འདི་ནི་ནག་ཆུ་གྲོང་ཁྱེར་སོག་རྫོང་རུག་ནང་གྲོང་ཚོའི་པ་མཚོའི་ཁྱིམ་མི་ཚོས་དགུ་ཐུག་འཐུང་བཞིན་པ།

འདི་ནི་མངའ་རིས་ས་ཁུལ་ཕན་བདེ་ཁང་གི་དགུ་ཐུག་དགོང་མོའི་རྣམ་པ་ཡིན་པ།

ཚེས་27ཉིན་ནི་དགུ་ཐུག་དགོང་མོ་ཡིན་པས། བོད་ཀྱི་ལོ་གསར་གྱི་སྔོན་འགྲོ་གལ་ཆེན་ཞིག་ཏུ་བརྩི་བ་དང་བོད་ཀྱི་ས་གནས་ཁག་ཏུ་ལོ་རྙིང་ཕར་ལ་སྐྱེལ་བ་དང་ལོ་གསར་ཚུར་ལ་བསུ་བའི་རྟེན་འབྲེལ་གྱི་རྣམ་པ་ཟབ་མོ་ཞིག་མངོན་པར་བརྟེན་མི་རྣམས་ཀྱིས་རྣམ་པ་མི་འདྲ་བའི་ཐོག་ནས“དགུ་ཐུག”བཏུང་སྟེ་དྲོ་སྐྱིད་དང་མཉམ་འཛོམས་ཀྱི་དཔལ་ལ་རོལ་ནས་མཉམ་འཛོམས་ཀྱི་དུས་འདི་དགའ་གཏོང་བྱས།

ལྷ་ས།

ལོ་གསར་པར་རྣམ་པ་གསར་པ་མངོན། ཁྱིམ་ཚང་ཁྲི་སྟོང་དུ་མས་གློག་བཞུ་ཁྲ་ཆེམ་མེར་སྤར་ཏེ་མཉམ་འཛོམས་དགའ་སྟོན་གྱི་དུས་བཟང་འདིར། མེ་ཟོན་བཀོད་འཐབ་པ་ཚོས་ཁྲོམ་གཞུང་དང་སྲང་ལམ་དུ་སྐོར་གཡེང་བྱེད་པ་དེ་བཀྲག་མདངས་འཚེར་བའི་མཛེས་ལྗོངས་ཞིག་ཏུ་མངོན།

“དེ་རིང་གི་དགོང་མོ་ནི་བོད་ཀྱི་ལོ་གསར་གྱི‘དགུ་ཐུག’དགོང་མོ་ཡིན་པས། མེ་སྐྱོན་སྔོན་འགོག་དང་ཐོལ་བྱུང་ཐག་གཅོད་ཀྱི་ལས་འགན་ཧ་ཅང་ལྕི་བས། ཚང་མས་འགན་འཁྲི་སྔར་བས་ནན་པོ་ཁུར་ནས་མི་སེར་ཚོ་འཆམ་མཐུན་དང་བདེ་སྐྱིད་ལྡན་པའི་ལོ་གསར་པ་ཞིག་གཏོང་ཐུབ་པའི་འགན་ལེན་བྱེད་དགོས”ཞེས་ཚེས་27ཉིན་གྱི་དགོང་མོར་ལྷ་ས་གྲོང་ཁྱེར་ཁྲེང་ཀོན་ཆུས་མེ་ཟོན་རོགས་སྐྱོབ་རུ་ཆེན་མཁར་ལྔ་གདོང་ལྷོ་ལམ་མེ་ཟོན་རོགས་སྐྱོབ་ས་ཚིགས་ཀྱི་བཀོད་འཐབ་པ་ཚོས་ཉིན་དེའི་སྐོར་གཡེང་མ་བྱས་གོང་། ཆབ་སྲིད་ཁྲིད་སྟོན་པ་ཁྲེན་ལེ་ཡིས་ཡང་ནས་ཡང་དུ་མངགས་བྱས།

གཞིས་རྩེ།

“དགུ་ཐུག”གི་དགོང་མོར། གཞིས་རྩེ་གྲོང་ཁྱེར་དིང་རི་རྫོང་མཚོ་སྒང་ཤང་ཡེ་བྱང་གྲོང་ཚོའི་གེགས་ཁུལ་གྱི་བར་བརྒལ་བཀོད་སྒྲིག་བྱ་ཡུལ་དུ། སྟབས་བདེའི་ཁང་པའི་ཕྱིར་རླུང་བུ་འུར་འུར་དུ་ལྡང་ཡང་ནང་དུ་དྲོ་སོབ་སོབ་ཡོད་པ་རེད།

ལོ་60ལ་སླེབས་པའི་རྒད་པོ་རྡོ་རྗེ་ཕྱུགས་འཚོས་ནས་ལོག་འོང་བ་དང་། ཁོང་ཁྱིམ་གྱི་སྒོ་འཛུལ་མ་ཐག་དགུ་ཐུག་གི་དྲི་ཞིམ་པོ་ཞིག་ཁ་ནས་ལུས་ཀྱི་ངལ་དུབ་ཅིག་ཅར་དུ་སེལ། “ཚང་མ་འཛོམས་སོང་བས་དགུ་ཐུག་བཏུངས་ན་ཆོག”ཅེས་བུ་རྒན་པ་སྐལ་བཟང་རྡོ་རྗེས་དེ་ལྟར་བརྗོད་བཞིན་དུ་ཚང་མར་དགུ་ཐུག་བླུག་འགོ་ཚུགས། ཁྱིམ་དུ་དགའ་བའི་དགོད་སྒྲ་བར་མི་ཆད་པར་གྲགས་ནས་དྲོ་སྐྱིད་ཀྱི་བརྩེ་བ་ཟབ་མོ་ཞིག་ངང་གིས་མངོན།

“གེགས་བར་འདི་འདྲའི་འོག་ཏང་དང་སྲིད་གཞུང་གིས་ཐུགས་ཁུར་ཟབ་མོ་གནང་ནས‘དགུ་ཐུག’མཚན་མོ་དེར་ང་ཚོའི་སེམས་པ་དྲོ་བར་བྱས་པས། སླད་ཕྱིན་ང་ཚོའི་འཚོ་བ་སྔར་བས་ཡག་ཏུ་འགྲོ་ངེས་རེད”ཅེས་སྐལ་བཟང་རྡོ་རྗེས་མྱོང་ཚོར་ཟབ་མོའི་ངང་བཤད།

ལྷོ་ཁ།

བོད་ཀྱི་ལོ་གསར་གྱི“དགུ་ཐུག”དགོང་མོར། ལྷུན་རྩེ་རྫོང་གིས་འཆར་འགོད་བྱས་པའི“གངས་ལྗོངས་ས་མཐོའི་མཐའ་མཚམས་སུ་སྐྱོད། བོད་ཀྱི་ལོ་གསར་མྱོང་རོལ་བྱེད་པའི”བརྗོད་དོན་གཙོ་བོའི་བྱེད་སྒོར་གཙང་གླས་གནམ་གྲུ་ཐེངས་དང་པོ་བཏང་ནས་ས་གནས་ཁག་ནས་འོང་བའི་ཡུལ་སྐོར་བ་འཕྲལ་མར་འོང་ཐུབ་པ་བྱས་ཡོད།

ཡུལ་སྐོར་ཚོགས་པ་མདོ་ཡུལ་དུ་ཁྲིད་དེ་ལྷོ་པའི་ཡུལ་སྲོལ་གོམས་གཤིས་དང་ཡུལ་སྨད་དང་། རྩ་རིའི་གངས་རི་དང་། ནགས་ཚལ་སོགས་རང་བྱུང་ཁམས་ཀྱི་མཛེས་ལྗོངས་མྱོང་ཚོར་བྱས་པ་མ་ཟད། ས་གནས་ཀྱི་མང་ཚོགས་དང་མཉམ་དུ“དགུ་ཐུག”འཐུང་བ་དང་རྭ་རྩེད་དང་། “མདའ་འཕེན་པ”སོགས་ཀྱི་སྲོལ་རྒྱུན་གྱི་རྩལ་འགྲན་ནང་དུའང་ཞུགས་ཡོད།

ཆབ་མདོ།

2014ལོའི་ཟླ་བ་བདུན་པར། ཆོས་སྒྲོན་ཉིང་ཁྲི་ནས་ཆབ་མདོ་གྲོང་ཁྱེར་སྨར་ཁམས་རྫོང་གྲུ་པ་ལུང་ཤང་དུ་ལས་ཀ་བྱེད་པར་འོང་བ་དང་། འདི་ག་ནས་ཡིད་ལ་འབབ་པའི་གཏན་གྲོགས་ཏེ་གྲུ་པ་ལུང་ཤང་ནས་ཡིན་པའི་ས་སྐྱེས་རྡོ་སྐྱེས་ཀྱི་རིན་ཆེན་རྡོ་རྗེ་ཐུག་སྟེ། ཕན་ཚུན་གཉིས་པོ་དགའ་རོགས་ལོ་གཉིས་བསྒྲིགས་ནས་ཆང་སའི་ལག་ཁྱེར་བླངས་ཤིང་། གསར་འགོད་པས་ཆོས་སྒྲོན་ལ་ལོ་འགའ་ཁྱིམ་དུ་ལོ་གསར་གཏོང་བར་ལོག་མེད་ཚུལ་སྐོར་འདྲི་སྐབས། ཁོང་གིས“ལས་ཀའི་རྐྱེན་གྱིས་ལོ་གཉིས་ཁྱིམ་དུ་ཕ་མ་དང་མཉམ་འཛོམས་ཀྱི་ལོ་གསར་གཏོང་ཐུབ་མ་སོང”ཞེས་མཆི་ཞག་འཁོར་བཞིན་དུ་བཤད།

ཆོས་སྒྲོན་གྱིས་མ་གཞི་བློ་ཕམ་པོ་བྱུང་རུང་ཡིན་ནའང་དགའ་འོས་པ་ཞིག་ལ“ཁྱོ་ག་དང་ཕྲུ་གུ་རང་ཉིད་དང་མཉམ་དུ་ཡོད་པ་མ་ཟད། ཁྱོ་གའི་ཁྱིམ་ཡང་ལས་ཀ་བྱ་ཡུལ་དང་ཐག་ཉེ་པོ་ཡོད”ཅེས་བཤད། ཅི་འཕྲོས་མོལ་འཕྲོས་བྱེད་རིང་ཐུག་པ་འཁོལ་ནས། “དགུ་ཐུག”གཏོང་འགོ་ཚུགས།

ནག་ཆུ།

ནག་ཆུ་གྲོང་ཁྱེར་སོག་རྫོང་གསེར་ཊ་ཤང་རུག་ནང་གྲོང་ཚོར། པ་མཚོའི་ཁྱིམ་དུ་གློག་འོད་ཁྲ་ཆིལ་ལེར་སྤར་ནས་དགའ་སྤྲོས་ཁེངས། ཁྱིམ་གྱི་མི་རབས་བཞི་པོས་ལུས་ལ་གཟབ་མཆོར་སྤྲས་ནས་བཞུགས་གྲལ་སྒོར་མོར་བསྡད་དེ་མཉམ་འཛོམས་མཚོན་པའི་དགུ་ཐུག་འཐུང་ཞིང་། སྒྲོག་ཙེའི་སྟེང་ཕྱུར་བ་དང་གྲོ་མ་སོགས་འབྲོག་ཁུལ་གྱི་ཁྱད་ལྡན་ཞིམ་ཟས་བསྒྲིགས་ཡོད། པ་མཚོའི་བུས“དགུ་ཐུག”མ་བླུགས་གོང་རང་ཉིད་ཀྱི་སློབ་གྲོགས་ཚོར་བརྙན་ལམ་ནས་དུས་ཆེན་གྱི་སྤྲོ་སྣང་མཉམ་སྤྱོད་བྱེད་བཞིན་ཡོད།

མངའ་རིས།

ཚེས་27ཉིན། མངའ་རིས་ས་ཁུལ་གྱི་ཕན་བདེ་ཁང་དུ་ལྒང་བཞུ་དང་དར་ཚོན་གྱིས་བརྒྱན་ནས་གང་སར་བོད་ཀྱི་ལོ་གསར་གཏོང་བའི་དགའ་སྤྲོ་དང་དྲོ་སྐྱིད་ཀྱི་རྣམ་པ་མངོན། ཚང་མར་ཁྱིམ་གྱི་དྲོ་སྐྱིད་དང་དུས་ཆེན་གྱི་སྤྲོ་སྣང་ཚོར་དུ་འཇུག་ཆེད། ལས་དོན་པས“དགུ་ཐུག”གི་སྟོན་མོ་གཟབ་རྒྱས་ཤིག་བཤམས་ཡོད།

ཕན་བདེ་ཁང་གི་ལས་དོན་པ་ཚེ་རིང་རྒྱ་མཚོས“འདི་ལོ་ནི་ངས་གྲོགས་པོ་ཆུང་ཆུང་ཚོ་དང་མཉམ་དུ་བོད་ཀྱི་ལོ་གསར་གཏོང་ཐེངས་དགུ་པ་ཡིན། དོ་དགོང་གི་དགུ་ཐུག་ནས་འགོ་བཙུགས་ཏེ། རྗེས་ཀྱི་ཉིན་འགའི་རིང་ང་ཚོས་སྣ་མང་ཕུན་སུམ་ཚོགས་པའི་བོད་ཀྱི་ལོ་གསར་གྱི་བྱེད་སྒོ་སྤེལ་ནས་ཕྲུ་གུ་ཚོ་དགའ་དགའ་སྤྲོ་སྤྲོའི་ངང་ལོ་གསར་གཏོང་ཐུབ་པའི་རེ་བ་འཆང་བ་མ་ཟད། ཁོང་ཚོ་ལོ་གསར་པར་སྐྱོན་བྲལ་ངང་འཚར་ལོངས་ཡོང་བའི་སྨོན་འདུན་ཞུ་བའི་འཆར་གཞིའང་ཡོད”ཅེས་བཤད།

དགའ་དགའ་སྤྲོ་སྤྲོའི་ངང་ལོ་གསར་གཏོང་བ།

ལེ་ཚན་གཏོད་པའི་གཏམ།

བོད་ཀྱི་ལོ་གསར་རིང་ལོ་མང་ཕྱིར་ལས་ཀ་བྱེད་པའི་འདི་ག་ཚགས་པར་གྱི་གསར་འགོད་པ་ཁྱིམ་དུ་ལོག་ནས་ནང་མི་དང་མཉམ་འཛོམས་བྱས། ཁོང་ཚོས་རང་ཡུལ་དུ་ལོག་པའི་གོ་སྐབས་དང་བསྟུན་ཏེ་པར་ཆས་ཐོག་ནས་ཕ་ཡུལ་གྱི་འགྱུར་ལྡོག་བཀོད་པ་དང་སྨྱུག་རྩལ་ལ་བརྟེན་ནས་བོད་ཀྱི་གཏམ་རྒྱུད་བྲིས་ཡོད། རང་ཡུལ་དེ་ཙམ་གྲ་རྒྱས་པོ་མེད་མོད། འོན་ཀྱང་ཧ་ཅང་མཛེས་ཤིང་ལྟ་ན་སྡུག་པ་དང་དེ་བས་མཛེས་སྡུག་ལྡན་པར་འགྱུར་ངེས་རེད།

བོད་ལྗོངས་ཉིན་རེའི་ཚགས་པར་ཐོག་བཏོན་པའི་ཆེད་སྒྲིག་ལེ་ཚན“གསར་འགོད་པ་རང་ཡུལ་དུ་ལོག་པའི་ཟིན་བྲིས”ལ་དོ་ཁུར་གནང་རོགས།

བོད་ཤིང་སྦྲུལ་ལོའི་ལོ་གསར་ལ་གང་སར་མཉམ་འཛོམས་ཀྱི་རྣམ་པས་ཁེངས། རང་ཡུལ་དང་བྲལ་བའི་མི་མང་པོ་ཞིག་དང་འདྲ་བར་ངས་ཀྱང་ལམ་ཆས་འཁྱེར་ཏེ་རང་ཡུལ་ཆབ་མདོར་ལོག་པ་ཡིན། ལོ་གཅིག་རིང་རང་ཡུལ་དུ་ལོག་མེད་པས་རང་ཡུལ་ལ་འགྱུར་ལྡོག་བྱུང་ཡོད་མེད་དང་ནང་མི་བདེ་པོ་ཡིན་མིན་སོགས་ལམ་བར་དུ་རེ་བ་དང་སེམས་ཁྲལ་གཉིས་ལྡན་གྱི་བསམ་པ་ཞིག་སྐྱེས་བྱུང་།

ཞོགས་པ་ལྷ་ས་ནས་འཕུར་ཏེ་ཆུ་ཚོད་གཅིག་ལྷག་ཙམ་གྱི་རྗེས་སུ་སྤོམ་མདའ་གནམ་ཐང་དུ་འབྱོར། གནམ་ཐང་འབབ་ཚུགས་ནས་དོན་སྐབས་རླངས་འཁོར་སྒུག་ཁུལ་གྱི་བོགས་གཏོང་རླངས་འཁོར་དང་སྒེར་འཁོར་གྲལ་སྟར་སྒྲིག་པོས་བཞག་འདུག

ངས་རྡོག་ཁྲེས་ཁྱེར་ནས་པཱ་ལགས་ཀྱི་རླངས་འཁོར་དུ་བསྡད། ཆུ་ཚོད་གཉིས་ཙམ་གྱི་ལམ་ཐག་ནང་ང་ཚོ་དགའ་དགའ་སྤྲོ་སྤྲོའི་ངང་ཅི་འཕྲོས་མོལ་འཕྲོས་བྱས། ལམ་བར་དུ་ངས་ལམ་རྒྱུད་དུ་ད་དུང་གངས་གསོག་ཅུང་ཐེབས་པ་དང་། འགྲོ་ལམ་གཡས་གཡོན་གྱི་གྲོང་ཚོའི་རྣམ་པ་གསར་རྐྱང་དུ་གྱུར་པ། ཚོང་ཁང་དུ་ཕྱུར་བ་དང་། བྱེ་རིལ། ཁ་ཟས་སོགས་ལོ་གསར་གྱི་མཁོ་ཆས་སྣ་ཚོགས་སྒྲིག་པ་མཐོང་བྱུང་། ཁ་རུབ་ཆུས་ཁྲེང་ཀོན་གྲོང་རྡལ་དུ་སླེབས་སྐབས་འགྲོ་ལམ་གཡས་གཡོན་གྱི་ལམ་སྒྲོན་འོག་ཏུ་བཀྲ་ཤིས་མཚོན་རྟགས་ཀྱི་ལྒང་བཞུ་དམར་པོ་དང་དར་ཚོན་བཀལ་ཡོད་པས་དུས་ཆེན་གྱི་རྣམ་པས་ཁེངས་འདུག

ཁྱིམ་གྱི་ལོ་གསར་མཁོ་ཆས་གྲ་སྒྲིག་ཆ་ཚང་བྱས་ཡོད་མོད། འོན་ཀྱང་ངས་ད་དུང་ལོ་གསར་གོང་གི་མཁོ་ཆས་ཉོ་བའི་ཚོར་སྣང་དེ་མྱོང་ཚོར་བྱེད་འདོད་འདུག ལྟོ་བཟས་རྗེས་ངས་གཅེན་མོ་དང་གཅེན་པོ་ཁྲིད་ནས་ས་གནས་དེ་གའི་ལོ་གསར་གྱི་མཁོ་ཆས་ཁྲོམ་རར་ཕྱིན་པ་ཡིན། གཅེན་པོས་དགོང་མོའི་རྒྱ་ཁོག་རྒྱུ་ཆ་འདེམས་ཞོར་དུ“སྔོན་ཆད་ལོ་གསར་ལ་ཁྲོམ་རར་བྱེ་རིལ་དང་ཀོའོ་ཙེ་ཙམ་ལས་མེད། ད་ལྟ་ཉོ་འདོད་པ་ཐམས་ཅད་འདུག ལོ་གསར་གྱི་མཁོ་ཆས་ཉོས་ན་སྲིད་གཞུང་གི་ཁ་གསབ་བྱེད་སྒོར་ཞུགས་ཆོག་གི་འདུག་པས་དངོས་གནས་ཡག་པོ་འདུག”ཅེས་སེམས་འགུལ་ཟབ་མོ་ཐེབས་བཞིན་དུ་བཤད།

ས་རུབ་ལ་ཁད་དུ་ང་ཚོས་ལག་ཏུ་དངོས་ཟོག་འཁྱེར་ནས་མི་ཚོགས་ཀྱིས་ཁེངས་པའི་ཁྲོམ་ར་ནས་ལོག་པ་ཡིན། ལོ་གསར་པ་དེར་ངས་རང་ཡུལ་ནས་ལོ་གསར་གྱི་ཉམས་འགྱུར་ཚོར་བྱུང་ལ་ཆབ་མདོའི་འཕེལ་རྒྱས་ཀྱི་རྣམ་པ་གསར་པའང་མཐོང་བྱུང་། དེ་ནི་བརྗེད་པར་དཀའ་བའི་རང་ཡུལ་དུ་ལོག་པའི་ཡུལ་སྐོར་ཞིག་ཡིན་ལ་རེ་བས་ཁེངས་པའི་མགོ་བརྩམས་ཞིག་ཀྱང་ཡིན།