གསར་འགོད་པར་ཀུའེ་ཀྲོའུ་ཞིང་ཆེན་ནགས་ལས་ཅུས་ནས་ཤེས་རྟོགས་བྱུང་བར། བསྡོམས་རྩིས་རགས་ཙམ་བྱས་པར་གཞིགས་ན། 2024ལོའི་ཟླ་3པར། ཀུའེ་ཀྲོའུ་ཞིང་ཆེན་གྱི་སྐམ་སའི་རི་སྐྱེས་སྲོག་ཆགས་ལ་ལྟ་ཞིབ་ཚད་ལེན་གྱི་ལས་དོན་སྤེལ་བ་ནས་ད་བར། རིམ་རྩིས་བརྒྱབ་ན་རི་སྐྱེས་སྲོག་ཆགས་སྣ་ཁ་298བརྙན་པར་དུ་བླངས་ནས་ཐོ་བཀོད་པའི་ནང་རྒྱལ་ཁབ་ཀྱི་རིམ་པ་དང་པོའི་གཙོ་གནད་རི་སྐྱེས་སྲོག་ཆགས་སྣ་ཁ་6དང་། རྒྱལ་ཁབ་ཀྱི་རིམ་པ་གཉིས་པའི་གཙོ་གནད་རི་སྐྱེས་སྲོག་ཆགས་སྣ་ཁ་46ཡོད་པ་རེད།

སྟོངས་ལ་ཉེ་བའི་རི་སྐྱེས་སྲོག་ཆགས་རྩ་ཆེན་སྲུང་སྐྱོབ་བྱེད་ཤུགས་ཆེ་རུ་བཏང་ནས་ཐོན་ཁུངས་ཀྱི་མ་གྲངས་མཐིལ་རྟོགས་དང་ཐོན་ཁུངས་ཀྱི་སྐབས་བསྟུན་འགྱུར་ལྡོག་གནས་ཚུལ་ཁོང་དུ་ཆུད་པར་བྱ་ཆེད། ཀུའེ་ཀྲོའུ་ཞིང་ཆེན་ནགས་ལས་ཅུས་ཀྱིས་ཞིང་ཆེན་ཡོངས་སུ་སྐམ་སའི་རི་སྐྱེས་སྲོག་ཆགས་ལ་ལྟ་ཞིབ་ཚད་ལེན་བྱེད་པའི་ལས་དོན་སྒྲིག་འཛུགས་བྱས་ཤིང་། ཀུའེ་ཀྲོའུ་ཞིང་ཆེན་ནགས་ལས་བརྟག་ཞིབ་འཆར་འགོད་ཁང་གིས་ལྟ་ཞིབ་ཚད་ལེན་ལས་དོན་གྱི་ཞིབ་ཕྲའི་འགན་ཁུར་ཡོད།