གཞིས་རྩེ་གྲོང་ཁྱེར་དིང་རི་རྫོང་ཆུ་ལྷོ་ཤང་དཔལ་འབྱོར་སྒང་གྲོང་ཚོའི་བཀོད་སྒྲིག་བྱ་ཡུལ་དུ། ཞོགས་པ་སྔ་པོ་ནས་དུད་ཚང་གི་ཁང་སྟེང་ནས་དུ་བ་ལྷོག་ལྷོག་ཏུ་འཕྱུར་ཏེ་སྐྱིད་སྣང་དོད་པའི་རྣམ་པ་ཞིག་མངོན། གསར་འགོད་པ་སྔོ་ཚལ་དྲོད་ཁང་ཆེན་པོར་སྐྱོད་སྐབས། དེ་གར་སྔོ་ཚལ་དང་། ལ་ཕུག་གི་ལོ་འདབ་སྔོ་ཐིང་ཐིང་དུ་གྱུར་པ་དང་། གྲོང་གསེབ་དར་རྒྱས་ཀྱི་ཆེད་བསྐོས་པ་ཆོས་འཛོམས་བུ་ཁྲིད་དང་ཚན་རྩལ་ཆེད་བསྐོས་པ་བསྟན་འཛིན་ཆོས་སྒྲོན་གྱིས་ཉེ་འགྲམ་གྱི་ས་སྟོང་ཞིག་ཏུ་སྔོ་ཚལ་འདེབས་འཛུགས་ལ་བྲེལ་བཞིན་པ་མཐོང་བྱུང་།

“ང་ཚོས་ཧོང་ཀྭ་དང་ཀྲོ་མ་ཀྲུ་ཡི་ས་བོན་གསབ་འདེབས་བྱེད་རྩིས་ཡོད”ཅེས་ཆོས་འཛོམས་བུ་ཁྲིད་ཀྱིས་གསར་འགོད་པར་བཤད་བྱུང་། ཟླ་1ཚེས་7ཉིན་ས་ཡོམ་བརྒྱབ་རྗེས། ཁོང་ཚོས་གེགས་ཁུལ་དུ་རོགས་སྐྱོབ་དང་བཀོད་སྒྲིག་བྱ་ཡུལ་འཛུགས་སྐྲུན་བྱེད་པར་བྲེལ་ནས་དལ་དལ་ལྷོད་ལྷོད་ངང་སྡོད་ཁོམ་བྱུང་མེད། ད་ཆ་ཡུལ་མི་རྣམས་སྟབས་བདེའི་ཁང་པར་སྤོས་རྗེས་ཐོན་སྐྱེད་དང་འཚོ་བ་སྔར་རྒྱུན་བཞིན་སླར་གསོ་བྱུང་རྗེས། ཁོང་གཉིས་པོར་ཡང་རིམ་བཞིན་ཁོམ་པ་བྱུང་ནས་སྔོ་ཚལ་གསབ་འདེབས་ཀྱི་ལས་ལ་གཞོལ་འགོ་བརྩམས།

2023ལོར་དཔལ་འབྱོར་སྒང་གྲོང་ཚོས་མ་དངུལ་སྒོར་ཁྲི་3000ལྷག་ཙམ་བཏང་ནས་སྔོ་ཚལ་དྲོད་ཁང་ཆེན་པོ་སྟར་པ་11དང་། སྣུམ་ནག་གཞུང་ལམ་འདིང་བ་དང་། ཆུ་ཡུར་དང་ཆུ་མཛོད་བཟོ་བ། མི་ཕྱུགས་ལོགས་སུ་དབྱེ་བ་སོགས་ཚུད་པའི་གྲོང་གསེབ་དར་རྒྱས་རྣམ་གྲངས་འཛུགས་སྐྲུན་བྱས་ཤིང་། སྔོ་ཚལ་དྲོད་ཁང་ཆེན་པོ་སྟར་པ་11ལ་ཧོང་ཀྭ་དང་། ཀྲོ་མ་ཀྲུ། སྔོ་ཚལ། ལ་ཕུག པད་ཚལ། སུར་པན། ཨ་ཤོམ། གྲོ་མ་སོགས་བཏབ་པས་ཡུལ་མིའི་རྒྱུན་གཏན་འཚོ་བའི་དགོས་མཁོ་བསྐངས་པ་མ་ཟད། ཕྱིར་བཙོངས་ནས་ན་ནིང་ཡོང་འབབ་སྒོར་ཁྲི་7ཙམ་བྱུང་ཡོད། ད་རེས་ཀྱི་ས་ཡོམ་ནང་དཔལ་འབྱོར་སྒང་གྲོང་ཚོའི་ཁང་པ་མང་པོ་བརྡིབས་ནའང་། ཕྱོགས་ཁག་གི་རོགས་སྐྱོབ་སྟོབས་ཤུགས་ཀྱི་རོགས་རམ་ལ་བརྟེན་ནས་ཡུལ་མི་ཚོ་ཉིན་དེ་གའི་དགོང་མོར་གུར་ནང་སྡོད་ཐུབ་པ་བྱུང་བ་དང་། ཚེས་12ཉིན་སྟབས་བདེའི་ཁང་པ་གྲོང་ཚོར་དབོར་བ་དང་། ཚེས་15ཉིན་མང་ཚོགས་ཚང་མ་གློག་ཁྲིད་ཟིན་པའི་སྟབས་བདེའི་ཁང་པར་སྤོ་ཐུབ་པ་བྱུང་ཡོད།

ཆོས་འཛོམས་བུ་ཁྲིད་ཀྱིས། ངེད་གཉིས་ཀྱིས་ཉིན་གཅིག་གོང་ནས་ཧོང་ཀྭ་དང་ཀྲོ་མ་ཀྲུ་ཡི་སོན་སྦངས་ཟིན་པས། ད་རེས་གསབ་འདེབས་བྱས་པའི་ཧོང་ཀྭ་དེ་ཉིན་ལྔ་བཅུའི་ཡས་མས་སུ་འཐུ་ཐུབ་པ་དང་། གཟའ་འཁོར་རེར་ཐེངས་གཉིས་ནས་གསུམ་བར་འཐུ་ཐུབ་པ་མ་ཟད། གསབ་འདེབས་བྱས་པའི་ཀྲོ་མ་ཀྲུ་ཡང་ཉིན་ལྔ་བཅུ་ལྷག་ཙམ་ཕྱིན་རྗེས་འཐུ་ཆོག་པས། དེ་དུས་ཡུལ་མི་ཚོས་ཧོང་ཀྭ་དང་ཀྲོ་མ་ཀྲུ་སོས་པ་བཟའ་ཐུབ་རྒྱུ་རེད་ཅེས་བཤད།

ལས་ལ་བྲེལ་བཞིན་པའི་ཡུལ་མི་ཟླ་བ་སྐྱིད་དང་ཐག་གཅོད་དྲོད་ཁང་ཆེན་པོར་ཧྲང་ཧའེ་སྔོ་ཚལ་ཆག་པ་འགའ་བཏུ་བར་འོང་ཞིང་། ཁོང་གཉིས་པོས་གྲོང་ཚོར་སྔོ་ཚལ་དྲོད་ཁང་ཆེན་པོ་བརྒྱབ་ནས་བཟུང་། སྔོ་ཚལ་སོས་པ་འདང་ངེས་ཡོད་པས། ག་དུས་བཟའ་འདོད་ཀྱང་འཐུ་བར་འོང་ན་ཆོག་པ་མ་ཟད། ཕྱིར་བཙོང་བའི་རིན་གོང་ལས་ཁེ་བ་ཡོད། ད་རེས་ས་ཡོམ་བརྒྱབ་རྗེས། སྔོ་ཚལ་མང་པོ་འཁྱགས་པ་ཐེབས་ནས་ཕན་མི་ཐོགས་པར་གྱུར་ཡང་། ཡུལ་མི་ཚོས་དགའ་པོ་བྱེད་པའི་ཧྲང་ཧའེ་སྔོ་ཚལ་དང་ལ་ཕུག་གི་སྐྱེ་ཚུལ་ཡག་པོ་ཡོད་ཅེས་གསར་འགོད་པར་བཤད་བྱུང་།

“རྒྱལ་ཁབ་ཀྱིས་གནང་བའི་སྔོ་ཚལ་བཟའ་རྒྱུ་འབེལ་པོ་ཡོད་ལ། སྐབས་རེ་བཟའ་སྙིང་འདོད་ཚེ་ཉིན་གསུམ་བཞིའི་མཚམས་སུ་དྲོད་ཁང་དུ་ཧྲང་ཧའེ་སྔོ་ཚལ་དང་ལ་ཕུག་སོས་པ་འཐུ་བར་འགྲོ་གི་ཡོད”ཅེས་ཟླ་བ་སྐྱིད་ཀྱིས་བཤད་པ་དང་། ཁོང་གིས་ད་ཆ་ང་ཚོ་དྲོ་སོབ་སོབ་ཀྱི་སྟབས་བདེའི་ཁང་པར་སྡོད་རྒྱུ་བྱུང་བ་མ་ཟད། ཇ་སྲུབས་མ་དང་། རྩམ་པ། འབྲས་དང་གྲོ་ཞིབ་སོགས་འདང་ངེས་ཡོད་ལ། རྒྱུན་གཏན་གྱི་འཚོ་བའི་མཁོ་ཆས་ཀྱང་འཛོམས་པོ་ཡོད་ཅེས་བཤད།