ས་གནས་ཁག་གི་མཐོ་སློབ་གཅིག་རྗེས་གཉིས་མཐུད་ངང་སློབ་འགོ་ཚུགས་ཤིང་། སློབ་མ་དང་ཁྱིམ་བདག་ཁག་གཅིག་གིས་སློབ་དུས་གསར་པར་སྦྱངས་ཐོན་གཟིགས་བཟོས་དང་སློབ་ཞུགས་རོགས་དངུལ་སྲིད་ཇུས་ལ་འགྱུར་ལྡོག་གང་ཡོད་མེད་སྐོར་ལ་དོ་ཁུར་ཆེན་པོ་བྱེད་ཀྱི་ཡོད། དེ་དང་ཆབས་ཅིག་སློབ་རིམ་གཞན་དག་གི་སྦྱངས་ཐོན་གཟིགས་བཟོས་དང་སློབ་ཞུགས་རོགས་དངུལ་ལ་ལེགས་སྒྲིག་བྱས་ཡོད་མེད་དང་རེ་ཞུ་བྱེད་མཁན་རིགས་གང་དག་ལ་ཕན་པ་ཐོབ་མིན་སྐོར་ལ་སློབ་གསོ་པུའུ་ནོར་དོན་སིའི་འབྲེལ་ཡོད་འགན་འཁུར་བས་འདི་ག་ཚགས་པར་གྱི་གསར་འགོད་པའི་བཅར་འདྲི་དང་ལེན་བྱས་པ་རེད།

དྲི་བ། ཞིབ་འཇུག་སློབ་མའི་གསོ་སྐྱོང་གཞི་ཁྱོན་ཆེ་རུ་ཕྱིན་ཚེ་སྦྱངས་ཐོན་གཟིགས་བཟོས་ཀྱི་རྒྱབ་སྐྱོར་བྱེད་ཤུགས་དེ་རྩིས་ཀྱི་ཆེ་རུ་འགྲོ་སྲིད་དམ།

དྲིས་ལན། ཉེ་བའི་ལོ་ཤས་རིང་། སྤྱི་ཚོགས་དང་དཔལ་འབྱོར་འཕེལ་རྒྱས་ཀྱི་ཆུ་ཚད་མཐོ་རུ་དང་སློབ་གྲྭར་འགྲོ་མུས་ཀྱི་ཞིབ་འཇུག་སློབ་མའི་མི་གྲངས་མང་དུ་ཕྱིན་པ་དང་བསྟུན་ནས། ས་གནས་དང་སློབ་གྲྭ་ཁག་གཅིག་གིས་ཞིབ་འཇུག་སློབ་མ་དང་འབྲེལ་བ་ཡོད་པའི་རྒྱལ་ཁབ་ཀྱི་སྦྱངས་ཐོན་གཟིགས་བཟོས་ཀྱི་བྱ་དགའ་སྤྲོད་པའི་མི་གྲངས་དེ་དང་བསྟུན་ནས་མང་དུ་དང་ཚད་གཞི་འོས་འཚམ་མཐོ་རུ་གཏོང་རྒྱུའི་སྐོར་གོང་ཞུ་བྱས་ཡོད།

ནོར་སྲིད་དང་། སློབ་གསོ། མི་སྤྱི་བཅས་སྡེ་ཚན་གསུམ་གྱིས་2024ལོའི་ཟླ་10པར《མཐོ་རིམ་སློབ་གསོའི་དུས་མཚམས་དང་མཐོ་རིམ་སློབ་འབྲིང་དུས་མཚམས་ཀྱི་རྒྱལ་ཁབ་ཀྱི་སྦྱངས་ཐོན་གཟིགས་བཟོས་དང་སློབ་ཞུགས་རོགས་དངུལ་སྲིད་ཇུས་ལེགས་སྒྲིག་བྱ་རྒྱུའི་སྐོར་གྱི་བརྡ་ཐོ》བཀྲམ་ནས་དེའི་ཐད་ལེགས་སུ་དང་འཐུས་སྒོ་ཚང་དུ་བཏང་ཡོད་པ་སྟེ།

—— ཚད་གཞི་མཐོ་རུ་བཏང་ཞིང་། 2025ལོ་ནས་བཟུང་། ཀྲུང་དབྱང་མཐོ་སློབ་ཀྱི་ཞིབ་འཇུག་སློབ་མའི་སྦྱངས་ཐོན་གཟིགས་བཟོས་ཐད་ཀྲུང་དབྱང་ནོར་སྲིད་ཀྱི་རྒྱབ་སྐྱོར་ཚད་གཞི་མཐོ་རུ་བཏང་བ་དང་། དེའི་ནང་ཤེས་རམས་པ་རེར་ལོ་རེར་སྒོར་8000ནས་སྒོར་ཁྲི་1བར་མཐོ་རུ་བཏང་བ་དང་འབུམ་རམས་པ་རེར་ལོ་རེར་སྒོར་ཁྲི་1ནས་སྒོར་ཁྲི་1.2བར་མཐོ་རུ་བཏང་ཡོད། ད་ལོའི་དཔྱིད་དུས་ཀྱི་སློབ་འགོ་ཚུགས་པ་ནས་བཟུང་ཀྲུང་དབྱང་མཐོ་སློབ་ཏུ་ལེགས་སྒྲིག་བྱས་པ་དེ་དག་ལག་ལེན་བསྟར་རྒྱུ་རེད།

—— མི་གྲངས་མང་དུ་བཏང་ཞིང་། ཞིབ་འཇུག་སློབ་མའི་རྒྱལ་ཁབ་ཀྱི་སྦྱངས་ཐོན་གཟིགས་བཟོས་ཀྱི་བྱ་དགའ་སྤྲོད་པའི་མི་གྲངས་ལོ་རེར་ཁྲི་4.5ནས་ཁྲི་9བར་མང་དུ་ཕྱིན་ཡོད། དེའི་ནང་ཤེས་རམས་པ་ཁྲི་3.5ནས་ཁྲི་7བར་མང་དུ་ཕྱིན་པ་དང་འབུམ་རམས་པ་ཁྲི་1ནས་ཁྲི་2བར་མང་དུ་ཕྱིན་ཡོད། 2024ལོའི་སྟོན་ཁའི་སློབ་དུས་ནས་ལེགས་སྒྲིག་བྱས་པ་དེ་དག་ལག་བསྟར་བྱེད་རྒྱུ་རེད།

དྲི་བ། ཞིབ་འཇུག་སློབ་མ་ཕུད། སློབ་དུས་གསར་པར་ད་དུང་ཚོགས་པ་གང་དག་གི་སྦྱངས་ཐོན་གཟིགས་བཟོས་དང་སློབ་ཞུགས་རོགས་དངུལ་ལ་འགྱུར་ལྡོག་བྱུང་ཡོད་དམ།

དྲིས་ལན། དམངས་འཚོའི་དགོས་མཁོ་སྐོང་རྒྱུར་བསམ་གཞིག་བྱས་ནས་བརྡ་ཐོ་གཞིར་བཟུང་། ད་ལོའི་དཔྱིད་དུས་ཀྱི་སློབ་འགོ་ཚུགས་པ་ནས་བཟུང་མཐོ་རིམ་སློབ་འབྲིང་དཀྱུས་མའི་རྒྱལ་ཁབ་ཀྱི་སློབ་ཞུགས་རོགས་དངུལ་གྱི་རོགས་སྐྱོར་ཚད་གཞི་མཐོ་རུ་གཏོང་རྒྱུ་དང་འབྲིང་རིམ་ལས་རིགས་སློབ་གྲྭའི་རྒྱལ་ཁབ་ཀྱི་སློབ་ཞུགས་རོགས་དངུལ་གྱི་ཁྱབ་རྒྱ་ཆེ་རུ་གཏོང་རྒྱུ་རེད།

—— མཐོ་རིམ་སློབ་འབྲིང་དཀྱུས་མའི་རྒྱལ་ཁབ་ཀྱི་སློབ་ཞུགས་རོགས་དངུལ་གྱི་ཆ་སྙོམས་རོགས་སྐྱོར་ཚད་གཞི་དེ་སློབ་མ་རེར་ལོ་རེར་སྒོར་2000ནས་སྒོར་2300བར་མཐོ་རུ་གཏོང་རྒྱུ་དང་། ཞིབ་ཕྲའི་ཚད་གཞི་ས་གནས་ཁག་གིས་དོན་དངོས་དང་ཟུང་འབྲེལ་བྱས་ཏེ་སྒོར་1200ནས་སྒོར་3500བར་གྱི་ཁྱབ་ཁོངས་ནང་གཏན་འཁེལ་བྱེད་པ་དང་དེ་རིམ་པ་2ནས་3བར་དབྱེ་ཆོག

—— འབྲིང་རིམ་ལས་རིགས་སློབ་གྲྭའི(ལག་ཤེས་པའི་སློབ་གྲྭ་ཚུད)རྒྱལ་ཁབ་ཀྱི་སློབ་སྐྱོར་རོགས་དངུལ་དེ་མཐོ་རིམ་སློབ་འབྲིང་དཀྱུས་མ་དང་འདྲ་བར་ཆ་སྙོམས་རོགས་སྐྱོར་ཚད་གཞི་སློབ་མ་རེར་ལོ་རེར་སྒོར་2000ནས་སྒོར་2300བར་མཐོ་རུ་བཏང་བ་མ་ཟད། ད་དུང་ཁྱབ་རྒྱ་ཆེ་རུ་བཏང་ཡོད། དེ་སྔའི་ཉིན་གང་ལམ་ལུགས་ཀྱི་སློབ་རྒྱུས་སློབ་གསོའི་དངོས་གཞིའི་སློབ་ཐེམ་གྱི་ལོ་རིམ་དང་པོ་དང་གཉིས་པའི་ཆེད་ལས་ཞིང་ལས་དང་འབྲེལ་བ་ཡོད་པའི་སློབ་མ་དང་ཆེད་ལས་ཞིང་ལས་དང་འབྲེལ་བ་མེད་པའི་ཁྱིམ་ཚང་གི་འཁོས་ཀ་ཞན་པའི་སློབ་མར་རོགས་སྐྱོར་བྱེད་པའི་རྨང་གཞིའི་ཐོག་ལོ་རིམ་གསུམ་པ་རོགས་སྐྱོར་ཁྱབ་ཁོངས་ནང་བཅུག་པ་རེད།

—— དེ་དང་ཆབས་ཅིག་ལིའུ་ཕན་ཧྲན་རི་ཁུལ་སོགས་དེ་སྔའི་ཡུག་འབྲེལ་དམིགས་བསལ་དབུལ་ཕོངས་ས་ཁུལ་11དང་། བོད་ལྗོངས། ཞིང་ཆེན་བཞིའི་བོད་འབྲེལ་གྱི་ཀྲོའུ་དང་རྫོང་། ཤིན་ཅང་ལྷོ་རྒྱུད་བཅས་ས་ཁུལ་དང་ཀྲོའུ་བཞིའི་འབྲིང་རིམ་ལས་རིགས་སློབ་གྲྭའི་ལོ་རིམ་གསུམ་པའི་གྲོང་གསེབ་སློབ་མ(རྫོང་གྲོང་ཚུད་མེད)ཚང་མ་རྒྱལ་ཁབ་ཀྱི་སློབ་སྐྱོར་རོགས་དངུལ་གྱི་རོགས་སྐྱོར་ཁྱབ་ཁོངས་ནང་བཅུག་ཡོད།

ལེགས་སྒྲིག་བྱས་པ་དེ་དག་སློབ་མ་དང་སློབ་གྲྭའི་དགོས་མཁོ་དངོས་དང་སྔར་བས་འཚམ་པས། ཁྱིམ་ཚང་གི་འཁོས་ཀ་ཞན་པའི་སློབ་མའི་དཔལ་འབྱོར་གྱི་གནོན་ཤུགས་སྔར་བས་ཆུང་དུ་གཏོང་ཐུབ་པ་དང་ཁོང་ཚོ་བདེ་བླག་ངང་སློབ་གྲྭར་ཞུགས་པ་དང་བློ་བདེ་པོས་སློབ་སྦྱོང་བྱེད་པར་འགན་སྲུང་ཐུབ་པ་མ་ཟད། ཁོང་ཚོར་སྦྱངས་པར་གྲུབ་འབྲས་ཐོབ་པ་དང་ཕྱོགས་ཡོངས་ནས་འཕེལ་རྒྱས་ཡོང་བར་སྐུལ་ལྕག་ཀྱང་གཏོང་ཐུབ།

དྲི་བ། སློབ་དུས་གསར་པར་འབྲེལ་ཡོད་སྲིད་ཇུས་དོན་འཁྱོལ་བྱེད་པར་སྐུལ་འདེད་ཇི་ལྟར་གཏོང་དགོས་སམ།

དྲིས་ལན། ཕྱོགས་གཅིག་ནས་ནོར་སྲིད་དང་། སློབ་གསོ། མི་སྤྱི་བཅས་སྡེ་ཚན་གསུམ་གྱིས་ས་གནས་ཁག་ལ་མ་དངུལ་སྤྱི་འདོམས་བཀོད་སྒྲིག་བྱེད་པར་སྐུལ་འདེད་གཏོང་བ་དང་། དུས་ཐོག་ཏུ་གཤམ་སྤྲོད་ཀྱི་སྔོན་རྩིས་བརྒྱབ་སྟེ་མ་དངུལ་བེད་སྤྱོད་དང་སྲིད་ཇུས་ལག་ལེན་བསྟར་ཚུལ་ལ་ལྟ་འདོམས་བྱེད་དགོས།

ཕྱོགས་གཞན་ཞིག་ནས་གསོ་སྦྱོང་དང་མཛུབ་ཁྲིད་ལ་ཤུགས་སྣོན་རྒྱག་རྒྱུ་ཡིན་ཞིང་། སྡེ་ཚན་གསུམ་གྱིས་ས་གནས་ཁག་གི་སློབ་གྲྭ་ཁག་ལ་ཕྱོགས་ནས་ལས་སྒོའི་གསོ་སྦྱོང་རྒྱ་ཁྱབ་ངང་སྤེལ་རྒྱུ་དང་། སྲིད་ཇུས་གསོ་སྦྱོང་གི་ཐབས་ལམ་རྒྱ་སྐྱེད་གཏོང་བ། སྲིད་ཇུས་ཀྱི་ནང་དོན་གསལ་འགྲེལ་ཞིབ་ཕྲ་རྒྱག་པ་བཅས་བྱས་ཏེ་སྲིད་ཇུས་ལག་བསྟར་ཚད་ལྡན་གནད་སྨིན་ཡོང་རྒྱུར་འགན་ལེན་བྱེད་པ་དང་། ལེགས་ཐོན་ཅན་ལ་བྱ་དགའ་སྤྲོད་པ་དང་དཀའ་ངལ་ཅན་ལ་རོགས་སྐྱོར་བྱེད་པའི་གནད་འཁེལ་རང་བཞིན་རྒྱུན་ཆད་མེད་པར་མཐོ་རུ་གཏོང་བ། སློབ་གསོ་དྲང་གཞག་ལ་སྔར་བས་སྐུལ་འདེད་ནུས་ལྡན་གཏོང་བ་བཅས་བྱས་ནས་སྲིད་ཇུས་བཟང་པོས་རྒྱ་ཆེའི་སློབ་མར་དུས་ཐོག་ཏུ་ཕན་འདོགས་རྒྱུ་རེད།