང་ཁྱེར་མཚོ་སྨད་རྫོང་གི་གཞོན་ནུའི་ཁྱིམ་གཞིས་ཀྱི་ཤེལ་ཁང་ཞིག་ཏུ་འཛུལ་སྐབས། འཁྲུག་ཆ་དོད་པའི་དགོད་སྒྲ་ཡང་ནས་ཡང་དུ་གྲགས་འོང་། གཞན་ལ་དྲིས་རྗེས་ཤེས་རྟོགས་བྱུང་བར། དེ་ནི་མཚོ་སྨད་རྫོང་གིས་གཉེར་ཐེངས་ཐོག་མ་ཡིན་པའི“གཞོན་ནུའི་ཁྱིམ་གཞིས། དོན་སྙིང་ལྡན་པའི་གུང་གསེང”ཞེས་པའི་གུང་གསེང་རིང་གི་སྤྱི་ཕན་ཚབ་གཉེར་འཛིན་གྲྭའི་ཕྲུ་གུ་ཚོ་རྩེད་མོ་རྩེ་བའི་དགོད་སྒྲ་རེད་འདུག

གཞོན་ནུའི་ཁྱིམ་གཞིས་ཀྱི་དང་བླངས་པ་བློ་བཟང་ཆོས་སྐྱིད་ཀྱིས་གྲོགས་པོ་ཆུང་ཆུང་ཚོར་སྒོར་གཞས་འཁྲབ་སྟངས་སློབ་བཞིན་འདུག“སྔོན་མ་གུང་གསེང་སྐབས། ཕྲུ་གུ་ཚོ་རྒན་རྒོན་གྱིས་ཉར་རོགས་བྱས་པས། ཉིན་ལྟར་ཁྱིམ་དུ་བརྙན་འཕྲིན་ལྟ་བ་མིན་ན་ལག་ཐོགས་ཁ་པར་ལ་རྩེད་མོ་བརྩེས་ནས་སྡོད་ཀྱི་ཡོད། དེ་ལྟར་བྱས་པས་ང་ཚོ་ལས་ཀར་འགྲོ་མཁན་ཁྱིམ་བདག་ཕྲུ་གུར་སེམས་ཁྲལ་བྱས་ནས་སྡོད་དགོས་ཀྱི་འདུག ད་ཆ་ཞོགས་པ་སྔ་པོ་ནས་ཕྲུ་གུ་ཚབ་གཉེར་འཛིན་གྲྭར་བསྐྱལ་བས། དགེ་རྒན་གྱིས་ཕྲུ་གུ་ཚོའི་ཁྱིམ་སྦྱོང་ལ་ཟུར་ཁྲིད་བྱེད་པ་ཕུད་དགའ་མོས་ཀྱི་སློབ་ཚན་སྣ་ཚོགས་འཚོགས་པས། ཕྲུ་གུ་ཚོའི་སེམས་ཁམས་སྐྱིད་དུ་སོང་ལ་གུང་གསེང་གི་འཚོ་བའང་ཕུན་སུམ་ཚོགས་སུ་གྱུར་འདུག ད་རེས་ཀྱི་ཚབ་གཉེར་འཛིན་གྲྭ་འདི་ང་ཚོ་ཁྱིམ་བདག་ལ་བསམ་པ་བཞིན་བྱུང་འདུག”ཅེས་ཁྱིམ་བདག་བསམ་གཏན་ཆོས་སྒྲོན་གྱིས་ཚབ་གཉེར་འཛིན་གྲྭར་འདོད་བློ་ཁེངས་བཞིན་དུ་བཤད།

གུང་གསེང་རིང་། ལས་བཟོ་དང་མང་ཚོགས་ཀྱི་བུ་ཕྲུག་ལ་ལྟ་མཁན་མེད་པའི་དཀའ་ངལ་བསལ་ནས་གཞོན་ནུ་ལོ་ཆུང་ལ་བདེ་འཇགས་དང་། སྤྲོ་སྣང་། དོན་སྙིང་བཅས་ལྡན་པའི་གུང་གསེང་ཞིག་སྐྱེལ་བར་ཁྲིད་སྟོན་དང་རོགས་རམ་བྱ་ཆེད། མཚོ་སྨད་རྫོང་གིས་ཕྱོགས་མང་པོའི་ཐོན་ཁུངས་བསྡུ་སྒྲིལ་བྱས་ནས་རྫོང་མང་ཚོགས་ཚོགས་པའི་ལས་དོན་པུའུ་ཡིས་སྣེ་ཁྲིད་དེ“གཞོན་ནུའི་ཁྱིམ་གཞིས། དོན་སྙིང་ལྡན་པའི་གུང་གསེང”ཞེས་པའི་གུང་གསེང་རིང་གི་སྤྱི་ཕན་ཚབ་གཉེར་འཛིན་གྲྭ་ཞིག་བཙུགས་ནས་ཁོངས་གཏོགས་ཁུལ་གྱི་གཞོན་ནུ་ལོ་ཆུང་30ལྷག་ཙམ་ལ་ཚབ་གཉེར་ཞབས་འདེགས་ཞུས་པ་རེད།

ཤེས་རྟོགས་བྱུང་བར་གཞིགས་ན། ཚབ་གཉེར་འཛིན་གྲྭས“བཅོལ་བ་དང་དོ་དམ་ཟུང་འབྲེལ”དང་། “སློབ་པ་དང་རོལ་རྩེད་ཟུང་དུ་འབྲེལ་བའི”བྱེད་སྟངས་ལ་བརྟེན་ནས། ཕྲུ་གུ་སོ་སོའི་ལོ་ཚད་ཀྱི་ཁྱད་ཆོས་དང་དགའ་མོས་ལ་དམིགས་པའི་ཁར་ས་གནས་ཀྱི་ཁྱད་ཆོས་དང་ཡང་ཟུང་འབྲེལ་གྱིས་གསར་གཏོད་ལྡན་པའི་སྒོ་ནས་མཛེས་རིས་དང་། རོལ་ཆ། མི་རིགས་ཀྱི་ཞབས་བྲོ། གཞོན་ནུ་ལོ་ཆུང་གི་རང་སྐྱོབ་སློབ་གསོ་སོགས་ཀྱི་སློབ་ཚན་སྣ་ཚོགས་ཁྲིད་པ་དང་ཆབས་ཅིག་ཏང་ཡོན་རྒན་གྲས་དང་། ན་གཞོན་དགེ་རྒན། མེ་ཟོན་རུ་མི། འགྲིམ་འགྲུལ་ཉེན་རྟོག་པ་སོགས་གདན་དྲངས་ནས་དང་བླངས་སློབ་ཚན་ཁྲིད་དུ་བཅུག་པས། གཞོན་ནུ་ལོ་ཆུང་དང་བྱིས་པ་ཁྱོན་ཡོངས་འཕེལ་རྒྱས་འགྲོ་བའི་དགོས་འདུན་གསར་པ་སྔར་བས་བསྐངས་ནས་ཁྱིམ་བདག་གི་སེམས་ཁྲལ་སེལ་ཐུབ་པ་བྱུང་ཡོད།

གུང་གསེང་རིང་། ཚབ་གཉེར་འཛིན་གྲྭས་སློབ་ཆེན་སློབ་མ་དང་བླངས་པ་བསྡུས་ཏེ། ཁོང་ཚོར་ཁྱིམ་སྦྱོང་ལ་ཟུར་ཁྲིད་དང་། སྐྱིད་སྣང་དོད་པའི་ཚན་རིག་ཁྱབ་གདལ། སྒྱུ་རྩལ་མྱོང་རོལ། ལན་ཆིའུ་སྤོ་ལོ་རྒྱག་པ་སོགས་ཀྱི་སློབ་ཚན་ཁྲིད་དུ་བཅུག་པ་མ་ཟད། ཆེད་ལས་དགེ་རྒན་གྱི་སྟོབས་ཤུགས་གཅིག་ཏུ་བསྒྲིལ་ནས་གུང་གསེང་རིང་ཕྲུ་གུ་ཚོའི་སློབ་སྦྱོང་དང་འཚོ་བ་འབྲེལ་མཐུད་ཟབ་མོ་ཡོང་བའང་བྱས་ཡོད། བློ་བཟང་ཆོས་སྐྱིད་ནི་སློབ་ཆེན་སློབ་མ་དང་བླངས་པའི་གྲས་ཤིག་ཡིན། ཁོང་གིས“གུང་གསེང་བཞག་པའི་རྗེས། ཉིན་ལྟར་ཁྱིམ་དུ་སྡོད་འདོད་མི་འདུག ད་ཆ་ཚབ་གཉེར་འཛིན་གྲྭར་གཅུང་པོ་དང་གཅུང་མོ་མང་པོར་རང་སྦྱོང་ཟུར་ཁྲིད་བྱེད་པ་དང་། མཉམ་དུ་རྩེད་མོ་རྩེ་བ། སྒོར་གཞས་དང་རི་མོ་བསླབས་ན་ང་རང་སེམས་པ་སྐྱིད་པོ་འདུག་ལ། གཟུགས་པོར་ཡང་སྦྱོང་བརྡར་ཐེབས་ཀྱི་འདུག གུང་གསེང་འདི་ཧ་ཅང་དོན་སྙིང་ལྡན་པ་ཞིག་བྱུང་སོང”ཞེས་བཤད།