དཔྱིད་གསར་འགོ་ཚུགས་པའི་སྐབས་སུ“ཞིང་གསུམ”ལས་དོན་བཀོད་སྒྲིག་ཡག་པོ་བྱེད་པ་དེ་ལོ་ཧྲིལ་པོ་དང་འབྲེལ་བ་ཡོད་པ་དང་སྤྱི་ཡོངས་དང་འབྲེལ་བ་ཡོད།

ཀྲུང་གུང་ཀྲུང་དབྱང་དང་རྒྱལ་སྲིད་སྤྱི་ཁྱབ་ཁང་གིས《གྲོང་གསེབ་སྒྱུར་བཅོས་སྔར་བས་ཟབ་ཏུ་བཏང་སྟེ་གྲོང་གསེབ་ཕྱོགས་ཡོངས་ནས་དར་རྒྱས་ཡོང་བར་སྐུལ་འདེད་ཏན་ཏིག་གཏོང་རྒྱུའི་སྐོར་གྱི་བསམ་འཆར》ཡོངས་བསྒྲགས་ངང་ཁྱབ་བསྒྲགས་བྱས་ཡོད། འདི་ནི་ཏང་གི་ཚོགས་ཆེན་བཅོ་བརྒྱད་པ་འཚོགས་ཚུན་ཀྲུང་དབྱང་གིས་བསྟུད་མར་ཁྱབ་བསྒྲགས་བྱས་པའི“ཞིང་གསུམ”ལས་དོན་ལ་མཛུབ་ཁྲིད་བྱེད་པའི“ཡིག་ཆ་ཨང་དང་པོ”དེ་ཡིན་ཞིང་། དེ་ཐོག་ནས་བློ་མཐུན་ཞི་ཅིན་ཕིང་གིས་སྲོག་ཤིང་གནང་བའི་ཏང་ཀྲུང་དབྱང་གིས“ཞིང་གསུམ”ལས་དོན་ལ་ཐོག་མཐའ་བར་གསུམ་དུ་མཐོང་ཆེན་བྱེད་པ་དང་ཞིང་རྒྱས་ཞིང་སྐྱོང་ཞིང་ཕྱུག་གསུམ་གྱི་སྲིད་ཇུས་འདོན་ཤུགས་མུ་མཐུད་ཆེ་རུ་གཏོང་ལུགས་མཚོན་ཡོད། “ཞིང་གསུམ”ལས་དོན་ལ་དམ་འཛིན་ཡག་པོ་བྱེད་པ་དེ་ཀྲུང་གོའི་ལུགས་ཀྱི་དེང་རབས་ཅན་འཛུགས་སྐྲུན་བྱེད་པའི་ངོས་ནས་བརྗོད་ན་དོན་སྙིང་གལ་ཆེན་ལྡན་ཡོད། མིག་སྔར། ས་ཁུལ་ཁག་དང་སྡེ་ཚན་ཁག་གིས་ཀྲུང་དབྱང་གི་ཡིག་ཆ་ཨང་དང་པོ་ལག་བསྟར་དོན་འཁྱོལ་ལ་དམ་འཛིན་ཡག་པོ་བྱས་ཏེ། བྱ་ཐབས་ནུས་ལྡན་སྤྱད་ནས་ཞིང་ལས་སྟོབས་ཆེར་གཏོང་བ་དང་རྨང་གཞི་བརྟན་དུ་གཏོང་བཞིན་ཡོད།

ཞིང་ལས་སྟོབས་ཆེར་གཏོང་བ་དང་རྨང་གཞི་བརྟན་དུ་གཏོང་བར་མིག་སྔར་ཐོབ་པའི་གྲུབ་འབྲས་སྲ་བརྟན་དུ་གཏོང་དགོས། ཞིང་ལས་ཀྱིས་རྒྱལ་ཁབ་བརྟན་ལྷིང་དང་འབྲུ་རིགས་ཀྱིས་གནམ་འོག་བདེ་འཇགས་ཡོང་ཞིང་། “ཞིང་གསུམ”ལས་དོན་ནི“གྲུ་རྡོ”ཞིག་རེད། 2024ལོར་རང་རྒྱལ་གྱི་འབྲུ་རིགས་ཐོན་སྐྱེད་སྐས་རིམ་གསར་པར་སླེབས་ནས་ཐོན་ཚད་བསྡོམས་འབོར་ལོ་རྒྱུས་རང་བཞིན་གྱི་སྒོ་ནས་རྒྱ་མ་དུང་ཕྱུར་ཁྲི་1.4ལས་ཐོག་མར་བརྒལ་ཏེ། གྲོང་གསེབ་ཀྱི་གྲོང་མི་མི་རེའི་ཆ་སྙོམས་བཀོལ་སྤྱོད་ཆོག་པའི་ཡོང་འབབ་སྒོར་23119ཟིན་པ་དེ་ལོ་གོང་མ་ལས་6.3%དངོས་སུ་འཕར་ནས་གནས་འཕྲོད་ལས་འཚམ་མཛེས་མཐུན་གསུམ་ལྡན་གྱི་གྲོང་གསེབ་འཛུགས་སྐྲུན་བྱེད་པར་དགེ་མཚན་ལྡན་པའི་འཕེལ་རྒྱས་བྱུང་བ་དང་གྲོང་གསེབ་ཕྱོགས་ཡོངས་ནས་དར་རྒྱས་ཡོང་བར་སྐྱེ་སྟོབས་ཀྱི་དཔལ་འབར་བའི་རྣམ་པ་མངོན་ཡོད། རྒྱལ་ཁབ་ཕྱི་ནང་གི་དུས་བབ་རྙོག་འཛིང་ཆེ་ཞིང་ཛ་དྲག་པའི་གནས་ཚུལ་འོག“ཞིང་གསུམ”ལས་དོན་ལ་ཐོབ་དཀའ་བའི་གྲུབ་འབྲས་ཐོབ་ནས། དཔལ་འབྱོར་དང་སྤྱི་ཚོགས་སྤུས་ཚད་མཐོ་བའི་འཕེལ་རྒྱས་ལ་སྐུལ་འདེད་གཏོང་ཆེད་ལེགས་སྐྱེས་གལ་ཆེན་ཕུལ་བ་དང་། འགག་སྒྲོལ་དཀའ་སེལ་དང་འབད་འབུངས་མདུན་སྐྱོད་བྱེད་པར་ང་ཚོར་གདེང་ཚོད་ཆེ་རུ་ཕྱིན་པ་དང་རང་འགུལ་ཐོབ་ཡོད།

ཞིང་ལས་སྟོབས་ཆེར་གཏོང་བ་དང་རྨང་གཞི་བརྟན་དུ་གཏོང་བར་དུས་བབ་ལ་སྟངས་འཛིན་ཡག་པོ་བྱེད་དགོས། འདི་ལོ་ནི“ལོ་ལྔ་ཚན་བཅུ་བཞི་པའི”འཆར་འགོད་མཇུག་བསྡུའི་ལོ་ཡིན་ལ། ཕྱོགས་ཡོངས་ནས་སྒྱུར་བཅོས་སྔར་བས་ཟབ་ཏུ་གཏོང་བའི་ལོ་གལ་ཆེན་ཞིག་ཀྱང་རེད། མིག་སྔར། རང་རྒྱལ་གྱི་འཕེལ་རྒྱས་ལ་ངེས་གཏན་མེད་པ་དང་སྔོན་དཔག་བྱེད་དཀའ་བའི་རྒྱུ་རྐྱེན་མང་པོ་འཕྲད་ཡོད། ཉེན་ཁ་དང་འགྲན་སློང་ལ་ཁ་གཏད་ཇི་ཙམ་གཅོག་དགོས་ན། “ཞིང་གསུམ་”ལས་དོན་གྱི་རྨང་གཞི་དེ་ཙམ་གྱིས་བརྟན་དུ་གཏོང་དགོས། སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས“ཞིང་ལས་དང་གྲོང་གསེབ་དེང་རབས་ཅན་ལ་མགྱོགས་མྱུར་འགྱུར་བར་བྱས་ཏེ། ཞིང་ལས་རྨང་གཞི་དེ་བས་བརྟན་པོ་དང་། གྲོང་གསེབ་ས་ཁུལ་དེ་བས་དར་རྒྱས། ཞིང་པའི་འཚོ་བ་དེ་བས་སྐྱིད་པ་བཅས་ཡོང་བར་སྐུལ་འདེད་གཏོང་དགོས་པའི”ནན་བཤད་གནང་ཡོད། “ཞིང་གསུམ”གྱི་གནད་དོན་ཐག་གཅོད་ཡག་པོ་བྱེད་པ་དེ་ཏང་ཡོངས་ཀྱི་ལས་ཀའི་གལ་ཆེའི་ནང་གི་འགངས་ཆེར་བརྩི་རྒྱུ་མཐའ་འཁྱོངས་བྱས་ནས། ཀྲུང་དབྱང་གི་ཡིག་ཆ་ཨང་དང་པོའི་ནང་ཁ་གསལ་བསྟན་པའི“རྒྱུན་མཐུད་གཉིས་དང་འབད་བརྩོན་བཞིའི”ལས་ཀའི་ལས་འགན་ལེགས་སྒྲུབ་མཐའ་གཅིག་ཏུ་བྱས་ཏེ། ཐབས་བརྒྱ་ཇུས་སྟོང་གིས་ཞིང་ལས་ཀྱི་ཕན་འབྲས་ཆེ་རུ་གཏོང་བ་དང་། གྲོང་གསེབ་ཀྱི་གསོན་ཤུགས་འཕེལ་བ། ཞིང་པའི་ཡོང་འབབ་མང་དུ་གཏོང་བ་བཅས་ལ་སྐུལ་འདེད་བཏང་ཚེ། ཀྲུང་གོའི་ལུགས་ཀྱི་དེང་རབས་ཅན་ལ་སྐུལ་འདེད་གཏོང་ཆེད་རྨང་གཞིའི་འདེགས་སྐྱོར་བྱེད་ཐུབ་ངེས་རེད།

ཞིང་ལས་སྟོབས་ཆེར་གཏོང་བ་དང་རྨང་གཞི་བརྟན་དུ་གཏོང་བར་འབྲུ་རིགས་ཐོན་སྐྱེད་ལ་དམ་འཛིན་ཡག་པོ་བྱེད་དགོས། འབྲུ་རིགས་བདེ་འཇགས་ནི“རྒྱལ་ཁབ་ཀྱི་དོན་ཆེན”ཡིན་ཞིང་། འབྲུ་རིགས་ཐོན་སྐྱེད་ཀྱི་གྲངས་འབོར་འཕར་དཀའ་བ་དང་ཆག་སླ་བ་དང་། ཐོན་ཚད་མཐོ་རུ་འགྲོ་འགོར་བ་དང་དམའ་རུ་འགྲོ་མགྱོགས་པོ་ཡོད། འབྲུ་རིགས་ཐོན་ཚད་ལོ་རྒྱུས་རང་བཞིན་གྱི་སྐས་རིམ་གསར་པར་ཇི་ཙམ་སླེབས་རིམ་བཞིན། དེ་ཙམ་གྱིས་བདེ་སྡོད་ཉེན་བསམ་བྱེད་དགོས་པ་ལས་ལྷོད་གཡེང་གཏོང་མི་རུང་། ཀྲུང་དབྱང་གི་ཡིག་ཆ་ཨང་དང་པོའི་ནང“འབྲུ་རིགས་སོགས་ཞིང་ལས་ཐོན་རྫས་གལ་ཆེན་མཁོ་སྤྲོད་འགན་ལེན་བྱེད་ནུས་རྒྱུན་མཐུད་ཆེ་རུ་གཏོང་དགོས་པ”ཨང་དང་པོར་བཞག་ཡོད་པ་དེ་ཐོག་ནས་རྒྱལ་ཁབ་ཀྱི་འབྲུ་རིགས་བདེ་འཇགས་འགན་ལེན་བྱེད་པའི་འཐབ་ཇུས་ཀྱི་བསམ་གཞིག་མཚོན་གྱི་ཡོད། ཐོན་ཁུལ་གཙོ་བོ་ཡིན་ནའང་འདྲ། ཡང་ན་ཚོང་ཁུལ་གཙོ་བོ་དང་ཐོན་ཚོང་དོ་མཉམ་ཁུལ་ཡིན་ནའང་འདྲ། ཚང་མས་ཆབ་སྲིད་ཀྱི་ཕན་པ་དང་ཕུགས་ཀྱི་ཕན་པ་ཡག་པོ་རྟོགས་ཐུབ་པར་བྱས་ཏེ། འབྲུ་རིགས་བདེ་འཇགས་ཀྱི་ཏང་སྲིད་འགན་འཁྲི་མཉམ་འཁུར་གྱི་བླང་བྱ་དོན་འཁྱོལ་ནན་པོ་བྱེད་དགོས་པ་ལག་ལེན་གྱི་ཐོག་ནས་ང་ཚོར་ཁ་གསལ་བསྟན་ཡོད། འབྲུ་རིགས་དང་པད་ཁའི་སྐྱེ་དངོས་ཀྱི་གཞི་ཁྱོན་ཆེ་བའི་མུའུ་རེའི་ཐོན་ཚད་མཐོ་རུ་གཏོང་བའི་བྱ་སྤྱོད་ལ་སྐུལ་འདེད་གཏིང་ཟབ་གཏོང་བ་ནས་རྨོ་ཞིང་སྲུང་སྐྱོང་དང་སྤུས་ཚད་མཐོ་རུ་གཏོང་བར་ཤུགས་སྣོན་བརྒྱབ་ནས་ཞིང་ལས་ཚན་རྩལ་སྟོབས་ཤུགས་ཀྱིས་མཉམ་དུ་འགག་སྒྲོལ་བྱེད་པར་སྐུལ་འདེད་གཏོང་བའི་བར་དང་། སྣ་མང་ཅན་གྱི་བཟའ་བཅའ་མཁོ་སྤྲོད་མ་ལག་སྐྲུན་པ་ནས་འབྲུ་རིགས་དང་བཟའ་བཅའ་གྲོན་ཆུང་གི་ཕུགས་ཕན་ལམ་སྲོལ་འཐུས་སྒོ་ཚང་དུ་གཏོང་བའི་བར་རྒྱལ་ཁབ་ཀྱི་འབྲུ་རིགས་བདེ་འཇགས་ཀྱི་རྨང་གཞི་ཕྱོགས་ཡོངས་ནས་སྲ་བརྟན་དུ་གཏོང་བ་དང་། ཐོན་ཚད་དང་ཐོན་ནུས་དང་། ཐོན་སྐྱེད་དང་སྐྱེ་ཁམས། ཐོན་འཕར་དང་འབབ་འཕར་བཅས་ལ་མཉམ་དུ་དམ་འཛིན་བྱ་རྒྱུ་མཐའ་འཁྱོངས་བྱེད་པ། ཞིང་ལས་ཀྱི་ཕྱོགས་བསྡུས་ཕན་འབྲས་དང་འགྲན་རྩོད་བྱེད་ནུས་ཆེ་རུ་ཏན་ཏིག་གཏོང་བ་བཅས་བྱས་ཚེ། གཞི་ནས་ཀྲུང་གོའི་ལྟོ་ཕོར་ལག་ཏུ་བརྟན་པོ་འཛིན་ཐུབ་ངེས་ཡིན།

ཞིང་ལས་སྟོབས་ཆེར་གཏོང་བ་དང་རྨང་གཞི་བརྟན་དུ་གཏོང་བར་དབུལ་སྒྲོལ་འགག་སྒྲོལ་གྱི་གྲུབ་འབྲས་སྲ་བརྟན་དུ་གཏོང་དགོས། དབུལ་སྒྲོལ་འགག་སྒྲོལ་གྱི་གྲུབ་འབྲས་ལོ་རྒྱུས་དེབ་ཐེར་ནང་འཁོད་ངེས་ཡིན་ལ་ཐོབ་དཀའ་བ་ཞིག་ཡིན་པས། གྲུབ་འབྲས་རླབས་པོ་ཆེ་འདི་སྲ་བརྟན་དང་རྒྱ་སྐྱེད་ཡག་པོ་གཏོང་རྒྱུ་ནི་ལོ་རྒྱུས་དང་མི་དམངས་ལ་འགན་འཁུར་བའི་མཚོན་ཚུལ་ཞིག་ཡིན་ལ། གྲོང་གསེབ་ཕྱོགས་ཡོངས་ནས་དར་རྒྱས་ཡོང་བར་སྐུལ་འདེད་གཏོང་བའི་སྔོན་འགྲོའི་ཆ་རྐྱེན་དང་མཐའ་ཚད་ཀྱང་རེད། འདི་ལོ་ནི་ལོ་ལྔའི་བར་བརྒལ་དུས་སྐབས་ཀྱི་ལོ་མཇུག་ཤོས་དེ་ཡིན་པས། ངེས་པར་དུ་འགོ་མཇུག་གཟབ་འཁྱོངས་ཀྱིས་འགན་འཁྲི་བརྟན་པོ་འཁུར་བ་དང་། དབུལ་ལོག་དང་དབུལ་ཕོངས་མི་ཐོན་པའི་ལྟ་ཞིབ་ཚད་ལེན་དང་རོགས་སྐྱོར་ལས་དོན་ཞིབ་ཚགས་ངང་ལེགས་པར་སྒྲུབ་པ། བར་བརྒལ་དུས་སྐབས་རྗེས་ཀྱི་རོགས་སྐྱོར་སྲིད་ཇུས་མ་ལག་འཐུས་སྒོ་ཚང་དུ་གཏོང་བ་བཅས་བྱས་ནས། བརྟན་ལ་གོ་རིམ་ལྡན་པའི་ངང་བར་བརྒལ་ཐུབ་པའི་འགན་ལེན་བྱེད་དགོས། མིག་སྔར་དབུལ་ལོག་དང་དབུལ་ཕོངས་ཐོན་པའི་ཉེན་ཁའི་རྒྱུ་རྐྱེན་སྔར་བཞིན་གནས་ཡོད་དེ། དཔེར་ན་རང་བྱུང་གནོད་འཚེ་དང་། ཞིང་ལས་ཐོན་རྫས་ཀྱི་ཁྲོམ་རའི་རིན་གོང་འཕར་ཆག ཁྱིམ་ཚང་རིམ་པའི་ཉེན་ཁ་སོགས། དབུལ་སྒྲོལ་ས་ཁུལ་ཉུང་ཤས་ཀྱི“གཞན་བརྟེན”ནས“རང་བརྟེན”བར་གྱི་ནུས་པ་ད་དུང་མི་འདང་བ་རིག་པ་དྭངས་གསལ་གྱི་སྒོ་ནས་མཐོང་བར་བྱེད་དགོས། ཀྲུང་དབྱང་གི་ཡིག་ཆ་ཨང་དང་པོའི་བཀོད་སྒྲིག་དོན་འཁྱོལ་བྱེད་སྐབས། ང་ཚོར་ངེས་པར་དུ་མཐའ་ཚད་ཀྱི་བསམ་གཞིག་ཆེ་རུ་བཏང་སྟེ། གཞི་ཁྱོན་རང་བཞིན་གྱི་དབུལ་ལོག་དང་དབུལ་ཕོངས་མི་ཐོན་པའི་མཐའ་ཚད་མཐའ་གཅིག་ཏུ་སྲུང་དགོས་པ་དང་། ཕྱོགས་མཚུངས་གནད་སྨིན་བསམ་གཞིག་བྱེད་ཤུགས་ཆེ་རུ་བཏང་ནས། གྲོང་གསེབ་ཀྱི་དབུལ་ལོག་དང་དབུལ་ཕོངས་མི་ཐོན་པའི་ལམ་སྲོལ་དང་ཡོང་འབབ་དམའ་བའི་མི་འབོར་དང་དར་རྒྱས་འགྲོ་འགོར་བའི་ས་ཁུལ་གྱི་རིམ་དབྱེ་དང་རིགས་དབྱེའི་རོགས་སྐྱོར་ལམ་ལུགས་འཛུགས་པར་སྤྱི་འདོམས་བྱས་ནས། རོགས་སྐྱོར་ལས་དོན་གྱི་དམིགས་སའི་རང་བཞིན་དང་གནད་སྨིན་རང་བཞིན་རྒྱུན་ཆད་མེད་པར་ཆེ་རུ་གཏོང་དགོས་པའི་བླང་བྱ་བཏོན་ཡོད།

ཞིང་ལས་སྟོབས་ཆེར་གཏོང་བ་དང་རྨང་གཞི་བརྟན་དུ་གཏོང་བར་གྲོང་གསེབ་ཕྱོགས་ཡོངས་ནས་དར་རྒྱས་ཡོང་བར་བྱེད་པའི་མཛེས་སྡུག་ལྡན་པའི་འཆར་གཞི་དེ་དོན་དངོས་སུ་འགྱུར་བར་བྱེད་དགོས། ཉིན་ཤས་གོང་བཀྲམ་པའི《གྲོང་གསེབ་ཕྱོགས་ཡོངས་ནས་དར་རྒྱས་གཏོང་བའི་འཆར་འགོད（2024ལོ་ནས་2027ལོ་བར）》ནང་2027ལོར་སླེབས་སྐབས་ངོ་བོའི་རང་བཞིན་གྱི་འཕེལ་རྒྱས་ཡོང་བར་བྱེད་པ་དང་། 2035ལོར་སླེབས་སྐབས་ཐག་གཅོད་རང་བཞིན་གྱི་འཕེལ་རྒྱས་ཡོང་བའི་དམིགས་ཚད་གསལ་སྟོན་བྱས་ཡོད། ཀྲུང་དབྱང་གི་ཡིག་ཆ་ཨང་དང་པོའི་ནང་རྫོང་ཁོངས་ཀྱི་དམངས་ཕྱུག་ཐོན་ལས་རྒྱ་སྟོབས་ཆེ་རུ་གཏོང་བ་དང་། གྲོང་གསེབ་འཛུགས་སྐྲུན་ལ་སྐུལ་འདེད་གཏོང་བ། གྲོང་གསེབ་བཅོས་སྐྱོང་མ་ལག་འཐུས་སྒོ་ཚང་དུ་གཏོང་བ། གཙོ་རྒྱུ་འགན་ལེན་དང་བཀོད་སྒྲིག་ལེགས་གཏོང་གི་སྒྲིག་སྲོལ་ལམ་སྲོལ་འཐུས་སྒོ་ཚང་དུ་གཏོང་བ་སོགས་ཀྱི་ཐད་བཀོད་སྒྲིག་ཞིབ་ཕྲ་བྱས་ཡོད། གྲོང་གསེབ་ཕྱོགས་ཡོངས་ནས་དར་རྒྱས་ཡོང་བར་བྱེད་པ་དེ་གང་ལྟར་ན་ཡང་མི་སེར་ལ་བདེ་སྐྱིད་སྐྲུན་ཆེད་ཡིན་པས། ལས་ཀ་གང་འདྲ་ཞིག་བྱས་རུང་ཞིང་པ་མང་ཚོགས་ཀྱིས་ཚོར་ཐུབ་པ་དང་ཁོང་ཚོར་ཕན་པ་ཐོན་པར་བྱེད་དགོས། “ཁྲི་སྟོང་འདུ་འགོད”ལ་ཉམས་མྱོང་སློབ་སྦྱོང་དང་བེད་སྤྱོད་གཏིང་ཟབ་བྱས་ཏེ། གྲོང་གསེབ་ཀྱི་དམངས་ཕྱུག་ཐོན་ལས་འཕེལ་རྒྱས་ཧུར་ཐག་གཏོང་བ་དང་། གྲོང་གསེབ་ཀྱི་མི་སྡོད་ཁོར་ཡུག་རྒྱུན་མཐུད་ལེགས་སུ་གཏོང་བ། གྲོང་གསེབ་ཀྱི་རིག་གནས་དར་རྒྱས་གཏོང་བ། ཡུལ་སྲོལ་སྒྱུར་བར་སྐུལ་འདེད་གཏོང་བ་བཅས་བྱས་ནས་གྲོང་གསེབ་ཀྱི་ཐོན་ལས་འཕེལ་རྒྱས་ཀྱི་ཆུ་ཚད་དང་། གྲོང་གསེབ་འཛུགས་སྐྲུན་གྱི་ཆུ་ཚད། གྲོང་གསེབ་བཅོས་སྐྱོང་གི་ཆུ་ཚད་བཅས་མཐོ་རུ་གཏོང་དགོས། གྲོང་གསེབ་སྒྱུར་བཅོས་གཏིང་ཟབ་ཏུ་གཏོང་བ་ནི་གྲོང་གསེབ་ཕྱོགས་ཡོངས་ནས་དར་རྒྱས་ཡོང་བར་སྐུལ་འདེད་གཏོང་བའི་ཐབས་མཆོག་གལ་ཆེན་ཞིག་ཡིན། གྲོང་གསེབ་ཀྱི་ས་ཞིང་འགན་གཙང་ལེན་པའི་འབྲེལ་བ་བརྟན་དུ་དང་འཐུས་སྒོ་ཚང་དུ་གཏོང་བ་དང་། རེས་སྐོར་གཉིས་པའི་ས་ཞིང་འགན་གཙང་ལེན་པའི་དུས་ཡུན་ཐིམ་རྗེས་སླར་ཡང་ལོ་སུམ་ཅུ་རིང་དུ་གཏོང་བའི་ཚོད་ལྟ་བྱེད་པར་གོ་རིམ་ལྡན་པའི་ངང་སྐུལ་འདེད་བཏང་ནས། ཞིང་དུད་མང་ཆེ་བའི་སྔར་ཡོད་འགན་གཙང་བླངས་པའི་ས་ཞིང་སྤྱི་ཡོངས་ནས་རིམ་བཞིན་ནར་འགྱངས་དང་བརྟན་པོ་རྒྱུན་འཁྱོངས་ཐུབ་པར་འགན་ལེན་བྱེད་དགོས། གཟེར་འདེབས་ཀྱི་སྙིང་སྟོབས་ལ་བརྟེན་ནས་སྒྱུར་བཅོས་ཁག་དོན་འཁྱོལ་ཡོང་བར་དམ་འཛིན་ཡག་པོ་བྱས་ཚེ། གྲོང་གསེབ་ཕྱོགས་ཡོངས་ནས་དར་རྒྱས་གཏོང་བའི་སྒུལ་ཤུགས་དང་གསོན་ཤུགས་རྒྱུན་ཆད་མེད་པར་འཕེལ་ངེས་རེད།

ཀྲུང་གོའི་ལུགས་ཀྱི་དེང་རབས་ཅན་མངོན་འགྱུར་བྱེད་པར་ངེས་པར་དུ་གྲོང་གསེབ་ཕྱོགས་ཡོངས་ནས་དར་རྒྱས་ཡོང་བར་སྐུལ་འདེད་མགྱོགས་མྱུར་གཏོང་དགོས། ང་ཚོས་བློ་མཐུན་ཞི་ཅིན་ཕིང་གིས་སྲོག་ཤིང་གནང་བའི་ཏང་ཀྲུང་དབྱང་གི་མཐའ་འཁོར་དུ་དེ་བས་མཐུན་སྒྲིལ་དམ་ཟབ་བྱས་ཏེ། ཡིད་ཆེས་བརྟན་པོ་དང་། གཞུང་འཁྱོངས་གསར་འབྱེད། དངོས་འཛིན་དངོས་སྒྲུབ་བཅས་བྱེད་པ་དང་། དེ་བས་གནད་སྨིན་གྱི་བྱ་ཐབས་དང་དེ་བས་དངོས་སྒྲུབ་ཀྱི་བྱ་སྤྱོད་ལ་བརྟེན་ནས་ཞིང་ལས་སྟོབས་ཆེར་གཏོང་བ་དང་རྨང་གཞི་བརྟན་དུ་བཏང་སྟེ། ཞིང་ལས་རྒྱལ་ཁབ་སྟོབས་ཆེན་འཛུགས་སྐྲུན་བྱེད་པའི་དམིགས་ཚད་ཕྱོགས་སུ་མདུན་སྐྱོད་བྱེད་དགོས།