ད་ལོ་ནི་ཀྲུང་གོ་དང་ཡོ་རོབ་མནའ་འབྲེལ་དབར་ཕྱི་འབྲེལ་བཙུགས་ནས་ལོ་50འཁོར་བའི་ལོ་ཞིག་ཡིན་པ་དང་། འཛིན་སྐྱོང་སྤེལ་གསུམ་བྱེད་པའི་གཙོ་གནད་ལྷུ་ཚིགས་ཡིན་ལ། ཀྲུང་གོ་དང་ཡོ་རོབ་དབར་གྱི་འབྲེལ་བར་བསམ་གཞིག་གཏིང་ཟབ་བྱེད་པའི་དུས་སྐབས་གལ་ཆེན་ཞིག་ཀྱང་རེད། ཉེ་ཆར། ཀྲུང་གོས་ཡོ་རོབ་མནའ་འབྲེལ་གྱི་རྒྱལ་ཁབ་མང་པོ་དང་ཕྱི་འབྲེལ་མཉམ་འགུལ་བྱས་ནས་རྒྱལ་སྤྱིའི་སྤྱི་ཚོགས་ལ་ཐུན་མོང་ཐོག་ཕྱོགས་མང་རིང་ལུགས་ལག་བསྟར་དང་རང་མོས་ཚོང་དོན་ཐུན་མོང་ཐོག་སྲུང་སྐྱོང་བྱེད་པའི་དགེ་མཚན་ལྡན་པའི་བརྡ་རྟགས་བཏང་ཡོད། དེ་ཐོག་ནས་ཀྲུང་གོ་དང་ཡོ་རོབ་ནི་ཡོ་ལང་ཆེ་བའི་འཛམ་གླིང་ཁྲོད་ཀྱི་བརྟན་པོའི་རང་བཞིན་དང་ངེས་གཏན་རང་བཞིན་གྱི་སྟོབས་ཤུགས་སུ་འགྱུར་ཆོག་པ་མཚོན་ཡོད།

ཀྲུང་གོ་ཕྱོགས་ཀྱིས་ཐོག་མཐའ་བར་གསུམ་དུ་འཐབ་ཇུས་ཀྱི་མཐོ་ཚད་དང་ཕུགས་ཀྱི་ཟུར་ཚད་ཐོག་ནས་ཀྲུང་ཡོའི་འབྲེལ་བར་ལྟ་སྟངས་འཛིན་པ་དང་། སྔར་ནས་བཟུང་ཀྲུང་ཡོའི་འབྲེལ་བ་འཕེལ་རྒྱས་གཏོང་རྒྱུ་དེ་ཀྲུང་གོའི་ཕྱི་འབྲེལ་གྱི་སྔོན་ཚུད་ཁ་ཕྱོགས་སུ་བརྩི་གི་ཡོད། ཀྲུང་གོ་དང་ཡོ་རོབ་དབར་ཐུན་མོང་གི་ཁེ་ཕན་རྒྱ་ཁྱབ་ལྡན་པ་དང་མཉམ་ལས་ནི་འགྲན་རྩོད་ལས་ཆེ་བ་དང་ཐུན་མོང་གི་ངོས་འཛིན་ནི་མི་མཐུན་པའི་ཆ་ལས་མང་བ་ཡོད། ཀྲུང་གོ་དང་ཡོ་རོབ་དབར་གྱི་འབྲེལ་བ་འཕེལ་རྒྱས་གཏོང་བའི་འགག་རྩ་ནི་རང་རང་སོ་སོའི་མི་དམངས་ཀྱིས་གདམ་ག་བྱས་པའི་སྤྱི་ཚོགས་ཀྱི་ལམ་ལུགས་དང་འཕེལ་རྒྱས་ཀྱི་འགྲོ་ལམ་ལ་བརྩི་འཇོག་དང་། ཕན་ཚུན་གྱི་ལྟེ་བའི་ཁེ་ཕན་དང་དོ་ཁུར་གལ་ཆེན་ལ་བརྩི་འཇོག་བྱེད་པ་དེ་ཡིན། རྒྱལ་སྤྱིའི་དུས་བབ་ཛ་དྲག་དང་རྙོག་འཛིང་ཇི་ཙམ་ཆེ་བ་ཡོད་ན། ཀྲུང་གོ་དང་ཡོ་རོབ་དབར་ཕྱི་འབྲེལ་འཛུགས་པའི་ཐོག་མའི་བསམ་འདུན་དེ་ཙམ་གྱིས་རྒྱུན་འཁྱོངས་དང་། འཐབ་ཇུས་ཀྱི་འབྲེལ་གཏུག་ལ་ཤུགས་སྣོན། འཐབ་ཇུས་ཀྱི་ཕན་ཚུན་ཡིད་ཆེས་ཟབ་ཏུ་གཏོང་བ། རོགས་ཟླའི་འབྲེལ་བའི་ངེས་གནས་མཐའ་འཁྱོངས་བཅས་བྱེད་དགོས།

ཀྲུང་གོ་དང་ཡོ་རོབ་དབར་རྩ་བའི་ཁེ་ཕན་གྱི་འགལ་ཟླ་མེད་ལ། ས་འབྲེལ་ཆབ་སྲིད་ཀྱི་འགལ་ཟླ་ཡང་མེད་པས། དེ་གཉིས་ནི་ཕན་ཚུན་གྲུབ་འབྲས་གཏོད་པའི་རོགས་ཟླ་རེད། ཕྱོགས་མང་ཚོང་དོན་སྒྲིག་སྲོལ་ཐུན་མོང་ཐོག་སྲུང་སྐྱོང་བྱེད་མཁན་ཞིག་ཡིན་པའི་ངོས་ནས་ཀྲུང་གོ་དང་ཡོ་རོབ་དབར་དཔལ་འབྱོར་མཉམ་གནས་ཀྱི་འབྲེལ་བ་སྟོབས་ལྡན་ཞིག་ཆགས་ཡོད་པས། རང་རང་སོ་སོའི་འཕེལ་རྒྱས་ལ་རམ་འདེགས་བྱེད་པ་དང་ཆབས་ཅིག འཛམ་གླིང་ཞི་བདེ་དང་དར་རྒྱས་ལ་ལེགས་སྐྱེས་གལ་ཆེན་ཕུལ་ཡོད། ཀྲུང་གོ་དང་ཡོ་རོབ་ཕན་ཚུན་དབར་ཚོང་དོན་རོགས་ཟླ་དང་མ་འཇོག་བྱ་ཡུལ་གཙོ་བོ་ཡིན། 2024ལོར་ཀྲུང་གོ་དང་ཡོ་རོབ་དབར་གྱི་ཚོང་དོན་དངུལ་འབོར་ཨ་སྒོར་དུང་ཕྱུར་7858ཟིན་པ་དང་ཕྱོགས་གཉིས་ཀྱི་མ་འཇོག་གི་གསོག་འབོར་ཨ་སྒོར་དུང་ཕྱུར་2600ཟིན་ཡོད།

ཀྲུང་གོ་དང་ཡོ་རོབ་དབར་གྱི་འབྲེལ་བ་ནི་ཨེ་ཤེ་ཡ་དང་ཡོ་རོབ་སྐམ་ས་ཆེན་པོའི་དར་རྒྱས་དང་འཛམ་གླིང་གི་དུས་བབ་བརྟན་ལྷིང་དང་འབྲེལ་བ་ཡོད་པས། ཕྱོགས་གཉིས་པོས་ཐུན་མོང་ཐོག་སྲུང་སྐྱོང་དང་འཕེལ་རྒྱས་ཡག་པོ་གཏོང་དགོས། ཀྲུང་གོ་ནི་སྣེ་མང་མ་ལག་ཁྲོད་ཀྱི་གཏན་འཁེལ་རང་བཞིན་གྱི་རྒྱུ་རྐྱེན་ཡིན་པས། འཛམ་གླིང་གསར་སྒྱུར་ཁྲོད་ཀྱི་དགེ་མཚན་ལྡན་པའི་སྟོབས་ཤུགས་བརྟན་པོ་བྱེད་དགོས། ཀྲུང་གོ་ཕྱོགས་ཀྱིས་ཐོག་མཐའ་བར་གསུམ་དུ་ཡོ་རོབ་ནི་སྣེ་མང་འཛམ་གླིང་ཁྲོད་ཀྱི་སྣེ་མོ་གལ་ཆེན་ཞིག་ཡིན་པའི་ངོས་འཛིན་བྱས་ནས་ཡོ་རོབ་གཞི་གཅིག་ཅན་དང་ཡོ་རོབ་མནའ་འབྲེལ་གྱི་འཐབ་ཇུས་རང་བརྟེན་ལ་རྒྱབ་སྐྱོར་བྱེད་ཀྱི་ཡོད། ཀྲུང་གོ་དང་ཡོ་རོབ་གཉིས་ཀས་མཉམ་འབྲེལ་རྒྱལ་ཚོགས་ཀྱི་རྩ་འཛིན་གྱི་དམིགས་ཡུལ་ལ་བརྩི་འཇོག་དང་། ཕྱོགས་མང་རིང་ལུགས་མཐའ་འཁྱོངས། རང་མོས་ཚོང་དོན་ལ་སྲུང་སྐྱོང་བཅས་བྱས་ནས་དཔུང་ཚོགས་ཁ་གཏད་དུ་ལངས་པར་ངོ་རྒོལ་བྱས་ཏེ་ཕྱོགས་གཉིས་པོས་མཉམ་ལས་བྱེད་པ་ལས་འགྲན་རྩོད་བྱེད་མི་རུང་།

ཀྲུང་ཡོའི་འབྲེལ་བའི་འཕེལ་རྒྱས་ཀྱི་བརྒྱུད་རིམ་ལས་ཕྱོགས་གཉིས་པོས་ཕན་ཚུན་བརྩི་འཇོག་དང་། འདྲ་མཉམ་གྱི་ལྟ་སྟངས་འཛིན་པ། ལྷག་བསམ་ཟོལ་མེད་ཀྱི་སྐད་ཆ་ཤོད་རེས་བཅས་བྱས་ཚེ་མཉམ་ལས་ལ་སྐུལ་འདེད་དང་དོན་ཆེན་སྒྲུབ་ཐུབ་པ་གསལ་བཤད་བྱས་ཡོད། གཡོ་འགུལ་ཆེ་བའི་རྒྱལ་སྤྱིའི་དུས་བབ་དང་རྫོགས་མཐའ་མེད་པའི་གོ་ལ་ཧྲིལ་པོའི་རང་བཞིན་གྱི་འགྲན་སློང་གི་མདུན་དུ་ཀྲུང་གོ་དང་ཡོ་རོབ་ཀྱིས་བློ་རྩ་བརྟན་པོས་ལོ་རྒྱུས་ཀྱི་ཡང་དག་པའི་ཕྱོགས་དང་མིའི་རིགས་ཀྱི་ཤེས་དཔལ་ཡར་ཐོན་གྱི་ཕྱོགས་སུ་ལངས་ནས་ལོ་རྒྱུས་ཀྱི་འགན་འཁྲི་དཔའ་ངར་ཆེན་པོས་དང་དུ་ལེན་དགོས། ཕྱོགས་གཉིས་པོས་རོགས་ཟླའི་འབྲེལ་བའི་ངེས་གནས་གཏན་འཁེལ་དང་། སྐད་ཆ་ཤོད་རེས་དང་མཉམ་ལས་ཀྱི་གཙོ་ཁྲིད་སྟོན་ཕྱོགས་མཐའ་འཁྱོངས། གཉིས་ཁེ་གཉིས་ཕན་གྱི་རྩ་བའི་དགོངས་གཞི་སྟངས་འཛིན་བཅས་བྱས་ཏེ། ཕན་ཚུན་བརྩི་འཇོག་དང་། ཕན་ཚུན་ཡིད་ཆེས། ཡུན་རིང་བརྟན་ལྷིང་བཅས་ཀྱི་འཐབ་ཇུས་རོགས་ཟླ་མུ་མཐུད་བྱས་ནས་ལག་གདང་སྦྲེལ་ཏེ་འཛམ་གླིང་ཞི་བདེ་དང་། བདེ་འཇགས། དར་རྒྱས། ཡར་ཐོན་བཅས་ཀྱི་འོད་ཟེར་སྟོང་ལྡན་གྱི་ཕྱོགས་སུ་སྐྱོད་པར་སྐུལ་འདེད་གཏོང་དགོས།