འདི་ནི་དབྱང་ལིས(གཡས)ཕྱི་རོལ་དུ་བརྟག་ཞིབ་བྱེད་བཞིན་པ། (བཅར་འདྲི་དང་ལེན་བྱེད་མཁན་གྱིས་པར་མཁོ་འདོན་བྱས)

བོད་ལྗོངས་ལྷ་སར་གནས་པའི་ས་མཐོའི་སྐྱེ་དངོས་ཞིབ་འཇུག་སུའོ་རུ་སྐྱོད་སྐབས། སུའོ་ཀྲང་གཞོན་པ་དབྱང་ལིས་བོད་སྐད་བདེ་པོའི་ཐོག་ནས་སྒོ་སྲུང་བ་དང་སྐད་ཆ་ཤོད་བཞིན་འདུག ཧུའུ་ནན་ནས་ཡིན་པའི་དབྱང་ལི་འདི་གར་ལས་ཀ་བྱས་ནས་ལོ་20ལྷག་ཙམ་སོང་ཞིང་། ཁོང་གིས“ད་ལྟ་བོད་ལྗོངས་ནི་ངའི་ཕ་ཡུལ་ཡིན”ཞེས་འཛུམ་དམུལ་དམུལ་དུ་བརྗོད།

2004ལོར་སློབ་ཆེན་ཐོན་པའི་དབྱང་ལིས་ནུབ་རྒྱུད་འཆར་གཞིའི་དང་བླངས་པ་ཞིག་བྱས་ཏེ། པེ་ཅིང་ནས་བོད་དུ་ཡོང་བ་དང་། དུས་དེ་ནས་བཟུང་ཁོང་དང་བོད་ལྗོངས་ལས་དབང་གཅིག་ཏུ་སྒྲིལ་ཡོད།

དང་བླངས་པ་ནས་ཞིབ་འཇུག་པའི་བར།

བོད་དུ་སླེབས་མ་ཐག་དབྱང་ལི་རང་སྐྱོང་ལྗོངས་འཕྲོད་བསྟེན་ལྟ་སྐུལ་སུའོ་རུ་ལས་བགོས་བརྒྱབ། ཞབས་ཞུའི་དུས་ཚོད་ཐིམ་ལ་ཉེ་བའི་སྐབས། “འདི་གར་མུ་མཐུད་སྡོད་དགོས་མིན”ཐད་དབྱང་ལི་སོམ་ཉིའི་དྲ་བར་ཚུད་མོད། འོན་ཀྱང་ཞོགས་པའི་ཁྲུང་ཁྲུང་གི་སྙན་སྒྲ་ཞིག་ལས་དབྱང་ལིས་མུ་མཐུད་སྡོད་རྒྱུའི་སེམས་ཐག་བཅད།

2005ལོའི་ཟླ་2པའི་ཟླ་མཇུག་ལ། ལྷ་སའི་ལྷུན་གྲུབ་རྫོང་དུ་དབྱང་ལི་དང་བོད་ལྗོངས་ས་མཐོའི་སྐྱེ་དངོས་ཞིབ་འཇུག་སུའོ་ཡི་ཁྲུང་ཁྲུང་སྐེ་ནག་ཞིབ་འཇུག་དང་རིགས་གཅིག་མཁས་ཅན་མཚམས་གཅོད་སྒྲོལ་མ་ཐུག་འཕྲད་བྱུང་ཞིང་། མཚམས་གཅོད་སྒྲོལ་མས“ང་ཚོའི་འདི་ཁུལ་དུ་ཁྲུང་ཁྲུང་སྐེ་ནག་ལ་ཞིབ་འཇུག་བྱེད་པར་ཡོང་འདོད་ཡོད་དམ”ཞེས་ཁོང་གདན་ཞུ་བྱས། སྐྱེ་དངོས་རིག་པའི་ཆེད་ལས་ཡིན་པའི་དབྱང་ལི་ཡོང་འདོད་ཆེན་པོ་བྱུང་ཞིང་། དེ་རྗེས་ཁོང་གིས་ཞིབ་འཇུག་ཚོགས་པ་དང་མཉམ་དུ་ཕྱི་རོལ་དུ་ཁྲུང་ཁྲུང་སྐེ་ནག་ལ་ལྟ་ཞིབ་ཐེངས་གཅིག་བྱས།

དེ་ཉིན་ཞོགས་པ་སྐད་སྒྲ་ཞིག་གིས་ཁོང་གཉིད་ལས་དཀྲོག དེ་ནས་ཁང་པའི་ཕྱི་རོལ་དུ་བསྐྱོད་ནས་ལྟ་སྐབས་ཁྲུང་ཁྲུང་སྐེ་ནག་ཁྱུ་གཅིག་ཕྱི་རོལ་དུ་ཅི་དགར་རོལ་བཞིན་པའི་རྣམ་པ་དབྱང་ལིས་ད་ལྟ་ཡང་བརྗེད་མེད། འདི་ནི་ཁོང་གིས་རི་སྐྱེས་ཁྲུང་ཁྲུང་སྐེ་ནག་རིགས་ཁྱུ་མང་པོ་མཐོང་ཐེངས་དང་པོ་ཡིན་ཞིང་། ཞོགས་པའི་གྲང་རླུང་ཁྲོད་དབྱང་ལིས་ག་ལེར་རྒྱང་ཤེལ་བཙུགས་ནས་བལྟས་པས་ཁྲུང་ཁྲུང་སྐེ་ནག་200ལྷག་ཙམ་ཅི་དགར་རོལ་བཞིན་པ་མཐོང་།

“ཁྲུང་ཁྲུང་སྐེ་ནག་ལ་ལྟ་དཔྱད་བྱེད་དགོས་པ་མ་ཟད། ད་དུང་ཚན་རིག་དང་མཐུན་པའི་འདེགས་སྐྱོར་ལ་བརྟེན་ནས་བརྒྱུད་རིམ་ལྡན་པའི་ངང་སྲུང་སྐྱོང་བྱེད་དགོས་ཀྱི་ཡོད། དེའི་ཐད་ངས་བྱེད་དགོས་པའི་ལས་ཀ་ད་དུང་ཧ་ཅང་མང་པོ་ཡོད”

ཅེས་དབྱང་ལིས་བསམ་བློ་གཏོང་བཞིན་བརྗོད།

དེས་ན། དབྱང་ལིས་བོད་དུ་བསྡད་ནས་ས་མཐོའི་སྐྱེ་དངོས་ཞིབ་འཇུག་སུའོ་རུ་ཁྲུང་ཁྲུང་སྐེ་ནག་གི་ཞིབ་འཇུག་ལས་ལ་གཞོལ་བ་རེད།

དཀའ་ངལ་ཁྱད་དུ་བསད་ནས་ཕྱི་རོལ་དུ་བརྟག་དཔྱད་ལས་དོན་སྤེལ་བ།

མ་གཞི་ས་ཆ་མང་པོར་འགྲོ་མྱོང་ཡོད་མོད། འོན་ཀྱང་དབྱང་ལིར་བག་ཆགས་ཟབ་ཤོས་ནི་སྔར་བཞིན་ལྷུན་གྲུབ་རྫོང་གི་རི་ཐང་གི་མཚན་གུང་དུ་གྲགས་པའི་ཁྲུང་ཁྲུང་གི་སྐད་སྒྲ་དེ་ཡིན་ཞིང་། དབྱང་ལིས“ལྷུན་གྲུབ་རྫོང་ལ་ཁྲུང་ཁྲུང་སྐེ་ནག་བབ་སྡོད་བྱ་ཡུལ་གཙོ་བོ་གཉིས་ཡོད་པ་དེ་གཉིས་བར་ཐག་རིང་ཙམ་ཡོད། ང་ཚོར་ལས་མི་མང་པོ་མེད་པས་རྒྱུན་དུ་ས་ཆ་གཅིག་བདམས་ཏེ་དམིགས་འཛུགས་ལྟ་དཔྱད་ཚད་ལེན་བྱེད་ཀྱི་ཡོད”ཅེས་བརྗོད་པ་དང་། ཁོང་གིས་གལ་ཏེ་དུས་ཚོད་གཅིག་གི་ནང་བབ་སྡོད་བྱ་ཡུལ་གཉིས་པོར་ལྟ་ཞིབ་ཚད་ལེན་བྱེད་མི་ཐུབ་ཚེ། ས་ཆ་གཉིས་ཀྱི་རིགས་ཁྱུ་སྡོམ་རྩིས་བསྐྱར་ཟློས་ཐེབས་པའམ་ཡང་ན་ཆད་ལུས་བྱུང་མེད་པ་གཏན་འཁེལ་ཇི་ལྟར་བྱེད་དགོས་མིན་ཐད་རྟག་ཏུ་བསམ་བློ་གཏོང་གི་ཡོད།

དེས་ན། ཉིན་ཞིག་གི་ས་སྲོད་དུ་ཁོང་གིས་བབ་སྡོད་བྱ་ཡུལ་དང་པོའི་ཁྲུང་ཁྲུང་སྐེ་ནག་གི་གྲངས་འབོར་བསྡོམས་རྩིས་བརྒྱབ་རྗེས། ཆུ་འགྲམ་བརྒྱུད་རྐང་འཁོར་བཞོན་ནས་བབ་སྡོད་བྱ་ཡུལ་གཞན་ཞིག་ཏུ་བསྐྱོད་པ་དང་མཚན་གུང་དུ་དེ་གར་འབྱོར་ནས་ཁྲུང་ཁྲུང་སྐེ་ནག་གི་ལྟ་ཞིབ་ཟིན་འགོད་ལས་དོན་ལེགས་གྲུབ་བདེ་བླག་བྱུང་ཡོད།

སྡོད་གནས་སུ་ལོག་སྐབས་ས་རུབ་པ་དང་མཐའ་འཁོར་གྱི་གནས་ཚུལ་ལ་རྒྱུས་མངའ་མེད་པའི་དབང་གིས་དབྱང་ལི་ལམ་ནོར་ཐེབས། འོན་ཀྱང་ཁོང་གིས་མུན་ནག་གི་མཚན་མོར་བློ་ཁོག་ཆེན་པོས་མུ་མཐུད་མདུན་དུ་བསྐྱོད། གློ་བུར་དུ་ཐག་རིང་ནས་ཁྲུང་ཁྲུང་གི་སྐད་སྒྲ་གསལ་པོ་ཞིག་གྲཌ་ཤིང་། དབྱང་ལིས“འདི་ནི་ཁྲུང་ཁྲུང་སྐེ་ནག་གི་སྐད་སྒྲ་ཡིན་པས་ཁ་ཕྱོགས་དེ་བརྒྱུད་ནས་ཕྱིན་ཚེ་ལམ་ནོར་ཐེབས་ཀྱི་མ་རེད། ཁོ་ཚོས་ང་ལ་ལམ་སྟོན་བྱེད་ཀྱི་ཡོད”སྙམ།

2007ལོ་ཚུན་དུ། དབྱང་ལིས་བོད་ཀྱི་ཁྲུང་ཁྲུང་སྐེ་ནག་ལ་ལྗོངས་ཡོངས་ཀྱི་ཁྱབ་ཁོངས་སུ་དགུན་ཁར་བརྟག་དཔྱད་ཐེངས་10ལྷག་ཙམ་བྱས་པ་དང་། ཕྱི་རོལ་དུ་བརྟག་དཔྱད་བྱས་པའི་རྐང་རྗེས་བོད་ཀྱི་ཆུས་དང་རྫོང་ཚང་མར་ཁྱབ་ནས་ལོ་རེའི་འགྲོ་སྐྱོད་ལམ་ཐག་སྤྱི་ལེ་ཁྲི་2ཙམ་ཟིན་གྱི་ཡོད།

ཚན་རྩལ་ལ་བརྟེན་ནས་ས་མཐོའི་སྐྱེ་ཁམས་སླར་གསོར་རམ་འདེགས་བྱས་པ།

ལོ་ཉི་ཤུ་ལྷག་ཙམ་རིང་། ཁྲུང་ཁྲུང་སྐེ་ནག་དབྱང་ལིའི་ས་མཐོའི་རོགས་ཟླ་ཡག་ཤོས་ལ་གྱུར་ཡོད་ལ། ལྟ་དཔྱད་ཚད་ལེན་གྱི་ལག་རྩལ་རྒྱུན་མཐུད་མཐོ་རུ་ཕྱིན་པའི་བདེན་དཔང་ཡང་བྱས་ཡོད།

དེ་སྔོན། ཞིབ་འཇུག་པས་ཞོགས་པ་ནས་དགོང་མོའི་བར་ཕྱི་རོལ་དུ་ལྟ་ཞིབ་ཚད་ལེན་བྱེད་དགོས་ཀྱི་ཡོད། ཁྲུང་ཁྲུང་སྐེ་ནག་གི་ཉིན་མོའི་འགུལ་སྐྱོད་ལ་ལྟ་ཞིབ་ཚད་ལེན་ཆ་ཚང་བ་ཞིག་བྱ་ཆེད། རྒྱང་ཤེལ་སྤྱད་དེ་རྒྱུན་མཐུད་ལྟ་ཞིབ་ཚད་ལེན་བྱེད་པ་དང་ཆབས་ཅིག ད་དུང་ལྟ་ཞིབ་ཚད་ལེན་མི་སྣས་སྒྲ་ཕབ་སྨྱུ་གུ་སྤྱད་དེ་ངག་ཐོག་ནས་འབྲེལ་ཡོད་གནས་ཚུལ་ཟིན་ཐོ་འགོད་དགོས་པ་དང་། དགོང་མོ་སླར་ཡང་དུས་ཚོད་དེ་བས་མང་པོ་སྤྱད་དེ་ཡིག་ཐོག་ཏུ་ཕབ་དགོས་ཀྱི་ཡོད། འོན་ཀྱང་ད་ཆ་དཔར་མིག་གསལ་པོ་དང་མི་མེད་གནམ་གྲུ་སྤྱོད་འགོ་ཚུགས་པ་དང་བསྟུན་ནས་ལྟ་དཔྱད་ཚད་ལེན་དེ་བས་སྟབས་བདེ་རུ་ཕྱིན་ཡོད།

བོད་ལྗོངས་ལྷ་རྩེ་རྫོང་ཆོས་མ་ཤང་དུ་དབྱང་ལིས་གཙང་པོའི་གཞོགས་གཅིག་ནས་ལག་ཐོགས་ཁ་པར་བརྒྱུད་ཕར་ཕྱོགས་ཀྱི་ལས་དོན་པ་དང་འབྲེལ་བ་བྱས། ཁོང་གཉིས་ཀྱིས་དུས་གཅིག་ཏུ་མི་མེད་གནམ་གྲུ་བཏང་ཞིང་། དབྱང་ལིས“ང་ཚོས་མྱུར་ཚད་གཅིག་གྱུར་ཡོང་བར་བྱས་ནས་དལ་བུར་མདུན་ཕྱོགས་སུ་སྐྱོད་དགོས”ཞེས་ཁ་པར་བརྒྱུད་བཀའ་བཏང་།

ལྷ་རྩེ་རྫོང་དུ་གནས་པའི་བབ་སྡོད་བྱ་ཡུལ་ནི་ལོ་འདི་དག་རིང་ཁོང་ལ་གསར་རྙེད་བྱུང་བ་ཞིག་རེད། ཐེངས་ཤིག་དབྱང་ལིས་འདི་ཁུལ་གྱི་ཕྱི་རོལ་དུ་ཚན་ཞིབ་བྱེད་སྐབས་འདི་གར་གཞི་ཁྱོན་ཆེ་བའི་ཁྲུང་ཁྲུང་སྐེ་ནག་གི་རིགས་ཁྱུ་ཞིག་ཡོད་པ་བསམ་ཡུལ་ལས་འདས་པར་གསར་རྙེད་བྱུང་། གྲོག་རོང་ཆུང་ཆུང་དེའི་ནང་དགུན་སྒྲོལ་ལ་ཡོང་བའི་ཁྲུང་ཁྲུང་སྐེ་ནག་2000ཙམ་འཚོ་སྡོད་བྱེད་ཀྱི་ཡོད། དེ་ཉིན་ཞོགས་པར་ཁོང་རླངས་འཁོར་བཏང་ནས་གྲོག་རོང་དུ་སྐྱོད་སྐབས་ཁྲུང་ཁྲུང་སྐེ་ནག་ཧ་ཅང་མང་པོ་ཁ་ཐོར་དུ་བབས་ཡོད་པ་མཐོང་། ཁོང་ཉེ་སར་སླེབས་སྐབས་ཁྲུང་ཁྲུང་སྐེ་ནག་ཁྱུ་གཅིག་འོད་ཆེམ་ཆེམ་དུ་འཕྲོ་བའི་ཆུ་ངོས་ནས་ཞོགས་པའི་སྐྱ་རེངས་ཁྲོད་དགུང་སྔོན་ཕྱོགས་སུ་འཕུར་བ་རེད།