སྔོ་མདོག་གི་དྲོད་ཁང་ཆེ་མོའི་ནང་དཀར་པོ་ཆིག་ཐུབ་ཀྱི་ལྗང་ཕྲུག་མཐེ་བོང་གི་རིང་ཐུང་ཙམ་སྐྱེས་ཡོད་ཅིང་། རྒྱལ་ཡོངས་སྲིད་གྲོས་ཀྱི་ཨུ་ཡོན་ཡན་པན་སློབ་ཆེན་རང་བྱུང་རིག་པའི་སློབ་གླིང་གི་རྫས་འགྱུར་ཚན་ཁག་གི་དགེ་རྒན་ཆེ་མོ་བ་ལི་ཏུང་ཧའོ་ཡིས་དཀར་པོ་ཆིག་ཐུབ་འདེབས་མཁན་ལ“ཅོག་ཝང་ལགས། ཁྱེད་རང་དཀར་པོ་ཆིག་ཐུབ་འདེབས་རྒྱུར་མཁས་པོ་ཡོད་པས། ལོ་དེ་དག་རིང་ཚོང་ཡག་པོ་འདུག་གམ། ནད་འབུའི་གནོད་འཚེ་ཕོག་མ་བྱུང་ངམ”ཞེས་དྲིས།

ཅིས་ལིན་ཞིང་ཆེན་ཁྲང་པའེ་ཧྲན་ས་ཁུལ་ནི་ཀྲུང་གོའི་དཀར་པོ་ཆིག་ཐུབ་ཀྱི་ཐོན་ཁུལ་གཙོ་བོ་ཡིན་མོད། རྒྱུ་རྐྱེན་སྣ་ཚོགས་དབང་གིས་ཡུལ་དེའི་དཀར་པོ་ཆིག་ཐུབ་ལ་རེ་ཞིག་ལ་ཕུག་གི་རིན་གོང་ཙམ་ལས་རག་མེད། ཡན་པན་ཁྲའོ་ཤན་རིགས་རང་སྐྱོང་ཀྲོའུ་ཡི་ས་སྐྱེས་རྡོ་སྐྱེས་ཀྱི་མི་ཞིག་ཡིན་པའི་ངོས་ནས་རྒྱལ་ཡོངས་སྲིད་གྲོས་ཀྱི་ཨུ་ཡོན་གྱི་འགན་འཁུར་ཚུན། ལི་ཏུང་ཧའོ་ཡིས་སྔ་ཕྱི་བར་གསུམ་དུ་དཀར་པོ་ཆིག་ཐུབ་ཀྱི་ཐོན་ལས་འཕེལ་རྒྱས་ལ་དོ་ཁུར་གནང་བཞིན་ཡོད། ཁོང་གིས་ཕུལ་བའི་དཀར་པོ་ཆིག་ཐུབ་ཀྱི་ཐོན་ལས་ལས་སྣོན་ཞིབ་ཚགས་དང་དཀར་པོ་ཆིག་ཐུབ་དེ་འཕྲོད་སྦྱོར་བཟའ་བཅའི་མིང་གཞུང་ནང་འཇུག་པ་སོགས་ཀྱི་གྲོས་གཞིར་འབྲེལ་ཡོད་སྡེ་ཚན་གྱིས་མཐོང་ཆེན་བྱས་པ་རེད།

བརྟག་ཞིབ་གནང་བ་བརྒྱུད། ཁོང་ལ་དཀར་པོ་ཆིག་ཐུབ་ཀྱི་ཐོན་ལས་རྒྱ་སྟོབས་ཆེ་རུ་གཏོང་དགོས་ཚེ། སྲིད་ཇུས་བཟང་པོ་ཁོ་ནས་མི་འགྲིག་པར། ད་དུང་ཕྱོགས་མང་པོའི་ཐད་ནས་མཉམ་ལས་བྱས་ཏེ་ལས་སྣོན་ཞིབ་ཚགས་བྱེད་དགོས་པའི་མྱོང་ཚོར་ཟབ་མོ་བྱུང་བ་རེད།

ལི་ཏུང་ཧའོ་ཡིས་གསར་འགོད་པར་འདི་ལོ་རང་ཉིད་ཀྱིས་ད་དུང་པའེ་ཧྲན་དང་ཐུང་ཧྭ་ས་ཁུལ་སོགས་ཀྱི་དཀར་པོ་ཆིག་ཐུབ་ཐོན་ཁུལ་དུ་མུ་མཐུད་བརྟག་ཞིབ་ཟབ་མོ་བྱེད་པར་འགྲོ་རྩིས་ཡོད། “རྒྱལ་ཡོངས་སྲིད་གྲོས་ཀྱི་ཨུ་ཡོན་ཞིག་ཡིན་པའི་ངོས་ནས་འཐབ་ཕྱོགས་དང་པོར་བསྐྱོད་དེ་ས་གནས་དེ་གའི་ཁྱད་ལྡན་ཐོན་ལས་འཕེལ་རྒྱས་གཏོང་བའི་དཀའ་གནད་སེལ་བ་དང་། ཐོན་ལས་དར་རྒྱས་དང་ས་ཁུལ་འཕེལ་རྒྱས་ཡོང་བར་སྟོབས་ཤུགས་སྐྱེས་སུ་འབུལ་དགོས”ཞེས་གསུངས་པ་རེད།