“གངས་འཁྱགས་ཐོན་ཁུངས”ལ་བརྟེན་ནས་ཐོན་ལས་འཕེལ་རྒྱས་བཏང་།
ཅི་ལིན་གྱིས་གངས་འཁྱགས་དཔལ་འབྱོར་སྤུས་ཚད་མཐོ་བའི་འཕེལ་རྒྱས་ལ་སྐུལ་འདེད་བཏང་བ།
ཅི་ལིན་ཞིང་ཆེན་པེ་ཏ་མཚེའུ་གངས་ཤུད་སྤྲོ་གསེང་ཁུལ་འགྲམ་གྱི་ནན་ཀོའུ་གྲོང་ཚོར་ཡུལ་སྐོར་བ་མང་པོ་ཡོད། “གངས་ཤུད་གློད་ཚར་སོང་ངམ། དགོང་ཟས་ཅི་ཞིག་ཟ་འདོད་འདུག་གམ”ཞེས“གངས་ཡུལ་མི་ཁྱིམ”ཞེས་པའི་དམངས་སྲོལ་གནས་ཚང་གཉེར་སྐྱོང་བྱེད་མཁན་ཡུས་ཧྲུའུ་ཧྥན་གྱིས་སེམས་རྩ་འཁོལ་པོས་ཡུལ་སྐོར་བར་བཤད། ཡུས་ཧྲུའུ་ཧྥན་གྱིས“ད་ལོའི་དཔྱིད་གསར་དུས་ཆེན་ལ་ལས་མཚམས་གཏན་ནས་བཞག་མེད། གངས་འཁྱགས་དཔལ་འབྱོར་རྒྱུན་མཐུད་དར་རྒྱས་བྱུང་བ་དང་དཔྱིད་གསར་དུས་ཆེན་གྱི་གུང་གསེང་རིང་དམངས་སྲོལ་གནས་ཚང་གི་སྡོད་ཁང་ཚང་མ་ཁེངས་ནས་ཡོང་འབབ་སླར་ཡང་འཕར་སོང་། གངས་འཁྱགས་དུས་ཚིགས་གཅིག་ལ་ཡོང་འབབ་ཉུང་མཐར་ཡང་སྒོར་ཁྲི་20རག་གི་འདུག”ཅེས་བཤད།
ད་ལོའི་ཟླ་2ཚེས་8ཉིན་སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས་ཅི་ལིན་ཞིང་ཨུད་དང་ཞིང་ཆེན་སྲིད་གཞུང་གི་ལས་དོན་སྙན་གསེང་ཞུས་པ་གསན་སྐབས“སྐྱེ་ཁམས་ཁོར་ཡུག་སྲུང་སྐྱོང་དང་ལྗང་མདོག་ཐཱན་ཉུང་འཕེལ་རྒྱས་ཡོང་བར་སྤྱི་འདོམས་བྱས་ཏེ་གངས་འཁྱགས་དང་། རང་བྱུང་མཛེས་ལྗོངས། མི་རིགས་ཀྱི་ཡུལ་སྲོལ་གོམས་འདྲིས་སོགས་ཁྱད་ལྡན་ཐོན་ཁུངས་སྤྱད་དེ་ཡུལ་སྐོར་ལས་རིགས་འཕེལ་རྒྱས་གཏོང་དགོས”ཞེས་ནན་བཤད་གནང་ཡོད།
མངགས་བཅོལ་ནན་པོ་རྒྱུན་སྲིང་ལག་བསྟར་བྱེད། 2018ལོའི་ཟླ་9པར་སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས་བྱང་ཤར་ཞིང་ཆེན་གསུམ་དུ་རྟོག་ཞིབ་གནང་བ་དང་འབྲེལ་བྱང་ཤར་དར་རྒྱས་ལ་སྐུལ་འདེད་གཏིང་ཟབ་གཏོང་བའི་བཞུགས་མོལ་ཚོགས་འདུ་གཙོ་སྐྱོང་གནང་བ་རེད། སྤྱི་ཁྱབ་ཧྲུའུ་ཅིས“བྱང་ཤར་ས་ཁུལ་གྱི་ཐུན་མོང་མ་ཡིན་པའི་ཐོན་ཁུངས་དང་ལེགས་ཆ་བེད་སྤྱོད་གང་ལེགས་བྱས་ཏེ་གྲང་ངར་ཆེ་བའི་ས་ཁུལ་གྱི་གངས་འཁྱགས་དཔལ་འབྱོར་མགྱོགས་མྱུར་འཕེལ་རྒྱས་འགྲོ་བར་སྐུལ་འདེད་གཏོང་དགོས”ཞེས་ནན་བཤད་གནང་ཡོད།
སྤྱི་ཁྱབ་ཧྲུའུ་ཅི་ཞི་ཅིན་ཕིང་གི་མཛུབ་སྟོན་གལ་ཆེན་གྱི་དགོངས་དོན་ལག་བསྟར་གཏིང་ཟབ་བྱས་ཏེ། ཅི་ལིན་ཞིང་ཆེན་གྱིས་གྲང་ངར་ཆེ་བའི་ས་ཁུལ་གྱི་གངས་འཁྱགས་དཔལ་འབྱོར་འཕེལ་རྒྱས་ལ་སྐུལ་འདེད་མགྱོགས་པོ་བཏང་སྟེ། “གངས་འཁྱགས་ཐོན་ཁུངས”ལ་བརྟེན་ནས་ཐོན་ལས་འཕེལ་རྒྱས་གཏོང་བར་དམིགས་ཏེ། གངས་འཁྱཌ་ལུས་རྩལ་དང་། གངས་འཁྱགས་རིག་གནས། གངས་འཁྱགས་ཡུལ་སྐོར། གངས་འཁྱགས་སྒྲིག་ཆས་བཅས་གཙོ་གནད་དུ་བྱས་པའི“4+X”གངས་འཁྱགས་ཐོན་ལས་མ་ལག་འཛུགས་རྒྱུར་ཤུགས་སྣོན་བརྒྱབ་ཡོད། ད་ལོའི་དཔྱིད་གསར་དུས་ཆེན་གྱི་གུང་གསེང་རིང་ཅི་ལིན་ཞིང་ཆེན་གྱིས་རྒྱལ་ནང་གི་ཡུལ་སྐོར་བ་མི་ཐེངས་ཁྲི་2770.68ལ་སྣེ་ལེན་ཞུས་པ་དང་རྒྱལ་ནང་གི་ཡུལ་སྐོར་བའི་འགྲོ་སོང་བསྡོམས་འབོར་སྒོར་དུང་ཕྱུར་337.55ཟིན་ཡོད།
“2025ལོར་ཅི་ལིན་ཞིང་ཆེན་གྱིས་ཡུལ་སྐོར་གྱི་སྒོར་དུང་ཕྱུར་ཁྲི་རིམ་པའི་ཐོན་ལས་མུ་མཐུད་གཏོད་ནས་རྣམ་གྲངས་སྣེ་ཁྲིད་དང་ཞབས་ཞུའི་སྤུས་ཚད་མཐོ་རུ་གཏོང་རྒྱུ་མངོན་གསལ་དོད་དུ་གཏོང་བ་དང་། དུས་བཞི་མཉམ་འགུལ་དང་ས་ཁོངས་ཡོངས་འཕེལ་རྒྱས་རྒྱུན་འཁྱོངས་བྱས་ཏེ་རྒྱལ་ནང་གི་ཡུལ་སྐོར་བར་སྣེ་ལེན་བྱེད་ཚད་དང་ཡུལ་སྐོར་གྱི་འགྲོ་སོང་བསྡོམས་འབོར་གཉིས་ཀ་གྲངས་གནས་གཉིས་འཕར་རྒྱུ་རྒྱུན་འཁྱོངས་ཐུབ་པའི་བརྩོན་ལེན་བྱ་རྒྱུ་རེད། གངས་འཁྱགས་དཔལ་འབྱོར་འཕེལ་རྒྱས་མངོན་གསལ་དོད་པོ་བཏང་ནས་གངས་བབས་པའི་དུས་ཚིགས་གསར་པར་ཡུལ་སྐོར་བར་སྣེ་ལེན་ཞུ་རྒྱུ་དང་ཡུལ་སྐོར་འགྲོ་གྲོན་བསྡོམས་འབོར་འཕར་ཚད་20%ཡན་ཟིན་རྒྱུའི་འབད་བརྩོན་ཧུར་ཐག་བྱ་རྒྱུ་ཡིན”ཞེས་ཅི་ལིན་ཞིང་ཆེན་རིག་གནས་དང་ཡུལ་སྐོར་ཐིང་གི་ཐིང་ཀྲང་སུན་ཀོང་ཀྲིས་བཤད།
2024ལོའི་ཟླ་12པར། ཅི་ལིན་ཞིང་ཆེན་གྱིས《ཅི་ལིན་ཞིང་ཆེན་གྱི་གངས་འཁྱགས་དཔལ་འབྱོར་སྤུས་ཚད་མཐོ་བའི་འཕེལ་རྒྱས་ལ་སྐུལ་འདེད་གཏོང་རྒྱུའི་སྐོར་གྱི་ལག་བསྟར་བསམ་འཆར》བཀྲམ་ནས་ཅི་ལིན་ཞིང་ཆེན་དེ་རྒྱལ་ཁབ་ཀྱི་གངས་འཁྱགས་དཔལ་འབྱོར་ལྟེ་གནས་དང་། གངས་འཁྱགས་རིག་གནས་བསམ་བཀོད་ལྟེ་གནས། སྤུས་ལེགས་གངས་འཁྱགས་འཚོ་བའི་ཁུལ། རྒྱལ་སྤྱིའི་ཤུགས་རྐྱེན་ལྡན་པའི་གངས་འཁྱགས་དཔལ་འབྱོར་འདུ་འཛོམས་ཁུལ་བཅས་སུ་བསྐྲུན་དགོས་པ་ཁ་གསལ་བཏོན་ཡོད།
“གངས་འཁྱགས་ཀྱི་ས་གཞི”དེ“གསེར་རི་དང་དངུལ་རིར”བསྒྱུར་བར་དམིགས་ནས། ཟླ་2ཚེས་6ཉིན། ཅི་ལིན་ཞིང་ཆེན་གྱི་ཚོང་འགུགས་མ་འདྲེན་ལམ་སྲོལ་སྒྱུར་བཅོས་ཀྱི་ཆེད་དོན་ཚོགས་འདུའི་ཐོག་བཏོན་དོན། དུས་བབ་གསར་པ་དང་ལས་འགན་གསར་པ་ཁོང་དུ་ཆུད་པར་བྱས་ནས་ཚོང་འགུགས་མ་འདྲེན་གྱི་འདུ་ཤེས་གསར་གཏོད་དང་། ལམ་སྲོལ་གསར་གཏོད། རྣམ་པ་གསར་གཏོད་བཅས་ལ་སྐུལ་འདེད་ཧུར་ཐག་བཏང་ནས་ལས་ཀའི་མ་ལག་ལེགས་སྒྱུར་འཐུས་སྒོ་ཚང་དུ་བཏང་ནས་ཚོང་འགུགས་མ་འདྲེན་གྱི་སྤུས་ཚད་དང་ཕན་འབྲས་ཆེ་རུ་བཏང་སྟེ་ཅི་ལིན་གྱི་སྤུས་ཚད་མཐོ་བའི་འཕེལ་རྒྱས་ལ་སྐུལ་འདེད་གཏོང་ཆེད་འདེགས་སྐྱོར་ནུས་ལྡན་མཁོ་འདོན་བྱེད་དགོས། གངས་འཁྱགས་ཐོན་ལས་ལ་དམིགས་པའི་ཚོང་འགུག་མ་འདྲེན་ནི་ད་ཐེངས་ཀྱི་ཆེད་དོན་ཚོགས་འདུའི་བརྗོད་དོན་ནང་ཡོད་དགོས་ངེས་ཀྱི་གནས་ལུགས་རེད།
ས་གཞི་ཁ་བས་བཀླུབས་ཤིང་གང་སར་ཡུལ་སྐོར་བས་ཁེངས། གངས་འཁྱགས་དཔལ་འབྱོར་གྱིས་ཕྱོགས་བཞི་མཚམས་བརྒྱད་ཀྱི་ཡུལ་སྐོར་བའི་ཡིད་དབང་བཀུག་ཤིང་གང་སར་གསོན་ཤུགས་ཆེན་པོ་རྒྱས་བཞིན་ཡོད། འཕེལ་རྒྱས་ཀྱི་སྒུལ་ཤུགས་གསར་པ་དང་ལེགས་ཆ་གསར་པ་ས་གཞི་ཡོངས་ལ་ཁྱབ་བཞིན་མཆིས།