གཞི་རིམ་གྱི་ཁུར་པོ་ཡང་དུ་གཏོང་རྒྱུ་ནི་བཅོས་སྐྱོང་ཆེད་ནུས་པ་འདོན་པ་དང་དངོས་སྒྲུབ་མཁན་ལ་རྒྱབ་རྩ་བྱ་རྒྱུ་དེ་ཡིན། སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས“ཕྱི་ཚུལ་རིང་ལུགས་རྒྱུན་མཐུད་ངང་བཅོས་སྒྲིག་གཏིང་ཟབ་བྱས་ནས་གཞི་རིམ་གྱི་ཁུར་པོ་ཡང་དུ་གཏོང་དགོས”ཞེས་ནན་བཤད་གནང་ཡོད། ཀྲུང་དབྱང་རིམ་པའི་ཕྱི་ཚུལ་རིང་ལུགས་བཅོས་སྒྲིག་བྱས་ནས་གཞི་རིམ་གྱི་ཁུར་པོ་ཡང་དུ་གཏོང་བའི་ཆེད་དོན་ལས་དོན་ལམ་སྲོལ་ཚོགས་འདུའི་ཐོག“འབྱུང་རྩ་ནས་བཅོས་སྐྱོང་བྱ་རྒྱུར་དེ་བས་གཙིགས་ཆེན་བྱས་ཏེ་མངོན་གསལ་དོད་པའི་གནད་དོན་ལ་དམིགས་ནས་རྩ་བཅོས་བྱེད་དགོས་ལ། བསམ་བློ་དང་ཁེ་ཕན་གྱི་འབྱུང་རྩ་ནས་རྩ་བཅོས་བྱས་ཏེ་གཏུགས་ཕོད་པ་དང་དངོས་འཛིན་དངོས་སྒྲུབ་བྱེད་དགོས”ཞེས་བཏོན་ཡོད།

ས་གནས་ཁག་གིས་རྒྱུན་སྲིང་ལྷོད་མེད་ངང་སྤྱོད་ཚུལ་ལ་དམ་འཛིན་དང་ཕྱི་ཚུལ་རིང་ལུགས་བཅོས་སྒྲིག་བྱས་ནས་གཞི་རིམ་གྱི་ཁུར་པོ་ཡང་དུ་གཏོང་བའི་གཡུར་ཟའི་གྲུབ་འབྲས་དང་ངོ་བོའི་འཕེལ་རིམ་རྒྱུན་ཆད་མེད་པར་ཟབ་ཏུ་བཏང་སྟེ། རྒྱ་ཆེའི་ཏང་ཡོན་ལས་བྱེད་པའི་ཐེག་པ་འཁུར་ལེན་དང་ལས་སྒྲུབ་ལས་གཏོད་ཀྱི་ནང་སྐྱེས་སྒུལ་ཤུགས་སྔར་བས་སྐུལ་སློང་བྱས་ཡོད།

འགན་འཁྲི་ཁ་གསལ་བཟོས་ཏེ་འབྱུང་རྩ་ནས་འགན་འཁྲིའི་འཁོར་འབྲེལ་ནན་དུ་བཏང་བ།

ཧུའུ་ནན་ཡོན་ཅང་གྲོང་ཁྱེར་ཚའོ་ཝུའེ་གྲོང་རྡལ་ལིས་ཤིན་གྲོང་ཚོའི་ལས་བྱེད་པ་ཀུའོ་ལང་ཆིང་གིས“མང་ཚོགས་ཁྱིམ་དུ་བསྐྱོད་མང་བ་དང་ཅི་འཕྲོས་མོལ་འཕྲོས་བྱས་ནས་མང་ཚོགས་ཀྱི་གནད་དོན་མང་པོ་ཐག་གཅོད་ཐུབ་པས་ང་ཚོའི་སྤོབས་སེམས་ཆེ་རུ་ཕྱིན་སོང”ཞེས་བཤད།

ཧུའུ་ནན་ཞིང་ཆེན་གྱི《གྲོང་ཚོ་རིམ་པའི་རྩ་འཛུགས་ལས་དོན་དང་། ལམ་སྲོལ་བྱང་བུ། ངོ་སྤྲོད་ཡི་གེའི་དོན་ཚན་བཅས་ཚད་ལྡན་དུ་གཏོང་རྒྱུའི་སྐོར་གྱི་བྱེད་ཐབས་འགའ་ཞིག》དོན་ཐོག་ཏུ་འཁྱོལ་རྗེས“གྲོང་ཚོའི་ནང་བྱ་བ་གང་ཞིག་སྒྲུབ་དགོས་པ་དང་བྱ་བ་གང་ཞིག་སྒྲུབ་མི་རུང་བ་ཁ་གསལ་བྱུང་ཡོད”ཅེས་ཀུའོ་ལང་ཆིང་གིས་བཤད། མིག་སྔར། ཡོན་ཅང་གྲོང་ཁྱེར་གྱིས་གཞི་རིམ་རང་སྐྱོང་རྩ་འཛུགས་ཀྱི་ལས་ཀའི་དོན་ཚན་60དང་གཞོགས་འདེགས་ལས་དོན་ཁག་29ཁ་གསལ་བཟོས་པ་དང་། གྲོང་ཚོ་རིམ་པའི་རྩ་འཛུགས་ཀྱིས་ངོ་སྤྲོད་ཡི་གེ་ཁག་36འབྲི་མི་ཆོག་པ་ཁ་གསལ་བཟོས་ཡོད། གྲོང་ཁྱེར་ཡོངས་སུ་གཞི་རིམ་གྱི་ཁུར་པོ་ཡང་དུ་གཏོང་བའི་ལྟ་ཞིབ་ཚད་ལེན་ས་ཚིགས་38བཙུགས་ཏེ་ཚེག་ནས་ཚེག་ལ་དག་ཐེར་བཅོས་སྒྲིག་བྱ་རྒྱུར་སྐུལ་འདེད་བཏང་ཡོད།

ཆུས་ཀྲོའུ་གྲོང་ཨུད་ཀྱི་ཧྲུའུ་ཅི་གཞོན་པ་ཏུའུ་ཤིན་ལིན་གྱིས་གོང་འོག་ཚང་མ་རྡོག་རྩ་གཅིག་ཏུ་སྒྲིལ་དགོས་ཞེས་བཤད། ཆུས་ཀྲོའུ་གྲོང་ཁྱེར་གྱི“དམངས་གསུམ་འདུ་འགོད”ལས་སྟེགས་ན་ནིང་ཟླ་6པར་སྤྱོད་འགོ་ཚུགས་རྗེས་གྲོང་ཚོ་དང་སྡེ་ཁུལ་གྱི་དྲ་མིག་གིས་འཁུར་བའི་ལས་འགན་ཆ་སྙོམས་1/3ཙམ་ཉུང་དུ་ཕྱིན་ཡོད།

གོ་རིམ་ལམ་སྲོལ་ཁུ་བསྡུ་བྱས་ནས“མཛུབ་རྩེའི་ཕྱི་ཚུལ་རིང་ལུགས”བཅོས་སྒྲིག་བྱས་པ།

ཀན་སུའུ་ཏིང་ཤིས་གྲོང་ཁྱེར་ཨན་ཏིང་ཆུས་ཆིང་ལན་ཧྲན་ཤང་གི་ལས་དོན་པ་ཧན་མེ་དབྱིན་གྱིས་གྲོང་མི་དང་ཅི་འཕྲོས་མོལ་འཕྲོས་བྱེད་སྐབས་ཧན་མེ་དབྱིན་གྱིས“ད་ལྟ་གཟའ་འཁོར་རེར་ཉིན་གསུམ་བཞི་དུད་ཚང་ཁག་ཏུ་འཚམས་འདྲི་བྱེད་ཆོག”ཅེས་བཤད།

ཨན་ཏིང་ཆུས་ཀྱིས་སྲིད་དོན་ཉེར་སྤྱོད་ཀྱི་བྱ་རིམ་དང་། སྲིད་དོན་སྤྱི་དམངས་ཀྱི་གསལ་ཐོ། ལས་ཀའི་ཚོགས་པ་བཅས་ལ་ཕྱོགས་ཡོངས་ནས་མཐིལ་རྟོགས་ཞིབ་དཔྱད་བྱས་ཏེ་སྐར་གསོག་མིང་གྲལ་དང་དེ་བཞིན་མིང་གྲལ་སྣ་ཚོགས་4མེད་པ་བཟོས་པ་དང་། སྲིད་དོན་སྤྱི་དམངས་གསལ་ཐོ་4དང་ལས་དོན་ཚོགས་པ་528མེད་པ་བཟོས་ཡོད།

2023ལོ་ཚུན། “རེའུ་མིག་གཅིག་ཀུན་གྲོལ”གྱི་རིག་ནུས་རེའུ་མིག་ཁྲུང་ཆིང་གྲོང་ཁྱེར་རིམ་པའི་སྡེ་ཚན་དང་། ཆུས་དང་རྫོང་། གྲོང་རྡལ་དང་ཁྲོམ་གཞུང་། གྲོང་ཚོ་དང་སྡེ་ཁུལ་བཅས་རིམ་པ་བཞིར་རིམ་བཞིན་སྤྱོད་འགོ་ཚུགས་པས་གཞི་རིམ་གྱི་རེའུ་མིག་གི་གྲངས་འབོར་དང་། རེའུ་མིག་ཐག་གཅོད་བྱེད་པའི་དུས་ཚོད། རེའུ་མིག་གི་ལས་དོན་པའི་གྲངས་འབོར་བཅས་ཆ་སྙོམས་60%ཡན་ཉུང་དུ་ཕྱིན་ཡོད།

དཔྱད་ཞིབ་གདེང་འཇོག་ལེགས་སུ་བཏང་ནས་ཡང་དག་པའི་སྲིད་དོན་ལས་རྗེས་ཀྱི་ལྟ་བ་འཛུཌ་པ་དང་ལག་ལེན་བསྟར་བ།

དཔྱད་ཞིབ་ཉུང་དུ་བཏང་ནས་ལས་སྒྲུབ་ལས་གཏོད་ཀྱི་སྒུལ་ཤུགས་འཕེལ་བར་བྱས་ཤིང་། “གྲོང་རྡལ་ཁྲོམ་གཞུང་ལ་དཔྱད་ཞིབ་བྱ་རྒྱུར་མི་འཚམ་པའི་རིགས་ཆེན་པོ་ལྔ་དང་རྣམ་གྲངས་15བསྡུ་སྒྲིལ་དང་ཉུང་དུ་བཏང་བར་བརྟེན། དེ་སྔའི་དཔལ་འབྱོར་འཕེལ་རྒྱས་དཔྱད་ཞིབ་རྣམ་གྲངས་61ནས་37བར་ཉུང་དུ་ཕྱིན་ཡོད” ཏུང་ཀང་ཆུས་ཨུད་རྩ་འཛུགས་པུའུ་ཡི་པུའུ་ཀྲང་ལི་མན་ཧྲེང་གིས“འཕྲི་ཐབས་ཀྱི་བྱེད་ཐབས་སྤྱོད་དགོས་ལ། སྣོན་ཐབས་ཀྱི་བྱེད་ཐབས་ཀྱང་སྤྱོད་དགོས། ལས་ཀའི་གྲུབ་འབྲས་མངོན་གསལ་དོད་པའི་གྲོང་རྡལ་ཁྲོམ་གཞུང་ལ་དཔྱད་ཞིབ་བྱེད་སྐབས་གཟེངས་བསྟོད་བྱས་ཏེ་དངོས་སྒྲུབ་བྱེད་མཁན་ལ་སྐུལ་ལྕག་བྱེད་པ་དང་ཕན་འབྲས་ལ་མཐོང་ཆེན་བྱེད་པའི་དཔྱད་ཞིབ་ཀྱི་ཕྱོགས་སྟོན་ཆགས་པར་བྱེད་དགོས”ཞེས་བཤད།

ཡུན་ནན་ཁུན་མིང་གྲོང་ཁྱེར་ཀོན་ཏུའུ་ཆུས་ཅིན་མ་ཁྲོམ་གཞུང་ཏུང་ཧྭ་ལམ་སྡེ་ཁུལ་དུ་དྲ་མིག་ལས་དོན་པ་ལིའུ་དབྱིན་གྱིས་མི་ཧྲེང་རྒན་རྒོན་ཚོར་ལྟོ་སྐྱེལ་བཞིན་འདུག ལིའུ་དབྱིན་གྱིས“ཐོ་དེབ་ཁྱེར་ནས་ཉིན་ལྟར་ལྟོ་སྐྱེལ་བར་འགྲོ་གི་ཡོད”ཅེས་བརྗོད་བྱུང་།

འདི་ལོའི་ཟླ་དང་པོར་ཀོན་ཏུའུ་ཆུས་ཀྱི་འབྲེལ་ཡོད་སྡེ་ཚན་དང་ཅིན་མ་ཁྲོམ་གཞུང་ལས་གྲུབ་པའི་མཉམ་འབྲེལ་ཞིབ་བཤེར་ཚོགས་ཆུང་གིས་བདེ་འཇགས་ཐོན་སྐྱེད་ལ་ཞིབ་བཤེར་བྱས་པ་དང་གནད་དོན་གྱི་གསལ་ཐོ་དང་བསྡུར་ནས་ས་གནས་ས་ཐོག་ཏུ་བཅོས་སྒྲིག་བྱས་ཚུལ་ལ་ལྟ་ཞིབ་བྱས་ཤིང་། ཀོན་ཏུའུ་ཆུས་ཨུད་རྩ་འཛུགས་པུའུ་ཡི་པུའུ་དོན་ཨུ་ཡོན་ལིའུ་ཆང་གིས“ད་ཆ་གཟུགས་པོར་བརྟག་དཔྱད་བྱེད་པ་ལྟར་དཔྱད་ཞིབ་བྱེད་ཀྱི་ཡོད་པས་ལས་ཀ་ཏན་ཏིག་སྒྲུབ་མིན་གསལ་པོ་ཤེས་ཐུབ”ཅེས་བརྗོད་བྱུང་།

ཉེ་བའི་ལོ་ཤས་རིང་། ཡུན་ནན་གྱི་ཕྱོགས་བསྡུས་གྲུབ་འབྲས་དཔྱད་ཞིབ་དང་ཆེད་དོན་དཔྱད་ཞིབ་སོགས་རིམ་པ་ཁག་གི་དམིགས་ཚད་ཆེས་ཆེར་ཉུང་དུ་ཕྱིན་ཞིང་། མིག་སྔའི་བར། ཡུན་ནན་གྱི་ཞིང་ཆེན་རིམ་པའི་དཔྱད་ཞིབ་དོན་ཚན་དུས་མཚུངས་ལས་67.24%ཉུང་དུ་ཕྱིན་པ་དང་དཔྱད་ཞིབ་དམིགས་ཚད་དུས་མཚུངས་ལས་83.04%ཉུང་དུ་ཕྱིན་ཡོད།