ཆུ་འབྲས་དང་། གྲོ མ་རྨོས་ལོ་ཏོག་བཅས་འབྲུ་རིགས་ལོ་ཏོག་ཆེན་པོ་གསུམ་ལ་རྫས་ལུད་སྤྱོད་ཚད་བརྟན་པོའི་ངང་འཕར་བ།

2015ལོར། 35.2% 2017ལོར། 37.8%

2019ལོར། 39.2% 2020ལོར། 40.2%

2022ལོར། 41.3% 2024ལོར། 42.6%

ཞིང་སྤྱོད་རྫས་ལུད་སྤྱོད་ཚད(ཕབ་རྩིས་བྱེད་ཚད)ལོ་8བསྟུད་མར་ཆག་པའི་རྣམ་པ་རྒྱུན་འཁྱོངས་ཐུབ་པ། (ཏུན་ཁྲི)

2015ལོར། 6022.60 2016ལོར། 5984.41

2017ལོར། 5859.41 2018ལོར། 5653.42

2019ལོར། 5403.59 2020ལོར། 5250.65

2021ལོར། 5191.26 2022ལོར། 5079.20

2023ལོར། 5021.74

ས་དཔྱད་ལུད་སྦྱོར་ལག་རྩལ་ལོར་ཁྱབ་གདལ་བཏང་བའི་རྒྱ་ཁྱོན་ཆེ་རུ་ཕྱིན་པ། (མུའུ་གྲངས)

2016ལོར། དུང་ཕྱུར་16 2017ལོར། དུང་ཕྱུར་17

2018ལོར། དུང་ཕྱུར་18.5 2019ལོར། དུང་ཕྱུར་19.3

2022ལོར། དུང་ཕྱུར་22.6

2024ལོར། དུང་ཕྱུར་23ལས་བརྒལ་བ།

2024ལོར་རང་རྒྱལ་གྱི་ཆུ་འབྲས་དང་། གྲོ མ་རྨོས་ལོ་ཏོག་བཅས་འབྲུ་རིགས་ལོ་ཏོག་ཆེན་པོ་གསུམ་ལ་རྫས་ལུད་སྤྱོད་ཚད་42.6%ཟིན་ནས་2022ལོ་ལས་བརྒྱ་ཆའི་གྲངས་1.3འཕར་ཡོད། རྫས་ལུད་སྤྱོད་ཚད་སྟེ། ལོ་ཏོག་གིས་རྫས་ལུད་བསྡུ་ལེན་བྱས་པའི་བསྡུར་ཚད་ལས་ཞིང་ལས་ཐོན་སྐྱེད་ཁྲོད་རྫས་ལུད་བེད་སྤྱོད་ནུས་ལྡན་བྱེད་ཚད་མཚོན་གྱི་ཡོད། ཚན་རིག་དང་མཐུན་པའི་ངང་ལུད་རྒྱག་པའི་ཕན་འབྲས་ཆེ་རུ་ཕྱིན་པ་དེས་ཞིང་ལས་འཕེལ་རྒྱས་གཏོང་སྟངས་ལ་འགྱུར་ལྡོག་ཕྱིན་པ་མཚོན་གྱི་ཡོད།

རྫས་ལུད་སྤྱོད་ཚད་དམའ་རུ་ཇི་ལྟར་གཏོང་དགོས་སམ། གསར་འགོད་པས་དཔྱིད་རྨོད་དཔྱིད་གྲབས་ཀྱི་འཐབ་ས་དང་པོར་བཅར་འདྲི་བྱས་ནས་འགྱུར་ལྡོག་གསར་པ་རབ་དང་རིམ་པ་བྱུང་བ་ཚོར་བྱུང་།

“སྔོ་ལོག་དུས་སུ་གྲོའི་ལྗང་པར་འཚོ་བཅུད་ཀྱི་རེ་བ་མཐོ་པོ་ཡོད་པས། སྡེབ་སྦྱོར་རྫས་ལུད་སྤྱད་ན་ཧ་ཅང་འཚམ་པོ་ཡོད” ཞིང་ལས་རྒྱུ་ཆ་ཚོང་ཁང་གི་འགན་འཁུར་བ་ཀྲང་ཅུན་ཧྥན་གྱིས་ངོ་སྤྲོད་བྱས་པར་གཞིགས་ན། སྡེབ་སྦྱོར་རྫས་ལུད་ཀྱི་འཚོ་བཅུད་དེ་བས་མང་བ་དང་ལུད་ཀྱི་ཕན་ནུས་མཐོ་བ་ཡོད་མོད། འོན་ཀྱང་གཏིང་ལུད་སྤྱོད་པའི་གནས་ཚུལ་ལ་གཞིགས་ནས་འཚོ་བཅུད་ཀྱི་བསྡུར་ཚད་འོས་འཚམ་ལྟར་སྡེབ་སྦྱོར་བྱས་པའི་སྡེབ་སྦྱོར་རྫས་ལུད་འདེམས་དགོས།

“ལུད་རྒྱག་ཚད་རན་པོ་དང་ཚན་རིག་དང་མཐུན་པའི་ངང་ལུད་ཁ་སྣོན་རྒྱག་དགོས” མ་འཇོག་ཐོན་འབབ་དང་སྐྱེ་ཁམས་ནུས་ཆེར་བསམ་གཞིག་བྱས་ཏེ། ཞིང་དུད་ཀྱི་ལུད་སྤྱོད་པའི“ཞིབ་རྩིས”ཇི་ཙམ་བརྒྱབ་པ་དེ་ཙམ་གྱིས་ཞིབ་ཚགས་སུ་འགྲོ་བཞིན་ཡོད། མིག་སྔར། རང་རྒྱལ་དུ་རྫས་ལུད་ཐོན་རྫས་སྣ་ཁ་30ལྷག་ཙམ་ཡོད་པ་དེ་དག་ནང་ལོ་ཏོག་སྣ་ཚོགས་ལ་དགོས་ངེས་ཀྱི་གཏེར་རྫས་འཚོ་བཅུད་གཞི་རྒྱུ་དང་ཕན་ཡོད་གཞི་རྒྱུ་གཞན་དག་ཁྱབ་ཡོད་ལ། སྲ་གཟུགས་དང་གཤེར་གཟུགས་སོགས་རྫས་ལུད་སྣ་ཚོགས་ཚུད་ཡོད་པ་དེ་དག་གིས་ཞིང་ལས་ཐོན་སྐྱེད་ཀྱི་དགོས་མཁོ་གང་ལེགས་སྐོང་ཐུབ་ཀྱི་ཡོད།

ས་དཔྱད་ལུས་སྦྱོར་ནི་རྫས་ལུད་སྤྱོད་ཚད་མཐོ་རུ་གཏོང་བའི་རྨང་གཞི་གལ་ཆེན་ཞིག་རེད། “ང་ཚོས་རིམ་གསུམ་ལག་རྩལ་ཞབས་ཞུ་ཚོགས་པ་བཙུགས་ནས་གྲོང་གསེབ་ཏུ་ཞིང་པར་ཚན་རིག་དང་མཐུན་པའི་སྒོ་ནས་རྫས་ལུད་རྒྱག་པར་མཛུབ་ཁྲིད་བྱེད་ཀྱི་ཡོད” ཀྲུང་ཧྭ་རྫས་ལུད་ཚད་ཡོད་ཀུང་སིའི་ཐབས་ལམ་དང་མཐུན་སྦྱོར་ལས་སྒོ་པུའི་སྤྱི་ཁྱབ་ཅིང་ལི་ཝང་ཧྲོའེ་ཡིས་ངོ་སྤྲོད་བྱས་པར་གཞིགས་ན། ལོ་འགོ་ཚུན་དུ། དཔྱིད་འདེབས་ལག་རྩལ་གྱི་གསོ་སྦྱོང་ཐེངས་480ལྷག་ཙམ་དང་ས་དཔྱད་ལུད་སྦྱོར་ཐེངས་300ལྷག་ཙམ་བྱས་ཡོད།

རིམ་ཁག་ཞིང་ལས་ལག་རྩལ་ཁྱབ་གདལ་སྡེ་ཚན་གྱིས་ནུས་ཤུགས་ཡོད་རྒུས་སྐུལ་འདེད་བཏང་བ་བརྒྱུད། རྒྱལ་ཡོངས་ཀྱི་ས་དཔྱད་ལུད་སྦྱོར་ལག་རྩལ་ལོ་རེར་ཁྱབ་གདལ་གཏོང་ཐེངས་མུའུ་དུང་ཕྱུར་23ལྷག་ཙམ་ཟིན་པའི་ནང་འབྲུ་རིགས་ལོ་ཏོག་ཆེན་པོ་གསུམ་ལ་བེད་སྤྱོད་གཏོང་ཚད་95%ལྷག་ཙམ་ཟིན་ཡོད། ས་གནས་ཁག་གིས“ས་དཔྱད་དང་། ལུད་སྦྱོར། ཐོན་སྐྱེད། མཁོ་སྤྲོད། ལུད་རྒྱག”བཅས་ལྷུ་ཚིགས་ཆེན་པོ་ལྔ་ལ་དམིགས་ནས། ཞིང་ལས་དང་ཁེ་ལས་འབྲེལ་མཐུད་བྱེད་ཤུགས་ཆེ་རུ་བཏང་སྟེ་ལུད་སྦྱོར་བེད་སྤྱོད་ལ་སྐུལ་འདེད་བཏང་ཡོད།

ཞིང་པ་དེ་བས་མང་བས་རང་འགུལ་ངང་ལག་རྩལ་འདི་བཀོལ་སྤྱོད་བྱེད་པར་སྐུལ་མ་ཇི་ལྟར་གཏོང་དགོས་སམ། ཅང་སུའུ་ཞིང་ཆེན་རྨོ་ཞིང་སྤུས་ཚད་དང་ཞིང་ལས་ཁོར་ཡུག་སྲུང་སྐྱོང་ས་ཚིགས་ཀྱི་མཐོ་རིམ་ཞིང་ལས་ལག་རྩལ་ཆེ་མོ་བ་ཆིའུ་མེ་ཧྭ་ཡིས་ངོ་སྤྲོད་བྱས་པར་གཞིགས་ན། 2021ལོ་ནས་བཟུང་། ཅང་སུའུ་ཡིས་ཀྲུང་དབྱང་ནོར་སྲིད་ཀྱི་མ་དངུལ་སྤྱད་དེ་ཆུ་འབྲས་ལ་གཏིང་ལུད་རྒྱག་པའི་སྒྲིག་ཆས་ཉོ་བའི་ཐད་ཞིང་དུད་ལ་སྒྲིག་ཆས་རེར་ཁ་གསབ་སྒོར་5000སྤྲད་པ་མ་ཟད། ད་དུང་ལོ་ལྟར་ཞིང་ཆེན་རིམ་པའི་ནོར་སྲིད་ཀྱི་ཆེད་སྤྱོད་མ་དངུལ་སྒོར་ཁྲི་7500ལྷག་ཙམ་་བཏང་བ་དེ་དག་རྫས་ལུད་རན་པོ་རྒྱག་པ་དང་ཕན་འབྲས་ཆེར་གཏོང་གི་འབྲེལ་ཡོད་ལག་རྩལ་ཁྱབ་གདལ་གཏོང་བར་སྤྱད་ཡོད། ན་ནིང་། ཞིང་ཆེན་ཡོངས་ཀྱི་ཆུ་འབྲས་ལ་གཏིང་ལུད་བརྒྱབ་པར་རྒྱ་ཁྱོན་མུའུ་ཁྲི་114ཟིན་པ་དེ་2020ལོ་ལས་ལྡབ་གཅིག་འཕར་ཡོད།

ལག་རྩལ་སྣ་ཚོགས་སྡེབ་སྒྲིག་ནུས་ལྡན་བྱས་པས་རྫས་ལུད་སྤྱོད་པའི་ལས་ཆོད་རིམ་བཞིན་ཆེ་རུ་འགྲོ་བཞིན་ཡོད། ནང་སོག་ཏུ“ས་དཔྱད་ལུད་སྦྱོར་དང་། ས་བོན་དང་རྫས་ལུད་བསྲེས་ནས་འདེབས་པ། འགྱིག་ཤོག་འོག་ཐིགས་ཆུ་གཏོང་བའི་ཆུ་ལུད་གཞི་གཅིག་ཅན”བཅས་ཟུང་དུ་འབྲེལ་བའི་ལག་རྩལ་བྱེད་སྟངས་དེས་ཐིགས་ཆུ་དང་ལུད་སྙོམས་པོ་ཡོང་བ་མ་ཟད། ད་དུང་ཆུ་དང་། ལུད། མི་ཤུགས་བཅས་ལ་གྲོན་ཆུང་ཐུབ་ཀྱི་ཡོད།

“འདུས་གྲུབ་ལེ་ལག་ཚང་སྒྲིག་གི་ལག་རྩལ་དེ་དག་ཡག་པོ་སྤྱད་ན་འབྲེལ་ཡོད་ཀྱི་ཤེས་བྱ་དང་རྩལ་ནུས་ཁོང་དུ་ཆུད་པར་གལ་འགངས་ཧ་ཅང་ཆེན་པོ་ཡོད” དབུ་བཞུགས་ཚན་རིག་མཁས་ཅན་དང་། ཀྲུང་གོ་ཞིང་ལས་དང་ཚན་རིག་ཁང་ཞིང་ལས་ཐོན་ཁུངས་དང་ཞིང་ལས་ཁུལ་དབྱེ་ཞིབ་འཇུག་ཁང་གི་ཞིབ་འཇུག་པ་ཧོ་ཕིང་གིས། ཕྱོགས་གཅིག་ནས་ཞིབ་འཇུག་གསར་སྤེལ་ལ་མ་དངུལ་གཏོང་ཤུགས་ཆེ་རུ་གཏོང་བ་དང་ཚན་རྩལ་དང་ཁེ་ལས་མཉམ་ལས་གཏིང་ཟབ་བྱས་ཏེ་རྫས་ལུད་གསར་པ་དང་རིག་ནུས་ཅན་གྱི་རྫས་ལུད་རྒྱག་པའི་ལག་རྩལ་དབར་གྱི་འཚམ་མཐུན་རང་བཞིན་ལེགས་སུ་གཏོང་དགོས་པ་དང་། ཕྱོགས་གཞན་ཞིག་ནས་གསོ་སྦྱོང་ཞབས་ཞུ་དང་དཔེ་སྟོན་ཁྱབ་གདལ་ལ་ཤུགས་སྣོན་བརྒྱབ་ནས་ལག་རྩལ་གྲུབ་འབྲས་ཀྱི་ཕན་འབྲས་ཆེ་ཤོས་ཐོན་པར་སྐུལ་འདེད་གཏོང་དགོས།

རྫས་ལུད་ཚན་རིག་དང་མཐུན་པའི་ངང་ཡག་པོ་འདང་ངེས་སྤྱོད་རྒྱུ་དེས་འབྲུ་རིགས་བདེ་འཇགས་འགན་ལེན་བྱེད་པར་དོན་སྙིང་གལ་ཆེན་ལྡན་ཡོད། ཉེ་བའི་ལོ་ཤས་རིང་། ཞིང་ལས་གྲོང་གསེབ་པུས་རྫས་ལུད་སྤྱོད་ཚད་འཕར་མེད་པ་དང་། རྫས་ལུད་ཉུང་དུ་གཏོང་བ། ལྗང་མདོག་འདེབས་གསོ་འཁོར་རྒྱུག་གི་ཞིང་ལས་ཚོད་ལྟ་སོགས་བྱ་སྤྱོད་གལ་ཆེན་རབ་དང་རིམ་པ་ལག་ལེན་བསྟར་ནས། རྫས་ལུད་རན་པོ་རྒྱག་པ་དང་ཕན་འབྲས་ཆེར་གཏོང་ལ་མུ་མཐུད་སྐུལ་འདེད་བཏང་ཡོད། རྒྱལ་ཁབ་བསྡོམས་རྩིས་ཅུས་ཀྱི་གྲངས་གཞི་ལས་མངོན་པར། 2023ལོར་རྒྱལ་ཡོངས་ཀྱི་ཞིང་སྤྱོད་རྫས་ལུད་སྤྱོད་ཚད་ཏུན་ཁྲི་5021.74(ཕབ་རྩིས་རྒྱག་ཚད)ཟིན་པ་དེ་2015ལོ་ལས་16.6%ཉུང་དུ་ཕྱིན་ནས་ལོ་8བསྟུད་མར་ཆག་ཡོད།

ཞིང་ལས་གྲོང་གསེབ་པུའུ་འདེབས་འཛུགས་ལས་རིགས་དོ་དམ་སིའི་འབྲེལ་ཡོད་འགན་འཁུར་བས་ངོ་སྤྲོད་བྱས་པར་གཞིགས་ན། གོམ་སྟབས་རྗེས་མར་རེས་སྐོར་གསར་པའི་འབྲུ་རིགས་རྒྱ་མ་དུང་ཕྱུར་ཆིག་སྟོང་གི་ཐོན་ནུས་ཆེ་རུ་གཏོང་རྒྱུར་དམིགས་ནས། ཚན་རིག་དང་མཐུན་པའི་ངང་ལུད་བརྒྱབ་སྟེ་ཕན་འབྲས་ཆེ་རུ་གཏོང་བའི་ཐད་ཀྱི་སྲིད་ཇུས་ཀྱི་རོགས་སྐྱོར་བྱེད་ཤུགས་ཆེ་རུ་གཏོང་བ་དང་། ལོ་ཏོག་གི་འཚོ་བཅུད་ལེགས་ཉེས་ལ་བརྟག་དཔྱད་དང་། ཞིང་ལུད་རྒྱག་པར་བརྟག་དཔྱད། ཞིང་ནང་ཚོད་ལྟ་སོགས་རྨང་གཞིའི་ལས་དོན་ཡག་པོ་སྒྲུབ་པ། སྤྱི་ཚོགས་ཅན་གྱི་ཞབས་ཞུའི་རྩ་འཛུགས་ཀྱིས་ལུད་བསྡུ་རུབ་དང་ཞིང་ནང་དུ་བེད་སྤྱོད་སོགས་ཀྱི་ཞབས་ཞུ་མཁོ་འདོན་བྱེད་པར་རྒྱབ་སྐྱོར་བྱས་ཏེ་དེ་བས་བརྟན་པའི་འདེབས་གསོ་འཁོར་རྒྱུག་གི་ཁེ་ཕན་འབྲེལ་མཐུད་ལམ་སྲོལ་འཛུགས་རྒྱུ་རེད། (ཉི་དོན་དང་པད་མ་ཆོས་སྒྲོན་གྱིས་སྒྱུར་ཞུས་བྱས)

རྫས་ལུད་ཉོ་མཁས་པོ་དང་ཚན་རིག་དང་མཐུན་པའི་ངང་སྤྱོད་དགོས།

ཏུའུ་སེན།

དཔྱིད་རྨོད་ཀྱི་དུས་སུ་རྫས་ལུད་སྤྱོད་མང་ཤོས་རེད། མིག་སྔར། ཞིང་ལས་རྒྱུ་ཆ་ཁྲོམ་རར་རྫས་ལུད་ཀྱི་སྣ་ཁ་མང་ལ་ཐུམ་སྒྲིལ་འདྲ་མིན་སྣ་ཚོགས་ཡོད། ཞིང་པས་རྫས་ལུད་ཉོ་སྐབས་ཡག་ཤོས་བྱུང་ན་ཚད་ལྡན་གྱི་ཚོང་ཁང་ནས་ཉོ་དགོས། རྫས་ལུད་ཀྱི་མཚོན་རྟགས་ལ་ལྟ་སྐབས། སྤྱིའི་འཚོ་བཅུད་མང་ཉུང་ལ་ལྟ་དགོས་པ་མ་ཟད། འཚོ་བཅུད་སྡེབ་སྦྱོར་གྱི་བསྡུར་ཚད་ལའང་དོ་སྣང་བྱེད་དགོས། སྡེབ་སྦྱོར་རྫས་ལུད་ཀྱི་སྤྱིའི་འཚོ་བཅུད་འདུས་ཚད་ཞེས་པ་ནི་ཏན་རྒྱུ་དང་། དབྱང་ལྔ་ལིན་གཉིས། དབྱང་འགྱུར་ཅཱ་འདུས་བཅས་འདུས་པ་ལ་ཟེར་བས། དེ་མིན་གྱི་རྒྱུ་ཆ་དང་སྐྱེ་ལྡན་རྫས་ལུད་དེའི་ནང་ཚུད་ཀྱི་མེད། གལ་སྲིད་འཚོ་བཅུད་སྣ་ཚོགས་འདུས་པར་སྤྱིའི་འཚོ་བཅུད་བྲིས་པ་ཙམ་གྱིས་ཚད་དང་ལྡན་པ་ཞིག་མིན། མཇུག་ཏུ་བརྒྱུད་འཚོང་བའི་ས་ནས་འཛིན་ཤོག་ལེན་དགོས། དེ་ལྟར་བྱས་ཚེ་རྩོད་གཞི་ཐོན་སྐབས་ཁེ་དབང་ལ་སྲུང་སྐྱོང་བྱེད་བདེ་པོ་ཡོད།

ཚན་རིག་དང་མཐུན་པའི་ངང་ལུད་བརྒྱབ་ནས་འཚོ་བཅུད་སྡེབ་སྦྱོར་ལ་མཐོང་ཆེན་བྱས་ཏེ་གང་ཆད་པ་དེ་གསབ་ནས་འཕྲོ་བརླག་མི་འགྲོ་བ་བྱེད་དགོས། ས་གནས་དེ་གའི་གནམ་གཤིས་ཀྱི་ཆ་རྐྱེན་དང་། ལོ་ཏོག་གི་སྣ་ཁ། ས་རྒྱུའི་ངོ་བོ་སོགས་ལ་གཞིགས་ནས་དེ་འཚམ་གྱི་རྫས་ལུད་སྣ་ཁ་འདེམས་དགོས། དཔེར་ན། ཆུ་ཞིང་ལ་ཟེ་རྒྱུ་དང་ཏན་རྒྱུ་འདུས་པའི་རྫས་ལུད་རབ་བྱུང་ན་སྤྱོད་རྒྱུ་མེད། གང་ལགས་ཤེ་ན། ཟེ་སྐྱུར་ཚ་གསུམ་ནི་ཆུ་དང་འདྲེས་ཚེ་འཚོ་བཅུད་ཤོར་སླ་བས་ཡིན། སྔོ་ཚལ་ལ་ཟེ་རྒྱུ་དང་ཏན་རྒྱུ་འཕྲོད་པོ་ཡོད་པས་ཟེ་རྒྱུ་དང་ཏན་རྒྱུ་ངེས་གཏན་འདུས་པའི་རྫས་ལུད་སྤྱོད་ཆོག སྐྱུར་རྒྱུ་འདུས་པའི་ས་རྒྱུར་བུལ་རྒྱུའི་རྫས་ལུད་སྤྱད་ན་འཚམ་པ་དང་བུལ་འདུས་ས་རྒྱུར་སྐྱུར་བའི་རྫས་ལུད་སྤྱད་ན་འཚམ་པོ་ཡོད།

ལོ་ཏོག་སྐྱེ་འཚར་གྱི་དུས་ཚིགས་མི་འདྲ་བར་འཚོ་བཅུད་ཀྱི་དགོས་མཁོ་ཡང་གཅིག་པ་མིན་པས། རྫས་ལུད་རྒྱག་པའི་དུས་ཚོད་འོས་འཚམ་བདམས་ནས་ལོ་ཏོག་སྐྱེ་འཚར་གྱི་འགག་རྩའི་དུས་སུ་འཚོ་བཅུད་འདང་ངེས་ཡོང་བ་བྱེད་དགོས། དཔེར་ན། དགུན་གྲོར་མྱུ་གུ་འབུས་པ་དང་སྙེ་ཚིགས་ཐོན་རྗེས་སྐྱེ་འཚར་མྱུར་བའི་དུས་སུ་སླེབས་པས། འཚོ་བཅུད་ཀྱི་དགོས་མཁོ་ཆེ་རུ་འགྲོ་གི་ཡོད། དེར་བརྟེན་སྔོ་འབུས་གོང་ཏན་རྒྱུའི་རྫས་ལུད་སྤྱོད་ཚད་ཉུང་དུ་འོས་འཚམ་བཏང་སྟེ“སྔོན་ལ་སྤྱོད་པའི་ཏན་རྒྱུ་རྗེས་ལ་སྤྱོད་པའི”ལག་རྩལ་སྤྱད་ནས་ཐོན་ཚད་མཐོ་རུ་དང་སྤུས་ཚད་ལེགས་སུ་འགྲོ་བར་བྱེད་དགོས།

(རྩོམ་པ་པོ་ནི་རྒྱལ་ཡོངས་ཞིང་ལས་ལག་རྩལ་ཁྱབ་གདལ་ཞབས་ཞུ་ལྟེ་གནས་ཀྱི་དབུ་བཞུགས་རིགས་གཅིག་མཁས་ཅན་ཡིན་པ)