རང་བྱུང་སྐྱེ་ཁམས་བདེ་འཇགས་ལ་སྲུང་སྐྱོང་བྱེད་པ།
རང་རྒྱལ་གྱིས་འདབ་ཆགས་སོགས་རི་སྐྱེས་སྲོག་ཆགས་དང་རྩི་ཤིང་ལ་སྲུང་སྐྱོང་བྱེད་ཤུགས་ཆེ་རུ་གཏོང་རྒྱུའི་བཀོད་སྒྲིག་བྱས་པ།
གསར་འགོད་པས་རྒྱལ་ཁབ་ནགས་ཚལ་རྩྭ་ཐང་ཅུས་ཀྱིས་སྒྲིག་འཛུགས་བྱས་ནས་འཚོགས་པའི་རི་སྐྱེས་སྲོག་ཆགས་དང་རྩི་ཤིང་ཁྲིམས་དང་མ་མཐུན་པར་ཉོ་ཚོང་བྱེད་པར་རྡུང་རྡེག་གཏོང་བའི་པུའུ་དབར་གྱི་མཉམ་འབྲེལ་ཚོགས་འདུའི་ཚང་འཛོམས་གྲོས་ཚོགས་ཐེངས་ལྔ་པའི་ཐོག་ནས་ཤེས་རྟོགས་བྱས་པར། རང་རྒྱལ་གྱིས་ཉེ་དུས་“གཙང་སེལ་བྱ་སྤྱོད2025”དང“རི་སྐྱེས་སྲོག་ཆགས་དང་རྩི་ཤིང་སྲུང་སྐྱོང་ཆེད་དོན་བྱ་སྤྱོད”ལ་སྐུལ་འདེད་རྒྱུན་མཐུད་གཏོང་རྒྱུ་དང་འབྲེལ། དཔྱིད་དུས་འདབ་ཆགས་སྲུང་སྐྱོང་གི་ཆེད་དོན་བྱ་སྤྱོད་སྒྲིག་འཛུགས་བྱས་ནས་སྤེལ་ཏེ། རི་སྐྱེས་སྲོག་ཆགས་དང་རྩི་ཤིང་གི་ཐོན་ཁུངས་ལ་གཏོར་བཤིག་གཏོང་བའི་ཁྲིམས་འགལ་ཉེས་གསོག་བྱེད་སྤྱོད་ལ་རྡུང་རྡེག་ཚ་ནན་བཏང་ནས་རང་བྱུང་སྐྱེ་ཁམས་བདེ་འཇགས་ལ་ནུས་ཤུགས་ཡོད་རྒུས་སྲུང་སྐྱོང་བྱ་རྒྱུ་རེད།
ཉེ་བའི་ལོ་ཤས་རིང་། རང་རྒྱལ་གྱིས་རི་སྐྱེས་སྲོག་ཆགས་དང་རྩི་ཤིང་སྲུང་སྐྱོང་བྱེད་ཤུགས་ཆེ་རུ་རྒྱུན་མཐུད་བཏང་ནས་2024ལོར་རྒྱལ་ཡོངས་ཀྱི་དགུན་སྒྲོལ་ཆུ་བྱར་ལྟ་ཞིབ་ཚད་ལེན་བྱས་པའི་གྲངས་འབོར་མང་ཤོས་སུ་སླེབས་ནས་རི་སྐྱེས་སྲོག་ཆགས་དང་རྩི་ཤིང་དང་ཕྱི་རོལ་ཁྱུ་ཚོགས་ལ་གཙོ་གནད་སྲུང་སྐྱོང་བྱེད་ཚད་སྤྱི་ཡོངས་ནས་བརྟན་ཁྲོད་ཡར་འཕེལ་གྱི་རྣམ་པ་བཟང་པོ་མངོན་ཡོད། འོན་ཀྱང་རང་རྒྱལ་དུ་རི་སྐྱེས་སྲོག་ཆགས་དང་རྩི་ཤིང་གི་རིགས་མང་བ་དང་། འགུལ་སྐྱོད་དང་ཁྱབ་རྒྱ་ཆེ་བས། ས་ཆ་ཉུང་ཤས་སུ་འདབ་ཆགས་སོགས་རི་སྐྱེས་སྲོག་ཆགས་གང་བྱུང་དུ་བཟུང་བ་དང་རྔོན་པ་རྒྱག་པ། གང་བྱུང་དུ་ཟ་བ་བཅས་ཀྱི་སྣང་ཚུལ་སྔར་བཞིན་ཐོན་ནས་འདབ་ཆགས་སོགས་རི་སྐྱེས་ཁྱུ་ཚོགས་ཀྱི་བདེ་འཇགས་ལ་འཇིགས་སྐུལ་ཕོག་གི་ཡོད།
རྒྱལ་ཁབ་ནགས་ཚལ་རྩྭ་ཐང་ཅུས་ཀྱི་འབྲེལ་ཡོད་འགན་འཁུར་བས། གོམ་སྟབས་རྗེས་མར་གཙོ་གནད་ལྷུ་ཚིགས་ལ་དམིགས་ཏེ་ཆེད་དོན་བྱ་སྤྱོད་སྤེལ་ནས་ཁྲིམས་དང་མ་མཐུན་པར་རྔོན་རྒྱག་དང་། ཁྲིམས་དང་མ་མཐུན་པར་འདབ་ཆགས་ཉོ་ཚོང་། སྤྱོད་མི་ཆོག་པའི་རྔོན་རྒྱག་ཡོ་ཆས་ཕྱིར་ཚོང་སོགས་གཙོ་གནད་རྡུང་རྡེག་བྱ་ཡུལ་དུ་བརྩི་རྒྱུ་ཁ་གསལ་བཏོན་པ་དང་། འདབ་ཆགས་གཅིག་སྡུད་ཁྱབ་ཁུལ་དང་ཁྲིམས་དང་མ་མཐུན་པའི་གྱོད་གཞི་ཐོན་མང་བའི་ཞིང་ཆེན་ལ་ཁག་དབྱེ་འགན་གཙང་སྤྲད་ནས་ས་གནས་ཁག་ལ་སྲུང་སྐྱོང་བྱེད་ཤུགས་ཆེ་རུ་གཏོང་རྒྱུའི་ལྟ་སྐུལ་མཛུབ་ཁྲིད་བྱ་རྒྱུ། འདབ་ཆགས་ལ་གནོད་འཚེ་མི་བཟོ་བ་དང་གྱོང་གུན་སྔོན་འགོག་ནུས་ལྡན་བྱེད་ཐུབ་པའི་འགོག་སྲུང་དྲ་བའི་ཚད་གཞི་མགྱོགས་མྱུར་ཞིབ་འཇུག་བྱས་ནས་བཟོས་ཏེ། འདབ་ཆགས་སྲུང་སྐྱོང་དང་གྱོང་གུན་སྔོན་འགོག་སོགས་ཀྱི་བླང་བྱའི་སྤྱི་ཡོངས་ལ་ལྟ་རྟོག་བྱ་རྒྱུ། ཕྱོགས་ཁག་གི་འགན་འཁྲི་ནན་ཏུ་བཏང་ནས་འདབ་ཆགས་སོགས་རི་སྐྱེས་སྲོག་ཆགས་དང་རྩི་ཤིང་ལ་སྲུང་སྐྱོང་བྱེད་རྒྱུ་དེ་ས་གནས་ཁག་གི་ནགས་དཔོན་ལམ་ལུགས་ཀྱི་དཔྱད་ཞིབ་ནང་དོན་དུ་འཇུག་རྒྱུ་ཡིན་ཞེས་བཤད་པ་རེད།