མང་ཚོགས་ལ་ཏན་ཏན་ཏིག་ཏིག་གི་བདེ་སྐྱིད་བསྐྲུན་པ།
རང་ལྗོངས་ཀྱིས་དམངས་འཚོའི་བྱ་གཞག་ལ་རྒྱུན་མཐུད་སྐུལ་འདེད་བཏང་བས་འཕེལ་རྒྱས་གསར་པ་བྱུང་བ།
2024ལོའི་ཟླ་12ཚེས་5དང་6ཉིན། རང་སྐྱོང་ལྗོངས་མི་སྤྱི་ཐིང་གིས་ཧྲང་ཧའེ་རུ་བཅའ་སྡོད་རང་སྐྱོང་ལྗོངས་མི་དམངས་སྲིད་གཞུང་གཞུང་དོན་ཁང་དང་ཧྲང་ཧའེ་གྲོང་ཁྱེར་ཞུས་ཧུའེ་ཆུས་ཞེ་ཐུའུ་ཁྲོམ་གཞུང་གཞུང་དོན་ཁང་དང་མཉམ་དུ་གཙོ་གཉེར་བྱས་པའི“ལས་རིགས་ཀྱིས་འབྱུང་འགྱུར་ལ་ཁྲིད་སྟོན་བྱེད——2024ལོའི་གྲོང་ཁྱེར་ཆེ་འབྲིང་གིས་མཐོ་སློབ་སློབ་ཐོན་སློབ་མ་མཉམ་འབྲེལ་ལས་བསྡུའི་ལས་ཞུགས་ཞབས་ཞུའི་བྱེད་སྒོའི”ཧྲང་ཧའེ་ས་ཚིགས་ཀྱི་ཆེད་དོན་ཚོགས་འདུར་ལོ་འདི་གའི་སློབ་ཐོན་སློབ་མ་པད་མ་དབྱངས་ལགས་ཀྱིས་རང་འགུལ་ཅན་གྱི་ཆེད་ལས་རྒྱབ་ལྗོངས་ལ་བརྟེན་ནས་ནུས་རྒྱུ་གསར་པའི་ཁེ་ལས་ཤིག་ནང་ལེགས་གྲུབ་ལྡན་པའི་ངང་ཚུད་པ་རེད།
“རང་སྐྱོང་ལྗོངས་ཀྱིས་བོད་ཀྱི་གཞོན་ནུའི་ལས་ཞུགས་ལ་གོ་སྐབས་མང་པོ་བསྐྲུན་པས། འབྱུང་འགྱུར་གྱི་འཕེལ་རྒྱས་ལ་ངའི་གདེང་ཚོད་ཆེ་རུ་ཕྱིན་སོང”ཞེེས་པད་མ་དབྱང་ལགས་ཀྱིས་དགའ་སྤྲོའི་ངང་བཤད།
ཏང་གི་སྐབས་ཉི་ཤུ་པའི་ཀྲུང་ཨུ་ཚང་འཛོམས་གྲོས་ཚོགས་ཐེངས་གསུམ་པའི་ཐོག་བླང་བྱ་བཏོན་དོན། འཕེལ་རྒྱས་ཁྲོད་དམངས་འཚོ་འགན་སྲུང་དང་ལེགས་བཅོས་བྱེད་པ་ནི་ཀྲུང་གོའི་ལུགས་ཀྱི་དེང་རབས་ཅན་གྱི་ལས་འགན་གལ་ཆེན་ཞིག་རེད། ངེས་པར་དུ་གང་ཐུབ་ཅི་ཐུབ་དང་ནུས་པས་ལྕོགས་ཚོད་ཀྱི་ལས་སྒྲུབ་མཐའ་འཁྱོངས་བྱས་ཏེ་གཞི་རྩའི་སྤྱི་པའི་ཞབས་ཞུའི་ལམ་ལུགས་མ་ལག་འཐུས་སྒོ་ཚང་དུ་གཏོང་བ་དང་། ཀུན་ཕན་རང་བཞིན་དང་། རྨང་གཞིའི་རང་བཞིན། ཐ་སྐྱོང་རང་བཞིན་བཅས་ཀྱི་དམངས་འཚོ་འཛུགས་སྐྱོང་བྱེད་ཤུགས་ཆེ་རུ་གཏོང་བ། མི་དམངས་ཀྱིས་དོ་སྣང་ཆེ་ཤོས་བྱེད་པ་དང་། མང་ཚོགས་དང་ཐད་ཀར་འབྲེལ་བ་ཆེ་ཤོས་ཡོད་པ། མང་ཚོགས་ལ་འཕྲལ་མཁོ་ཆེ་ཤོས་ཡིན་པ་བཅས་ཀྱི་ཁེ་ཕན་གྱི་གནད་དོན་ཐག་གཅོད་ཡག་པོ་བྱས་ཏེ་མཛེས་སྡུག་ལྡན་པའི་འཚོ་བར་བཅངས་པའི་མི་དམངས་ཀྱི་རེ་འདོད་རྒྱུན་ཆད་མེད་པར་སྐོང་དགོས།
2024ལོར་ལྗོངས་མི་སྤྱི་ཐིང་གིས་ལས་གནས་འགན་སྲུང་ལ་མུ་མཐུད་དམ་འཛིན་ནན་པོ་བྱས་ཏེ་འགན་འཁྲིའི་གསལ་ཐོ་8བཟོས་པ་དང་། ལས་འགན་ཁག་30ཞིབ་ཚགས་སུ་བཏང་བ། ཕྱོགས་ཁག་གི་འགན་འཁྲི་ནན་དུ་བཏང་བ་བཅས་བྱས་ནས་སྔ་རྗེས་སུ་ལས་གནས་སྣ་ཚོགས་ཁྲི་7.56གསར་སྤེལ་བྱས་པ་རེད། ལྗོངས་ཕྱིའི་ལས་ཞུགས་ལ་དམ་འཛིན་ནན་པོ་བྱས་ཏེ་ལྗོངས་ཕྱིའི་ལས་ཞུགས་ལས་གནས་ཁྲི་2ལྷག་ཙམ་དང་སྦྲེལ་མཐུད་དང་དོན་འཁྱོལ་བྱས་ནས“ཚོགས་སྒྲིག་རྣམ་པའི”ལས་ཞུགས་རྟེན་གཞི་40བསྐྲུན་ཡོད། དེ་དང་ཆབས་ཅིག་ལས་གཏོད་སྣེ་ཁྲིད་ལ་དམ་འཛིན་ནན་པོ་བྱས་ཏེ“བརྒྱུད་རིམ་ཧྲིལ་པོའི”ལས་གཏོད་ཞབས་ཞུ་སྤུས་ལེགས་བྱས་ནས་ལས་གཏོད་ལ་སྐུལ་ལྕག་དང་རྒྱབ་སྐྱོར་གང་ཐུབ་བྱས་ཐོག་རང་སྐྱོང་ལྗོངས་རིམ་པའི་ལས་གཏོད་གསོ་སྐྱོང་རྟེན་གཞི་13བསྐྲུན་པ་དང་། ཁེ་ལས་800བཅའ་སྡོད་བྱས་པ། མི་2000ལྷག་ཙམ་ལས་ཞུགས་ཐུབ་པར་སྐུལ་ཁྲིད་བྱས་ཡོད།
2024ལོ་ནས་བཟུང་། རང་ལྗོངས་ཀྱི་མཐོ་སློབ་སློབ་ཐོན་སློབ་མ་ལས་ཞུགས་བྱེད་ཚད་95%ཡན་ཟིན་པ་དང་གྲོང་ཁྱེར་དང་གྲོང་རྡལ་དུ་མི་ཁྲི་5.1གསར་དུ་ལས་ཞུགས་ཐུབ་ནས་ལོ་འཁོར་མོའི་ལས་འགན་གྱི་102%ལེགས་གྲུབ་བྱུང་བ་དང་། ཞིང་འབྲོག་པ་ཁྲི་64.79ལས་ཞུགས་གཞན་སྒྱུར་བྱས་ནས་རང་ལྗོངས་ཀྱི་ལས་ཞུགས་གནས་བབ་སྤྱི་ཡོངས་ནས་བརྟན་པོ་རྒྱུན་འཁྱོངས་ཐུབ་ཡོད།
ཉེ་བའི་ལོ་ཤས་རིང་། ལྗོངས་སྡོད་ཁང་འཛུགས་སྐྲུན་ཐིང་གིས་གྲོང་ཁྱེར་ལས་དོན་སྐོར་གྱི་སྤྱི་ཁྱབ་ཧྲུའུ་ཅི་ཞི་ཅིན་ཕིང་གི་རྣམ་བཤད་གལ་ཆེན་ལག་བསྟར་དོན་འཁྱོལ་གཏིང་ཟབ་བྱས་ཏེ“མི་དམངས་ཀྱི་གྲོང་ཁྱེར་དེ་མི་དམངས་ཀྱིས་འཛུགས་སྐྲུན་དང་མི་དམངས་ཀྱི་གྲོང་ཁྱེར་གྱིས་མི་དམངས་ཆེད་དུ་ལས་དོན་སྒྲུབ་པའི”འདུ་ཤེས་བརྟན་པོ་བཙུགས་ནས། སྡེ་ཁུལ་རྙིང་པ་ཆུང་གྲས་སྒྱུར་བཀོད་ཀྱི་ལས་དོན་ལ་ནུས་ལྡན་དང་གོ་རིམ་ལྡན་པའི་ངང་སྐུལ་འདེད་བཏང་ཡོད།
2024ལོར་གྲོང་ཁྱེར་དང་གྲོང་རྡལ་གྱི་སྡེ་ཁུལ་རྙིང་པ་ཆུང་གྲས་སྒྱུར་བཀོད་བྱ་རྒྱུའི་དེ་སྔའི་འཆར་གཞིའི་ནང་ཁུལ་ཆུང་38དང་དུད་ཚང་12108ཡོད་པའི་རྨང་གཞིའི་ཐོག་ལྗོངས་སྡོད་ཁང་འཛུགས་སྐྲུན་ཐིང་གིས་རང་འགུལ་ངང་སྡོད་ཁང་འཛུགས་སྐྲུན་པུའུ་དང་འབྲེལ་མཐུད་ཧུར་ཐག་བྱས་ཏེ། ཁུལ་ཆུང་150(ལྷ་ས་གྲོང་ཁྱེར་གྱི་གྲོང་ཁུལ་རྙིང་པ་སྒྱུར་བཀོད་ཀྱི་ཁུལ་ཆུང་115ཚུད་ཡོད)དང་དུད་ཚང་36218ཁ་གསབ་ལེགས་གྲུབ་བྱས་པ་དང་། 2024ལོའི་སྒྱུར་བཀོད་ཀྱི་སྤྱིའི་འཆར་གཞིའི་ནང་ཁུལ་ཆུང་188དང་དུད་ཚང་48326ཟིན་ཡོད། 2024ལོའི་ཟླ་བ་10པའི་ཟླ་མཇུག་བར། ལྗོངས་ཡོངས་ཀྱི་གྲོང་ཁྱེར་དང་གྲོང་རྡལ་གྱི་སྡེ་ཁུལ་རྙིང་པ་ཆུང་གྲས་78སྒྱུར་བཀོད་བྱེད་འགོ་ཚུགས་ནས་མ་དངུལ་སྒོར་དུང་ཕྱུར་1.8བཏང་བ་རེད།
2023ལོར་རང་སྐྱོང་ལྗོངས་མི་དམངས་སྲིད་གཞུང་གིས《བོད་རང་སྐྱོང་ལྗོངས་ཀྱི་གྲོང་ཁྱེར་དང་གྲོང་གསེབ་ཀྱི་གྲོང་མིའི་གཞི་རྩའི་སྨན་བཅོས་འགན་བཅོལ་གྱི་རང་སྐྱོང་ལྗོངས་རིམ་པའི་སྤྱི་འདོམས་ལག་བསྟར་བསམ་འཆར(ཚོད་ལྟའི་ལག་བསྟར)》བཏོན་ནས་གྲོང་ཁྱེར་དང་གྲོང་རྡལ་གྱི་ལས་བཟོ་དང་གྲོང་ཁྱེར་དང་གྲོང་གསེབ་ཀྱི་གྲོང་མིའི་གཞི་རྩའི་སྨན་བཅོས་འགན་བཅོལ་གྱི་ཞིང་ཆེན་རིམ་པའི་སྤྱི་འདོམས་སྔོན་ལ་མངོན་འགྱུར་བྱས་ཏེ་སྨན་བཅོས་འགན་བཅོལ་སྲིད་ཇུས་ཀྱི་ཁྱབ་ཁོངས་ནང་སྨན་ཁང་དུ་བསྡད་ནས་རྩིས་ཞུ་བྱེད་པའི་བསྡུར་ཚད་བརྒྱ་ཆའི་གྲངས་2མཐོ་རུ་བཏང་བ་དང་། ལས་བཟོའི་སྨན་བཅོས་འགན་བཅོལ་གྱི་སྒོ་བསྟེན་སྨན་རིན་མཉམ་འདོན་གྱི་འགན་སྲུང་ལམ་སྲོལ་དང་མི་སྒེར་གྱི་ཐོ་ཁོངས་ཁྱིམ་ཚང་མཉམ་སྤྱོད་ཀྱི་ལམ་ལུགས་བཏོན་ནས་སྨན་བཅོས་འགྲོ་གྲོན་གྱི་ཁུར་པོ་ཡང་དུ་བཏང་བ། དམིགས་བསལ་དཀའ་ངལ་ཡོད་པའི་ཚོགས་སྤྱིར་ནད་ཚབས་ཆེ་བའི་འགན་བཅོལ་གྱི་གཟིགས་སྐྱོང་འགན་སྲུང་སྲིད་ཇུས་ལག་བསྟར་བྱས་ཏེ་འགོ་སྤྲོད་ཚད་གཞི་50%དམའ་རུ་བཏང་བ་དང་རྩིས་ཞུའི་བསྡུར་ཚད་5%མཐོ་རུ་བཏང་བ་བཅས་རེད།
དེ་དང་ཆབས་ཅིག རྒན་ཡོལ་ཞུས་པའི་མི་སྣ་དང་ལས་ཐོག་གི་མི་སྣའི་སྒོ་བསྟེན་སྨན་ཁང་གི་སྤྱི་འདོམས་འགོ་སྤྲོད་ཚད་གཞི་སྒོར་140དང་སྒོར་200བར་སོ་སོར་དམའ་རུ་དང་ལོ་འཁོར་གྱི་རྩིས་ཞུའི་བཅད་གྲངས་སྒོར་5000བར་མཐོ་རུ་བཏང་བ་དང་། གྲོང་ཁྱེར་དང་གྲོང་གསེབ་ཀྱི་གྲོང་མིའི་སྤྱིར་བཏང་སྒོ་བསྟེན་སྨན་ཁང་གི་འགོ་སྤྲོད་ཚད་གཞི་ལོ་འཁོར་གྱི་རིམ་རྩིས་སྒོར་50དང་རྩིས་ཞུའི་བསྡུར་ཚད་60%བར་དམའ་རུ་བཏང་བ། སྒོ་བསྟེན་སྨན་ཁང་གི་དམིགས་བསལ་ནད་རིགས་ནང་ནད་རིགས་ཆེན་པོ་36དང་ནད་རིགས་51ཚུད་ཡོད་པ་དང་རྩིས་ཞུའི་བསྡུར་ཚད་90%ཟིན་པ། གྲོང་ཁྱེར་དང་གྲོང་གསེབ་ཀྱི་གྲོང་མིའི་ནད་ཆེན་འགན་བཅོལ་སྐྱིན་ཚབ་འཇལ་བའི་ཚད་གཞི་མི་རེར་ལོ་རེར་སྒོར་ཁྲི་14ཡིན་པ་དང་སྤྱིར་བཏང་གི་སྨན་བཅོས་རོགས་སྐྱོབ་དང་ནད་རིགས་ཚབས་ཆེན་གྱི་སྨན་བཅོས་རོགས་སྐྱོབ་ལོ་འཁོར་གྱི་བཅད་གྲངས་མཐོ་ཤོས་སྒོར་ཁྲི་15དང་ཁྲི་30སོ་སོར་ཟིན་པ་བཅས་རེད།
ལས་ཞུགས་སྔོན་ལ་འཇོག་རྒྱུ་མཐའ་འཁྱོངས་བྱས་ནས་ལས་ཞུགས་འགན་སྲུང་དྲ་བ་དམ་དུ་བཏང་བ་དང་། འགན་སྲུང་རང་བཞིན་གྱི་བདེ་སྡོད་ལས་གྲྭར་སྐུལ་འདེད་ཤུགས་ཆེན་བཏང་ནས་མི་སེར་ལ་སྐྱིད་སྣང་དོད་པའི་ཁྱིམ་གཞིས་བསྐྲུན་པ། སྨན་བཅོས་འགན་བཅོལ་ལམ་ལུགས་འཐུས་སྒོ་ཚང་དུ་བཏང་ནས་སྨན་བཅོས་ཀྱི་ཁུར་པོ་ཡང་དུ་བཏང་བ་ལ་སོགས་དམངས་འཚོའི་བྱེད་ཐབས་རབ་དང་རིམ་པ་བཏོན་ནས་མི་དམངས་མང་ཚོགས་ཀྱི་ཐོབ་སྣང་རྒྱུན་ཆད་མེད་པར་ཆེ་རུ་དང་། སྐྱིད་སྣང་ཏན་ཏིག་འཕེལ་བ། བདེ་འཇགས་ཚོར་སྣང་བརྟན་དུ་སོང་བ་བཅས་རེད།